Ino Bwami Bwa Leza Ninzi?

INO mutwe wamakani aabukambausi bwa Jesu wakali mutwe nzi? Kweelana ambwaakaamba mwini Jesu, wakali Bwami bwa Leza. (Luka 4:43) Naakali kwaambaula abantu, Bwami wakali kubwaamba cakwiinduluka-induluka. Sena bakagambwa? Sena bakamubuzya ncobwakali kwaamba Bwami oobo? Peepe. Kunyina nokulembedwe mibuzyo iili boobo mu Makani Mabotu. Aboobo, sena Bwami bwa Leza bwakalizibidwe kubantu aabo?

Masimpe ngakuti, Magwalo aakaindi ba Juda ngobakali kulemeka kuti alasalala akabupandulula Bwami oobo, akwaamba munzila iitakatazyi ncobwaamba ancobuyoocita. Mazuba aano, tulakonzya kwiiya zinji kujatikizya Bwami mbuli ba Juda mbobakacita—kwiinda mukubelesya Bbaibbele. Atulange-lange twaambo tuli ciloba twakasimpe Ibbaibbele ncolituyiisya kujatikizya Bwami. Twaambo totatwe twakusaanguna twakaliko kuba Juda mumazuba Jesu ngaakali kupona akatanasika. Twaambo totatwe tutobela twakaambwa a Kristo naa abaapostolo bakwe mumwaanda wamyaka wakusaanguna. Kaambo kamamamanino kalalimvwisya mazuba aano.

1. Bwami bwa Leza nimfwulumende ini-ini eeyo iiyookkalilila kukabe kutamani. Businsimi bwakusaanguna bwamu Bbaibbele bwakaamba kuti Leza uyootuma muntu uyoovwuna bantu basyomeka. Muntu ooyu waambwa kuti “lunyungu,” nguyoogusya mapenzi aakatalika akuzanga kwa Adamu a Eva alimwi a Saatani. (Matalikilo 3:15) Kakwiindide myaka minji, Mwami Davida uusyomeka wakaambilwa cintu cimwi cikkomanisya kujatikizya “lunyungu,” oolu naa Mesiya. Nguuyooba Mwami wa Bwami. Bwami oobu buyooindana abwami buli boonse. Buyookkalilila kukabe kutamani.—2 Samuele 7:12-14.

2. Bwami bwa Leza buyoonyonyoona mfwulumende zyoonse zyabantu. Musinsimi Daniele wakabona mucilengaano zisi zyeendelezya nyika kazyaatulana kuzwa kaindi kusikila mazuba aano. Amubone cintu cikkomanisya kucilengaano eeco: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.” Aboobo mami oonse naa mfwulumende zyamunyika ino, nkondo, kupenga akuulana makulo ziyoomana. Mbuli mubusinsimi bwa Daniele mbobutondezya,  Bwami bwa Leza ino-ino buyooendelezya nyika yoonse. (Daniele 2:44, 45) Takuli buyo kuti Bwami oobu mbwini-bwini pele akuti mbombubo bulikke buyoocaala anyika kabweendelezya. *

3. Bwami bwa Leza buyoomana nkondo, malwazi, nzala noluba lufwu kulugama. Businsimi bukkomanisya bwamu Bbaibbele butondezya ncobuyoocita Bwami bwa Leza aano anyika. Bwami oobo buyoocita ncozitakonzyi kucita mfwulumende zyabantu. Amuyeeye buyo—zibelesyo zyoonse zyankondo ziyoonyonyoonwa! “Ulalesya inkondo mane kusikila kumamanino aanyika.” (Intembauzyo 46:9) Takukabi bamadokotela, zibbadela naa malwazi ali oonse. “Takukooyooba naba omwe akati kabantu banyika uuamba kuti, Ndaciswa.” (Isaya 33:24) Takukabi nzala amalwazi aboola akaambo kakubula zyakulya. “Maila avule ansi, atala lyazilundu.” (Intembauzyo 72:16) Takukabi malila, zyuumbwe, masaini, naa kupenga kuboola akaamba kamapenzi aaya. Lufwu, sinkondoma wesu luyoogusyigwa. Leza ‘lufwu uyoolumenenena mane kukabe kutamani. Mwami Jehova uyoosindula misozi kumasyu oonse.’—Isaya 25:8.

