Kuti Mwafwidwa Muyandwa Wenu

Muli Bwabili mangolezya mu July 17, 2007 aciindi ca 19hrs, ndeke inyamuna bantu yakaleya kuzwa munzila muyeelede kubalikila kubbuwa lyandeke mudolopo lya São Paulo ku Brazil. Ndeke eeyi yakakosola nzila mpati akwaakupwaya nkobabikka ntundu. Bantu bali 200 bakafwa muntenda eeyi.

EEYI ntenda iinda kubija akati kantenda zyandeke zyakacitika ku Brazil, tabakailubi aabo bakafwidwa bayandwa babo. Claudete ulaakati kabaabo bakafwidwa bayandwa babo muntenda eeyi. Wakali kweebelela cipekupeku naakamvwa makani aantenda eeyi yandeke. Mwanaakwe musankwa Renato wakajisi buyo myaka iili 26 wakali mundeke eeyi. Musankwa ooyu wakajisi makanze aakukwata mu October. Claudete wakasola kumutumina luwaile pele tanaakali kwiingula. Claudete wakawa muzinga akulila citaambiki.

Antje wakafwidwa musankwa wakali kuyanda kumukwata muntenda yamumugwagwa mu January 1986. Naakaamvwa makani aaya zyakamumana nguzu. Wakati: “Kusaanguna tiindakasyoma. Ndakali kuyeeya kuti ndilota buya. Ndakatalika kubimba alimwi ndakamvwa mwida mwanyenguluka.” Kwamyaka yotatwe Antje wakalityompedwe. Nokuba kuti kwainda myaka iinda ku 20 kuzwa ntenda eeyi noyakacitika, aino ucipenga mumoyo nayeeya cakacitika.

Kunyina uukonzya kupandulula kutyompwa, kutasyoma akukopana muntu nkwamvwa ikuti wafwidwa muyandwa muntenda. Noliba leelyo notulangila kuti muyandwa wesu ulafwa akaambo kakuciswa kwaciindi cilamfwu, tulausa kapati. Kunyina muntu uuyanda kufwidwa muyandwa wakwe. Mucikozyanyo, nobakaciswa kwaciindi cilamfwu banyina Nanci, bakafwa mu 2002. Pele ibuzuba nobakafwa banyina, Nanci wakalimvweketa ansi kucibbadela kakopene kapati. Wakabona kuti kunyina ncaakali kuponena. Kwainda myaka iinda kuli yosanwe, pesi ucilila aino abayeeya banyina.

Ba Dr Holly G. Prigerson bakaamba kuti: “Bantu tabalubi ikuti bafwidwa pele bazyibila buyo.” Ikuti naa mwakafwidwa muyandwa wenu muntenda naa akaambo kakuciswa kwaciindi cilamfwu, mulakonzya kubuzya kuti: ‘Sena cili kabotu kulila? Mbuti mbondikonzya kuliyumya ikuti ndafwidwa muyandwa wangu? Sena ndiya kumubona alimwi?’ Cibalo citobela cilijisi twaambo tujatikizya mibuzyo eeyi alimwi amibuzyo iimwi njomukonzya kuba anjiyo.

Nkotwakajana cifwanikiso icili apeeji 3]

EVERTON DE FREITAS/AFP/Getty Images