Mulakonzya Kukkomana Nokuba Kuti Mulatyompwa
Mulakonzya Kukkomana Nokuba Kuti Mulatyompwa
INO NGUNI utanatyompedwe? Naba Taata wesu wakujulu, Jehova Leza ulatyompwa awalo. Mucikozyanyo, wakabavwuna bana Israyeli kuzwa mubuzike mu Egepita alimwi wakabalongezya kapati. Pele Ibbaibbele lyaamba kuti: “Bakali kusunka Leza, akukalazya Uusalala wa-Israyeli.” (Intembauzyo 78:41) Nokuba boobo, Jehova lyoonse ngu “Leza” uukkomene.—1 Timoteo 1:11.
Masimpe kuli zyintu zyinji zyipa kutyompwa. Mbuti mbotukonzya kucita kutegwa katukkomana lyoonse? Ncinzi ncotukonzya kwiiya kuli Jehova Leza mbwaakacita naakali mubukkale butyompya?
Zyintu Zyityompya
Ijwi lya Leza lyaamba kuti: “Boonse buyo balasikilwa ziindi zyalufu azyamapenzi.” (Mukambausi 9:11) Cakutayeeyela, nkondo, ntenda naa malwazi alakonzya kupa kuti tunyongane akutyompwa. Alimwi Bbaibbele lyaamba kuti: “Bulangizi butafwambi kuzuzikizigwa bulacisya moyo.” (Tusimpi 13:12) Kulindila cintu cimwi cibotu kulakkomanisya, pele ikuti tiicasika kufwambaana, tulatyompwa. Mucikozyanyo, Duncan, * amukaintu wakwe ibakabeleka kwamyaka minji mumulimo wabumisyinali alimwi bakacili kuyanda kuzumanana mumulimo ooyu, bakaambilwa kuti bajokele kwabo. Duncan wakaamba kuti: “Ndakatyompwa kapati. Tiindakalizyi cakucita. Kunyina cakali kundikkomanisya.” Kutyompwa kulazumanana kwaciindi cilamfwu mbubonya mbucakabede kuli Claire. Upandulula kuti: “Ida lyakazwa kalijisi myezi iili ciloba. Kwainda myaka minji, pele noliba lino, ndabona mwana musankwa kaambaula makani acibumbili, ndilaakuyeeya kuti andime mwanaangu naali mbuli nguwe’”
Alimwi cilacima ikuti muntu umwi wamutyompya, cisyabo camana, mwalekana, mwana wazanga, ngomukwetene limwi
katasyomeki naa mweenzyinyoko katalumbi. Mbwaanga bantu mbotukkala limwi tabalondokede alimwi tupona muzyiindi zyikatazya, tulangila kutyompwa.Kulezya kwesu akwalo kulakonzya kututyompya. Mucikozyanyo, ikuti tiitwacita kabotu mumusunko, twaalilwa kujana mulimo naa muntu wakukwatana limwi, tulakonzya kutyompwa. Alimwi tulakonzya kutyompwa ikuti muntu ngotuyanda kataciti kabotu kumuuya. Mariya waamba kuti: “Mwanaangu musimbi wakali kulibonya kuti ucita kabotu. Ndakali kuyeeya kuti wakali kutobela cikozyanyo cangu cibotu. Pele naakaleka kumukomba Jehova Leza akutobela milawo yamumukwasyi, ndakalimvwa kuti ndaalilwa ncobeni. Kunyina cintu cili coonse ncindakali kucita mubuumi icakali kundikkomanisya. Ndakatyompwa kapati.”
Mbuti mbotukonzya kuliyumya kukutyompwa kuli boobu? Kutegwa tujane bwiinguzi amulange cikozyanyo ncatondezya Jehova mumakani aakutyompwa.
Amubone Mbomunga Mwalimana Penzi
Nokuba kuti Jehova Leza wakabapa banabukwetene bakusaanguna zyintu zyoonse zyobakali kuyanda, tiibakali kulumba alimwi bakazanga. (Matalikilo, zyaandano 2 a 3) Kumane mwanaabo Kaini wakaba amuuya mubi. Akaambo kakutatobela kucenjezya kwa Jehova, Kaini wakamujaya munyina. (Matalikilo 4:1-8) Jehova wakatyompwa kapati.