4. Bwami bwa Leza bulijisi Mweendelezi wakasalwa a Leza. Mesiya tanaakalibikka alikke kuba mweendelezi naa kusalwa abantu batalondokede pe. Wakasalwa a Jehova Leza. Mazina aakuti Mesiya a Kristo atondezya kuti wakasalwa a Leza. Mazina oonse aamba “Munanike.” Aboobo Mwami ooyu munanike wakasalwa a Jehova. Leza waamba boobu kujatikizya nguwe: “Ngooyu mulanda wangu nguntabilila, musale wangu moyo wangu nguukondelwa. Ndabika Muuya wangu alinguwe, kuti aletele bamasi lubeta.” (Isaya 42:1; Matayo 12:17, 18) Mulengi wesu alikke nguuzi Mweendelezi ngotuyandika.

5. Mweendelezi wa Bwami bwa Leza watondezya kusyomeka kwakwe kubantu boonse. Jesu waku Nazareta wakazikuba Mesiya wakasyomezyegwa. Wakazyalilwa mumukwasyi Leza ngwaakasala. (Matalikilo 22:18; 1 Makani 17:11; Matayo 1:1) Naakali anyika wakazuzikizya businsimi bunji bwabu Mesiya bwakalembedwe myaanda yamyaka katanasika. Alimwi wakazibwa kali kujulu kuti ngu Mesiya. Ino cakacitika buti eeco? Leza wakaambaula kali kujulu kuzibya Mwanaakwe; bangelo bakaamba kuti Jesu wakali Mesiya wakasyomezyegwa; alimwi Jesu wakacita maleele—zyuulu zyabantu bakaabona akuti akacitwa kwiinda mukubelesya nguzu zya Leza. * Jesu cakwiinduluka-induluka wakatondezya mbwayakuba aakuba Mweendelezi. Wakalijisi nguzu zyakugwasya bantu alimwi wakali kuyanda kucita oobo. (Matayo 8:1-3) Tanaakali kuliyanda, wakali sibuuya, sicamba alimwi uulicesya. Makani azintu nzyaakacita kali waano anyika nkwaali mu Bbaibbele kutegwa bantu boonse kabaabala.

6. Bwami bwa Leza bulijisi bantu bali 144,000 basikulelanyina a Kristo. Jesu wakaamba kuti bantu bamwi kubikkilizya abaapostolo bakwe bakali kuyoolela anguwe kujulu. Wakabaamba kuti “katanga kaniini.” (Luka 12:32) Kumbele mwaapostolo Johane wakaambilwa kuti bakatanga kaniini bayooba bali 144,000. Bayoopegwa mulimo uukkomanisya kujulu, wakulela kabali bami abapaizi antoomwe a Kristo.—Ciyubunuzyo 5:9, 10; 14:1, 3.

7. Bwami bwa Leza bulalela lino kujulu, bulilibambilide kutalika kweendelezya aano anyika yoonse. Kaambo aaka kamamanino nkakaambo kakkomanisya nkotukonzya kwiiya. Ibbaibbele lilapa bumboni bunji butondezya kuti Jesu wapegwa nguzu zyakuba Mwami kujulu. Ulalela lino okuya, muciindi cino alimwi ino-ino uyooendelezya nyika yoonse akuzuzikizya businsimi mbotwaamba kale. Pele mbuti mbotukonzya kusyoma kuti masimpe Bwami bwa Leza buleendelezya lino? Alimwi ino ndilili nobuyootalika kweendelezya anyika?

Bupanduluzi buyungizidwe