1, 2. Ino Jehova watuyiisya buti kutondezya luyando kulinguwe?

NZILA yiinda kubota usyi mbwakonzya kuyiisya bana nkwiinda mukuba cikozyanyo cibotu kulimbabo. Ciindi natondezya luyando kubana bakwe, ubayiisya nzila yakutondezya luyando kuli bamwi. Taakwe muntu naba omwe iwakatuyanda kale mbuli mbwatuyanda Taateesu, Jehova. Aboobo, tulaiya mbotukonzya kutondezya luyando “nkaambo walo nguwakasaanguna kutuyanda.”—1Joh. 4:19.

² Muunzila nzi Jehova mwaatondezya kuti “nguwakasaanguna kutuyanda”? Bbaibbele lyaamba kuti: “Notwakacili basizibi, Kristo wakatufwida.” (Rom. 5:8) Taateesu siluyando, Jehova, wakapa Mwanaakwe kuti cibe cinunuzyo kutegwa atuvwune kucibi alimwi alufwu. Cipego eeci citaliboteli cakapa kuti cikonzyeke kulindiswe kuba acilongwe a Jehova alimwi akuti tutondezye luyando lwesu kulinguwe. Kwiinda mukupa cituuzyo eeci cipati, Jehova wakatupa cikozyanyo cibotu. Wakatuyiisya kuti tweelede kutondezya luyando kuzwa ansi aamoyo alimwi akuti tweelede kuba baabi.—1Joh. 4:10.

3, 4. Mbuti mbotutondezya kuti tulamuyanda Leza?

³ Luyando mbobube bulibonya kapati muli Jehova. Aboobo, tulakonzya kumvwisya icakapa Jesu kwaamba kuti mulawo mupati kwiinda yoonse ngwakuti: “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.” (Mk. 12:30) Jehova uyanda kuti tumuyande ‘amoyo wesu woonse.’ Cilakonzya kumucisa Jehova ikuti twayanda kapati muntu umwi naa cintu cimwi kwiinda nguwe. Pele luyando lwesu kulinguwe talweelede kujatikizya buyo mbotulimvwa. Jehova alimwi uyanda kuti tumuyande ‘amizeezo yesu yoonse’ alimwi ‘anguzu zyesu zyoonse.’ Eeci caamba kuti tweelede kumuyanda muzintu zyoonse nzyotuyeeya alimwi anzyotucita.—Amubale Mika 6:8.

⁴ Aboobo, tweelede kumuyanda Jehova cakumaninina alimwi azintu zyoonse nzyotujisi. Kwiinda mukumubikka mubusena bwakusaanguna mubuumi bwesu, tutondezya kuti tulamuyanda ncobeni. Mucibalo cainda, twakalanga-langa nzila zyone Jehova mbwatondezya luyando lwakwe lupati kubana bakwe. Lino atubone mbotukonzya kukomezya luyando lwesu kuli Jehova alimwi ambotukonzya kutondezya kuti tulamuyanda.

5. Ciindi notuyeeya zintu zyoonse Jehova nzyaatucitila, ncinzi andiswe ncotuyanda kucita?

⁵ Ikuti muntu umwi wamupa cipego, cakutadooneka mulangilwa kumulumba muntu ooyo. Alimwi akaambo kakuti mulaciyanda cipego eeco, mulacibelesya. Jakobo wakalemba kuti: “Cipego cibotu cili coonse alimwi acipego cilondokede cili coonse zizwa kujulu, zilaseluka kuzwa kuli Taata wamimuni yakujulu ooyo uutasanduki naa kucinca mbuli zimvwule zicinca-cinca.” (Jak. 1:17) Tulamulumba kapati Jehova akaambo kakuti ulatupa zintu zyoonse nzyotuyandika kutegwa tupone alimwi akukkomana. Tulizyi mbwatuyanda kapati, alimwi tuyanda kumutondezya kuti andiswe tulamuyanda. Sena oobo mbomulimvwa?

6. Ncinzi bana Israyeli ncobakali kuyandika kucita ikuti nobakali kuyanda kuti Jehova azumanane kubalongezya?

⁶ Bana Israyeli bakatambula zintu zibotu zinji kuzwa kuli Jehova. Kwamyaanda yamyaka, wakabasololela amilawo yakwe alimwi akubapa zintu zyoonse nzyobakali kuyandika kutegwa bapone. (Dt. 4:7, 8) Alimwi bana Israyeli bakali kukonzya kutondezya kulumba kwabo kuli Jehova kwiinda mukumvwida milawo njaakabapede. Mucikozyanyo, ciindi nobakali kutuula zituuzyo kuli Jehova, bakali kuyandika kumupa “micelo mitaanzi mibotu kapati” njobakali kulima. (Kul. 23:19) Bana Israyeli bakalizyi kuti Jehova wakali kuyoozumanana kubalongezya ikuti nobakali kuyoozumanana kumumvwida alimwi akumupa zintu zyabo ziinda kubota.—Amubale Deuteronomo 8:7-11.

