Ndilili Bwami Bwa Leza Nobuya Kuboola?

“OMWAMI, sena ulabweedezya bwami ku-Israyeli kuliceecino ciindi?” (Incito 1:6) Baapostolo bakali kuyandisya kuziba Jesu naakali kuyookkazikizya Bwami bwakwe. Nokuba kuti kwainda myaka iitandila ku 2,000, sunu bantu baciyandisya kuziba: Ndilili Bwami bwa Leza nobuya kuboola?

Mbwaanga Jesu mutwe wamakani aakwe mapati aakukambauka akali kwaamba Bwami, mulakonzya kwaamba kuti wakaubandika mubuzyo ooyu. Alimwi masimpe oobo mbwaakacita! Wakaamba ziindi zinji kujatikizya ciindi cimwi ncaakaamba kuti “kubako” kwakwe. (Matayo 24:37) Kubako ooko kuliswaangene akubikkwa kwa Bwami bwabu Mesiya. Ino kubako ooku kwaamba nzi? Atulange-lange twaambo tone twamasimpe Bbaibbele ncolyaamba kujatikizya kubako kwa Kristo.

1. Kubako kwa Kristo kwakali kuyooba kakwiindide ciindi cilamfwu kafwide kale. Jesu wakapa cikozyanyo ncaakalikozyanisya amuntu “wakainka kucisi cimwi icakali kule kuti akalitambwide bwami.” (Luka 19:12) Mbuti cikozyanyo eeco cabusinsimi mbocakazuzikizyigwa? Jesu wakafwa akubusyigwa; mpoonya “wakainka kucisi cimwi icakali kule,” nkokuti kujulu. Kweelana a Jesu mbwaakasinsima mucikozyanyo ceelene, kubako kwakwe mubwami kuyooba kwaakwiinda “ciindi cilamfu.”—Matayo 25:19.

Nokwakainda myaka Jesu kaunkide kale kujulu, mwaapostolo Paulo wakalemba kuti: “Jesu naakamana kutuulila zibi cipaizyo comwe citamani, wakaakukala kululyo lwa-Leza, elyo kuzwa kuciindi eco unoolindila mane basinkondonyina bakabe mbobutandabilo bwamaulu aakwe.” (Ba-Hebrayo 10:12, 13) Aboobo, Jesu naakasika kujulu, wakalindila kwaciindi cilamfwu. Mwanaakwe wakacileka kulindila Jehova Leza naakamubikka kuba Mwami wa Bwami bwabu Mesiya bwakasyomezyegwa kwaciindi cilamfwu. Eeco nceciindi kubako kwa Kristo nokwakatalika. Sena bantu  anyika bakali kukonzya kubona cicitika eeci cikkomanisya?

2. Kubako kwakwe takulibonyi kubantu. Amuyeeye kuti Jesu wakabandika citondezyo cakubako kwakwe. (Matayo 24:3) Ikuti kubako kwakwe nikwakali kulibonya kubantu, sena kwakali kuyandika citondezyo? Mucikozyanyo: Amweezyeezye kuti muunka kwaakubona lwizi. Mulakonzya kubona zikwankwani zimutondezya nzila iitozya kulwizi, pele mwasika kunkomwe, mwaima munsi aameenda, sena inga mwayanda kubona cikwankwani cilembedwe mumabala mapati aakuti “Lwizi”? Peepe! Tamuyandiki cikonkwani cimutondezya cintu ncomubwene, nkaambo mulakonzya kulubona ameso aanu.

Jesu wakapandulula citondezyo cakubako kwakwe, ikutali kwaamba cintu cimwi bantu ncobakonzya kubona ameso aabo pele kubagwasya kuziba cintu cimwi cikonzya kucitika kujulu. Aboobo, Jesu wakaamba kuti: “Ukusika kwa-Bwami bwa-Leza takubonwa.” (Luka 17:20) Aboobo, ino mbuti citondezyo mbocakali kukonzya kutondezya baabo bali anyika kuti kubako kwa Kristo kwatalika?

