Ncotweelede Kubalumba Bamwi

“Ooyandwa Raquel,

Ndalumba kapati akaambo kakundikulwaizya. Nokuba kuti ambweni tozyi, ibwini mbwakuti bube bwako bubotu alimwi amajwi aako aaluzyalo zilandikulwaizya kapati.”—Jennifer.

SENA kuli buzuba nomwakatambude kagwalo kuzwa kumuntu ngumwatakali kuyeeyela iwakali kumulumba? Ikuti naa mboobo, mwakakkomana kapati akaambo kakuti toonse tuyanda kuti bantu kabatuyanda akutulumba.—Matayo 25:19-23.

Imajwi aakulumba apa kuti ooyo waamba majwi aayo ayooyo waambilwa bamvwane kapati. Kuyungizya waawo, ooyo uulumba mweenzinyina utobela mikondo ya Jesu Kristo iwakali kubikkila maano kuzyintu zibotu nzyobakali kucita bamwi.—Marko 14:3-9; Luka 21:1-4.

Pele icuusisya ncakuti, mazuba aano bantu banji tabalumbi. Ibbaibbele lyakacenjezya kuti “kumazuba aakumamanino,” kuya kuba bantu “batalumbi.” (2 Timoteo 3:1, 2) Ikuti twatacenjela, imuuya ngobajisi bantu banji mazuba aano wakutalumba ulakonzya kupa kuti tuleke kuba amoyo mubotu.

Ncinzi ncobeelede kucita bazyali kutegwa bayiisye bana babo kuti kabalumba? Mbaani mbotweelede kulumba? Alimwi ino nkaambo nzi ncotweelede kulumba nokuba kuti ibamwi tabaciti oobo?

Mumukwasyi

Ibazyali balabeleka canguzu kutegwa bajanine bana babo nzyobayandika. Pele, zimwi ziindi bazyali balakonzya kuyeeya kuti milimo njobacita tailumbwi. Ncinzi ncobakonzya kucita mubukkale buli boobu? Kuyandika zyintu zyotatwe.

(1) Cikozyanyo. Nokuba kuti kuli nzila zinji zyakuyiisya bana, bazyali beelede kupa cikozyanyo cibotu. Ikujatikizya mutumbu munkutwe wamu Israyeli yansiku, Ibbaibbele lyaamba kuti: “Bana bakwe balabuka akumulongezya.” Ino aaba bana bakayiila kuli kulumba bamwi? Ibwiinguzi bulakonzya kujanwa kwiinda mukubala kapango koonse. Kaamba kuti: “Alakwe mulumaakwe ulamutembaula.” (Tusimpi 31:28) Ibazyali nobalumbaizyanya bapa kuti bana babo bazyibe kuti ibamwi balakonzya kukkomana kwiinda mukubalumba. Ikucita boobo kupa kuti bamukwasyi kabamvwana alimwi eeci ncitondezyo cakuti balaamaano.

Usyi bana wazyina lya Stephen wakati: “Ndilasoleka kubapa cikozyanyo cibotu bana bangu kwiinda mukumulumba mukaintu wangu akaambo kacakulya cibotu.” Ino kucita boobo kwagwasya buti? Ba Stephen bakati: “Eeci nciiyo kubana bangu bobilo basimbi alimwi cabagwasya kubona mbociyandika kulumba bamwi.” Ikuti naa mulikwete naa mulikwetwe, sena bunji bwaziindi mulamulumba ngomukwetene limwi nacita milimo iimwi? Sena mulabalumba bana banu noliba leelyo nobacita milimo njobeelede kubeleka?

(2) Kuyiisya. Ikutegwa muntu abe amoyo mubotu wakulumba bamwi weelede  kugwasyigwa mbubonya mbotulimina maluba kutegwa akomene kabotu. Ino mbuti bazyali mbobakonzya kugwasya bana babo kutegwa kabalumba? Mwami musongo Solomoni wakaamba nzila imwi iiyandika kapati naakalemba kuti: “Moyo wamululami ulayeeya kabotu mbweelede kuvuwa.”—Tusimpi 15:28.

