1, 2. Mbuti Magwalo mbwaatondezya mboluyandika kapati luyando?

LUYANDO mbobube bupati bwa Jehova Leza. (1 Johane 4:16) Cilenge cakwe citaanzi, Jesu Kristo, wakakkala kwamabbiliyoni aamyaka kujulu antoomwe a Bausyi alimwi wakayiya Jehova Leza mbwali siluyando. (Bakolose 1:15) Jesu walutondezya luyando lukozyenye mubuumi bwakwe boonse, kujulu aanyika. Aboobo tulakonzya kuba masimpe kuti Jehova alimwi a Jesu lyoonse bayakweendelezya caluyando.

² Ciindi umwi muntu naakabuzya Jesu naa nguuli mulawo mupati kwiinda, Jesu wakati: “‘Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.’ Ooyu ngomulawo mupati alimwi ngonguwe wakusaanguna. Alimwi ngooyu wabili uuli mbuli yooyu: ‘Weelede kuyanda  simukobonyoko mbubonya mbuli mboliyanda omwini.’”—Matayo 22:37-39.

3. Ino ‘simukoboma’ nguni?

³ Cilayandika kapati kutondezya luyando kubantu boonse. Jesu wakaamba kuti tweelede kuyanda Jehova alimwi akuyanda basimukoboma. Pele ino nguni ‘simukoboma’? Ikuti naa tulikwete naa tulikwetwe, simukoboma waafwaafwi kapati mulumi wesu naa mukaintu wesu. Basimukoboma alimwi balabikkilizya abakwesu abacizyi mumbungano alimwi abantu mbotujana mumulimo wamumuunda. Mucibalo eeci, tulaiya mbotukonzya kutondezya luyando kuli basimukoboma.

4. Mbuti cikwati mbocikonzya kuzwidilila nokuba kuti bantu tabalondoke?

⁴ Jehova wakalenga Adamu a Eva akubaleta antoomwe. Eeci cakali cikwati cakusaanguna. Leza wakali kuyanda kuti kabajisi lukkomano mucikwati akuzuzya nyika abana babo. (Matalikilo 1:27, 28) Nokuba boobo, nobakazangila Jehova, cikwati cabo cakanyongana, aboobo cibi alufwu zyakatuyambukila toonse. (Baroma 5:12) Nokuba kuti zintu zili boobo, cikwati cilakonzya kuzwidilila mazuba aano. Mu Bbaibbele, Jehova, Sikutalisya cikwati, upa lulayo lubotu kapati kubalumi abakaintu.—Amubale 2 Timoteyo 3:16, 17.

5. Ino luyando luyandika kapati buti mucikwati?

⁵ Ibbaibbele litondezya kuti kumvwana kapati caluyando kulayandika kapati kutegwa kube cilongwe cibotu. Oobu mbocibede amucikwati. Mwaapostolo Paulo wakalupandulula luyando lwini-lwini ciindi naakaamba kuti: “Luyando lulakkazika moyo alimwi lulaaluzyalo. Luyando talukwe munyono, talulidundi, talulisumpuli, talukwe cisapi, talubikkili buyo maano kuzintu nzyoluyanda, talunyemi-nyemi, talubikkilili. Talukkomanini kutalulama, pele lukkomanina kasimpe. Lulajatila zintu zyoonse, lulasyoma zintu zyoonse, lulalangila zintu zyoonse, lulaliyumya muzintu zyoonse. Luyando talumani.” (1 Bakorinto 13:4-8) Ciindi notwaayeeya majwi aa Paulo alimwi akwaatobela, tulakonzya kuba alukkomano mucikwati.

6, 7. (a) Ncinzi Bbaibbele ncolyaamba kujatikizya kuba silutwe? (b) Mbuti mulumi Munakristo mbwayelede kweendelezya mukaintu wakwe?

