1. Ino mulimo wakukambauka wakali kuyandika buti kuli Jesu? Amupandulule.

JESU wakali kuyanda kubandika kujatikizya Bwami bwa Leza. Ciindi Jesu naakali anyika, wakabandika kujatikizya Bwami kwiinda makani aambi aali woonse. Wakabwaamba Bwami ziindi ziinda 100 ciindi naakali mumulimo wakukambauka. Bwami bwakali kuyandika kapati kuli Jesu.—Amubale Matayo 12:34.

2. Ino kwakali bantu bongaye ibakamvwa malailile aalembedwe kulugwalo lwa Matayo 28:19, 20, alimwi ino nkaaambo nzi ncotwaambila boobo?

² Mbwaakabusyigwa buyo, Jesu wakaswaangana abantu bali 500 ibakali kulangilwa kuba basikwiiya. (1 Bakorinto 15:6) Ambweni eeci nceciindi naakabapa malailile aakukambaukila “bantu bazisi zyoonse.” Mulimo ooyu tiiwakali kuyooba muuba-uba. * (Amubone makani aayungizyidwe.) Wakabaambila kuti mulimo wakukambauka wakali  kuyoozumanana kwaciindi cilamfwu, kusikila “kumamanino aabweende bwazintu.” Ciindi nomukambauka makani mabotu mazuba aano, mugwasya kuzuzikizyigwa kwabusinsimi oobu.—Matayo 28:19, 20.

3. Ino nzintu nzi zyotatwe izyatugwasya kukambauka makani mabotu?

³ Jesu naakamana kupa malailile aakukambauka, wakaamba kuti: “Ndilaandinywe.” (Matayo. 28:20) Aboobo Jesu wakasyomezya basikwiiya bakwe kuti unoweendelezya mulimo wakukambauka alimwi akuti wakali kuyoobagwasya kukambauka munyika yoonse. Jehova awalo ulaandiswe. Watupa ‘cintu cibotu cili coonse’ kutegwa atugwasye kukambauka. (Bahebrayo 13:20, 21) Mucibalo eeci, tulanga-langa zintu zibotu zyotatwe: (1) zibelesyo nzyotwapegwa, (2) inzila nzyotwabelesya, alimwi (3) lwiiyo ndotwapegwa. Kusaanguna, atulange-lange zibelesyo zimwi nzyotwali kubelesya mumyaka iili 100 yainda.

4. Ino zibelesyo zinji ziindene-indene zyatugwasya buti mumulimo wesu wakukambauka?

⁴ Jesu wakakozyanisya mulumbe wa Bwami kunseke iyakaminzyigwa mubulongo busiyene-siyene. (Matayo 13:18, 19) Kutegwa abambe bulimo, mulimi ubelesya zibelesyo ziindene-indene. Munzila njiyona, Mwami wesu watupa zibelesyo nzyotukonzya kubelesya kugwasya bantu kutambula mulumbe wesu. Zibelesyo zimwi zyakabelesyegwa buyo kwaciindi cisyoonto, pele zimwi zicibelesyegwa amazuba aano. Pele zibelesyo zyoonse zyatugwasya kuyungizya luzyibo lwesu mulimo wakukambauka.

5. Ino kakkaadi ikakalembedwe mulumbe kakali kakkaadi kali buti, alimwi kakali kubelesyegwa buti?

⁵ Mu 1933, basikumwaya bakatalika kubelesya makkaadi aakalembedwe mulumbe uupa bumboni, cibelesyo icakagwasya banji kutalika kukambauka. Aaka kakali kakkaadi kakalembedwe mulumbe mufwaafwi alimwi uutakatazyi wamu Bbaibbele. Zimwi ziindi kakkaadi kapya ikajisi mulumbe mupya kakali kumwaigwa. Mukwesu Erlenmeyer wakali amyaka yakuzyalwa iili 10 ciindi naakabelesya kakkaadi kakalembedwe mulumbe ciindi cakusaanguna. Wakapandulula kuti: “Twakali kuvwula kutalisya mubandi kwiinda mukwaamba kuti, ‘Sena inga mwakabala kakkaadi aaka?’ Mukamwini ŋanda amana kubala kakkaadi, twakali kumupa mabbuku akuunka.”