Nobazyali, sena mulakonzya kuyiisya bana banu ikubona kulyaaba nkobacita bamwi nibabapa zipego? Kwiinda mukukkala ansi kuyeeya balakonzya kubona mbociyandika kulumba bamwi mbubonya mbuli bulongo bubotu mbobupa kuti maluba akomene kabotu. Mucikozyanyo, mutumbu ulaabana botatwe wazyina lya Maria wakati: “Ibwini mbwakuti, kuyandika ciindi cili mbocibede kutegwa ukkale ansi antoomwe abana akubapanduluda ncayeeya muntu katanapa cipego—weelede kubapanduluda kuti muntu ooyo wali kubayeeya alimwi wali kuyanda kutondezya mbwabayanda. Alimwi ndiyeeya kuti ikucita boobo cilagwasya.” Mibandi iili boobu ipa kuti bana bagwasyigwe kubona ncobeelede kwaamba nobalumba bamwi alimwi akaambo ncobeelede kucitila boobo.

Bazyali bayiisya kabotu balabagwasya bana babo kuleka muuya wabusyaacivwulemwangu wakuti lyoonse beelede kupegwa zyintu. * Kucenjezya nkotujana mu The Bible in Tonga lyamu 1996 kubbuku lya Tusimpi 29:21 ikujatikizya babelesi kulabeleka akubana: “Kuti muntu walendekezya mubelesi wakwe mukumupa zyoonse nzyayanda, kumamanino uyoomunyanga kufumbwa ncajisi.”

Ino mbuti bana baniini mbobakonzya kuyiisyigwa kulumba? Mutumbu ulaabana botatwe wazyina lya Linda wakati: “Mebo abalumi bangu twakali kubagwasya bana besu kutola lubazu mukulemba tugwalo twakulumba bantu kwiinda mukubaambila kuti abalo balembe cifwanikiso naa zyina lyabo akagwalo.” Masimpe, cifwanikiso eeco inga kacitalibonyi kabotu alimwi ambweni nzyobalemba bana inga kazitabaliki. Nokuba boobo, eeci cilakonzya kupa kuti bana bagwasyigwe kapati.

(3) Kuzumanana. Toonse twakazyalwa akampenda kakuliyanda, alimwi kapenda aaka kalakonzya kupa kuti katutalumbi. (Matalikilo 8:21; Matayo 15:19) Pele, Ibbaibbele likulwaizya babelesi ba Leza kuti: “Muleelede kubukuluka mumuuya wakuyeeya kwanu, akulisamika buntu bupya bulengulwidwe mucinkozya ca-Leza.”—Ba-Efeso 4:23, 24.

Nokuba boobo, bazyali banji bacibwene kuyiisya balizyi kuti tacili cuuba-uba ikugwasya bana ‘kusama buntu bupya.’ Ba Stephen ibaambwa kale bakati: “Ikuyiisya bana besu basimbi ikuti kabalumba kakunyina kubasungilizya buya cakali kuboneka mbuli kuti citola ciindi cilamfwu.” Pele ba Stephen abakaintu babo tiibakatyompwa. Ba Stephen balazumanana kwaamba kuti: “Kwiinda mukuzumanana kubagwasya, ibana besu basimbi bakaiya ciiyo. Lino tulikkomene akaambo kakuti balaakulumba.”

Ino Mbuti Kujatikizya Balongwe Abasimukoboma?

Nokuba kuti mumoyo inga tulaakulumba, zimwi ziindi tulaluba kwaambila bamwi kuti ‘ndalumba.’ Sena kwaambila bamwi kuti ‘ndalumba’ kulayandika kapati kwiinda kwiile kulumbila mumoyo? Kutegwa twiingule mubuzyo ooyu, amulange-lange cakamucitikila Jesu abasicinsenda bamwi.

Naakali kuya ku Jerusalemu, Jesu wakayaanya baalumi bali kkumi basicinsenda. Ibbaibbele lyaamba kuti: “[Bakoompolola] bati, Omwami Jesu, tufwide luzyalo. Naakababona wakabaambila kuti, Kamuya mukalitondezye kubapaizi. Nobakali kuya bweenda bakasalazigwa. Nkabela umwi wabo naakabona kuti wapona, wakapiluka walumbaizya Leza ejwi ipati, wavundama kumatende aa-Jesu, wamulumba. Walo wakali mu-Samariya.”—Luka 17:11-16.

