Kuumbulizya Balwazi Batalangilwi Kupona

“Nondakamvwa kuti Bamaama balaciswa calufwu, tiindakasyoma pe. Ndakapenga kapati mumoyo cakunga tiindakali kukonzya kwaasyoma makani aakuti Bamaama ibakandizyala bakali kulangilwa kufwa.” —Grace wakucisi ca Canada.

CIINDI basilisi nobaamba kuti muyandwa uli abulwazi butalangilwi kupona, banamukwasyi abalongwe balausa kapati alimwi inga tabacizyi cakucita. Bamwi inga tabazyi naa beelede kwaambila mulwazi makani oonse aajatikizya bulwazi bwakwe. Ibamwi balibilika kuti naa balakonzya kuliyumya nobabona muyandwa wabo mbwapenga akaambo kabulwazi, alimwi ambweni nobatazyilemeki zyaasala. Ibanji ncobalibilika ncakuti tabazyi ncobakonzya kwaamba naa kucita eelyo mulwazi nafwumba bulamfwu.

Ncinzi ncomweelede kuzyiba kujatikizya ncomukonzya kucita ikuti naa mwaambilwa makani aaya aausisya? Alimwi ino mbuti mbomukonzya kuba “mulongwe” mwini-mwini uukonzya kuumbulizya akupa lugwasyo kuciindi eeci camapenzi?—Tusimpi 17:17, BT.

Ncilengwa Buya Ikulimvwa Bubi

Tacili ceenzu kulimvwa bubi ikuti muyandwa kaciswa bulwazi bupati. Nobaba basilisi, nokuba kuti lyoonse balababona bantu nobafwa, bunji bwaziindi balausa kapati alimwi cilabaalila kubona mbobakonzya kuumbulizya akugwasya balwazi batalangilwi kupona.

Ncimwi buyo, andinywe mulakonzya kupenga kapati mumoyo akaambo kakubona kuti muyandwa wanu ulapenga. Mucikozyanyo, muce wakwe naakaciswa calufwu, Hosa, wakucisi ca Brazil wakati: “Cilakatazya kapati ikubona muntu ngoyandisya kaciswa kapati.” Imwaalumi uusyomeka, Musa, naakabona kuti mucizyi wakwe waba acinsenda, wakati: “O Leza, aponesegwe.”—Myeelwe 12:12, 13.

 Tulausa kapati notubona mbwapenga muyandwa wesu uucisidwe akaambo kakuti twakalengwa mucinkozya ca Leza silubomba, Jehova. (Matalikilo 1:27; Isaya 63:9) Ino Jehova ulimvwa buti nabona bantu kabapenga? Amuyeeye mbwaakali kulimvwa Jesu. Jesu wakatondezya bube bwa Bausyi munzila iilondokede. (Johane 14:9) Ciindi Jesu naakali kubona bantu bakali kuciswa, wakali ‘kubafwida luzyalo.’ (Matayo 20:29-34; Marko 1:40, 41) Mbuli mbokwaambwa mucibalo cainda mumagazini eeyi, imweenzinyina Jesu, Lazaro, naakafwa alimwi Jesu naakabona mbolwakabajatikizya lufwu oolu bamukwasyi abalongwe, wakapenga kapati mumoyo mpoonya “wakalila.” (Johane 11:32-35) Masimpe, Ibbaibbele lyaamba kuti lufwu ngusinkondoma alimwi lisyomezya kuti lino-lino malwazi alufwu ziya kumana.—1 Ba-Korinto 15:26; Ciyubunuzyo 21:3, 4.

Ee, ambweni mulakonzya kupa mulandu muntu umwi—kufwumbwa muntu—ciindi nomumvwa mulumbe wakuti muyandwa wanu uciswa bulwazi butalangilwi kupona. Pele, ba Dr Marta Ortiz, basikuvwuntauzya makani aajatikizya kulanganya balwazi batalangilwi kupona bakapa lulayo kwiinda mukulemba kuti: “Tamweelede kupa bamwi mulandu—basilisi naa kulipa mulandu nywebo lwanu—akaambo kamulwazi mbwabede. Eeci inga caile kupa kuti muleke kumvwana akupa kuti mwaalilwe kubikkila maano kucintu ciyandika kapati: ziyandika zyamulwazi uutalangilwi kupona.” Nintaamu nzi zigwasya nzyomukonzya kubweza kutegwa mugwasye muyandwa wanu kuliyumya nacisidwe akulibambila lufwu?