6. Ino makkaadi aakalembedwe mulumbe uupa bumboni akagwasya buti?

⁶ Makkaadi aakalembedwe mulumbe uupa bumboni akali kugwasya basikumwaya munzila zisiyene-siyene. Mucikozyanyo, basikumwaya bamwi bakalaansoni, alimwi nokuba kuti masimpe bakali kuyanda kukambauka, tiibakazyi zyakwaamba. Basikumwaya bambi bakali basicamba kapati. Bakali kukonzya kwaambila mukamwini ŋanda zyoonse nzyobakazyi mumaminiti buyo masyoonto, pele nzyobakali kwaamba tiizyakali kwaambwa cabupampu. Imakkaadi aalembedwe mulumbe akagwasya basikumwaya boonse kukambauka munzila iilimvwisya alimwi iitakatazyi.

7. Ino mbuyumu-yumu nzi bwakaliko mukubelesya makkaadi?

⁷ Pele alimwi kwakali buyumu-yumu. Mucizyi  Grace Estep wakaamba kuti: “Ziindi zimwi twakali kubuzyigwa kuti, ‘Ino kaamba nzi kakkaadi aaka? Sena inga tiimwandaambila buyo zilembedwe mpawo?’” Alimwi, bamukamwini ŋanda bamwi tiibakali kukonzya kubala icakalembedwe amakkaadi. Bamwi bakali kubweza buyo makkaadi akujala kumulyango. Bantu bamwi tiibakali kuyanda mulumbe wesu, aboobo bakali kwaazapaula makkaadi. Nokuba kuti kwakali buyumu-yumu, makkaadi aalembedwe mulumbe akagwasya basikumwaya kukambaukila basimukobonyina akulizyibya kuti bakali bakambausi ba Bwami.

8. Ino cilimba camalekkoodi cakali kubelesyegwa buti? (Amubone cifwanikiso cili kumatalikilo aacibalo.)

⁸ Cibelesyo acimbi icakali kubelesyegwa nowakainda mwaka wa 1930 ncilimba camalekkoodi. Bakamboni bamwi bakali kuciita kuti Aroni nkaambo ncecakali kwaambaula muciindi cambabo. (Amubale Kulonga 4:14-16.) Ikuti naa mukamwiniŋanda wazumina kuswiilila, sikumwaya wakali kumubikkila lekkoodi yamakani aa Bbaibbele mafwaafwi amana wamupa mabbuku. Zimwi ziindi, banamukwasyi boonse bakali kubungana antoomwe kuswiilila makani! Mu 1934, ba Watch Tower Society bakatalika kupanga zilimba zyamalekkoodi zyakubelesya mubukambausi. Mukuya kwaciindi, bakwesu bakalekkoda makani aasiyene-siyene aali 92.

9. Ino cilimba camalekkoodi cakagwasya buti?

⁹ Ciindi ba Hillary Goslin nibakamvwa makani omwe akati kayaayo aakapegwa, bakacilomba cilimba kwamvwiki kutegwa baambile basimukobonyina kujatikizya mulumbe wamu Bbaibbele. Akaambo kaceeci, bantu banji, bakaba aluyandisisyo mukasimpe akubbapatizyigwa. Bana basimbi bobilo bamukwesu Goslin mukuya kwaciindi bakaunka ku Cikolo ca Gilead akuba bamisyinali. Mbubwenya mbuli makkaadi aakalembedwe mulumbe, cilimba camalekkoodi cakabagwasya basikumwaya banji kutalika kukambauka. Mukuya kwaciindi, kwiinda Mucikolo Camulimo Weendelezyegwa a Leza, Mwami wakali kuyooyiisya bantu bakwe kuba bamayi bacibwene.

10, 11. Ino miteende alimwi awailesi zyakabelesyegwa buti kukambauka makani mabotu, alimwi nkaambo nzi nzila eezyi ncozyakali kubeleka kabotu?

¹⁰ Mubweendelezi bwa Mwami wesu, bantu ba Leza babelesya nzila zisiyene-siyene kusikila bantu banji mumulimo wabukambausi. Nzila eezyi zyakali kuyandika kwaambisya ciindi nokwakali buyo babelesi basyoonto. (Amubale Matayo 9:37.) Mucikozyanyo, kaindi miteende yakali kubelesyegwa kukambauka makani mabotu. Mvwiki amvwiki Mukwesu Russell wakali kutuma makani aa Bbaibbele kuli basimubweza twaambo. Mpoonya bakali kutuma makani aakwe kuti alembwe mumiteende yaku Canada, Europe, alimwi aku United States. Kuzikusika mu 1913, makani aa Mukwesu Russell akali kusimbwa mumiteende iili 2,000 akubalwa abantu batandila ku 15,000,000.