Nkaambo nzi kutyompwa ooku ncokwatakamunyonganya Leza? Nkaambo kakuti wakali kuyanda kuti nyika izule abantu balondokede alimwi wakazumanana kubeleka kutegwa makanze aayo azuzikizyigwe. (Johane 5:17) Akaambo kaceeco, wakapa kuti kube cinunuzyo a Bwami bwakwe. (Matayo 6:9, 10; Ba-Roma 5:18, 19) Jehova Leza wakalanga mbolikonzya kumana penzi.
Ijwi lya Leza litukulwaizya kubikkila maano kuzyintu zyigwasya muciindi cakubikkila maano kuzyintu zyakainda kale. Lyaamba kuti: “Kufumbwa zintu zisinizye, kufumbwa zintu zilemekeka, kufumbwa zintu ziluleme, kufumbwa zintu zisalala, kufumbwa zintu ziyandika, kufumbwa zintu zili ampuwo imbotu, na kuli ciyanza niciba cimwi cibotu nanka cintu niciba cimwi citembaulika, amuziyeeyesye zintu ezi.”—Ba-Filipi 4:8.
Mbotweelede Kukubona Kutyompwa
Kulakonzya kuba zyintu zyikonzya kucinca buumi bwesu. Mucikozyanyo, tulakonzya kuleka kubeleka cakutayeeyela, kufwidwa muyandwa wesu naa mikuli imwi njotwaajisi mumbungano ilakonzya kumana. Tulakonzya kutalika kuciswa-ciswa, kugusyigwa muŋanda naa beenzuma kututantamuka. Mbuti mbotukonzya kuliyumya mubukkale buli boobu?
Bamwi bacibona kuti ikubona zyintu zyiyandika mubuumi kulagwasya kapati. Duncan waambwa atala aawa waamba kuti: “Mebo amukaintu wangu notwakazyiba kuti kunyina notuya kujokela alimwi mumulimo wabumisyinali, twakanyongana kapati. Kumane twakayeeya kucita zyintu zyobilo zyiyandika kapati: kulanganya Bamaama alimwi ikuti kacikonzyeka kuzumanana mumulimo wakukambauka waciindi coonse. Notwakali kuyandika kusala, twakalanga-langa mbozyakali kukonzya kujatikizya zyintu eezyi zyiyandika kapati. Aboobo tiicakali kutukatazya kusala.”
Tobanji tulaciindizya ikuti twatyompwa. Mucikozyanyo, kusoleka nkotucita notukomezya mwana, kwaalilwa kujana mulimo ngotuzyi naa kukambauka makani mabotu mucisi cimbi kulakonzya kupa kuti nzyotuyanda zyitacitiki. Tulakonzya kuyeeya kuti, ‘Twaalilwa.’ Nokuba kuti bantu bakutaanguna bakamutyompya Leza, eeci tiicakaamba kuti Leza waalilwa. Deuteronomo 32:4, 5.
Aboobo, tatukonzyi kwaamba kuti twaalilwa akaambo kakuti nzyotuyanda tiizyacitika kweelana ambotuyanda.—Ncuuba-uba kunyema ikuti bantu batutyompya. Jehova tabusyi mbwacita oobo. Jehova wakatyompwa ciindi Mwami Davida naakacita bumambe akujaya mulumi wamukaintu ooyo. Nokuba boobo, Jehova wakabona kuti Davida weempwa cakumaniina alimwi wakazumanana kumubelesya. Mbweena buyo, Mwami Jehosafati wakabisya naakatalika kuvwana abasinkondonyina Leza. Musinsimi wa Jehova wakaamba kuti: “Nkaambo kamakani ayo, bukali bwakusikila buzwa kuli-Jehova. Nekubaboobo zintu zimwi zibotu muzili mulinduwe.” (2 Makani 19:2, 3) Jehova wakalizyi kuti kulubizya kwa Jehosafati tiikwakaamba kuti waleka kumutobela. Andiswe tatweelede kucimanizya cilongwe ikuti naa beenzuma batulubizyila. Beenzuma ibatutyompya balakonzya kabajisi bube bubotu.—Ba-Kolose 3:13.
