1, 2. Nkaambo nzi Jesu ncaakali kumuyanda Marta, pele ncinzi ncaakalubizya icitondezya kuti taakwe naakalondokede?

CIINDI nomuyeeya mucizyi wa Lazaro, Marta, ino muyeeya kuti wakali muntu uuli buti? Bbaibbele litondezya kuti Marta a Jesu bakali kumvwana kapati, alimwi lyaamba kuti Jesu wakali kumuyanda kapati Marta. Pele Marta taakwe naakali ngomukaintu alikke Jesu ngwaakali kuyanda akulemeka. Mucikozyanyo, mucizyi wa Marta, Mariya, awalo wakali mulongwe wa Jesu ngobakali kumvwana kapati. Jesu alimwi wakali kubayanda banyina bakamuzyala, ba Mariya. (Johane 11:5; 19:25-27) Pele ino nkaambo nzi Jesu ncaakamuyandila Marta?

² Jesu wakali kumuyanda Marta akaambo kakuti wakali siluse alimwi wakali mwaabi, alimwi wakali musungu kubeleka. Pele kwiinda zyoonse, Jesu wakali kumuyanda Marta akaambo kakuti wakajisi lusyomo luyumu. Wakali kuzisyoma zyoonse nzyaakali kuyiisya Jesu, alimwi taakwe naakali kudooneka kuti ngowakali Mesiya wakasyomezyegwa. (Johane 11:21-27) Nokuba boobo, Marta taakwe  naakali muntu uulondokede. Mbubwenya mbuli ndiswe toonse, wakali kulubizya. Mucikozyanyo, cimwi ciindi Jesu naakabaswaide, Marta wakanyema akaambo kamucizyi wakwe, Mariya, akwaambila Jesu kuti amululamike. Marta wakati: “Mwami, sena tokwe makani kuti mwanookwesu wandilekelezya kucita zintu? Komwaambila aboole azoondigwasye.” (Amubale Luka 10:38-42.) Ino nkaambo nzi Marta ncaakaambila boobo, alimwi ncinzi ncotukonzya kwiiya kubwiinguzi bwa Jesu?

3, 4. Ncinzi ncaakacita Mariya eeco Jesu ncaakaamba kuti cakali kabotu, alimwi ino ncinzi ncaakaiya Marta? (Amubone cifwanikiso icili kumatalikilo aacibalo.)

³ Jesu wakalumba kuti Marta a Mariya bakamutamba muŋanda yabo, alimwi wakali kuyanda kubelesya ciindi eeciya kubayiisya kasimpe kayandika kapati. Cakufwambaana Mariya wakakkala munsi lyakwe, ‘kaswiilila nzyaakali kwaamba.’ Wakali kuyanda kwiiya zyoonse nzyaakali kukonzya kwiiya kuzwa ku Mwiiyi Mupati. Marta awalo wakali kukonzya kuswiilila nzyaakali kwaamba Jesu. Awalo wakali kukonzya kutembaulwa akaambo kakuleka kucita nzyaakali kucita kutegwa aswiilile nzyaakali kwaamba Jesu.

⁴ Pele Marta wakanyonganizyigwa. Wakajisi bubi kujikila Jesu cakulya caalubazu akukutauka milimo minji kutegwa Jesu akkomane. Ciindi Marta naakabona kuti Mariya taakwe naakali kumugwasya, wakacimwa akutongookela Jesu. Jesu wakalizyi kuti Marta wakali kuyanda kubeleka milimo minji kapati, aboobo calubomba wakamwaambila kuti: “Marta, Marta, ulalibilika akunyonganizyigwa azintu zinji.” Kumane, Jesu wakamwaambila kuti cakali kabotu kubamba cakulya citakatazyi, ambweni cakulya comwe buyo cakali kukonzya kukkwana. Mpoonya Jesu wakamulumbaizya Mariya akaambo kakuswiilila cakubikkila maano kuzintu nzyaakali kwaamba. Wakaamba kuti: “Mariya walo wasala cibeela cibotu, alimwi takanyangwi ncico pe.” Mariya ulakonzya wakaluba zyakulya nzyaakalya buzuba oobuya, pele cakutadooneka kunyina naakaziluba zintu nzyaakaiya kuli Jesu alimwi ambwaakamulumbaizya. Nokwakainda myaka yiinda ku 60, mwaapostolo Johane wakalemba kuti: “Jesu wakali kumuyanda Marta amwanookwabo musimbi a Lazaro.” (Johane 11:5) Aaya majwi atondezya kuti Marta wakalutambula lulayo Jesu ndwaakamupa caluyando alimwi wakabelekela Jehova cakusyomeka mubuumi bwakwe boonse.