 ¹¹ Wailesi ayalo yakabelesyegwa munzila iigwasya kukambauka makani mabotu. Mu April 16, 1922, Mukwesu Rutherford wakapa makani aakwe aakusaanguna awailesi, alimwi bantu batandila ku 50,000 bakaswiilila. Tiilyakalampa, twakatalika kubelesya sikapepele wesu iwakali kwiitwa kuti WBBR, aboobo pulogilamu yakusaanguna yakamvwugwa mu February 24, 1924. Ngazi Yamulindizi yamu December 1, 1924, yakaamba kuti: “Tulisinizyide kuti wailesi nenzila iitaduli alimwi mbotu yakubelesya kumwaya mulumbe wakasimpe kwiinda nzila zyoonse zyakabelesyegwa kale.” Mbubwenya mbuli miteende, wailesi yakagwasya kusikila bantu banji mumasena mwakali basikumwaya basyoonto.

12. (a) Ino nimbazu nzi zyabukambausi bwakubuleya nzyomukkomanina kucita? (b) Ino ncinzi cikonzya kutugwasya kuzunda penzi lyakuyoowa ndyotukonzya kuba alyalo kujatikizya bukambausi bwakubuleya?

¹² Bukambausi bwakubuleya ninzila iibeleka kabotu iibelesyegwa mazuba aano kusikila bantu. Tulasolekesya kukambaukila bantu mbuli muzitisyini zyamabbaasi, muzitisyini zyazitima, alimwi amumasena aakusiila myootokala, mumasena mobaswaanganina banamaleya alimwi amumisika. Sena bukambausi bwakubuleya bulamuyoosya? Ikuti kakuli boobo, amupaile kulomba lugwasyo alimwi amulange Mukwesu Manera, mulangizi weendeenda ncaakaamba: “Nzila imwi aimwi mpya yamulimo twakali kwiibona kuba mbazu iimbi yakubelekela Jehova, kuba nzila  iimbi yakutondezya lusyomo lwesu kulinguwe, nzila iimbi yakusunka kusyomeka kwesu kulinguwe, aboobo twakaliyandide kutondezya kuti twakali kuyanda kumubelekela munzila iili yoonse njatwaambila.” Ciindi notuzunda penzi lyakuyoowa akubelesya nzila zipya kukambauka, tuyumya lusyomo lwesu muli Jehova akuba bakambausi bacibwene.—Amubale 2 Bakorinto 12:9, 10.

13. Ino nkaambo nzi kubelesya webbusaiti yesu ncoili nzila mbotu yakukambauka, alimwi nzyakuluula nzi nzyomwakajana kwiinda mukubelesya webbusaiti yesu?

¹³ Basikumwaya banji balakkomana kwaambila bantu kujatikizya webbusaiti yesu ya jw.org, ooko kwalo nkobakonzya kubala akukkopa mabbuku aamba zya Bbaibbele mumyaambo iinda ku 700. Buzuba abuzuba bantu ibainda ku 1.6 miliyoni balajalula webbusaiti yesu. Ikaindi, wailesi yakali kubelesyegwa kusikila bantu amakani mabotu mumasena aali kule kapati. Mazuba aano, webbusaiti yesu ilacita mbubwenya.

14. Ino ndwiiyo nzi basikumwaya ndobakali kuyandika, alimwi ncikolo nzi cabagwasya kuba bamayi bacibwene?

¹⁴ Zibelesyo alimwi anzila nzyotwabandika zyabeleka kapati. Nokuba boobo, basikumwaya ibakaliko mumyaka eeyo yakumatalikilo bakeelede kuyiisyigwa kuba bakambausi. Mucikozyanyo, zimwi ziindi mukamwiniŋanda tanaakali kuzumina nzyaakamvwa acilimba camalekkoodi. Zimwi ziindi mukamwini ŋanda wakali kutondezya luyandisisyo akuyanda kwiiya zinji. Basikumwaya bakeelede kuzyiba mbobakonzya kwiingula bantu bakazya munzila yabupampu alimwi ambobakonzya kuba bamayi bacibwene. Cakutadooneka, kwiinda mukugwasyigwa amuuya uusalala wa Leza, Mukwesu Knorr wakabona kuti cakali kuyandika kuli basikumwaya kwiiya mbobakeelede kubandika mumulimo wabukambausi. Aboobo kutalikila mu 1943, mbungano zyakatalika kuba a Cikolo Camulimo Weendelezyegwa a Leza. Cikolo eeci cakabagwasya boonse kuba bamayi bacibwene.

15. (a) Ino ncinzi cakabacitikila bamwi ciindi nobakali kupa makani Mucikolo Camulimo Weendelezyegwa a Leza? (b) Ino cisyomezyo ca Jehova cilembedwe mulugwalo lwa Intembauzyo 32:8 cazuzikizyigwa buti kulindinywe?