7. Mbuti mbotukonzya kubelesya “zintu ziyandisi” kutondezya luyando lwesu kuli Jehova?

⁷ Andiswe tulakonzya kumutondezya Jehova kuti tulamuyanda kwiinda mukumupa “zintu ziyandisi.” (Tus. 3:9) Tulacita oobo kwiinda mukubelesya zintu nzyotujisi kulemeka nguwe. Mucikozyanyo, tulakonzya kusanga kutegwa tugwasyilizye mulimo wa Bwami mumbungano yesu alimwi anyika yoonse mbwiizulwa. Tacikwe makani naa tujisi buyo zintu zisyoonto naa zinji, toonse tulakonzya kubelesya zintu nzyotujisi kutondezya luyando lwesu kuli Jehova. (2Kor. 8:12) Pele kuli nzila azimbi mbotukonzya kutondezya kuti tulamuyanda Jehova.

8, 9. Ninzila nzi aimbi mbotutondezya luyando lwesu kuli Jehova? Ncinzi ba Mike alimwi amukwasyi wabo ncobakacita?

⁸ Jesu wakatuyiisya kuzumanana kusaanguna kuyandaula Bwami alimwi akuti tutalibiliki kujatikizya cakulya naa zyakusama. Taateesu wasyomezya kutupa zintu nzyotuyandika. (Mt. 6:31-33) Tulijisi lusyomo muli Jehova alimwi tulizyi kuti uyootupa ncobeni nzyotuyandika. Kayi, ikuti muntu umwi komuyanda ncobeni, ulamusyoma muntu ooyo. Alimwi buya, ciindi notumusyoma kapati Jehova, ndendilyo notukonzya kutondezya kapati kuti tulamuyanda. (Int. 143:8) Aboobo, tweelede kulibuzya kuti: ‘Sena makanze aangu, mbondicibelesya ciindi alimwi anguzu zyangu zitondezya kuti ndilamuyanda ncobeni Jehova? Sena ndilamusyoma Jehova kuti alanganye zintu nzyondiyandika buzuba abuzuba?’

⁹ Ba Mike alimwi amukwasyi wabo bakamusyoma Jehova. Ciindi ba Mike nobakacili bakubusi, lyoonse bakali kuyandisya kuyookambaukila kubusena bwakunze aacisi. Noliba leelyo nobakakwata akuba abana bobilo, bakacili kuyanda kubeleka mulimo wakukambauka kunze aacisi. Ciindi ba Mike alimwi amukwasyi wabo nobakabala kujatikizya bakwesu abacizyi ibakali kubelekela kubusena bubulide, bakasala kuubya-ubya buumi bwabo. Bakasambala ŋanda yabo mpati akulongela muŋanda nsyoonto. Ba Mike alimwi bakacesya makwebo aabo ngobakali kucita alimwi akujana nzila yakukonzya kwaayendelezya makwebo kabali kucisi cimbi kwiinda mukubelesya Intaneti. Cakatobela ncakuti ba Mike alimwi amukwasyi wabo bakacikonzya kulongela kucisi cimbi, alimwi bakakkomana kapati kubeleka mulimo wakukambauka kubusena oobo. Ba Mike bakaamba kuti: “Twakabona ncobeni mbwaali aamasimpe majwi a Jesu aalembedwe mulugwalo lwa Matayo 6:33.”

10. Mbubwenya mbuli Mwami Davida, nkaambo nzi ncociyandika kuzinzibala kuyeeya nzyotwiiya kujatikizya Jehova?

¹⁰ Mwami Davida wakalemba kuti: “Majulu aambilizya bulemu bwa Leza; mulengalenga uluula milimo yamaanza aakwe.” Wakayungizya kwaamba kuti: “Mulawo wa Jehova ulilondokede, ulabukulusya nguzu. Ziyeekezyo zya Jehova zilasyomeka, zilabasongwaazya batakwe luzyibo.” Ciindi Davida naakali kuzinzibala kuyeeya milawo yabusongo ya Jehova alimwi akubota kwazilenge zyakwe, wakaba acilongwe ciyumu a Jehova alimwi wakali kuyanda kutondezya luyando lwakwe kulinguwe. Davida wakaamba kuti: “Nzyondaamba amulomo wangu anzyondiyeeya mumoyo, azibe zyeezyo zikukonda, O Jehova, O Ndomba yangu alimwi O Muvwuni wangu.”—Int. 19:1, 7, 14.

11. Mbuti mbotukonzya kubelesya luzyibo Jehova ndwaatupa kutondezya luyando lwesu kulinguwe? (Amubone cifwanikiso icili kumatalikilo aacibalo.)

