MYAKA yiinda ku 200 yainda, bantu tiibakali kukonzya kuzisyoma zyoonse izyakali kulembwa mumiteende. Mazuba aano tatukonzyi kuzisyoma zyoonse nzyotubala naa nzyotubona a Intaneti. Kuli makani manji aajanika aa intaneti, alimwi ncuubauba kujana makani aa intaneti akaambo kakusumpuka muzyakupanga-panga. Makani manji ngamasimpe, alagwasya, alimwi ali kabotu, pele alimwi kuli makani manji aakubeja, aatagwasyi, alimwi mabyaabi. Nkakaambo kaako tweelede kusala kabotu nzyotubala. Bamwi nobatalika kubelesya Intaneti balakonzya kuyeeya kuti makani ngamasimpe akaambo buyo kakuti ajanika a Intaneti naa akaambo buyo kakuti mweenzinyina nguwabatumina aa e-mail. Balakonzya kwaasyoma makani nokuba kuti alalibonya buya kuti ngakubeja. Pele Bbaibbele litucenjezya kuti: “Muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.”—Tusimpi 14:15.

Muntu wiindene amufwubafwuba, naa uusyoma kufwumbwa ncaamvwa, muntu uucenjede. Ikuti katucenjede, tulabikkila maano kuzintu nzyotumvwa akubala alimwi tusyoma buyo makani ngotuzyi kuti ngamasimpe. Tatukeenwi pe akusyoma makani aakubeja ngotwabala a intaneti, nokuba kuti makani aayo alakonzya kaadumide kapati. Ino ncinzi cikonzya kumugwasya kucenjela? Cakusaanguna, amulibuzye kuti: ‘Sena makani aaya ajanika awebbusaiti iizumizyidwe alimwi yaamba zyamasimpe? Sena makani aayo ajanika awebbusaiti iizumizya muntu uuli woonse kulemba mbwayeeya naa ajanika awebbusaiti iitazyibidwe? Sena webbusaiti njomusyoma yakatondezya kale kuti makani aayo ngakubeja?’ * (Amubone bupanduluzi buyungizyidwe.) Mpoonya, amubelesye “maano.” (Tusimpi 7:7) Ikuti makani kaalibonya kuti taali aamasimpe, kanji-kanji inga kaali aakubeja ncobeni. Alimwi, ciindi nomwabala makani aatali kabotu kujatikizya bamwi, amuyeeye naa kuli uuli woonse uukonzya kugwasyigwa ikuti amwaika alimwi akaambo muntu umwi ncakonzya kuyanda kwaamwaya makani aali boobo.

Bantu bamwi balakonzya kutumina bamwi makani  kakunyina kusinizya ncobeni naa makani aayo ngamasimpe naa kakunyina kuyeeya cikonzya kucitika kuti baatuma makani aayo. Ambweni bayanda kuti lyoonse bantu kabababikkila maano alimwi akuyanda kuba bakusaanguna kumwaya makani. (2 Samuele 13:28-33) Pele muntu uucenjede ulayeeya bubi bukonzya kuba akaambo kakucita boobo. Mucikozyanyo, makani aayo alakonzya kunyonyoona mpuwo mbotu yamuntu umwi naa mbunga imwi.

Muntu iwatuma makani ambweni takonzyi kusinizya ncobeni kuti makani ngamasimpe nkaambo kucita boobo kuyanda ciindi cinji alimwi tacili cuuba-uba. Ncayeeya buyo ncakuti aabo batiitambule mulumbe ooyo balakonzya kulivwuntauzyizya. Pele abalo ciindi ncobajisi ncisyoonto. (Baefeso 5:15, 16) Aboobo, muciindi cakutuma zintu nzyotutasinizyide kuti nzyamasimpe, inga cainda kubota kuyeeya kuti: “Ikuti ndacidooneka, nkokuti tandeelede kucibamba!”

Amulibuzye kuti: ‘Sena lyoonse ndilatumina bantu bamwi ma e-mail ngonditambula? Sena kuli cimwi ciindi nondakalilekelela kubantu akaambo kakubatumina makani aatali kabotu naa makani aakubeja? Sena kuli umwi iwakandaambila kale kuti ndileke kumutumina ma e-mail ngonditambula?’ Mutalubi kuti, ikuti naa beenzinyoko kababelesya e-mail, nkokuti abalo balakonzya kubelesya Intaneti, aboobo tabayandiki kugwasyigwa andinywe kuyandaula zintu zikonzya kubakkomanisya. Tabayandi kunootambula ma e-mail manji aabikkilizya azintu zisesya, mavidiyo, naa mafwoto. Alimwi tacili camaano kutumina bamwi makani aa Bbaibbele aakalekkoodwa naa twaambo ntomwakalemba. * (Amubone bupanduluzi buyungizyidwe.) Alimwi mutalubi kuti ikuti naa muntu walivwuntauzizya, wabala magwalo mu Bbaibbele, naa walibambila bwiinguzi bwakwe ciindi nalibambila miswaangano, muntu ooyo ulakonzya kugwasyigwa kapati kwiinda leelyo nomumutumina makani aayo.

