Sena Mwalizyi?

Ndilili Basikupandulula bweende bwanyenyeezi nobakamuswaya Jesu?

Mumakani Mabotu aakalembwa a Matayo atwaambila kuti, “basikupandulula bweende bwanyenyeezi bazwa kujwe” bakamuswaya Jesu akumuletela zipego. (Matayo 2:1-12, NW) Mweelwe wabasikupandulula bweende bwanyenyeezi ibakamuswaya mwana Jesu tawaambidwe alimwi kunyina makani aansiku aatondezya kuti bakali botatwe; alimwi tabaambidwe mazina mu Bbaibbele.

Ibbaibbele lya New International Version Study Bible lyaamba boobu ku Matayo 2:11: “Mukwiindana atunsiyansiya, basikupandulula bweende bwanyenyeezi tiibakamuswaya Jesu kuluba buzuba mbwaakazyalwa mbuli mbobakacita beembezi. Bakazikusika nokwakainda myezi akumuswaya mwana kuŋanda.” Eeci cili boobo nkaambo Heroda naakali kuyandaula kuti amujaye mwana, wakalailila kuti bana basankwa boonse bajisi myaka yakuzyalwa yobilo bajaigwe mu Betelehemu amuzyooko zyoonse. Wakasala myaka eeyo kwiinda mukubala “mbubonya mbuli ciindi ncaakabuzisisya basongo.”—Matayo 2:16.

Ikuti aaba basikupandulula bweende bwanyenyeezi nobakamuswaya Jesu buzuba mbwaakazyalwa akumuletela ngolida azipego zimwi zibotu, Mariya naatakapa buyo nkwilimba zyobilo kakwiindide mazuba aali 40 naakamutola Jesu kutempele ku Jerusalemu. (Luka 2:22-24) Oobu mbobwakali bubambe mu Mulawo kubantu bapengede ibatakali kukonzya kupa mwana aambelele. (Levitiko 12:6-8) Nokuba boobo, zipego eezi zibotu zyeelede kuti zyakabelesyegwa kuula zintu zyakali kuyandika kumukwasyi wa Jesu ku Egepita.—Matayo 2:13-15.

Nkaambo nzi Jesu ncaakatolela mazuba one kuti asike kucuumbwe ca Lazaro?

Kuboneka kuti Jesu mbwaakazibamba zintu kuti zibe boobo. Nkaambo nzi ncotunga twaamba boobo? Amulange-lange cibalo cilembedwe kuli Johane caandano 11.

Lazaro iwakali kukkala ku Betaniya alimwi iwakali mweenzinyina Jesu naakaciswa kapati, bacizyi bakwe bakatuma mulomo kuli Jesu. (Tupango 1-3) Aciindi eeco Jesu wakali kubusena kweendwa mazuba obilo naa kwiinda waawo kusika ku Betaniya. (Johane 10:40) Kulibonya kuti Lazaro wakafwa ciindi Jesu naakautambula mulumbe. Ino ncinzi Jesu ncaakacita? “Wakacilikede mazuba obile mpoonya awo mpaakali kubede,” mpoonya wakaunka ku Betaniya. (Tupango 6, 7) Aboobo, akaambo kakulindila mazuba obilo, akweenda mazuba obilo aambi, cakamupa kuti asike kucuumbwe nokwakainda mazuba one Lazaro kafwide kale.—Kapango 17.

Kumatalikilo, Jesu wakabusya bantu bobilo—omwe mbwaakafwida buyo, mpoonya kulibonya kuti uumwi nokwakainda ciindi cili mbocibede kafwide. (Luka 7:11-17; 8:49-55) Sena wakali kukonzya kubusya muntu wakafwa kwamazuba one imubili wakwe kautalikide kale kubola? (Kapango 39) Cikkomanisya ncakuti, bbuku limwi lipandulula twaambo twamu Bbaibbele lyaamba kuti, ba Juda bamwi bakali kusyoma kuti “ikuti naa kwainda mazuba one muntu kafwide kunyina nakonzya kubuka; nkaambo bakali kuyeeya kuti aciindi aawo mubili wakali talikide kale kubola alimwi muuya iwakali kukwabilila mubili mumazuba otatwe wakaunka.”

Ikuti bantu bamwi ibakali acuumbwe bakali kudooneka, cakasika ciindi lino cakuti balibonene nguzu nzyaakajisi Jesu zyakubusya bantu bafwide. Jesu kaimvwi kucuumbwe cakajalukide wakoompolola kuti: “Lazaro, kozwa omo. Mpoonya oyo uwakafwide wakazwa.” (Tupango 43, 44) Ibubuke, ikutali muzeezo uulubide bantu banji ngobajisi wakuti muntu ulazumanana kupona afwa, mbobulangizi bwini-bwini kubantu bafwide.—Ezekiele 18:4; Johane 11:25.