Amubayiisye Bana Banu

Timoteo —Wakalilibambide Alimwi Wakali Kuyanda Kubeleka

“SENA ulilibambide?” Sena kuli nokalibuzyidwe mubuzyo ooyu?—Muntu wakakubuzya wakali kuyanda kuzyiba naa uulilibambide. Mucikozyanyo, muntu ooyo ambweni wakali kubuzya kuti: ‘Sena uulaajisi mabbuku aako aakucikolo? Sena wazyibala nzyomuya kwiiya?’ Mbubonya mbotulaabone, Timoteo wakalilibambide.

Awalo Timoteo wakalilisungude. Sena ulicizyi ncocaamba eeco?—Timoteo naakalombwa kuti abelekele Leza, zyintu wakali kuzyibona mbwaakali kuzyibona umwi wababelesi ba Leza wakaamba kuti: “Mpendi! Unditume mebo!” (Isaya 6:8) Akaambo kakuti wakalilibambide alimwi wakali kuyanda kubeleka, Timoteo wakali kkomene mubuumi. Sena uyanda kumvwa zyinji kujatikizya makani aaya?—

Timoteo wakazyalwa ku Lustra kulampa makkilomita manji kuzwa ku Jerusalemu. Bakaapanyina ba Loisi abanyina ba Eunike bakalaazyi kabotu Magwalo. Timoteo naakali muvwanda, bakatalika kumuyiisya Ijwi lya Leza.—2 Timoteo 1:5; 3:15.

Timoteo ambweni naakacili mukubusi, mwaapostolo Paulo a Barnaba bakaswaya munzi wa Lustra mulweendo lwabo lwakusaanguna lwakukambauka. Kulibonya kuti aciindi aawa banyina Timoteo abakaapanyina bakaba Banakristo. Sena ulayanda kumvwa mbwaakapenga Paulo a Barnaba?—Bantu batakali kubayanda Banakristo bakamupwaya mabwe Paulo, bakamuusyila ansi akumusowela kunze aamunzi. Bakali kuyeeya kuti wafwa.

Aabo bakali kusyoma nzyaakali kuyiisya Paulo bakaboola akumunyamuna. Nobwakaca, Paulo a Barnaba bakaunka, pele bakajokela ku Lustra nokwakainda buyo ciindi cisyoonto. Nobakajokela, Paulo mumakani aakwe wakabaambila basikwiiya kuti: ‘Tweelede kunjila mu Bwami bwa Leza amapenzi manjimanji.’ (Incito 14:8-22) Sena ulicizyi ncaakali kwaamba Paulo?—Wakali kwaamba kuti bantu bamwi balakonzya kubapenzya aabo babelekela Leza. Paulo wakazyikulembela  Timoteo kuti: ‘Abo bayanda kupona cakululama muli Kristo Jesu baya kupenzyegwa.’—2 Timoteo 3:12; Johane 15:20.

Paulo a Barnaba nibakazwa ku Lustra, bakajokela kwabo. Nokwakainda myezi, Paulo wakabweza Sila akweenda limwi alimwi bakajokela kumasena Paulo ngaakaswaide kutegwa bakulwaizye basikwiiya bapya. Nibakasika ku Lustra, Timoteo weelede kuti wakakkomana kapati kumubona Paulo alimwi. Timoteo wakakkomana kapati naakaambilwa kuti beende limwi a Paulo a Sila. Timoteo tanaakakaka pe. Wakalilibambide alimwi wakali kuyanda kuunka.—Incito 15:40–16:5.

Boonse botatwe bakaunka antoomwe, bakeenda musinzo mulamfwu mpoonya bakatanta bwato. Nobakasika kunkomwe, bakaunka ku Tesalonika mucisi ca Gilisi. Oku bantu banji bakaba Banakristo. Pele bamwi bakanyema akutalisya manyongwe. Paulo, Sila a Timoteo bakali muntenda, aboobo bakaunka ku Bereya.—Incito 17:1-10.

Paulo wakalilibilikide kujatikizya basikwiiya bapya bakali ku Tesalonika, aboobo wakaambila Timoteo kuti ajokele. Sena ulicizyi cakapa kuti acite boobo?—Paulo wakazyi kupanduluda Banakristo baku Tesalonika kuti: ‘Kutegwa muyume akumuumbulizya akuti mutatyompwi.’ Sena ulikazyi kaambo kakapa kuti Paulo amutume Timoteo mumulimo uuyoosya uuli boobu nokuba kuti wakali mwana?—Kayi basikukazya banji tiibakali muzyi Timoteo, alimwi wakali kuyanda kuunka. Kutegwa acite oobo, wakeelede kuba sicamba. Sena kuli ncaakajana akaambo kakuswaya kwakwe? Timoteo naakajokela, wakaambila Paulo mbobakali kusyomeka bana Tesalonika. Aboobo, Paulo wakabalembela kuti: “Tuliyumizidwe anguzu mubuusu bwesu.”—1 Ba-Tesalonika 3:2-7.

Kwamyaka iili kkumi yakatobela, Timoteo wakabeleka a Paulo. Mpoonya Paulo wakaangwa ku Roma, Timoteo iwakazwa caino muntolongo wakaunka kuti akakkale anguwe. Kali muntolongo, Paulo wakabalembela bana Filipi lugwalo ambweni kabelesya Timoteo kulemba. Paulo wakati: ‘Ndilangila kumutumina Timoteo nkaambo kunyina uumbi uusyomeka alimwi ukonzya kubeleka andinywe kabotu.’—Ba-Filipi 2:19-22; Ba-Hebrayo 13:23.

Elo kaka majwi aayo ayelede kuti akamukkomanisya Timoteo! Paulo wakamuyanda kapati Timoteo nkaambo wakalilibambide alimwi wakali kuyanda kubeleka. Tusyoma kuti oobo mboya kucita andiwe.

Mibuzyo:

○ Nkuli Timoteo nkwaakakomenena alimwi ncinzi cakacitika Paulo naakaswaya okuya ciindi cakusaanguna?

○ Ino ncinzi Timoteo ncaakacita naakaambilwa kuti beende limwi a Paulo a Sila?

○ Ino mbuti Timoteo mbwaakatondezya busicamba alimwi nkaambo nzi Paulo ncaakali kumuyandila kapati?

[Cifwanikiso icili apeeji 18]

Ncinzi cacitika?