¹⁵ Bakwesu banji tiibakazyibide kwaambaula kubuleya. Mukwesu Ramu ulayeeya makani aakwe aakusaanguna mu 1944. Makani akayeeme amuntu wamu Bbaibbele wazina lya Doegi. Wakaamba kuti: “Maulu amaanza aangu akali kubimba alimwi ndakali kuluma menyo.” Wakayungizya kuti: “Eeci ncecakandicitikila ciindi cakasaanguna acibumbili, pele tiindakaleka.” Nokuba kuti tiicakali cuuba-uba, bana abalo bakali kupa makani mucikolo. Mukwesu Manera ulayeeya cakamucitikila mwana musankwa umwi ciindi naakapa makani aakwe aakusaanguna: “Wakaliyoowede kapati cakuti naakatalika  kupa makani aakwe, wakatalika kulila. Pele kakanzide kupa makani, wakalila mumakani aakwe oonse.” Ambweni tamwiinguli lyamiswaangano naa kutola lubazu akaambo kakuti mulaansoni naa mulimvwa kuti inga tiimwacikonzya. Ikuti kacili boobo, amumulombe Jehova kuti amugwasye kuzunda penzi lyakuyoowa. Uyoomugwasya mbuli mbwaakagwasya basicikolo aabo bakusaanguna ibakali Mucikolo Camulimo Weendelezyegwa a Leza.—Amubale Intembauzyo 32:8.

16. (a) Ino Cikolo ca Gilead cakajisi mbaakani nzi kaindi? (b) Ino Cikolo ca Gilead cijisi mbaakani nzi kutalikila mumwaka wa 2011?

¹⁶ Mbunga ya Leza alimwi yapa lwiiyo kwiinda mu Cikolo ca Gilead. Mbaakani imwi yacikolo eeci njakugwasya basicikolo kuyumya kuyandisisya kwabo kukambauka makani mabotu. Cikolo ca Gilead cakatalika mu 1943, aboobo kuzwa leelyo, basicikolo bali 8,500 bayiisyigwa akutumwa kuzisi zili 170. Kuzwa mu 2011, aabo batambwa kucikolo eeci mbaapainiya baalubazu, balangizi beendeenda, bamukwasyi wa Beteli, naa bamisyinali batanaunkide ku Gilead.

17. Ino Cikolo ca Gilead cagwasya buti?

¹⁷ Sena Cikolo ca Gilead cagwasya? Inzya. Amubone cakacitika ku Japan. Mu August 1949, kwakali basikumwaya batasiki ku 10 mucisi eeci. Pele kumamanino amwaka ngoonya ooyu, bamisyinali bali 13 bakali kukambauka abasikumwaya bamucisi eeci. Mazuba aano, kuli basikumwaya bali 216,000 mu Japan, alimwi afwaafwi fwaafwi acisela cabasikumwaya aaba mbaapainiya!

18. Ino nzikolo nzi azimbi nzyotujisi?

¹⁸ Tulijisi zikolo azimbi zinji, mbuli Cikolo Camulimo wa Bwami, Cikolo Camulimo Wabupainiya, Cikolo Cabakambausi ba Bwami, Cikolo ca Balangizi Babbazu Alimwi Abamakaintu Babo, Cikolo ca Bamukkomiti ya Mutabi Alimwi a Bamakaintu Babo. Zikolo eezyi zyazwidilila kuyiisya bakwesu abacizyi alimwi zyayumya lusyomo lwabo. Cilalibonya kuti Jesu wazumanana kuyiisya bantu banji.

19. Ino ncinzi ncaakaamba Mukwesu Russell kujatikizya mulimo wakukambauka, alimwi ino eeci cazuzikizyigwa buti?

¹⁹ Bwami bwa Leza bwalela kwamyaka iinda ku 100. Muciindi eeci, Mwami wesu, Jesu Kristo, wazumanana kuusololela mulimo wakukambauka. Mu 1916, Mukwesu Russell wakasyoma kuti kukambauka kwamakani mabotu kwakali kuzooyoyaambele munyika yoonse. Wakaamba kuti: “Mulimo ooyu uyaambele cakufwambaana, alimwi ulazumanana kuyaambele, nkaambo kuli mulimo wanyika yoonse weelede kucitwa mukukambauka ‘makani mabotu aa bwami.’” (Faith on the March, aba A. H. Macmillan, peeji 69) Mulimo ooyu ulimukucitwa mazuba aano! Tulamulumba Jehova, Leza waluumuno, kuti ulatupa zyoonse nzyotuyandika kutegwa tucite kuyanda kwakwe!