Ulaazyi Mapenzi Eesu
Amube Acilongwe a Leza
Ulaazyi Mapenzi Eesu
LUZYALO mbube buyandika kapati butugwasya kuzyiba mbobalimvwa bamwi nobali mumapenzi. Jehova Leza nguuyinda kutondezya luzyalo. Ulakatazyigwa bantu bakwe nobapenga. Ino mbuti mbotukonzya kucisyoma eeco? Luzyalo lwa Jehova lwakatondezyegwa kapati muzyintu nzyaakali kwaamba akucita Jesu naakali anyika. (Johane 5:19) Mucikozyanyo, amubone cakacitika, icilembedwe kuli Johane 11:33-35.
Lazalo, mulongwe wa Jesu naakafwa cakutayeeyelwa, Jesu wakanyamuka kuya kumunzi wa Lazalo. Mbuli cilengwa, bacizyi ba Lazalo ba Mariya a Marta bakali mubuumba. Jesu wakali kuuyanda kapati mukwasyi ooyu. (Johane 11:5) Aboobo, ino wakalimvwa buti? Cibalo eeci caamba kuti: “Jesu naakamubona [Mariya] ulalila, abalo ba-Juda abakali kumucilide balalila, moyo wakwe wakalenda, wakeetela, wakati, Ino nkuli nkomwakamuzikila? Bakamwaambila kuti, Omwami, koboola ubone. Jesu wakalila.” (Johane 11:33-35) Ino Jesu wakalilila nzi? Wakali kulila mweezinyina Lazalo wakafwa, pele wakali afwaafwi kumubusya. (Johane 11:41-44) Sena kuli cimbi cakamukatazya Jesu mumoyo?
Kamwaalanga alimwi majwi aazubululwa atala aawa. Amubone kuti, Jesu naakabona Mariya abaabo mbaakali limwi kabalila “moyo wakwe wakalenda, wakeetela.” Mabala aakabelesyegwa aawa mumwaambo wa Cigiliki aamba kweetezyegwa kapati. * Jesu wakeetezyegwa kapati naakababona kabalila. Mbokunga wakapenga kapati mumoyo, eeci cakalibonya meso aakwe naakazula misozi. Cakutadooneka, Jesu wakeetezyegwa kapati akaambo kabuumba bwabamwi. Sena kuli nomwakeetezyegwa cakuti mwatalika kulila akaambo kakuti mweenzinyoko umwi wakali kulila?—Ba-Roma 12:15.
Iluzyalo lwa Jesu lutugwasya kuzyiba bube anzila nzyobabelesya Bausyi, Jehova. Kamuyeeya kuti Jesu wakabutondezya bube bwa Bausyi munzila mbotu kapati cakuti wakali kukonzya kwaamba kuti: “Oyo uwandibona, wamubona awalo Taata.” (Johane 14:9) Aboobo notubala kuti “Jesu wakalila” tulakonzya kusyoma kuti Jehova ulalimvwa bubi akaambo kamapenzi aabacitikila bakombi bakwe. Masimpe, balembi ba Bbaibbele bamwi balakasininzya kaambo aaka. (Isaya 63:9; Zekariya 2:8) Eelo kaka Jehova Leza ulaalubomba!
Tulamvwana abantu balaaluzyalo. Ikuti naa twatyompwa, tulaakubaambila bantu mbotuzyi kuti inga baaswiilila mapenzi eesu akutugwasya munzila imwi. Aboobo tulakonzya kuba acilongwe a Jehova nkaambo walo ngu Leza siluzyalo uubona mbotupenga ancotulilila.—Intembauzyo 56:8.
Bupanduluzi buyungizidwe
^ munc. 6 Ibbala lya Cigiliki lyakasandululwa kuti ‘kulila’ lyaamba ‘kulila cakaumu-umu.’ Mukwiimpana, ibbala lyabelesyegwa aawa kupandulula kulila kwa Mariya abaabo mbaakali limwi, lyaamba “kulila cakoongolola, koomoka.”