Nzyotwiiya Kuli Jesu

Kujatikizya Mbotweelede Kubalanganya Bamwi

Nkaambo nzi ncotweelede kuba aluzyalo?

Sena mulabafwida luzyalo bantu nokuba kuti balo tabaciti oobo kulindinywe? Ikuti katuyanda kumwiiya Jesu, tweelede kuba aluzyalo nokuba kubantu batusulide. Jesu wakati: “Kuti mwayanda abamuyanda, ino mujisi kulumbwanzi? Abalo abacitazibi bayanda abo ababayanda. . . . Pele amuyande basinkondonyoko, . . . anywebo munooli bana ba-Sijulu lyamajulu, nkaambo uli aluzyalo walo kulibatalumbi akubabi.”—Luka 6:32-36; 10:25-37.

Nkaambo nzi ncotweelede kubalekelela bantu?

Ikuti twalubizya, tuyanda kuti Leza atulekelele. Jesu wakayiisya kuti tweelede kupaila kuti Leza atulekelele. (Matayo 6:12) Pele, Jesu alimwi wakaamba kuti Leza ulakonzya kutulekelela lelikke ikuti katulisungwide kulekelela bamwi. Wakati: “Mwalekelela bantu milandu yabo, alakwe Usowanu uuli kujulu ulamulekela anywe, Pele mwatalekelela bantu milandu yabo, alakwe Usowanu takooyoomulekelela milandu yanu pe.”—Matayo 6:14, 15.

 Ino Mbuti Mikwasyi Mboikonzya Kukkomana?

Nokuba kuti Jesu kunyina naakakwete, tulakonzya kwiiya zinji kulinguwe kujatikizya mikwasyi mboikonzya kupona calukkomano. Mumajwi aakwe anzyaakali kucita, wakatusiila cikozyanyo ncotweelede kutobela. Amulange-lange twaambo ootu totatwe tuccilila:

1. Mulumi weelede kuyanda mukaintu wakwe mbuli mbwaliyanda. Jesu wakabasiila cikozyanyo balumi. Wakaambila basikwiiya bakwe kuti: “Ndamupa mulao mupya wakuti, amuyandane umwi amweenzinyina.” Ino bakeelede kuyandana kusika aali? Wakati; “Mbuli mbwendali kumuyanda.” (Johane 13:34) Ikwaamba mboibeleka njiisyo eeyi kubalumi, Ibbaibbele lyaamba kuti: “Anywebo nobalumi, amuyande banakazi banu, mbuli Kristo mbwaakayanda imbungano akulyaaba nkaambo kanjiyo. . . . Mbuboobo balumi mbubeelede kuyanda banakazi babo mbuli mibili yabo beni. Uuyanda mukaakwe waliyanda mwini. Nkaambo taakwe muntu uusula mubili wakwe mwini, pe, ulausanina akuubamba kuti ubote. Mbubonya obo Mwami mbwacitila imbungano.”—Ba-Efeso 5:25, 28, 29.

2. Banabukwetene beelede kusyomeka. Ikucita bumambe ncibi cipati kuli Leza alimwi cinyonyoona mikwasyi. Jesu wakati: “Sa tamubalide kuti . . . Nkaambo kaako mwaalumi asie wisi abanyina, akakatile mukakwe, kuti aba bobile babe nyama yomwe. Lino tabacili bobile pe, baba nyama yomwe. Nkaambo kaako, abo mbaakakakatizya Leza muntu atabapambukanyi. . . . Ndamwaambila kuti umwi aumwi uuleka mukakwe akukwata umbi, nkutaamba nkaambo kakuvuula luzutu, waba sibwaamu.”—Matayo 19:4-9.

3. Bana beelede kulibombya kubazyali babo. Nokuba kuti Jesu wakalilondokede wakali kubamvwida bazyali bakwe batalondokede. Mboobu Bbaibbele mbolimwaamba Jesu naakali amyaka 12 yakuzyalwa: “Wakeenda abo [bazyali bakwe], waboola ku-Nazareta, wababombela.”—Luka 2:51; Ba-Efeso 6:1-3.

Nkaambo nzi ncotweelede kuzitobela njiisyo eezyi?

Ikujatikizya njiisyo nzyaakayiisya basikwiiya bakwe, Jesu wakati: “Mwanoozizi zintu ezi, muli acoolwe mwanoozicita.” (Johane 13:17) Kutegwa tube Banakristo beni-beni, tweelede kutobela lulayo ndwaakapa Jesu ikujatikizya mbotweelede kubalanganya bamwi. Wakati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”—Johane 13:35.

Ikuti kamuyanda twaambo atumbi, amubone cibalo 14 mubbuku lyakuti Ino Ncinzi Cini Bbaibbele Ncoliyiisya? *

Bupanduluzi buyungizidwe

[Cifwanikiso icili apeeji 16]

Cikozyanyo ca Jesu camwana mutaka cituyiisya mbokuyandika kuba aluzyalo akulekelela bamwi.—Luka 15:11-32

[Cifwanikiso icili apeeji 17]

Banabukwetene beelede kusyomeka