Amumubikkile Maano Mulwazi

Ntaamu yakusaanguna nkubikkila maano kumuntu muciindi cakulanga mbwafwulukide naa mbwamanide mubili mulwazi. Ino mbuti mbomukonzya kucita boobo? Sarah, imusilisi wakati: “Ndilaakulanga zifwanikiso zitondezya mbwaakali kulibonya mulwazi naakacili anguzu. Mulwazi nandaambila zyintu nzyaakali kucita kaindi, ndilaakuswiililisya. Eeci cilaakundigwasya kuyeeya buumi mbwaakali kupona mulwazi  kaindi muciindi cakwiile kulanga mbwabede lino.”

Aumwi musilisi uutegwa Anne-Catherine wakapandulula kuti awalo talangi buyo mbwabede mulwazi. Wakati: “Ndilaakulanga muntu mumeso akubona ncondikonzya kucita kutegwa ndimugwasye mulwazi kuba kabotu.” Ibbuku lijisi makani aajatikizya kulanganya nzyandika mulwazi uufwumba bulamfwu litegwa The Needs of the Dying—A Guide for Bringing Hope, Comfort, and Love to Life’s Final Chapter lyakati: “Tacili ceenzu ikulimvwa bubi naa kweetezyegwa akaambo kakubona muyandwa mbwafwulukide akaambo kabulwazi naa ntenda. Icinga cainda kugwasya mubukkale oobu nkubikkila maano kumuntu muciindi cakulanga mbwabede mulwazi lino.”

Masimpe, kutegwa muntu abweze ntaamu iili boobu weelede kulijata akuba alusyomo. Kujatikizya kaambo aaka, Georges, mulangizi Munakristo ulaacilengwa cakuswaya balwazi batalangilwi kupona wakati: “Tweelede kumuyanda kapati muyandwa wesu kutegwa tukonzye kumugwasya muciindi cakuyoowa bulwazi mbwajisi.” Kubikkila maano kumuntu muciindi cakulanga mbwabede mulwazi kulakonzya kumugwasya nywebo amuyandwa wanu. Mutumbu umwi uubeleka mulimo wakulanganya bana bali abulwazi bwakkansa uutegwa Yvonne wakati: “Ikuzyiba kuti mulakonzya kubagwasya balwazi kubona kuti mbantu beelede kulemekwa, kulakonzya kumupa kuti mujane nzila mbomukonzya kubayumya-yumya nobaciswa.”

Kamuswiililisya

Ibamwi balakonzya kuyoowa kuswaya muntu uutalangilwi kupona nokuba kuti muntu ooyo balamuyanda kapati. Nkaambo nzi? Bayoowa kuti inga babula cakwaamba. Nokuba boobo, Anne-Catherine, iwakali kulanganya mweenzinyina wakali kuciswa bulwazi butalangilwi kupona caino-ino, wakaamba kuti kuumuna akwalo kulagwasya. Wakati: “Tulakonzya kubaumbulizya bamwi ikutali buyo mumajwi pele amumicito ambotuzyibona zyintu. Kukkala munsi-munsi amulwazi, kumujata kumaanza, kulila akaambo kakweetela—zyoonse eezyi zitondezya kuti tulabikkila maano.”

Cakutadooneka, muyandwa wanu inga wayanda kwaamba mbwayeeya—ikwaamba makani oonse ngajisi kumoyo. Pele bunji bwaziindi ncobayeeya balwazi ncakuti bayandwa babo balilibilikide aboobo kunyina nobaamba twaambo tupati tubakatazyide. Nobasola kugwasya mulwazi, balongwe abamukwasyi inga bayeeya kuti ncibotu kutamwaambila mulwazi twaambo tumwi mbuli tooto tujatikizya bulwazi bwakwe. Ino ncinzi cikonzya kucitika akaambo kakutaamba makani aali boobo? Musilisi umwi uulanganya balwazi batalangilwi kupona wakati, “kusisa twaambo kulakonzya kupa kuti mutaabikkili maano makani ayandika kapati kumulwazi—aajatikizya bulwazi bwakwe akubona mbwakonzya kugwasyigwa.” Aboobo, ikuti kayanda, mulwazi weelede kupegwa ciindi cakwaamba mbwayeeya kujatikizya bukkale naa lufwu lwakwe.

