Nzila Zyikonzya Kupa Mukwasyi Kukkomana

Ikumana Mazwanga

Mulumi waamba kuti: “Kuzwa nitwaakwatana, Mebo a Sarah * twakali kukkala abazyali bangu. Buzuba bumwi, musimbi wamuce wangu wakandilomba kuti ndimutole kuŋanda mumootoka wesu. Ndakazumina alimwi ndakaunka amwanaangu musankwa. Pele nindakajoka, Sarah wakakalala kapati. Twakatalika kukalazyanya abazyali bangu kabaliko, wakandaamba kuti ndili syaabasimbi. Ndakanyema alimwi ndakaamba zyintu zyakamupa kuti anyemene limwi.”

Mukaintu waamba kuti: “Aciindi eeci mwaneesu musankwa wakali kuciswa alimwi tiitwakajisi mali. Aboobo, Fernando naakaunka amusimbi wamuce wakwe amwaneesu mumootoka, zyakandinyemya nzinji. Naakajoka, ndakamwaambila mbondakali kulimvwa. Twakakalazyanya citaambiki alimwi twakali kunongana. Nokwakainda ciindi, ndakalimvwa bubi.”

IKUTI banabukwetene bakalazyanya, sena eeci caamba kuti tabaciyandani? Peepe! Fernando a Sarah baambwa atala aawa balayandana kapati. Pele nomuba muzyikwati muli lukkomano zyiindi zyimwi mulaba mazwanga.

Nkaambo nzi ncokuba mazwanga alimwi ncinzi ncomukonzya kucita kutegwa atapi kuti cikwati canu cimane? Mbwaanga ngu Leza wakatalisya cikwati, kulayandika ikulanga-langa Jwi lyakwe Bbaibbele ncolyaamba kujatikizya makani aaya.—Matalikilo 2:21, 22; 2 Timoteo 3:16, 17.

Ikwaamvwisya Mapenzi

Banabukwetene banji balayandana. Nokuba boobo, Ibbaibbele lyaamba masimpe noliti, “boonse babisya akulela kubulemu bwa-Leza.” (Ba-Roma 3:23) Aboobo, nokuli kutamvwana, cilakatazya kulyeendelezya mbotulimvwa. Ikuti kakuli mazwanga, bamwi lyoonse cilabayumina kwaambaula ajwi lyaansi alimwi babelesya majwi aakutukila. (Ba-Roma 7:21; Ba-Efeso 4:31) Ino ntwaambo nzi tumbi tukonzya kupa kuti kakuli mazwanga?

Mulumi amukaintu zyiindi zyinji bajisi nzila ziindene zyakubandika. Michiko waamba kuti: “Notwakakwatana, ndakabona kuti twakaliindene kapati mbotwakali kutubandika twaambo. Ndiyandisya kwaamba ikutali buyo cintu cacitika pele kaambo kapa kuti cintu eeco cicitike ambocacitika. Balumi bangu bayandisya buyo kuti kaambo kamane.”

Michiko tali alikke uujisi penzi eeli. Muzyikwati zyinji, umwi ulakonzya kuti kayanda kubandika kwaciindi cilamfwu, kakuli umwi tayandi kukazyanya alimwi tayandili limwi kwaabandika makani. Zyiindi zyimwi, umwi nayanda kwaabandika makani, kujanika kuti umwi tayandi kwaambaula. Sena cintu camusyobo ooyu nkocili mucikwati canu? Sena umwi uyandisya kukabandika kaambo kakuli umwi ulibonya kuti tayandi?

Kaambo kamwi keelede kulangwa-langwa nkakuti, imuntu ulakonzya kulilemeka kweelana  amumukwasyi mwaakakomenena akutobela mbuli mbobakali kubandika banabukwetene. Justin uuli mucikwati kwamyaka iili musanu wakati: “Ndizwa mumukwasyi mobataambauli kapati alimwi cilandikatazya kwaamba cakulikwaya mbondilimvwa. Eeci cilamucima mukaintu wangu. Kumukwasyi nkwazwa balaambaula alimwi tacimukatazyi kwaamba mbwalimvwa.”

Nkaambo nzi Ncomuyandika Kwaamana Mapenzi?

