NONDAKAJISI myaka yakuzyalwa iili fwuka, ndakaleka kukomena. Sunu, kandijisi myaka yakuzyalwa iili 43, ndilampa buyo mita yomwe. Ciindi bazyali bangu nobakabona kuti tandikaindi waawa kulampa, bakandikulwaizya kubeleka canguzu kutegwa kanditakubikkili kapati maano kufwiimpa kwangu. Kutegwa kandijisi bubi kubeleka, ndakazikutalika kusambala micelo kumbele aaŋanda yesu alimwi ndakali kwiibikka kabotu-kabotu. Eeci cakapa kuti basikuula banji kababoola.

Nokuba boobo, kubeleka canguzu taakwe nokwakagwasya cakumaninina. Ndakacili mufwaafwi kapati, alimwi cakali kundiyumina akucita zintu zyuuba-uba mubuumi, mbuli kwaalilwa kusika mpobabbadelela mali mucintoolo. Zintu zyoonse zyakali kulibonya kuti zyakabambilwa bantu ibakali balamfwu kwiinda ndime. Ndakali kulimvwa bubi, pele zintu nzyakacinca ciindi nondakajisi myaka yakuzyalwa iili 14.

Bumwi buzuba, bamakaintu bobilo, Bakamboni ba Jehova, bakaula micelo alimwi bakandilomba kuti katwiiya Bbaibbele ambabo. Tiilyakalampa, ndakazikuzyiba kuti kuzyiba Jehova alimwi amakanze aakwe cakali kuyandika kapati kwiinda kufwiimpa kwangu. Eeci cakandigwasya kapati. Lugwalo lwa Intembauzyo 73:28 ndolugwalo ndondakali kuyandisya kapati. Cibeela cakusaanguna calugwalo oolu caamba kuti: “Cilandibotela kuswena kuli Leza.”

Kakutanainda aciindi cilamfwu, mukwasyi wesu wakalongela ku Burkina Faso kuzwa ku Côte d’Ivoire, alimwi buumi bwangu bwakacinca kapati. Kubusena nkotwakazwa bantu bakazyibide kundibona kandiimvwi munsi-munsi aamicelo njondakali kusambala. Pele kubusena nkotwakalongela, ndakali mweenzu, alimwi bantu banji bakali kundigambwa. Bantu bakali kundilangisya, aboobo ndakakkala muŋanda nsondo zinji. Mpoonya ndakayeeya mbocakali cintu cibotu kuswena kuli Jehova. Ndakalembela ofesi yamutabi ya Bakamboni ba Jehova, mpoonya bakanditumina muntu weelela kuti andiswaye. Ba Nani, balo bali mbaamisyinali, bakaboola kundiswaya akahonda.

Migwagwa mubusena motwakali kukkala yakajisi musenga munji alimwi lyoonse yakali kutezemuka, alimwi ciindi camainza yakali kuba amankandya. Ziindi zinji ba Nani bakali kuwa akahonda ciindi nobakali kuboola kuti bandiyiisye, pele tiibakacileka pe. Bumwi buzuba, bakanditamba kumiswaangano. Ndakazyiba kuti kuzwa aŋanda cakali kwaamba kuti ndakeelede kuliyumya kulangwa abantu. Kuyungizya waawo, kubbalwa akahonda kwakali kuyoominya kahonda kalo ikakali kukatazya kunyona. Nokuba boobo,  ndakazumina, kumwi kandiyeeya cibeela cabili calugwalo ndondakali kuyandisya, cibeela cakuti: “Ndasala Mwami Singuzuzyoonse Jehova kuba mayubilo aangu.”

Zimwi ziindi Mebo aba Nani twakali kuwa mumankandya, pele akaambo kakuti twakali kwiiyandisya miswaangano, twakazumanana. Eelo kaka kwakali lwiindano lupati kuti twakozyanisya mbobakali kumweta-mweta bantu mbondakabona mu Ŋanda ya Bwami alimwi ambobakali kundilangisya bantu anze! Nokwakainda myezi iili fwuka, ndakabbapatizyigwa.

Cibeela catatu calugwalo ndondiyandisya caamba kuti: “Kutegwa ndaambilizye milimo yako yoonse.” Ndakalizyi kuti cakali kuyoondiyumina kapati kukambauka. Ndiciyeeyede ciindi cakusaanguna nondakaunka mumulimo wakukambauka kuŋanda aŋanda. Bana alimwi abapati bakali kundilangisya, bakali kunditobela, alimwi akutalika kundiseka mbondakali kweenda. Eeci cakandicisa kapati, pele nondakayeeya kuti bayandika Paradaiso mbubwenya mbuli ndime, ndakacikonzya kuliyumya.

Kutegwa zintu zyuube-ube, ndakajana kacinga kamavwili otatwe kakweenzya amaanza. Ngotwakali kubeleka limwi wakali kunditonta twasika amulundu mpoonya wakali kusotokela akacinga kumwi kakabalika kuselemukila munselelo. Nokuba kuti mulimo wakukambauka wakali kukatazya kumatalikilo, tiilyakalampa pe, wakandipa kuba alukkomano kapati cakuti mumwaka wa 1998, ndakaba mupainiya waciindi coonse.

Ndakasololela ziiyo zya Bbaibbele zinji, alimwi akati kabantu mbondakali kuyiisya, bone bakabbapatizyigwa. Kuyungizya waawo, mucizyi wangu umwi awalo wakakatambula kasimpe! Kanji-kanji ndakali kukulwaizyigwa aciindi ceelede kumvwa bamwi mbobakali kuyaambele. Bumwi buzuba nondakacisidwe ntuntumaanzi, ndakatambula lugwalo kuzwa kucisi ca Côte d’Ivoire. Ndakatalisya ciiyo ca Bbaibbele kumwana wacikolo iwakali kuyunivesiti mu Burkina Faso alimwi akupa mukwesu kuti kasololela ciiyo eeco. Mukuya kwaciindi sicikolo ooyo wakalongela ku Côte d’Ivoire. Ndakakkomana kapati kumvwa kuti sicikolo ooyo wakaba sikumwaya uutanabbapatizyigwa!

Ino ndijana buti mali aakubelesya? Mbunga imwi iigwasya balema yakandiyiisya mulimo wakusuma. Mpoonya mwiiyi umwi iwakali kundiyiisya wakabona mbondakali kubeleka kabotu akwaamba kuti: “Tweelede kukuyiisya kupanga nsipa.” Aboobo bakandiyiisya. Lino ndipanga nsipa aŋanda yakuwasyizya ayakusambya. Bantu balaiyanda nsipa njondipanga alimwi balaambilana kuti kabayuula. Ndilabatolela aabo baula nsipa kwiinda mukubelesya kahonda.

Cuusisya ncakuti, mumwaka wa 2004, ndakacileka bupainiya akaambo kakuciswa musana. Pele ndilaunka mumulimo wakukambauka lyoonse.

Bantu baamba kuti ndili muntu uumweta-mweta. Ndilijisi twaambo tulimvwisya tundipa kukkomana nkaambo cilandibotela kuswena kuli Leza—As told by Sarah Maiga.