Basikubala Balabuzya

Nkaambo Nzi Bakamboni Ba Jehova Ncobatabelesyi Ciingano Nobakomba?

Bakamboni ba Jehova basyoma kuti lufwu lwa Jesu Kristo ncinunuzyo cipa kuti aabo bamusyoma bakajane buumi butamani. (Matayo 20:28; Johane 3:16) Nokuba boobo, tabasyomi kuti Jesu wakafwida aciingano kweelena ambwatondezyegwa muzyifwanikiso. Basyoma kuti Jesu wakafwida acisamu cilamfwu citajisi cisamu cimwi ciinga.

Zyiingano zyakali kubelesyegwa kucisi ca Mesopotamiya, myaka iili zyuulu zyobilo Kristo katanasika. Kwakali zyiingano izyakalembwa amabwe abantu bakali kupona myaanda yamyaka iili zyuulu zyotatwe Jesu katana zyalwa. Hazibweene asikwiiya zikozyanyo zyakali kubambwa kaindi Sven Tito Achen wakucisi caku Denmark mubbuku lyakuti Symbols Around Us wakalemba kuti, bantu batali Banakristo aabo bakali kubelesya zyiingano “kuba citondezyo camasalamuzi . . . icakali kubakwabilila akubapa coolwe.” Nkakaambo kaako ibbuku lyakuti New Catholic Encyclopedia lilazuminizya kuti: “Ikubelesyegwa kwaciingano kulajanwa muzyilengwa zyabantu bakali kupona Bunakristo kabutanatalika akuli baabo batakali Banakristo kazyili zyitondezyo zyazyintu zijanika kujulu.” Aboobo, ino nkaambo nzi zikombelo ncozyakatalika kubelesya ciingano kacili citondezyo cisetekene?

W. E. Vine. Mulembi uulemekwa waku Britain wakalemba twaambo twamasimpe kuti: “Akati kati kamwaanda wamyaka wa 3 A.D. naa Kristo kasikide, . . . bahedeni bakali kutambulwa muzikombelo . . . alimwi bakali kuzumizyigwa kuti kababelesya zyitondezyo zyabo. Aboobo, ciingano cakazumizyigwa muzikombelo.—Vine’s Expository Dictionary of Old and New Testament Words.

Vine wakayungizya kuti, ibbala “lyaciingano” aciti lyakuti “kubambulwa aciingano” lyaamba “cisamu” . . . ikwaandanya lusyomo lwaciingano ndobajisi basizikombelo. Kuzuminizya ceeci caambwa, Oxford University’s Companion Bible yaamba kuti: “Bumboni butondezya . . . kuti Mwami wakajailwa acisamu ikutali aciingano.” Masimpe ngakuti, zikombelo zitobela cilengwa citali camu Bbaibbele.

Sikulemba makani aansiku waambwa atala aawa Achen, wakati: “Mumyaanda yamyaka yobilo kuzwa ciindi Jesu naakafwa, kulibonya kuti kunyina Banakristo nobakabelesya ciingano.” Wakayungizya kuti, ku Banakristo aabo bamumwaanda wamyaka wakusaanguna ciingano “cakali kwaamba lufwu abubi mbubonya mbuli muncini ngobakosozya bantu mitwe naa cuuno camagesi cakujaila bantu.”

Kaambo kapati nkakuti kufwumbwa naa bakabelesya nzi kumupenzya Jesu akumujaya kunyina cikozyanyo naa citondezyo cacintu eeco ceelede kuba cintu cibelesyegwa ku Banakristo mukukomba. Ibbaibbele lilailila kuti: “Amucije kukomba mituni.” (1 Ba-Korinto 10:14) Jesu wakapa citondezyo cini cabasikumutobela beni-beni. Wakati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”—Johane 13:35.

Mumakani oonse aabukombi, Bakamboni ba Jehova mbuli Banakristo bamumwaanda wamyaka wakusaanguna balasoleka kutobela ncolyaamba Bbaibbele muciindi cakutobela tunsiyansiya. (Ba-Roma 3:4; Ba-Kolose 2:8) Akaambo kaceeci, tababelesyi ciingano nobakomba.

[Cifwanikiso icili apeeji 25]

Cifwanikiso citondezya mwami wa Asuri watakali kukomba Leza kasamide ciingano, cakuma 800 B.C.E.

[Kulumba]

Cakafwotolwa aba British Museum