MAKANI AABUUMI
Ndakaba Aluumuno a Leza Alimwi Abamaama
BAMAAMA bakandibuzya kuti: “Ino nkaambo nzi ncotakombi basikale? Ino tozyi kuti nkoli akaambo kambabo? Sena tokoobalumba? Ino inga wazileka buti zilengwa nzyobakatusiila basikale? Kukaka kulemeka basikale ncimwi buyo akwaamba kuti bukombi bwesu mbwabufwubafwuba.” Nobakamana kwaamba majwi aaya, bamaama bakatalika kulila.
Myezi misyoonto yamusyule, Bakamboni ba Jehova bakabuzya bamaama naa inga bayanda kwiiya Bbaibbele. Tiibakali kuyanda kwiiya, pele kutondezya bulemu, bakabaambila kuti batalike kwiiya andime. Mpoonya lino bakandinyemena, icintu catakali kucitika-citika akaambo kakuti ndakali kubamvwida lyoonse. Nokuba boobo akaambo kakuti ndakali kuyanda kukkomanisya Jehova, aciindi eeci ndakakaka kubamvwida. Tiicakali cuubauba, pele Jehova wakandipa nguzu.
KWIIYA KUJATIKIZYA JEHOVA
Bamukwasyi wangu bakali kuzulilwa mucikombelo ca Cibbuda, mbuli bantu banji mu Japan. Pele nokwakainda myezi yobilo kandiiya a Bakamboni ba Jehova, ndakasyoma kuti Bbaibbele ncolyaamba ncamasimpe. Nondakaiya kuti ndakalijisi Taata wakujulu, ndakali kuyandisya kumuzyiba kabotu. Kumatalikilo, mebo abamaama twakali kukkomana kubandika nzyondakali kwiiya. Ndakatalika kujanika kumiswaangano ya Munsondo ku Ŋanda ya Bwami. Mbondakali kuyaabwiiya zinji, ndakaambila bamaama kuti ndakali kuyanda kucileka kutola lubazu muzilengwa zya Cibbuda. Cakutayeeyela, bakacinca. Bakaamba kuti, “Kuba amuntu mumukwasyi uutajisi luyando kuli basikale masampu.” Bakandaambila kuti ndileke kwiiya Bbaibbele akujanika kumiswaangano. Tiindakali kuyeeyela kuti bamaama inga baamba boobu! Bakaba mbuli kuti muntu uumbi buyo.
Bataata bakazumunizyanya abamaama. Ndakaiya mulugwalo lwa Baefeso caandaano 6 kuti Jehova uyanda kuti kandilemeka bazyali bangu. Ndakali kuyanda kuti mukwasyi wangu ube aluumuno alimwi, aboobo ndakayeeya kuti ikuti ndibamvwide, mukuya kwaciindi bakali kuyoondimvwida. Aciindi eeco, ndakeelede kulibambila misunko yakucikolo, aboobo ndakazumina kucita mbubonya bazyali bangu mbobakaamba kwamyezi yotatwe. Pele ndakaambila Jehova kuti ndiyootalika kujanika kumiswaangano alimwi ndaakumanizya buyo.
Kusala kwangu kwakali kubi akaambo katwaambo tobilo. Cakusaanguna, ndakayeeya kuti yakwiinda myezi yotatwe ndicinoojisi luyandisisyo lwakubelekela Jehova. Muciindi caboobo, cilongwe cangu anguwe cakaleka kuyuma mukaindi buyo kasyoonto. Cabili, bamaama
abataata bakasoleka canguzu kundilesya kubelekela Jehova.LUGWASYO ALIMWI AKUKAZYIGWA
Ku Ŋanda ya Bwami, ndakajana Bakamboni banji ibakali kukazyigwa amikwasyi yabo. Bakandigwasya kusyoma kuti Jehova wakali kuyoondiyumya. (Matayo 10:34-37) Bakandipandulwida kuti ikuti naa ndazumanana kusyomeka kuli Jehova, mukwasyi wangu wakali kukonzya kwiiya kujatikizya nguwe. Ndakali kuyanda kusyoma Jehova, aboobo ndakatalika kupaila kapati.
