1. Mbube nzi bupati mbwajisi Leza, alimwi ino kuzyiba kaambo aaka kumupa kulimvwa buti?

IBBAIBBELE litwaambila kuti “Leza nduyando.” (1 Johane 4:8) Pele ino mubwini eeci caamba nzi? Luyando taluli buyo akati kabube bubotu bunji mbwajisi Jehova. Mbobube bwakwe bupati. Tajisi buyo luyando, pele ngoluyando. Luyando ndolusololela zintu zyoonse nzyacita. Eelo kaka tulalumba kuti luyando ndolwakamupa kulenga bubumbo boonse alimwi azintu zyoonse zipona!

2. Ino luyando lwa Leza lutupa kusinizya nzi? (Amubone cifwanikiso cili kumatalikilo aacibalo.)

² Jehova ngusilubomba alimwi ulaaluzyalo kububumbo bwakwe. Luyando lwakwe kulindiswe lutupa kusyoma kuti makanze aakwe kujatikizya bantu ayoozuzikizyigwa munzila mbotu kwiinda. Ciyakwaamba lukkomano lwini-lwini kuli baabo bamumvwida. Mucikozyanyo, akaambo kaluyando, Jehova, “wabikka buzuba mbwayoobeteka nyika mubululami kwiinda mumuntu ngwasalide,” Jesu Kristo. (Milimo 17:31) Tulijisi lusyomo lwakuti lubeta oolu luyoocitika. Kubantu basyoma, ciyakwaamba  buumi bwakumbele bubotu butiikabeko kukabe kutamani.

3. Ino buumi nobwali buti ikuti Leza naatakabayanda bantu?

³ Ino buumi bwabantu bwakumbele nibwakali kuyooba buti ikuti luyando nolwatakali bube bupati bwa Leza? Bantu nibakali kuyoozumanana kweendelezyanya akuyungwa a Saatani, uunyina luyando alimwi leza uujisi lunya. (2 Bakorinto 4:4; 1 Johane 5:19; amubale Ciyubunuzyo 12:9, 12.) Buumi bwakumbele nibwakali kuyoobija ikuti Jehova naatakatuyanda!

4. Nkaambo nzi Jehova ncaakazumizyila kuzangila bweendelezi bwakwe?

⁴ Ciindi Saatani naakazangila bweendelezi bwa Leza, wakayunga abazyali besu bakusaanguna kuti bazange. Wakakazya nguzu zya Leza zyakuba Mweendelezi Wabubumbo Boonse. Saatani wakaamba kuti bweendelezi bwakwe bwakali kuyooba bubotu kwiinda bwa Leza. (Matalikilo 3:1-5) Cabusongo, Jehova wakamuzumizya Saatani kaindi kasyoonto buyo kutegwa abone naa ncaakali kwaamba ncamasimpe. Pele cacitika catondezya kuti bantu alimwi a Saatani tabakonzyi kuba beendelezi babotu.

5. Ino makani aakaindi kujatikizya bantu asinizya nzi?

⁵ Mazuba aano, nyika iyaabwiindila kubija. Bantu bainda ku 100 miliyoni bajaigwa munkondo mumyaka iili 100 yainda. Kujatikizya “mazuba aamamanino” Ibbaibbele lyaamba kuti: “Bantu babyaabi abasilweeno bayoobija akubijila limwi.” (2 Timoteyo 3:1, 13) Ibbaibbele alimwi lyaamba kuti: “Ndilizyi kabotu, O Jehova, kuti muntu tapedwe nguzu zyakuzyiba nzila yakwe. Muntu weenda tapedwe nguzu zyakusololela noziba ntaamu zyakwe.” (Jeremiya 10:23) Makani aakaindi alasinizya kuti majwi aaya ngamasimpe. Jehova tanaakalenga bantu kuba anguzu zyakulyeendelezya kakunyina busolozi bwakwe.

6. Ino nkaambo nzi Leza ncazumizyide bubi?

⁶ Kwiinda mukuzumizya kuti bubi buzumanane, Jehova watondezya kuti bulikke bweendelezi bwakwe mbobukonzya kweendelezya cakuzwidilila. Kumbele, Leza uyoonyonyoona bantu boonse babi. Aakumana kucita boobo, ikuti muntu uuli woonse akakazye nzila yakwe yabweendelezi, Leza uyoobweza ntaamu mpoona-mpoona. Ulakonzya kuyoobelesya izyakacitika kaindi kuba bumboni bwakuti bazangi bali boobu beelede kugusyigwa cakufwambaana. Bubi tabukazumizyigwi alimwi pe.

7, 8. Ino Jehova walutondezya buti luyando lwakwe?