5. Nkaambo nzi ncocikatazya kapati mazuba aano kubikkila maano kuzintu ziyandika kapati, alimwi mubuzyo nzi ngotutiingule?

⁵ Tulizyi kuti mazuba aano kuli zintu zinji kwiinda kaindi izikonzya kutunyonganya kutegwa tuleke kubelekela Jehova. Ngazi Yamulindizi yamu Chingisi yamu September 15, 1958, yakacenjezya bakwesu abacizyi kutalekela zintu zipangwa abasayaansi kubanyonganya kuti baleke kubelekela Jehova. Nokuba kuciindi eeciya, kwakali kulibonya kuti buzuba abuzuba kwakali cintu cipya. Zintu mbuli mamagazini aakali kuboneka kabotu, mawailesi, mafilimu, alimwi azipeku-peku zyakali dumide kapati. Ngazi Yamulindizi yakati ciindi notuyaabuswena kumamanino aabweende bwazintu oobu, “zintu zinyonganya zilangilwa kuyoovwula.” Mazuba aano, kwiinda kaindi, kuli zintu zinji kapati zikonzya kutunyonganya. Ino ncinzi ncotukonzya kucita kutegwa tube mbuli Mariya akubikkila maano kukukomba Jehova?

6. Ino bantu ba Jehova bazibelesya buti zintu zipangwa abasayaansi?

⁶ Bantu ba Jehova bali kuzibelesya zintu zipangwa  abasayaansi kutegwa bakambauke makani mabotu. Mucikozyanyo, kaitanatalika Nkondo Yakusaanguna Yanyika Yoonse, bakali kutondezya bantu filimu ya “Photo-Drama of Creation.” Kwiinda mukubelesya majwi aayendelana azifwanikiso izili mumasilaidi alimwi atumafilimu tufwaafwi-fwaafwi, bakakambaukila bantu banji kapati muzisi zinji. Kumamanino, filimu eeyi ya “Photo-Drama” yakali kutondezya luumuno luyooba ciindi Jesu Kristo nayakweendelezya nyika. Mukuya kwaciindi, bantu ba Jehova bakabelesya wailesi kumwaya mulumbe wa Bwami kumamiliyoni aabantu nyika yoonse mbwiizulwa. Mazuba aano, tubelesya makkompyuta a Intaneti kukambaukila bantu kufwumbwa nkobabede, nokuba kumasena nkobatavwuli kusika bantu.

7. (a) Nkaambo nzi kubelesya nyika cakumaninina ncokukonzya kutunjizya muntenda? (b) Ino tweelede kucenjela kujatikizya nzi? (Amubone bupanduluzi buyungizyidwe.)

⁷ Bbaibbele litucenjezya kuti tatweelede kubelesya nyika cakumaninina. Eeci cilabikkilizya akubelesya ciindi cinji kapati azintu nzyoipa nyika. (Amubale 1 Bakorinto 7:29-31.) Zimwi akati kazintu eezyi kuzigama tazili zibi pe, pele zilakonzya kutusowela ciindi cinji. Mucikozyanyo, inga kacitukkomanisya kucita zintu nzyotuyandisya kucita, kubala mabbuku, kweebelela TV, kuswaya masena aajisi zintu zikkomanisya, kuula zintu, alimwi akuyanda kuzyiba zintu zyakupanga-panga zibotu alimwi zipya izisambalwa. Banji bayandisya kubandika kubelesya Intaneti, kutuma tugwalo kubelesya fooni akutuma ma e-mail, naa kulanga a Intaneti kutegwa bazyibe zintu zicitika munyika naa makani aajatikizya zisobano. Pele bamwi balakonzya kuba acizibilizi cakucita zintu eezyi. * (Amubone bupanduluzi buyungizyidwe.) (Mukambausi 3:1, 6) Kuti katubelesya ciindi cinji kucita zintu zitayandiki kapati, inga tiitwabikkila maano kuzintu ziyandika kapati, ikukomba Jehova.—Amubale Baefeso 5:15-17.