¹¹ Mazuba aano, Jehova ulatuyiisya zintu zinji zijatikizya nguwe, makanze aakwe, zilenge zyakwe, alimwi a Jwi lyakwe. Nyika ikulwaizya bantu kuba alwiiyo lwaatala lwalo kanji-kanji lupa kuti bantu aabo balujana bacileke kumuyanda Leza. Mukwiimpana, Jehova uyanda kuti tube aluzyibo alimwi akutugwasya kuba basongo. Uyanda kuti tubelesye zintu nzyotwiiya kutegwa tugwasyigwe alimwi akugwasya bambi. (Tus. 4:5-7) Mucikozyanyo, uyanda kuti twaambile bamwi “luzyibo lwini-lwini lwakasimpe” alimwi akubagwasya kuti bakafwutuke kumbele. (1Tim. 2:4) Tulatondezya kuti tulamuyanda Jehova alimwi abantu kwiinda mukuyiisya bantu banji makani aajatikizya Bwami bwa Leza alimwi ancobuyoocitila bantu.—Amubale Intembauzyo 66:16, 17.

12. Ncinzi mukubusi mucizyi umwi ncaakaamba kujatikizya cipego cimwi kuzwa kuli Jehova?

¹² Bakubusi abalo balakonzya kuzinzibala kuyeeya zintu zyoonse Jehova nzyaabapa alimwi anzyaabayiisya. Mukubusi uutegwa Shannon ulayeeya mbwaakalimvwa lyamuswaangano wacooko ngwaakajanika naakajisi myaka yakuzyalwa iili 11 alimwi amusyoonto wakwe musimbi iwakajisi myaka yakuzyalwa iili 10. Lyacibeela cimwi ca Muswaangano Wacooko iwakajisi mutwe wakuti “Godly Devotion,” (Kulyaaba Kwabunaleza) bakubusi boonse, kubikkilizya a Shannon alimwi amwanookwabo musimbi, bakalombwa kuti bakkalile abusena bumwi bwaalubazu. Kumatalikilo Shannon wakalibilika. Pele wakagambwa ciindi mukubusi umwi aumwi naakapegwa bbuku litegwa Questions Young People Ask—Answers That Work. Ino cipego cibotu eeci cakamupa kulimvwa buti kujatikizya Jehova? Wakaamba kuti: “Ndendilyo nondakazyiba kuti Jehova nkwali alimwi akuti ulandiyanda kapati mebo lwangu kundigama. Eelo kaka tulikkomene kuzyiba kuti Leza wesu mupati, Jehova, ulatupa cabuyo zipego zibotu kapati!”

13, 14. Mbuti mbotweelede kucita ciindi Jehova naatupa lulayo, alimwi nkaambo nzi?

¹³ Bbaibbele lituyeezya kuti: “Jehova ulabasinsa aabo mbayanda, mbubonya usyi mbwacita kumwana ngwakkomanina.” (Tus. 3:12) Ciindi notulutambula lulayo lwa Jehova alimwi akuzumina kuti atuyiisye, twiiya kucita ciluzi alimwi akujana luumuno. Masimpe “kunyina lulayo lukkomanisya ciindi nolupegwa, pele lulacisa.” (Heb. 12:11) Nokuba boobo, mbuti mbotweelede kucita ciindi Jehova naatupa lulayo? Tatweelede kuunduluzya lulayo lwa Jehova naa kuzumanana kukalala ikuti naa tatuciyandi ncotwaambilwa. Tulamuyanda Jehova, aboobo tweelede kuswiilila alimwi akucinca aawo mpotuyandika kucita boobo.

¹⁴ Kuciindi ca Malaki, ba Juda banji tiibakali kumuswiilila Jehova. Tiibakali kubikkila maano kufwumbwa naa zituuzyo zyabo tiizyakali kumukkomanisya. Aboobo, Jehova wakabapa lulayo lwanguzu kujatikizya zituuzyo zyabo. (Amubale Malaki 1:12, 13.) Alimwi buya, Jehova wakabapa lulayo ziindi zinji, pele bakakaka kuswiilila. Aboobo, wakabaambila kuti: “Ndilamusinganya, azyalo zileleko zyanu ndilazisinganya.” (Malk. 2:1, 2) Cilisalede kuti ikuti twazumanana kukaka kuswiilila lulayo lwa Jehova naa kuyeeya kuti taluyandiki, cilongwe cesu anguwe ciyoomana.