Kutyompwa kulakonzya kuba kutegwa tuzwidilile. Tulakonzya kutyompwa ikuti twabisya. Pele, kutyompwa kulakonzya kumana ikuti twabweza ntaamu iigwasya akutajoka munsi. Mwami Davida naakatyompwa akaambo kacibi ncaakacita, wakalemba kuti: “Mubili wangu wakali kuya bumana, Intembauzyo 32:3-5) Ikuti twazyiba kuti tiitwacita Leza ncayanda, tweelede kulomba kulekelelwa a Leza akucinca bukkale bwesu akuzumanana kutobela lulayo lwa Leza.—1 Johane 2:1, 2.
ndakali kutongela buzuba boonse. . . . Mpoonya awo ndakalyaambawida cibi cangu [kuli Jehova] . . . , Nkabela wakandilekelela mulandu wazibi zyangu.” (Mbotukonzya Kulibambila Mapenzi
Kakunyina kudooneka, toonse kumbele tuyakutyompwa. Ino ncinzi ncotukonzya kucita kutegwa tulibambile? Kuli twaambo tukkomanisya ntwaakaamba Bruno Munakristo wakacembaala iwakatyompwa akaambo kazyintu zyakamucitikila izyakapa kuti buumi bwakwe bucince. Wakaamba kuti: “Cintu cipati cakandigwasya nkuzumanana kucita zyintu nzyondakali kucita kaindi kutegwa ndibe acilongwe ciyumu a Leza. Ndakakazyiba kaambo Leza ncalekelede nyika eeyi mbyaabi kuzumanana. Cakanditolela myaka minji kutegwa ndibe acilongwe a Jehova. Ndilikkomene kapati kuti ndakayumya cilongwe cangu anguwe. Ikuzyiba kuti Jehova wakali andime cakandigwasya kuliyumya nokuba kuti ndakali tyompedwe.”
Notulanga-langa zyakumbele, tulakonzya kusyoma cintu comwe cakuti: Nokuba kuti tulakonzya kutyompwa azyintu nzyotwacita naa nzyobakonzya kucita bamwi, Leza takatutyompyi. Masimpe ngakuti, Leza wakaamba kuti izyina lyakwe lyakuti Jehova lyaamba kuti, “Ndiyooba kufwumbwa mbweyooba.” (Kulonga 3:14, NW) Eeci citupa kusyoma kuti uyakuba kufwumbwa eeco ciyandika kutegwa azuzikizye makanze aakwe. Wakasyomezya kuti kwiida mu Bwami bwakwe, luyando lwakwe luya kucitwa “ansi ano mbubonya mbuli kujulu.” Nkaambo kaako mwaapostolo Paulo ncaakalembela kuti: “Ndisinizye kuti taakwe cintu, niluba lufu nibuba buumi, nibaba baangelo nibaba basibwami . . . niziba zilenge zimwi zyoonse, taakwe cintu niciba cimwi cikonzya kutwaandaanya kuluyando lwa-Leza lwamuli-Kristo Jesu Mwami wesu.”—Matayo 6:10; Ba-Roma 8:38, 39.
Cakusinizya tulakonzya kulangila kukuzuzikizyigwa kwacisyomezyo ca Leza cakaambwa amusinsimi Isaya cakuti: “Ndalenga ijulu ipya anyika impya. Ezyo zyakusaanguna tazikooyooibalukwa limbi nikuba kuyeeyegwa.” (Isaya 65:17) Elo kaka mbulangizi bubotu bwakuti ciindi ciyakusika kutyompwa nokuyoomana!
Bupanduluzi buyungizidwe
^ munc. 5 Mazyina aamwi acincwa.
Majwi aakwelelezya sikubala aali apeeji 13]
Tatukonzyi kwaamba kuti twaalilwa akaambo kakuti nzyotuyanda tazyicitiki mbotuzyiyanda
Majwi aakwelelezya sikubala aali apeeji 14]
Ijwi lya Leza litukulwaizya kulanga-langa zyintu zyigwasya muciindi cakubikkila maano zyintu zyakainda kaindi
[Zifwanikiso izili apeeji 15]
Leza ulikkomene nokuba kuti bantu balabisya nkaambo ulizyi kuti makanze aakwe ayakuzuzikizyigwa
[Cifwanikiso icili apeeji 16]
Ikulibikkila zyintu zyiyandika kapati zyakumuuya kuya kutugwasya ikuyumya cilongwe cesu a Leza alimwi kuyakutugwasya kuliyumya ciindi notutyompwa