Babelesi ba Leza bakaindi nobakali kubona kuti balalangilwa kufwa, kunyina nobakali kuyoowa kwaamba mbobakali kulimvwa kuli Jehova Leza. Mucikozyanyo, naakaambilwa kuti ulafwa, Mwami Hezekiya iwakali amyaka iili 39 wakatyompwa kapati. (Isaya 38:9-12, 18-20) Mbweena buyo, aabo baciswa calufwu beelede kupegwa ciindi cakwaamba mbobatyompedwe akaambo kakuti buumi bwabo bwatyokezyegwa. Ambweni balityompedwe akaambo kakuti lino tabakonzyi kuzuzikizya mbaakani nzyobajisi, mbuli kweendeenda, kuba abana, kuba abazyukulu naa kuyungizya mulimo wabo kuli Leza. Ambweni balilibilikide kuti aabona ibeenzinyina alimwi abamukwasyi balabatantamuka akaambo kakutazyiba ncobakonzya kucita. (Jobu 19:16-18) Kuyoowa mbobani kupenga, bulema naa kulifwida akwalo kulakonzya kubakatazya kapati mumoyo.

Anne-Catherine wakati: “Mweelede kumupa ciindi mweenzinyoko cakwaamba kakunyina kumunjila mukanwa, kumusinsa naa kuubya-ubya makani aamupa kulibilika. Eeyi nenzila  mbotu kapati yakuzyiba bwini mbwalimvwide alimwi akubona ncalombozya, ncayoowa ancalangila.”

Amubikkile Maano Kuzyintu Ziyandika Kumulwazi

Ambweni akaambo kabusilisi bumwi mbwakonzya kupegwa muyandwa wanu, penzi lyakwe lilakonzya kukomena mpoonya nywebo mulakonzya kunyongana kapati cakunga inga mwaalilwa kubikkila maano kuzyintu ziyandika kumulwazi mbuli ikuba anguzu zyakulisalila mwini.

Mumisyobo imwi, bamukwasyi balakonzya kuyeeya kuti kutegwa bakwabilile mulwazi, tabeelede kubandika anguwe kujatikizya bulwazi bwakwe, mane buya balakonzya kumwiinda ambali caboola kukusala busilisi mbwayelede kupegwa. Mumisyobo imwi, amwalo mulakonzya kuba penzi limbi. Mucikozyanyo, musilisi wazyina  lya Jerry wakati: “Zimwi ziindi aabo baboola kuzyoobona mulwazi bajisi ciyanza cakuvwiya mulwazi mbuli kuti tako.” Nzila eezyi zyoonse zitondezya kuti mulwazi talemekwi.

Acimbi ncayandika mulwazi nkumusyomezya kuti tako kufwa ino. Muzisi mobasilika kabotu, kanji-kanji mulwazi ulakonzya kusyoma kuti tako kufwa ino-ino kwiinda mukuyandaula busilisi bukonzya kubeleka. Michelle, iwakali kulanganya banyina nobakaciswa bulwazi bwakkansa ziindi zyotatwe wakati: “Ikuti Bamaama kabayanda kusoleka busilisi bumwi naa kubonana amusilisi uumbi uucibwene, ndilaakubagwasya kuvwuntauzya. Ncindabona ncakuti nsyeelede kulangila kuti bulwazi bulakonzya kumana mpoona-mpoona alimwi nsyeelede kwaamba majwi aakonzya kubatyompya.”

Ino mbuti kuti kakunyina bulangizi bwakuti mulwazi ulakonzya kupona? Amuyeeye kuti aabo baciswa calufwu balaangulukide kwaamba mbobalimvwa kujatikizya lufwu. Georges, imulangizi Munakristo ngotwaamba kumatalikilo wakati: “Cilayandika kapati kutasisa makani aalufwu lulangilwa. Eeci cilakonzya kupa kuti mulwazi abikke bubambe bugwasya akulibambila katanafwa.” Ikulibambila ooku kulakonzya kupa kuti mulwazi abone kuti masimpe wacita zyintu zyoonse ziyandika katanafwa alimwi kunyina muntu ngwaasiila mukuli.

Mbuli cilengwa makani aaya alakatazya kwaabandika. Pele kubandika twaambo cakutainda mumbali, kulakonzya kumupa coolwe cakwaamba ibwini mbomulimvwide mumoyo. Ooyo uufwumba bulamfwu ambweni inga kayanda kuti mumanizye mazwanga ngomwakajisi anguwe, alilekelele naa kulomba kulekelelwa. Mibandi iili boobu ilakonzya kuyumya cilongwe canu anguwe kwiinda mbocakabede kaindi.

Kuumbulizya Muntu Uulangilwa Kufwa Kufwumba Ciindi

Mbuti mbomukonzya kuumbulizya muntu uulangilwa kufwa kufwumbwa ciindi? Ba Dr. Ortiz, ibaambwa atala aawa bakati: “Katanafwa, mulwazi weelede kupegwa ciindi cakwaamba zyintu nzyayanda kuti acitilwe. Amuswiililisye. Ikuti kacikonzyeka, amusoleke kucita zyintu nzyayanda mulwazi. Ikuti kacitakonzyeki kucita zyeezyo nzyaamba mulwazi, amumwaambile camasimpe.”