⁶ Jehova wakasala iweelede kuba mutwe wamukwasyi. Paulo wakapandulula kuti: “Ndiyanda kuti muzyibe kuti mutwe wamwaalumi uuli woonse ngu Kristo awalo mutwe wamukaintu mwaalumi; mpoonya mutwe wa Kristo ngu Leza.” (1 Bakorinto 11:3) Pele Jehova uyanda kuti mulumi kali silutwe siluyando, ikutali muyumu moyo naa silunya. Jehova lwakwe mwini ngu Silutwe siluzyalo alimwi taliyandi. Aboobo, Jesu ulabulemeka bweendelezi bwa Leza bwaluyando. Wakati: “Ndilamuyanda Taata.” (Johane 14:31) Jesu naatakalimvwa boobo ikuti Jehova naakali silunya kulinguwe.

⁷ Nokuba kuti mulumi ngomutwe wamukaintu wakwe, Bbaibbele limwaambila kumulemeka mukaintu wakwe. (1 Petro 3:7) Mbuti mulumi mbwakonzya kucita boobo? Ulakonzya kulanga-langa nzyayandika mukaintu  wakwe alimwi akubikkila maano kuzintu nzyayanda. Bbaibbele lyaamba kuti: “Nobalumi, amuzumanane kubayanda bakaintu banu, mbubonya awalo Kristo mbwaakayanda mbungano akulyaaba akaambo kanjiyo.” (Baefeso 5:25) Inzya, mane buya Jesu wakaaba buumi bwakwe akaambo kabasikumutobela. Ciindi mulumi nali silutwe siluyando mbuli mbwaakabede Jesu, ciyakuubauba kumukaintu kumuyanda, kumulemeka, alimwi akutobela nzyasala.—Amubale Tito 2:3-5.

8. Mbuti mbotweelede kulimvwa kujatikizya bakwesu abacizyi?

⁸ Mazuba aano, mamiliyoni aabantu nyika yoonse mbwiizulwa bakomba Jehova. Aaba mbakwesu abacizyi. Mbuti mbotweelede kulimvwa kujatikizya mbabo? Ibbaibbele lyaamba kuti: “Atucitile bantu boonse milimo mibotu, pele kapati ibaciinga cesu calusyomo.” (Bagalatiya 6:10; amubale Baroma 12:10.) Mwaapostolo Petro wakalemba kuti “kuswiilila kasimpe” kweelede kutupa kuba “aluyando lwabunyina.” Alimwi Petro wakaambila Banakristonyina kuti: “Ikwaambisya, amuyandane kapati.”—1 Petro 1:22; 4:8.

9, 10. Nkaambo nzi bantu ba Leza ncobakamantene?

⁹ Mbunga yesu yanyika yoonse ililibedelede. Ino nkaambo nzi? Akaambo kakuti tujisi luyando lwini-lwini kubakwesu alimwi  abacizyi. Icipati kwiinda ncakuti, akaambo kakuti tulamuyanda Jehova akutobela milawo yakwe, ulatugwasya kwiinda mukutupa nguzu ziinda mububumbo boonse, nkokuti muuya uusalala. Muuya uusalala ulatugwasya kukamantana ncobeni abunyina bwanyika yoonse.—Amubale 1 Johane 4:20, 21.

¹⁰ Paulo wakakankaizya mbociyandika kuyandana akati ka Banakristo ciindi naakalemba kuti: “Amulisamike luyando lwamoyo walubomba, luzyalo, kulicesya, kubomba moyo alimwi akukkazika moyo. Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo. Pele kunze lyazintu zyoonse eezyi, amulisamike luyando, nkaambo ncecaanzyo calukamantano cilondokede.” (Bakolose 3:12-14) Eelo kaka tulalumba kuti luyando oolo, lwalo iluli “ncecaanzyo calukamantano cilondokede,” nkoluli akati kesu tacikwe makani abusena nkotuzwa!

11. Ncinzi cizyibya mbunga ya Leza?

¹¹ Luyando lwini-lwini alimwi alukamantano iziliko akati kababelesi ba Jehova zilabazyibya kuti mbambabo ibali mucikombelo cakasimpe. Jesu wakati: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Johane 13:34, 35) Alimwi mwaapostolo Johane wakalemba kuti: “Lino bana ba Leza abana ba Diabolosi balazyibwa munzila eeyi: Kufwumbwa muntu uutazumanani kucita bululami tazwi kuli Leza pe, ncimwi buyo ayooyo uutayandi munyina. Nkaambo ooyu ngomulumbe ngomumvwide kuzwa kumatalikilo, wakuti tweelede kuyandana.” (1 Johane 3:10, 11) Luyando alukamantano zizyibya Bakamboni ba Jehova kuti mbaasikutobela beni-beni ba Kristo, ibantu Leza mbabelesya kukambauka makani mabotu aa Bwami munyika yoonse.—Matayo 24:14.