8. Nkaambo nzi ncociyandika kapati kuti tutanooyandi zintu zyamunyika?

⁸ Saatani ulacita zyoonse nzyakonzya kutegwa atoongelezye kuyanda zintu zyamunyika  akuti tunyongane akuleka kubelekela Jehova. Saatani wakacita oobu mumwaanda wamyaka wakusaanguna alimwi waindila buya kucita boobu mazuba aano. (2 Timoteyo 4:10) Aboobo, tweelede kuzumanana kulilingula kutegwa tuzyibe mbotulimvwa kujatikizya zintu zyamunyika alimwi akucinca oomo motuyandika kucinca. Bbaibbele litwaambila kuti tatweelede kuyanda zintu zyamunyika. Muciindi caboobo, tweelede kuzumanana kuyandisya Jehova. Kuti twacita boobo, ciyakuubauba kumumvwida Jehova akuzumanana kuba acilongwe ciyumu anguwe.—1 Johane 2:15-17.

9. Ino Jesu wakayiisya basikwiiya bakwe kubikkila maano kunzi, alimwi mbuti walo mbwaakapa cikozyanyo?

⁹ Mbubwenya mbwaakayiisya Marta calubomba kuti atanyonganizyigwi azintu zinji, Jesu wakayiisya basikwiiya bakwe ciiyo nciconya. Wakabakulwaizya kubikkila maano kukubelekela Jehova a Bwami bwakwe. (Amubale Matayo 6:22, 33.) Jesu lwakwe mwini wakapa cikozyanyo cibotu kapati. Taakwe naakajisi zintu zinji, alimwi taakwe naakajisi ŋanda naa nyika.—Luka 9:58; 19:33-35.

10. Ino ncikozyanyo nzi cibotu ncaakatusiila Jesu?

¹⁰ Jesu taakwe naakalekela cintu cilicoonse kumunyonganya kuti aleke mulimo wakukambauka. Mucikozyanyo, nokwakainda buyo ciindi cisyoonto kuzwa ciindi naakatalika kukambauka, makamu aabantu mu Kapenauma bakali kuyanda kuti Jesu akkale ciindi cilamfwu mumunzi uulya. Ino wakacita buti? Wakabikkila maano kumulimo wakwe. Wakati: “Akwalo kuminzi iimbi ndileelede kwaambilizya makani mabotu aa Bwami bwa Leza, nkaambo eeci ncindakatuminwa.” (Luka 4:42-44) Jesu wakeenda misinzo milamfwu kakambauka makani mabotu akuyiisya bantu banji kweelana ambwaakali kukonzya. Wakali muntu uulondokede, pele wakali kukatala alimwi wakali kuyandika kulyookezya nkaambo wakali kubeleka canguzu.—Luka 8:23; Johane 4:6.

11. Ncinzi Jesu ncaakacita ciindi muntu umwi naakamubuzya kujatikizya penzi ndyaakajisi? Nciiyo nzi Jesu ncaakayiisya basikwiiya bakwe?

¹¹ Mukuya kwaciindi, ciindi Jesu naakali kuyiisya basikwiiya bakwe ciiyo ciyandika kapati, muntu umwi wakamunjila mukanwa akwaamba kuti: “O Mwiiyi, komwaambila mukwesu kuti andaabile cibeela calukono.” Jesu taakwe naakasola kumana penzi lyamuntu ooyu. Taakwe naakanyonganizyigwa akuleka kuyiisya basikwiiya bakwe. Muciindi caboobo, wakabelesya coolwe eeci kubayiisya kaambo kakuti ikuti naa babikkila maano kuyanda kuba azintu zinji, balakonzya kunyonganizyigwa akuleka kubelekela Leza.—Luka 12:13-15.