⁷ Jehova walutondezya luyando lwakwe lupati munzila zinji. Amuyeeye buyo bupati alimwi abubotu bwabubumbo bwesu boonse. Bujisi mabbiliyoni aamilalabungu, alimwi mulalabungu umwi aumwi ujisi mabbiliyoni aanyenyezi amapulaneti. Mumulalabungu wesu, imwi yanyenyezi ndizuba. Ikuti kakunyina zuba, buumi tabukonzyi  kubako aano anyika. Zintu zyoonse eezyi izyakalengwa zitondezya kuti Jehova ngo Mulengi wesu, alimwi zitondezya bube bwakwe, mbuli nguzu, busongo, alimwi aluyando. Inzya, ‘bube bwa Leza butalibonyi bulalibonya caantangalala kuzwa ciindi naakalenga nyika kuyakumbele, nkaambo bulabonwa muzintu nzyalengede, noziba nguzu zyakwe zitamani akuti ngu Leza ncobeni.’—Baroma 1:20.

⁸ Jehova wakailenga nyika kutegwa kaikkalwa azilenge zyuumi. Zyoonse izili anyika zigwasya zinyama abantu. Leza wakabamba muunda mubotu kutegwa bantu kabakkala mumo alimwi wakabapa bongo bulondokede alimwi amibili iyakali kukonzya kupona kukabe kutamani. (Amubale Ciyubunuzyo 4:11.) Kuyungizya waawo, “ulazipa cakulya zilenge zyoonse zipona, nkaambo luyando lwakwe lutamani nkoluli lyoonse mane kukabe kutamani.”—Intembauzyo 136:25.

9. Nokuba kuti Jehova ngu Leza wakuyando, ino ncinzi ncasula?

⁹ Jehova ngu Leza waluyando, pele ulabusulaika bubi. Mucikozyanyo, mubbuku lya Intembauzyo 5:4-6 lyaamba Jehova kuti: “Toli Leza uukkomanina bubi . . . “Tobayandi aabo boonse bacita zibi.” Alimwi “ulabasesemwa basinkondo abasilweeno.”

10, 11. (a) Ino ncinzi ciyoocitika kubantu babi? (b) Ino Jehova uyoobalumbula buti bantu bamvwida?

¹⁰ Aciindi ceelede, Jehova uyoogwisya bubi mububumbo boonse akaambo kakuti ngu Leza waluyando alimwi ulibusulide bubi buli boonse. Ijwi lya Leza litusyomezya kuti: “Bantu babi bayoonyonyoonwa, pele aabo balangila Jehova bayookona nyika. Kusyeede kaindi kaniini buyo, ibantu babi tabakabi limbi pe.” Basinkondo ba Jehova “bayoozimaana mbuli busi.”—Intembauzyo 37:9, 10, 20.

¹¹ Ijwi lya Leza litusyomezya kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Intembauzyo 37:29) Ibantu basyomeka “bayoobotelwa kapati muluumuno lunji.” (Intembauzyo 37:11) Ino nkaambo nzi? Nkaambo Leza wesu siluyando lyoonse ucita zintu zibotu kubabelesi bakwe basyomeka. Ibbaibbele litwaambila kuti: “Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.” (Ciyubunuzyo 21:4) Eelo kaka oobu mbulangizi bubotu bwakumbele kubantu bamvwida ibalumba kuluyando lwa Leza!

12. Ino “muntu uunyina kampenda” muntu uuli buti?

¹² Ibbaibbele litwaambila kuti: “Amubikkile maano kumuntu uunyina kampenda, akulanga muntu uululeme, nkaambo kumbele muntu ooyo uyooba muluumuno. Pele basizibi boonse bayoonyonyoonwa; kumbele bantu babi bayooloba.” (Intembauzyo 37:37, 38) “Muntu uunyina kampenda” ulimuzyi Jehova alimwi a Mwanaakwe alimwi ulacita kuyanda kwa Leza. (Amubale Johane 17:3.) Ulasyoma kuti “inyika ilamana antoomwe azisusi zyanjiyo, pele ooyo uucita kuyanda  kwa Leza unooliko lyoonse mane kukabe kutamani.” (1 Johane 2:17) Akaambo kakuti mamanino aanyika alaafwaafwi, cilayandika cakufwambaana kuti ‘tulangile Jehova akutobela nzila yakwe.’—Intembauzyo 37:34.

13. Ino ninzila nzi iinda zyoonse Leza mbwaakatondezya luyando?

¹³ Nokuba kuti tatulondokede, tulakonzya kumumvwida Leza. Alimwi tulakonzya kuba acilongwe a Jehova akaambo kacinunuzyo ca Jesu, nzila iinda zyoonse Leza mbwaakatondezya luyando. Jehova wakapa cinunuzyo kutegwa bantu bamvwida bakabe acoolwe cakwaangununwa kucibi alufwu. (Amubale Baroma 5:12; 6:23.) Jesu wakali kusyomeka kuli Leza kwaciindi cilamfwu kujulu, aboobo Jehova wakalijisi lusyomo lwakuti Mwanaakwe wakali kukonzya kuzumanana kusyomeka anyika. Mbuli Usyi siluyando, Jehova cakamucisa kapati kubona bantu mbobakapenzya Mwanaakwe calunya. Pele Jesu cakusyomeka wakatondezya kuti Leza nguujisi nguzu zyakweendelezya alimwi wakatondezya kuti muntu uulondokede ulakonzya kuzumanana kusyomeka kuli Leza nomuba mubukkale bukatazya.