Ibantu banji bavwuntauzya zyalukwatano bajana kuti banabukwetene baambilana lyoonse kuti balayandana tacili citondezyo cakuti banakumvwana lyoonse. Ikoonana kwabanabukwetene akuba amali manji tazyisyi zyezyintu ziyandika kapati mulukwatano. Muciindi caboobo, citondezyo cibotu cabanabukwetene bakkomene cilalibonya mbuli mulumi amukaintu mbobaamanizya mapenzi ngobajana.

Kunze lyaboobo, Jesu wakaamba kuti bantu bobilo nobakwatana, tali muntu uubakwatanya pele ngu Leza. (Matayo 19:4-6) Aboobo, banabukwetene bakkomene balamulemeka Leza. Kulubazu lumwi, ikuti mulumi waalilwa kutondezya luyando akumubikkila maano mukaintu wakwe, Jehova Leza takonzyi kwiiswiilila mipailo yakwe. (1 Petro 3:7) Ikuti mukaintu katamulemeki mulumi wakwe, mubwini talemeki Jehova iwakamubikka kuba mutwe wamukwasyi.—1 Ba-Korinto 11:3.

Nzila Zyipa Kuzwidilila —Ikutabelesya Majwi Aanyemya

Kunyina makani ambomwaambaula lyoonse naa kumukwasyi nkomwakazwa, tamweelede kubelesya majwi mabi ikuti kamuyanda kubelesya njiisyo zyamu Bbaibbele kumana mazwanga. Amulibuzye mibuzyo eeyi iitobela:

▪ ‘Sena ndilaakuvwiila munzila iitakonzyi kumunyemya umwi?’ Ikasimpi kamwi kaamba kuti: “Kunyonyoona mpemo mbokugwisya munoka, mbubonya akuzwangana mbokubusya nkondo.” (Tusimpi 30:33, BT) Ino eeco caamba nzi? Amulange cikozyanyo eeci. Makani aali masyoonto buyo aamba mali mbwaakonzya kubelesyegwa mumukwasyi (mucikozyanyo umwi inga waamba kuti; “tatweelede kukweeleta zyintu zyinji”) alakonzya kukomena kumane umwi ulakozya kwaambwa kuti tacizyi kubelesya mali (“uli muyamba iwe”). Masimpe, ikuti ngomukwetene limwi ‘wamunyona mpemo’ kwiinda mukumusampaula, inga mwayanda ‘kumunyona’ andinywe. Pele, ikujokezya kupa kuti munyeme alimwi mazwanga alaindila.

Mulembi wa Bbaibbele Jakobo wakacenjezya kuti: “Amubone kalilo kaniini mbukaumpa cisaka cipati! Alwalo lulimi mulilo.” (Jakobo 3:5, 6) Ikuti banabukwetene kabataujati mulaka wabo, mazwanga masyoonto alakonzya kukomena. Muzyikwati muli mazwanga taaku luyando.

Muciindi cakuyanda kujola, mulakonzya kwiiya Jesu walo naakatukilwa “takakabweedezya matusi.” (1 Petro 2:23) Nzila mbotu yakumana mazwanga nkuzyiba kaambo mweenzyinyoko nkajisi akulilekelela kutegwa mazwanga amane.

AMUSOLE NZILA EEYI: Ciindi citobela mwaakuzwangana, amukalibuzye kuti: ‘Sena kuli mbocinga candigwasya kuti naa ndazyiba mbwalimvwa mweenzuma? Ncinzi ncindacita capa kuti kube penzi eeli? Ncinzi cindipa kutalilekelela?’

▪ ‘Sena ndilamunyasya mweenzuma naa tandibikkili maano mbwalimvwa?’ Ijwi lya Leza lilailila kuti: “Amube amoyo omwe, amube akweetelelana.” (1 Petro 3:8) Amulange-lange twaambo tobilo tukonzya kupa kuti mutalutobeli lulayo oolu. Kaambo kakusaanguna nkakuti, ambweni tamujisi luzyibo naa tamuzyi mbwalimvwa ngomukwetene limwi. Mucikozyanyo, ikuti ngomukwetene limwi talimvwide kabotu kumakani aamwi kwiinda mbomulimvwa inywe, mulakonzya kwaamba kuti, “Ulaciindizya.” Ncomuyanda nkugwasya ngomukwetene limwi ikukabona kaambo munzila iigwasya. Nokuba boobo, mbasyoonto  bantu baumbulizyigwa amajwi aali boobu. Boonse, balumi abakaintu beelede kuzyiba kuti bantu mbobayanda balabamvwisya akubamvwida lubomba.