Kwiinda lyoonse, muntu uulangilwa kufwa inga wayanda kubandika abantu mbaali kuyanda kapati mubuumi bwakwe. Ba Georges bakati: “Amumugwasye mulwazi kubandika ambabo nokuba kuti mibandi eeyo inga kiili mifwaafwi akaambo kakuti mulwazi tajisi nguzu.” Nokuba kuti mulakonzya kubelesya luwaile, mubandi ooyo ulakonzya kupa kuti bantu aabo bakulwaizyanye akupailila antoomwe. Christina, mukaintu waku Canada iwakafwidwa bayandwa bakwe cakutobelana wakati: “Nobakali kuyanda kufwa, bakali kwiisyoma kapati mipailo ya Banakristonyina.”

Sena mweelede kuyoowa kulila kaliko muyandwa wanu? Peepe. Ikuti mwalila mulakonzya kupa kuti muyandwa wanu awalo akonzye kuba acoolwe cakuba sikuumbulizya. Ibbuku litegwa The Needs of the Dying lyakati: “Cilakkomanisya kapati ikuumbulizyigwa amuntu uulangilwa kufwa alimwi awalo ulakonzya kugwasyigwa kapati.” Kwiinda mukuumbulizya bamwi, ooyo wali kulanganyizyigwa abamwi awalo ulakonzya kubona kuti mulongwe naa muzyali siluzyalo.

Masimpe, ibukkale bulakonzya kumulesya kuba amuyandwa wanu ciindi nalangilwa kufwa. Pele ikuti kamukonzya kuba amulongwe wanu kucibbadela naa kuŋanda, amukasoleke kumujatilila kujanza kusikila leelyo naya kuzimina. Kwiinda lyoonse, ciindi cili boobo cilakonzya kumupa coolwe cakutondezya bwini mbomulimvwide mumoyo. Nokuba kuti muyandwa wanu ufwumba bulamfwu aboobo takonzyi kwaamba cili coonse, eeco taceelede kumulesya kulayana anguwe, kutondezya luyando akwaamba bulangizi mbomujisi bwakuti muya kubonana aakubusyigwa.—Jobu 14:14, 15; Incito 24:15.

Kwiinda mukuumbulizya muntu uulangilwa kufwa kufwumbwa ciindi, mulakonzya kuba masimpe kuti kunyina nomuya kutyompwa kumbele. Mubwini, kweetezyegwa nkomukonzya kuba ankuko aciindi eeci kulakonzya kumuumbulizya kumbele aamazuba. Kwiinda mukucita boobo, mulakonzya kutondezya kuti muli balongwe beni-beni bakazyalilwa kugwasya kuciindi ‘camapenzi.’—Tusimpi 17:17.

Majwi aakwelelezya sikubala aali apeeji 25]

Kubikkila maano kumuntu muciindi cakulanga mbwabede mulwazi kulakonzya kumugwasya nywebo amuyandwa wanu

Kabbokesi/[Cifwanikiso icili apeeji 26]

Mbomukonzya Kutobela Ncaasala Mulwazi

Muzisi zinji, balasoleka kutobela ncaamba mulwazi uuciswa bulwazi butalangilwi kupona kutegwa nayanda kufwa kutabi cintu cimukatazya mumoyo. Ikubelesya malailile aakalembelwa limwi kweelana ancayanda mulwazi kuti cikacitike aakuyanda kufwa, kulakonzya kugwasya. Bamwi balakonzya kusala kufwida kuŋanda naa kucibbadela cabalwazi batalangilwi kupona.

Ipepa lyakalembelwa limwi lilakonzya kugwasya munzila eezyi:

• Likulwaizya kuti bamadokotela amukwasyi kababandika

• Lipa kuti mulwazi alisalile busilisi mbwayanda kwiinda kuti bamukwasyi bamusalile

• Lipa kuti mulwazi atapegwi musamu uutali nguyo, uutabeleki, uula nguzu kapati naa uudula

Ikutegwa pepa lyakalembelwa limwi kaligwasya, lyeelede kuba atwaambo ootu:

• Izyina lyamuntu uumwiiminina kucibbadela

• Busilisi mbomukonzya kuzumina naa kukaka ikuti naa bulwazi bwakomena

• Ikuti naa cilakonzyeka, inga mwabikkilizya azyina lya dokotela uubuzyi kabotu busilisi mbumwakasala

[Cifwanikiso icili apeeji 24]

Amubikkile maano kubuumi mbwali kupona mulwazi kutali mbwabede lino