14, 15. Ino lufwu lwa Jesu lubagwasya buti bantu?

¹⁴ Nomuba mumasunko aakatazya kapati, Jesu wakazumanana kusyomeka alimwi wakatondezya kuti Jehova nguweelela kulela. Tweelede kulumba kuti kwiinda mulufwu lwakwe, Jesu wakapa cinunuzyo nkaambo cipa bantu coolwe cakupona kukabe kutamani munyika ya Leza mpya! Mwaapostolo Paulo wakaamba luyando Jehova a Jesu ndobakatondezya kwiinda mucinunuzyo. Wakaamba kuti: “Notwakacili bantu batajisi nguzu, Kristo wakafwida basizibi aciindi cibikkidwe. Nkaambo nciyumu kuti muntu umwi alisungule kufwida mululami; pele kujatikizya muntu mubotu ambweni umwi inga walisungula buya kumufwida. Pele Leza watutondezya luyando lwakwe mwini mukuti notwakacili basizibi, Kristo wakatufwida.” (Baroma 5:6-8) Mwaapostolo Johane wakalemba kuti: “Lino oobu  mbolwakayubununwa luyando lwa Leza kulindiswe, Leza wakatuma Mwanaakwe simuzyalwaalikke munyika ikutegwa tukonzye kuba abuumi kwiinda mulinguwe. Iluyando lwaambwa waawa taluli akaambo kakuti swebo twali kumuyanda Leza pe, pele walo nguwakatuyanda akutuma Mwanaakwe kuti abe cipaizyo cakumanya zibi zyesu akutuyanzanya a Leza.”—1 Johane 4:9, 10.

¹⁵ Jesu wakaamba kuti “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.” (Johane 3:16) Nokuba kuti cakamucisa kapati Jehova, wakaaba Mwanaakwe kuba cinunuzyo. Eeci citondezya mbwabayanda kapati bantu. Alimwi luyando oolu lunooliko lyoonse. Paulo wakalemba kuti: “Ndilisinizyide kuti lube lufwu, naa buumi, naa bangelo, naa mfwulumende, naa zintu ziliko lino, naa zilangilwa kumbele, naa nguzu, naa zintu zili mujulu, naa zili ansi, naa cilenge cimbi cili coonse tazikonzyi pe kutwaandaanya kuluyando lwa Leza luli muli Kristo Jesu Mwami wesu.”—Baroma 8:38, 39.

16. Ino Bwami Bwabu Mesiya ninzi, alimwi ino nguni Jehova ngwaakabikka kuba Mweendelezi?

¹⁶ Mfwulumende ya Leza, Bwami bwabu Mesiya, ncitondezyo acimbi citondezya luyando lwa Jehova kubantu. Munzila nzi? Jehova wakamubikka kale Muleli uuyanda bantu alimwi weelela kulela, Jesu Kristo. (Tusimpi 8:31) Leza wakasala bantu bali 144,000 kuti bakalele a Kristo kujulu. Ciindi nobabusyigwa, balaunka aluzyibo lwabo ilujatikizya mbocakali kumvwika kuba muntu. (Ciyubunuzyo 14:1) Ciindi Jesu naakali anyika, Bwami ngowakali mutwe mupati wanzyakali kuyiisya, alimwi wakayiisya basikwiiya bakwe kupaila: “Taateesu ooli kujulu, alisalazyigwe zina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:9, 10) Tulangila kumbele noiyakuzuzikizyigwa mipailo iili boobu ciindi Bwami wa Leza nobuyooleta zilongezyo zinji kubantu.

17. Amweezyanisye bweendelezi bwa Jesu kubweendelezi bwabantu.

¹⁷ Kuli kwiindana kupati kuliko akati kabweendelezi bwa Jesu bwaluyando abweendelezi bwabantu. Bweendelezi bwabantu bwapa kuti kube nkondo zinji izyajaya mamiliyoni aabantu. Pele Mweendelezi wesu, Jesu, masimpe ulatuyanda alimwi wiiya bube bubotu bwa Leza, ikapati luyando. (Ciyubunuzyo 7:10, 16, 17) Jesu wakaamba kuti: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya eelyo mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.” (Matayo 11:28-30) Eelo kaka eeci ncisyomezyo caluyando!

18. (a) Ino ncinzi cali kucitika kuzwa mu 1914? (b) Ino tuyoolanga-langa nzi mucibalo citobela?

¹⁸ Ibbaibbele litondezya kuti Bwami bwa Leza bwakatalika kulela kujulu mu 1914. Kuzwa ciindi eeco, kuli kubunganya kwamamanino kwabaabo ibayoolela a Jesu kujulu alimwi akubunganya “nkamu mpati” yabantu ibayoofwutuka mamanino abweende buno akunjila munyika mpya. (Ciyubunuzyo 7:9, 13, 14) Ino nkamu mpati eeyi nimpati buti mazuba aano? Ino ncinzi Leza ncayanda kuli mbabo? Cibalo citobela cilanga-langa mibuzyo eeyi.