12, 13. Ncinzi ‘bankamu mpati’ ncobacita mazuba aano, alimwi ino bayoopona buumi buli buti lino-lino?

¹² Bunji bwababelesi ba Jehova mazuba aano ncibeela ‘cankamu mpati’ iizwa kumasena aaindene-indene aamunyika, alimwi balatondezya kuti bagwasyilizya Bwami. “Aaba mbambabo bazwa mumapenzi mapati, alimwi bawasya zisani zyabo zilamfwu akuzitubya mubulowa bwa Mwanaambelele” kwiinda mukutondezya lusyomo mucituuzyo cacinunuzyo ca Jesu. Aabo ibali cibeela ‘cankamu mpati’ balamuyanda Jehova a Mwanaakwe, alimwi bakomba Jehova “isyikati amasiku.”—Ciyubunuzyo 7:9, 14, 15.

¹³ Lino-lino buyo Leza uyoonyonyoona nyika mbyaabi eeyi ‘lyamapenzi mapati.’ (Matayo 24:21; amubale Jeremiya 25:32, 33.) Pele Jehova uyoobakwabilila  akubasololela babelesi bakwe munyika yakwe mpya akaambo kakuti ulabayanda. Mbubwenya mbwaakasyomezya myaka iitandila ku 2,000 yainda, “uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.” Sena mulangila kuyookkala mu Paradaiso ciindi bubi, kupenga, alufwu zyaakugwisyigwa?—Ciyubunuzyo 21:4.

14. Ino nkamu mpati nimpati buti mazuba aano?

¹⁴ Kumatalikilo aamazuba aamamanino mu 1914, kwakali buyo zyuulu zisyoonto zyababelesi ba Leza. Kwiinda mukukulwaizyigwa aluyando lwabasimukobonyina alimwi akugwasyigwa amuuya uusalala wa Leza, kakamu aako kasyoonto kabakwesu abacizyi bananike kakakambauka makani mabotu aa Bwami nokuba kuti kwakali buyumuyumu. Ino ncinzi cakacitika? Mazuba aano inkamu mpati yabantu ibajisi bulangizi bwakupona kukabe kutamani anyika ili mukubunganizyigwa. Kuli Bakamboni babalilwa ku 8,000,000 mumbungano zili 115,400 munyika yoonse, alimwi mweelwe ulazumanana kuyungizyika. Mucikozyanyo, Bakamboni bapya ibainda ku 275,500 bakabbapatizyigwa mumwaka wamulimo wa 2014. Eeci caamba kuti mvwiki amvwiki kwakali kubbapatizyigwa bantu ibali 5,300.

15. Mbuti banji mbobamvwa makani mabotu mazuba aano?

¹⁵ Cilagambya kubona bunji bwabantu ibakamvwa makani mabotu aa Bwami. Mazuba aano mabbuku eesu nkwaali mumyaambo iinda ku 700. Ngazi Yamulindizi nemagazini iimwaigwa kapati munyika yoonse. Mamagazini aayinda ku 52,000,000 alasimbwa mwezi amwezi, alimwi mamagazini aaya alamwaigwa mumyaambo iili 247. Alimwi bbuku ndyotubelesya kwiiya Bbaibbele lyakuti Ino Ncinzi Cini Bbaibbele Ncoliyiisya? lyakasandululwa mumyaambo iinda ku 250. Kusikila aciindi cino, mabbuku aayinda ku 200,000,000 asimbwa.

16. Nkaambo nzi mbunga ya Jehova ncoyazumanana kukomena?

¹⁶ Mbunga yesu yazumanana kukomena akaambo kakuti tulijisi lusyomo muli Leza alimwi tulalizumina Bbaibbele kuti ndi Jwi lyakwe ilyakasololelwa amuuya. (1 Batesalonika 2:13) Twazumanana kulongezyegwa a Jehova nokuba kuti Saatani ulitusulide alimwi ulatulwana.—2 Bakorinto 4:4.