Mukwasyi wangu wakandikazya munzila zisiyene-siyene. Bamaama bakandikombelezya kuti ndileke kwiiya alimwi bakasoleka kundipa twaambo twakuti ndileke. Ziindi zinji, ndakali kuumuna buyo. Ikuti ndaamba cili coonse, kanji-kanji twakali kukazyanya akaambo kakuti toonse twakali kusoleka kutondezya kuti twakaliluzi. Lino ndabona kuti ikuti naa nondakali kulemeka mbobakali kulimvwa bamaama alimwi azintu nzyobakali kusyoma, ambweni zintu nozyakali kabotu asyoonto. Bazyali bangu bakali kundipa milimo minji kutegwa kanditazwi aŋanda. Zimwi ziindi bakali kundijalila anze aaŋanda naa kutandisiila cakulya.
Bamaama bakalomba bantu bamwi kuti baambaule andime kutegwa ndicince mizeezo. Bakaambaula abayi bangu, pele eeci tiicakabeleka. Bamaama bakanditola kubapati babo bamulimo kutegwa bandizule kusyoma kuti zikombelo zimbi zyoonse zyakanyina mulimo pe. Alimwi bakatuma fooni kubabbululu besu akulila nobakali kubakombelezya kuti babagwasye. Eeci cakandinyemya kapati. Pele kumiswaangano, baalu bakandaambila kuti ciindi bamaama nobakali kwaambila bantu bamwi kujatikizya bukkale bwesu, nkokuti bakali kubakambaukila.
Bazyali bangu bakali kuyanda kuti nduunke ku univesiti kutegwa ndikajane mulimo mubotu. Toonse twakalinyemede kubandika kaambo
aaka munzila iili kabotu, aboobo ndakabalembela magwalo aali mbwaabede kupandulula mbaakani zyangu. Bataata bakanyema kapati akwaamba kuti, “Ikuti koyeeya kuti inga waujana mulimo, ukaujane juunza, ikuti naa pe, uzwe muŋanda muno.” Ndakapaila kuli Jehova akumulomba kuti andigwasye. Buzuba bwakatobela, nondakali mubukambausi, bacizyi bobilo baindene bakandipa mulimo wakuyiisya bana babo. Bataata tanaakabakkomanisya makani aaya, aboobo bakaleka kundaambauzya akundibikkila maano. Bamaama bakaamba kuti nocakainda kubota nondakali cigwebenga kuleka kuba umwi wa Bakamboni ba Jehova.Jehova wakandigwasya kululamika mbondakali kuyeeya alimwi akuzyiba ncondakeelede kucita
Zimwi ziindi ndakali kuyeeya ikuti naa ncobeni Jehova wakali kuyanda kuti kandibakazya bazyali bangu munzila iili boobu. Aboobo ndakapaila kuli Jehova akuzinzibala kuyeeya kujatikizya ncolyaamba Bbaibbele kujatikizya luyando lwakwe. Eeci cakandigwasya kuzibona munzila yeelede zintu alimwi cakandipa kuzyiba kuti bazyali bangu bakali kundikazya akaambo kakuti bakali kulibilika akaambo kandime. Jehova wakandigwasya kululamika mbondakali kuyeeya alimwi akuzyiba ncondakeelede kucita. Alimwi kuunka mubukambausi lyoonse cakandipa kuukkomanina mulimo. Inzya, ndakali kuyanda kuba mupainiya.
KUBELEKA KANDILI MUPAINIYA
Ciindi bacizyi bamwi nobakamvwa kuti ndakali kuyanda kuba mupainiya, bakandaambila kuti ndilindile kusikila bazyali bangu bakakkazike myoyo. Ndakapaila kulomba busongo, ndakavwuntauzya, ndakayeeya kujatikizya twaambo ncondakali kuyandila kucita bupainiya, alimwi ndakabandika abakwesu abacizyi basimide. Mpoonya ndakayeeya kuti ndakali kuyanda kukkomanisya Jehova. Alimwi ndakayeeya kuti nokuba kuti inga ndalindila kwaciindi cili mbocibede kanditanatalika bupainiya, bazyali bangu balakonzya kuyoondikazya mbubwenya buyo.
Ndakatalika bupainiya mumwaka ngondakali kumanizya lwiiyo lwangu lwakusekondali. Nondakacita bupainiya kwaciindi cili mbocibede, ndakali kuyanda kuunka kubusena bubulide. Pele bamaama abataata tiibakali kuyanda kuti ndizwe aŋanda. Aboobo ndakalindila kusikila nondakakkwanya myaka yakuzyalwa iili 20. Mpoonya ndakalomba ofesi yamutabi kuti inditume kufwaafwi ababbululu bangu kucooko icili kumusanza aacisi ca Japan kutegwa bamaama batanoolibiliki kapati.