3. Kubako kwa Jesu kwakali kuyootondezyegwa amapenzi mapati aano anyika. Jesu wakaamba kuti kubako kwakwe kali Mwami kujulu kwakali kuyootondezyegwa aano anyika ankondo, nzala, mizuzumo yanyika, malwazi akuvwula kwamilandu. (Matayo 24:7-12; Luka 21:10, 11) Ino ncinzi cakali kuyoopa kuti kube kupenga koonse ooku? Ibbaibbele lipandulula kuti Saatani, “mwami wenyika ino,” ulaabukali bupati nkaambo kakuti ulizyi kuti ciindi cakwe ncisyoonto alimwi akuti kubako kwa Kristo kali Mwami kwatalika. (Johane 12:31; Ciyubunuzyo 12:9, 12) Zitondezyo zyakuti Saatani ulinyemede alimwi azyakubako kwa Kristo zyavwula kapati mazuba aano. Ikapati kuzwa mu 1914, mwaka basikwiiya twaambo twakaindi ngobaamba kuti ngowakali mwaka wakucinca kupati, bumboni oobu bunji kapati nkobuli nyika yoonse.

Zyoonse eezyo inga zyalimvwisya mbuli kuti makani mabi, pele taali makani mabi. Caamba kuti Bwami bwabu Mesiya bulalela lino kujulu. Ino-ino, mfwulumende eeyo iyootalika kulela nyika yoonse eeyi. Ino mbuti bantu mbobakonzya kubuziba Bwami oobo kutegwa bazumine bweendelezi bwayo akweendelezyegwa?

4. Kubako kwa Jesu kulazibwa amulimo wakukambauka uucitwa nyika yoonse. Jesu wakaamba kuti kubako kwakwe kuyooba mbuli mbwaakabede “mazuba aa-Nowa.” * (Matayo 24:37-39) Nowa tanaakali buyo sikufwala bwato; wakali “mukambausi wabululami.” (2 Petro 2:5) Nowa wakabacenjezya bantu kuti lubeta lwa Leza lwakali afwaafwi.  Jesu wakaamba kuti abalo basikumutobela anyika bakali kuyoocenjezya bantu muciindi cakubako kwakwe. Wakasinsima kuti: “Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Matayo 24:14.

Kweelana ambotwakabona mucibalo cainda, Bwami bwa Leza buyoonyonyoona mfwulumende zyoonse zyamunyika eeyi. Mulimo wakukambuka upa bantu kuziba kuti mfwulumende eeyi yakujulu ino-ino iyoonyonyoona, akupa bantu coolwe cakufwutuka lunyonyooko luboola akuba basikulelwa ba Bwami oobo. Mubuzyo uuyandika kapati ngwakuti, ino muyoocita buti?

Sena Bwami bwa Leza Bwaamba Makani Mabotu kuli ndinywe?

Mulumbe Jesu ngwaakakambauka wakali kupa bulangizi bulibedelede. Kakwiindide myaka minji kuzwa ciindi cabuzangi mu Edeni, Jehova Leza wakabikka bubambe bwakuti kube mfwulumende iyoobambulula zintu, akupa bantu basyomeka kuba muciimo Leza ncaakajisi mumizeezo kumatalikilo—kupona kukabe kutamani muparadaiso aano anyika. Cilakkomanisya kuziba kuti mfwulumende yakasyomezyegwa kaindi lino ilalela kujulu. Tacili cintu cakatazya kumvwisya pele nimfwulumende ini-ini.

Lino, Mwami wakabikkwa a Leza ulalela akati kabasinkondonyina. (Intembauzyo 110:2) Munyika iino mbyaabi iitamuzyi Leza, Mesiya ucita kuyanda kwa Bausyi kwakuyandaula ibayanda kuziba Leza mbwabede akumukomba “mumuuya amubwini.” (Johane 4:24) Bulangizi bwakupona kukabe kutamani mubweendelezi bwa Bwami bwa Leza nkobuli kubantu bamisyobo yoonse, ciimo abukkale bwiindene-indene. (Incito 10:34, 35) Tumukulwaizya kuti mucizumine coolwe ncomwapegwa. Amwiiye makani aamba Bwami bwa Leza lino kutegwa mukonzye kukkomana abuumi mubweendelezi bwakwe bululeme kutamani.—1 Johane 2:17.

Bupanduluzi buyungizidwe

[Zifwanikiso izili apeeji 8]

Makani mabi ngotumvwa abuzuba ncitondezyo cakuti zintu zibotu zili munzila

[Kulumba]

Ntobolo yakudubula ndeke mujulu: Cakafwotolwa aba Basikalumamba baku U.S.