17, 18. Mbuti Jehova mbwayanda kuti katulimvwa kujatikizya baabo ibatamukombi?

¹⁷ Bantu balautambula munzila ziindene-indene mulumbe wesu ngotukambauka. Bamwi bantu balatuswiilila kakuli bambi baluusulide mulumbe wesu. Ino mbuti Jehova mbwayanda kuti katulimvwa kulibaabo ibatamukombi? Kufwumbwa nzila bantu mbobautambula mulumbe wesu, tutobela lulayo lujanika mu Bbaibbele. Bbaibbele lyaamba kuti: “Majwi aanu kaakondelezya lyoonse, aalweezyedwe kabotu amunyo kutegwa muzyibe mbomweelede kumwiingula muntu umwi aumwi.” (Bakolose 4:6) Kufwumbwa ciindi notwiiminina nzyotusyoma, tweelede kucita boobo “amoyo mubombe alimwi abulemu kapati” nkaambo tulabayanda basimukoboma.—1 Petro 3:15.

¹⁸ Nociba ciindi bantu nobanyema alimwi akuukaka mulumbe wesu, tutondezya luyando kuli basimukoboma alimwi akwiiya cikozyanyo ca Jesu. Ciindi Jesu “naakali kutukilwa, kunyina naakatalika kutukila awalo.  Naakali kupenga, kunyina naakatalika kukonga bantu pe.” Muciindi caboobo, Jesu wakasyoma Jehova. (1 Petro 2:23) Aboobo ciindi coonse, tulatondezya kulicesya kwiinda mukutobela lulayo oolu lwakuti: “Mutapilusyi cibi kucibi naa matusi kumatusi. Muciindi caboobo, amuleleke.”—1 Petro 3:8, 9.

19. Ino tweelede kubeendelezya buti basinkondoma?

¹⁹ Kulicesya kulatugwasya kutobela njiisyo iiyandika kapati njaakapa Jesu. Wakapandulula kuti: “Mwakamvwa kuti kwakaambwa kuti: ‘Weelede kuyanda simukobonyoko akusulaika sinkondonyoko.’ Pele ndimwaambila kuti: Amuzumanane kuyanda basinkondonyoko akubapailila aabo bamupenzya, ikutegwa musinizye kuti muli bana ba Uso uuli kujulu, nkaambo ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.” (Matayo 5:43-45) Mbotuli babelesi ba Leza, tweelede kubayanda basinkondoma tacikwe makani ambobatweendelezya.

20. Ino tuzyi buti kuti bantu boonse munyika banooyanda Leza alimwi abasimukobonyina? (Amubone cifwanikiso icili kumatalikilo aacibalo.)

²⁰ Ciindi coonse, tweelede kutondezya kuti tulamuyanda Jehova alimwi abasimukoboma. Nokuba kuti bantu balatukazya alimwi akukazya mulumbe wesu, tulabagwasya ciindi nobali mumapenzi. Mwaapostolo Paulo wakalemba kuti: “Mutabi acikwelete nociba comwe kumuntu uuli woonse, ccita buyo cikwelete cakuyandana; nkaambo kufwumbwa uuyanda simukobonyina wazuzikizya mulawo. Nkaambo milawo yakuti, ‘Utaciti bumambe, utajayi, utabbi, utanyonokeli,’ alimwi amilawo iimbi iili yoonse iiliko, ilaambwa mukaambo aaka komwe kakuti: ‘Weelede kuyanda simukobonyoko mbubonya mbuli mboliyanda omwini.’ Uuyanda simukobonyina takonzyi kumubisizya; aboobo, luyando ndoluzuzikizya mulawo.” (Baroma 13:8-10) Munyika eeyi bantu mobaandeene, iijisi lunya, mbyaabi iyeendelezygwa a Saatani, babelesi beni-beni ba Leza balatondezya luyando kuli basimukobonyina. (1 Johane 5:19) Jehova aakumana kunyonyoona Saatani, madaimona aakwe, alimwi anyika eeyi mbyaabi, luyando luyooba munyika yoonse. Eelo kaka cinooli cilongezyo ciindi bantu boonse munyika nobayooyanda Jehova alimwi abasimukobonyina!