12, 13. (a) Ncinzi Jesu ncaakacita icakabakkomanisya ba Giriki banji mu Jerusalemu? (b) Ino Jesu wakacita buti ciindi Filipo naakamulomba kuti abonane abantu aabo?

¹² Mazuba masyoonto aakumamanino Jesu ngaakakkala anyika kali muntu akamupa kupenga kapati mumizeezo. (Matayo 26:38; Johane 12:27) Wakalizyi kuti wakali kuyoopenga kapati akufwa. Alimwi wakalizyi kuti wakeelede kubeleka mulimo mupati katanafwa. Mucikozyanyo,  mu Nsondo, mu Nisani 9, Jesu wakanjila mu Jerusalemu katantide ambongolo. Makamu aabantu akamutambula kuba Mwami wabo. (Luka 19:38) Buzuba bwakatobela, Jesu cabusicamba wakabatanda mutempele basyaacivwulemwangu ibakali kubbida bantu kwiinda mukubasambalila zintu amuulo waatala.—Luka 19:45, 46.

¹³ Bantu bamwi ba Giriki, ibakaboolede ku Jerusalemu kuzoosekelela Pobwe Lyakwiindilila, bakabona ncaakacita Jesu alimwi cakabakkomanisya. Aboobo, bakalomba mwaapostolo Filipo kuti babonane a Jesu. Pele Jesu taakwe naakali kuyandaula bantu ibakali kukonzya kumugwasya akumukwabilila kuli basinkondonyina. Wakalizyi icakali kuyandika kapati. Wakabikkila maano kucita kuyanda kwa Jehova, nkokuti kwaaba buumi bwakwe kacili cituuzyo. Aboobo, wakaibalusya basikwiiya bakwe kuti wakali kuyoofwa akuti boonse aabo ibamutobela beelede kulisungula kwaaba buumi bwabo abalo. Wakati: “Kufwumbwa ooyo uuyandisya buumi bwakwe ulabunyonyoona, pele kufwumbwa ooyo uusulaika buumi bwakwe munyika eeyi ubuyobweda buumi butamani.” Pele Jesu alimwi wakasyomezya kuti ‘Taata uyoobalemeka’ basikwiiya ba Jesu akubapa buumi butamani. Filipo wakali kukonzya kwaambila ba Giriki aabaya mulumbe ooyu uukulwaizya.—Johane 12:20-26.

14. Nokuba kuti Jesu wakabikkide mulimo wakukambauka mubusena bwakusaanguna mubuumi bwakwe, ino wakali kujana ciindi cakucita nzi?

¹⁴ Ciindi Jesu naakali anyika, mulimo wakwe mupati wakali wakukambauka makani mabotu. Nokuba kuti wakabikkide maano kukukambauka mubuumi bwakwe boonse, tanaakali kuyeeya buyo mulimo wakukambauka lyoonse. Mucikozyanyo, wakajanika kupobwe lyabwiinga, kwalo nkwaakasandula maanzi kuti abe waini mubotu kapati. (Johane 2:2, 6-10) Alimwi wakali kulya cakulya mumaanda aabalongwe bakwe abantu bamwi ibakali kwaakkomanina makani mabotu. (Luka 5:29; Johane 12:2) Kwiinda zyoonse, Jesu kanji-kanji wakali kujana ciindi cakupaila, kuzinzibala kuyeeya alimwi akulyookezya.—Matayo 14:23; Marko 1:35; 6:31, 32.