Ikuliyanda akwalo kulakonzya kupa muntu kutabikkila maano mbwalimvwa ngobakwetene limwi. Muntu uuliyanda, ulalisumpula kwiinda mukubafwubaazya bamwi. Ulakonzya kucita oobo kwiinda mukunonga mweenzyinyina. Amulange-lange cikozyanyo caba Farisi abalembi bamuciindi ncaakali kupona Jesu. Ikuti muntu uuli woonse naba mu Farisinyina waamba kaambo kaindenyi abaaba bantu baliyanda, bakali kumunonga. (Johane 7:45-52) Jesu wakaliindenyi ambabo. Wakali kubafwida lubomba bantu nobakali kumwaambila mbobalimvwa.—Matayo 20:29-34; Marko 5:25-34.

Kamuyeeya mbomucita ikuti ngomukwetene limwi waamba mbwalimvwa. Sena majwi ngomubelesya, ijwi mbolilimvwisya ambomulibonya zyitondezya kuti mulaalubomba? Naa sena tamubikkili maano mbwalimvwa ngomukwetene limwi?

AMUSOLE NZILA EEYI: Ciindi ciboola, amukabone mbomunikwaambaula angomukwetene limwi. Ikuti naa kamutabikkili maano naa mwaamba cintu cimwi citayaki, cakufwambaana mweelede kulilekelela.

▪ ‘Sena ndeelede kufwambaana kwaamba kuti mweenzuma ucita buyo nzyayanda mwini?’ “Taakwe kaambo sena Jobu nkalemekela Leza? Teewakamuyakilide kabotu, walo abaŋanda bakwe azyoonse nzyajisi?” (Jobu 1:9, 10) Kwiinda mukwaamba majwi aayo, Saatani wakakazya makanze aamuntu uusyomeka Jobu.

Ikuti banabukwetene kabatazyilangi kabotu zyintu, balakonzya kutobela nzila njeena eeyi. Mucikozyanyo, ikuti ngomukwetene limwi wamucitila cintu cibotu, sena muyeeya kuti ncaacitila boobo kuli cintu cimwi ncayanda kulindinywe naa kuli ncasisa? Ikuti ngomukwetene limwi walubizya, sena kulubizya kwakwe kutondezya kuti ulaliyanda naa tabikkili maano? Sena cacitika cimuyeezya zyintu zyikozyenyi nzyaakacita kaindi?

AMUSOLE NZILA EEYI: Amulembe mulongo wazyintu zyibotu nzyaakamucitila ngomukwetene limwi acakamupa kuti acite boobo.

Mwaapostolo Paulo wakalemba kuti: “Luyandisyo . . . taluyeeyi inkoto yabubi.” (1 Ba-Korinto 13:4, 5) Luyando lwini-lwini lulizyi kuti tatulondokede. Alimwi talubikkilili. Paulo alimwi wakaamba kuti luyando luli “alusyomo.” (1 Ba-Korinto 13:7) Amubone kuti luyando luli boobo talupi bantu kusyoma zyintu zyoonse nzyoobaambilwa, pele balilibambide kusyoma. Lulasyoma. Ibbaibbele likulwaizya kuba aluyando lulibambide kulekelela bantu bamwi alimwi lupa kuti bantu babone kuti zyayeeya muntu umwi zyili luzi ikutali zyibi. (Intembauzyo 86:5; Ba-Efeso 4:32) Banabukwetene nobatondezya luyando luli boobu, banakukkomana kapati mucikwati cabo.

AMULIBUZYE . . .

▪ Nkulubizya kuli buti banabukwetene baambwa kumatalikilo kwacibalo nkobakacita?

▪ Kutegwa nditaciti mbuli mbobakacita balo mucikwati cabo, ino ncinzi ncondeelede kucita?

▪ Ntwaambo tuli twaambwa mucibalo ntondeelede kubelesya?

Bupanduluzi buyungizidwe