Nondakali mumulimo ooyu, ndakakkomana kapati kubona ziiyo zyangu zya Bbaibbele kazibbapatizyigwa. Ndakatalika kwiiya Chingisi akaambo kakuti ndakali kuyanda kucita zinji mumulimo wangu wakukambauka. Mpoonya kubona busungu bwabapainiya bobilo baalubazu mumbungano yangu, alimwi ambobakali kugwasya bamwi, ambebo ndakayanda kuti ndibe mupainiya waalubazu. Aciindi eeci, bamaama bakaciswa kapati ziindi zyobilo, alimwi zyoonse ziindi zyobilo eezyi, ndakaunka kuŋanda kuyoobalanganya. Eeci cakabagambya, aboobo bakabomba moyo asyoonto.
ZILONGEZYO ZINJI KUZWA KULI JEHOVA
Nokwakainda myaka iili ciloba, ba Atsushi, umwi wabapainiya baalubazu mbondaamba kale, wakanditumina lugwalo. Wakali kuyanda kukwata aboobo wakandibuzya mbondakali kulimvwa kujatikizya nguwe. Kunyina ambondakali kulimvwa kujatikizya ba Atsushi, alimwi tiindakali kuyeeya kuti abalo kuli mbobakali kulimvwa kujatikizya ndime. Nokwakainda mwezi, ndakaingula kuti ndakali kuyanda kubazyiba kabotu. Ndakabona kuti twakajisi mbaakani zikozyenye. Twakali kuyanda kuzumanana mumulimo waciindi coonse alimwi twakalilibambilide kuzumina kufwumbwa mulimo ngotwakali kukonzya kupegwa. Mukuya kwaciindi, twakakwatana. Ndakakkomana kapati kuti bamaama abataata, alimwi abacibbululu bambi bakaboola kubwiinga bwesu.
Nepal
Mbotwakakwatanina buyo, katucili bapainiya baciindi coonse, ba Atsushi bakasalwa kuba mulangizi wabbazu wakugwasyilizya. Mukuya kwaciindi, twakasalwa kuba bapainiya
baalubazu mpoonya akuyoobelekela mubbazu. Notwakamana kuswaya mbungano zyoonse mubbazu lyesu kwaciindi cakusaanguna, twakatambula fooni kuzwa kuofesi yamutabi. Bakatubuzya ikuti naa inga twazumina kuyoobelekela ku Nepal akuzumanana mumulimo wamubbazu.Kubelekela muzisi ziindene-indene kwandiyiisya zinji kujatikizya Jehova
Ndakalibilika kujatikizya bazyali bangu mbobakali kuyoolimvwa ndaunka kubusena buli kule. Nondakabatumina fooni, bwiinguzi bwabataata bwakali bwakuti, “Muunka kubusena bubotu.” Nsondo yomwe kanditana batumina fooni bataata, beenzinyina bamwi bakabapa bbuku ilyaamba kujatikizya cisi ca Nepal, alimwi bataata bakali kuyeeya kuti bwakali busena bubotu kuswaya.
Twakakkomana kapati kuba akati kabantu baku Nepal basangalizya. Kumane bakayungizya cisi ca Bangladesh kubbazu lyesu. Nokuba kuti cisi ca Bangladesh cakali munsi-munsi a Nepal, cakaliindene kapati. Twakalijisi zintu ziindene-indene mumulimo wesu wamumuunda. Nokwakainda myaka yosanwe, bakatutuma kuyoobelekela ku Japan alimwi, kwalo nkotukkomene mumulimo wamubbazu.
Ndakaiya zinji kujatikizya Jehova notwakali kubelekela ku Japan, Nepal, alimwi aku Bangladesh. Bantu muzisi eezyi balijisi bukkale bwiindene-indene, alimwi azilengwa ziindene-indene. Alimwi muntu umwi aumwi ulilibedelede. Ndabona Jehova mbwalanganya muntu umwi aumwi kumugama, kumutambula mbwababede, kumugwasya alimwi akumulongezya.
Ndilijisi zintu zinji zindipa kulumba Jehova. Wandizumizya kuti ndimuzyibe akubeleka mulimo wakwe, alimwi wandipa mulumi Munakristo uuli kabotu. Leza wandigwasya kusala kabotu zyakucita, alimwi lino ndilijisi cilongwe cibotu anguwe alimwi amukwasyi wangu. Ndilamulumba Jehova nkaambo mebo abamaama twaba balongwe alimwi. Ndilalumba kapati kuti ndakaba aluumuno a Leza alimwi abamaama.
Tulakkomana kapati mumulimo wamubbazu