15. Nkuyeeya kuli buti nkotweelede kweeleba?

¹⁵ Nyika ya Saatani ikulwaizya bantu kuti kabaliyanda alimwi akulisumpula. Banji tabayandi kululamikwa naa kwaambilwa cakucita. Bamwi batambula buyo lulayo akaambo kakuti beelede kucita boobo. Tatweelede kuba boobo pe. Bbaibbele litwaambila kuti ‘tuleke kutobela ziyanza zyabweende bwazintu obuno.’ Muciindi caboobo, tweelede kuzyiba Jehova ncayanda kuti tucite alimwi akumukkomanisya. (Rom. 12:2) Ubelesya mbunga yakwe kutupa lulayo aciindi ceelede. Mucikozyanyo, tulacenjezyegwa mbotweelede kulilemeka ciindi notuli amuntu ngotwiindene limwi zizo, mbotweelede kusala balongwe, alimwi ambotweelede kusala kabotu mumakani aakulikondelezya. Ciindi notutambula lulayo lwa  Jehova cakulyaaba alimwi akucinca kutegwa tumukkomanisye, tutondezya kuti tulamulumba akaambo kakutusololela alimwi akuti tulamuyanda ncobeni.—Joh. 14:31; Rom. 6:17.

16, 17. (a) Nkaambo nzi ncotweelede kuzyiba Jehova mbwayeeya katutanasala cakucita? (b) Ncinzi bana Israyeli ncobakacita muciindi cakusyoma Jehova?

¹⁶ Bana basyoonto basyoma bazyali babo kuti babagwasye akubakwabilila. Nobaba bana bapati balakonzya kulomba lugwasyo kuzwa kubazyali babo. Balizyi kuti nokuba kuti balakonzya kulisalila, bazyali babo balakonzya kubapa lulayo lubotu. Taateesu, Jehova, ulatuzumizya kulisalila. Pele akaambo kakuti tulamusyoma ncobeni alimwi akumuyanda, lyoonse tulamulomba kuti atugwasye alimwi akucita cili coonse ncotukonzya katutanasala cakucita kutegwa tuzyibe mbwacibona cintu cimwi naa makani amwi. Ikuti twamusyoma Jehova, uyootupa muuya wakwe uusalala kutegwa utugwasye kucita ciluzi.—Flp. 2:13.

¹⁷ Kuciindi ca Samuele, bana Israyeli bakazundwa aba Filisiti munkondo. Muciindi cakubuzya Jehova ncobakeelede kucita, bakaamba kuti: “Atulitolelezye bbokesi lyacizuminano ca Jehova kuzwa ku Silo kutegwa libe akati kesu akuti lituvwune kumaanza aabasinkondoma.” Ino ncinzi cakacitika akaambo kakusala kwabo? “Kwakajaigwa bantu banji; kulubazu lwabana Israyeli, kwakafwa basikalumamba beenda amaulu bali 30,000. Kuyungizya waawo, Bbokesi lya Leza lyakatolwa.” (1Sam. 4:2-4, 10, 11) Bana Israyeli bakali kuyeeya kuti kutolelezya buyo Bbokesi kwakali kuyoopa Jehova kuti abagwasye akubakwabilila. Pele tiibakamubuzya Jehova pe kutegwa abagwasye nokuba buyo kusola kuzyiba ncaakali kuyeeya kujatikizya makani aaya. Muciindi caboobo, bakacita ncobakali kuyeeya kuti ncocakaluzi, eeci cakapa kuti basikalumamba banji bajaigwe.—Amubale Tusimpi 14:12.

18. Ino Bbaibbele limuyiisya nzi kujatikizya makani aakusyoma Jehova?

¹⁸ Sintembauzyo iwakali kumuyanda kapati Jehova alimwi iwakali kumusyoma, wakalemba kuti: “Kolindila Leza, nkaambo ndiyoomutembaula alimwi, mbwaanga ngo Mufwutuli wangu mupati. O Leza wangu ndilityompedwe. Nkakaambo kaako ndilakuyeeya.” (Int. 42:5, 6) Sena mbomulimvwa oobu kujatikizya Jehova? Sena mulimvwa kuba acilongwe anguwe alimwi sena mulamusyoma? Mulakonzya kwiiya kumusyoma kapati. Bbaibbele litwaambila kuti: “Kosyoma Jehova amoyo wako woonse, utasyomi maano aako omwini pe. Munzila zyako zyoonse kolanga kulinguwe, eelyo walo ulalulamika nzila zyako.”—Tus. 3:5, 6.

19. Ino muyootondezya buti kuti mulamuyanda Jehova?

¹⁹ Akaambo kakuti nguwakasaanguna kutuyanda, Jehova watuyiisya mbotweelede kumuyanda. Atuzumanane kuyeeya zintu nzyaatucitila alimwi ambwatuyanda kapati. Alimwi atumutondezye kuti tulamuyanda amoyo wesu woonse abuumi bwesu boonse amizeezo yesu yoonse alimwi anguzu zyesu zyoonse.—Mk. 12:30.