Ino ncinzi ncomweelede kucita ikuti mwabona makani mabi aakubeja a Intaneti aajatikizya mbunga ya Jehova? Amwaakake makani aayo mpoonya-mpoonya! Mutaasyomi pe. Inga tiicaba camaano kutumina bamwi makani ngomwabala alimwi akubabuzya mbobayeeya kujatikizya makani aayo nkaambo inga capa kuti makani aayo aatali kabotu amwaike kapati. Ikuti naa kuli cintu cimwi ncomwabona a Intaneti icamukatazya, amulombe busongo kuli Jehova alimwi akwaambila mukwesu umwi uusimide. (Jakobo 1:5, 6; Juda 22, 23) Tatweelede kugambwa kuti bantu baamba makani aakubeja kujatikizya ndiswe. Bantu bakali kwaamba makani aakubeja kujatikizya Jesu, alimwi  Jesu wakacenjezya basikwiiya bakwe kuti bakali kuyoopenzyegwa abasinkondonyina alimwi ‘akubabejelezya zintu zibi ziindene-indene.’ (Matayo 5:11; 11:19; Johane 10:19-21) Aboobo, ikuti kamujisi busongo akuyeeya kabotu, muyoocikonzya kuzyiba kuti makani ngaamba muntu umwi ngakubeja alimwi akuti usola kweena bamwi.—Tusimpi 2:10-16.

Alimwi tweelede kucenjela caboola kumakani aakwaambila bamwi makani aajatikizya bakwesu naa zyakuluula zimwi nzyotwakamvwa. Zimwi ziindi inga tiiceelela naa inga tiikwaba kutondezya luyando kumwaya makani amwi nokuba kuti ngamasimpe. (Matayo 7:12) Mucikozyanyo, inga tiikwaba kutondezya luyando naa inga tiicaba cintu cikulwaizya kutumina bamwi makani aatali kabotu aajatikizya bamwi. (2 Batesalonika 3:11; 1 Timoteyo 5:13) Alimwi makani aamwi inga kaali maseseke. Bantu inga bayanda kwaayubununa aakale naa kwaayubununa munzila imbi. Aboobo, tweelede kutondezya kuti tulabalemeka akaambo kalwaanguluko ndobajisi lwakusala ciindi nobeelede kwaayubununa makani aayo alimwi anzila njobakonzya kubelesya kwaayubununa. Alimwi buya, ikuti twaambila bamwi makani aayo kacitanasika ciindi cakucita boobo, inga twaleta penzi litaambiki.

Mazuba aano, makani alakonzya kumwaika cakufwambaana, tacikwe makani naa ngamasimpe naa ngakubeja, naa alagwasya naa taagwasyi, naa alakonzya kuleta mapenzi naa pe. Nokuba kuti mwatumina buyo muntu omwe, muntu ooyo ulakonzya kutumina bantu munyika yoonse mutuvwaluvwalu tusyoonto buyo. Aboobo, amulikazye sunko lyakufwambaana kutumina makani kubantu boonse mbomuzyi. Nokuba kuti luyando “lulasyoma zintu zyoonse” alimwi akuti taluyandauli bubi, tatweelede kufwubaala akusyoma makani oonse mapya naa makani amwi aakondelezya. (1 Bakorinto 13:7) Alimwi tatweelede kusyoma makani aakubeja naa zintu zibi kujatikizya mbunga ya Jehova alimwi abakwesu, balo mbotuyanda. Mutalubi kuti aabo ibatalisya makani aakubeja alimwi akwaamwaya, bakkomanisya Saatani Diabolosi, “usyi wabubeji.” (Johane 8:44) Aboobo, atucenjele alimwi lyoonse atubikkile maano kapati ambotucita amakani manji ngotubona buzuba abuzuba. Bbaibbele lyaamba kuti: “Bantu batakwe luzyibo bayookona bufwubafwuba, pele bacenjede mbambabo basama luzyibo mbuli musini.”—Tusimpi 14:18.