15. Ino mwaapostolo Paulo wakaamba kuti Banakristo beelede kucita nzi, alimwi mbuti mbwaakaba cikozyanyo cibotu?

¹⁵ Mwaapostolo Paulo wakaamba kuti Banakristo bali mbuli basikubalika mukusiyana ibabalika musinzo mulamfwu akuti kutegwa bamanizye kubalika mukusiyana ooku, beelede kusowa cilicoonse icikonzya kubapa kuti balemenwe akwiima. (Amubale Bahebrayo 12:1.) Paulo lwakwe mwini wakapa cikozyanyo cibotu. Naakali kuyanda naakavwuba akuba ampuwo kali musololi wacikombelo caci Juda, pele wakauleka mulimo uulya kutegwa abikkile maano ‘kuzintu ziyandika kapati.’ Wakabeleka canguzu mumulimo wakukambauka alimwi wakaunka kumasena manji, kubikkilizya aku Siriya, Asia Minor, Makedoniya, alimwi aku Judaya. Paulo wakabikkila maano kulanga kumbele kubulumbu bwakwe bwabuumi butamani kujulu. Wakati: “Mukuziluba  zintu zyoonse zili musyule akugama buyo zintu zili kumbele, ndisolekesya kusika ambaakani eeyo mane ndikabujane bulumbu.” (Bafilipi 1:10; 3:8, 13, 14) Paulo tanaakakwete, eeci cakamugwasya “kubelekela Mwami lyoonse kakunyina kunyonganizyigwa.”—1 Bakorinto 7:32-35.

16, 17. Tacikwe makani naa tulikwete, tulikwetwe naa pe, mbuti mbotukonzya kwiiya cikozyanyo ca Paulo? Mbuti ba Mark aba Claire mbobakacita oobo?

¹⁶ Mbubwenya mbuli Paulo, babelesi ba Jehova bamwi mazuba aano basala kutakwata naa kutakwatwa kutegwa bacikonzye kucita zinji mumulimo wa Jehova. (Matayo 19:11, 12) Bantu batakwete naa batakwetwe kanji-kanji bajisi mikuli misyoonto yamukwasyi kwiinda bantu bakwete naa bakwetwe. Pele tacikwe makani naa tulikwete, tulikwetwe naa pe, toonse tulakonzya ‘kuzisowa zyoonse zitulemena’ izikonzya kutunyonganya kuti tuleke kubelekela Jehova. Inga twayandika kucinca zilengwa zyesu kutegwa tweelebe kusowa ciindi akuti tucikonzye kucita zinji mumulimo wa Jehova.

¹⁷ Mucikozyanyo, ba Mark aba Claire, ibakakomenena ku Wales, bakatalika mulimo wabupainiya ciindi nobakamanizya cikolo. Nobakakwatana, bakazumanana mumulimo wabupainiya. Pele bakali kuyanda kucita zinji. Ba Mark bakati: “Twakacikonzya kubuubya-ubya kapati buumi bwesu kwiinda mukuzwa muŋanda yesu mpati akuleka kubeleka mulimo uubelekwa mawoola masyoonto kutegwa tucikonzye kunjila mumulimo wakuyaka wanyika yoonse.” Kwamyaka iili 20 yainda, bali kweenda muzisi zinji mu Africa kugwasyilizya kuyaka Maanda aa Bwami. Zimwi ziindi bakali kuba amali masyoonto buyo, pele Jehova lyoonse wali kubalanganya. Ba Claire bakati: “Citupa kulimvwa kukkutila kapati kubelekela Jehova buzuba abuzuba. Twaba abalongwe banji mumasena moonse motwakali kuunka, alimwi taakwe ncotubulide. Zintu zisyoonto nzyotwakasala kusweekelwa tatukonzyi kuzyeelanya alukkomano luboola akaambo kakubelekela Jehova mumulimo waciindi coonse.” Babelesi baciindi coonse banji mbobalimvwa oobo. *—Amubone bupanduluzi buyungizyidwe.

18. Ino mibuzyo nzi njotukonzya kulibuzya?

¹⁸ Sena mulimvwa kuti inga mwakkomana kapati kubelekela Jehova? Sena kuli zintu zimunyonganya kuti mutaciti zintu ziyandika kapati? Kuti naa cili boobo, ino inga mwacita buti? Ambweni inga mwayaambele mbomubala alimwi ambomwiiya Bbaibbele. Cibalo citobela ciyoopandulula mbotukonzya kucita oobo.