Ino Jesu wakacita buti naakabona kuti ibamwi tiibakalumba? Sena wakaumuna buyo? Cibalo cilazumanana kuti: “Jesu wakavuwa kuti, Sena tabasalede abali kumi? Ino bali kuli abali musanu mubane? Sena taakwe uwaboola kulumbaizya Leza, pele oyu uwamasi?”—Luka 17:17, 18.

 Masimpe ngakuti, basicinsenda bamwi bali fwuka tiibakali basizibi. Kumatalikilo, bakatondezya lusyomo muli Jesu alimwi camoyo woonse bakaatobela malailile aakwe kwiinda mukuunka ku Jerusalemu kwaakulitondezya kubapaizi. Pele, nokuba kuti mumoyo bakamulumba kapati Jesu akaambo kakubafwida luzyalo, kunyina nobakamwaambila. Eeci ncobakacita cakamutyompya Kristo. Ino mbuti swebo? Ikuti bamwi batucitila zyintu zibotu, sena tulaakwaamba kuti ‘ndalumba’ alimwi ikuti kacikonzyeka akutondezya kuti tulalumba kwiinda mukubatumina kagwalo?

Ibbaibbele lyaamba kuti luyando “talukwe cisapi, talulilangilili cintu.” (1 Ba-Korinto 13:5) Aboobo, ikwaamba majwi aakulumba kuzwa ansi amoyo takutondezyi buyo kuti tuli bantu balilemeka pele ncitondezyo caluyando. Mbweena mbotwiiya kumakani aabasicinsenda, aabo bayanda kukkomanisya Kristo beelede kulumba akutondezya luyando kubantu boonse kunyina makani acisi nkobazwa, mubala naa cikombelo ncobanjila.

Amulibuzye kuti, ‘Ino ndilili nondakamulumba simukoboma, ngondibeleka limwi, ngondiiya limwi, musilisi, musambazi naa muntu umwi buyo wakandigwasya?’ Mubuzuba bomwe naa obilo, kamulemba ziindi nomwaamba kuti ‘ndalumba’ naa kulemba kagwalo kakutondezya kuti mwalumba. Ikucita boobo kulakonzya kumugwasya kubona mpomweelede kubelekela caboola kumakani aakulumba bamwi.

Eelyo mbuli cilengwa, tuleelede kumulumba kapati Jehova Leza. Ngonguwe uutupa “zipego zibotu zyoonse azyoolwe zyoonse zilondokede.” (Jakobo 1:17) Ino ndilili nomwakamulumba Leza camoyo woonse akaambo kazyintu nzyaamucitila?—1 Ba-Tesalonika 5:17, 18.

Nkaambo nzi Ncotweelede Kulumba Nokuba Kuti Ibamwi Tabaciti Oobo?

Bantu bamwi tabalumbi kuzyintu zibotu nzyotubacitila. Aboobo, ino nkaambo nzi ncotweelede kulumba bamwi nokuba kuti balo tabaciti oobo? Amuyeeye buyo kaambo aaka.

Kwiinda mukucita zyintu zibotu kubantu batalumbi, twiiya Mulengi wesu sibuuya, Jehova Leza. Jehova taleki kubayanda akubacitila zyintu zibotu bantu nokuba kuti tabamulumbi. (Ba-Roma 5:8; 1 Johane 4:9, 10) Walo “ulapasuzya izuba lyakwe kubabi akubabotu, ulawisizya boonse imvula yakwe, baluleme abataluleme.” Aboobo, kwiinda mukulumba bamwi munyika eeyi iizwide bantu batalumbi, tulakonzya kutondezya kuti masimpe tuli “bana ba [Taateesu] uuli kujulu.”—Matayo 5:45.

Bupanduluzi buyungizidwe

Majwi aakwelelezya sikubala aali apeeji 15]

Mubuzuba bomwe naa obilo, kamulemba ziindi nomwaamba kuti ‘ndalumba’

[Cifwanikiso icili apeeji 15]

Amube cikozyanyo kubana banu caboola kukwaamba kuti ‘ndalumba’

[Cifwanikiso icili apeeji 15]

Nobaba bana baniini balakonzya kuyiisyigwa kwaamba kuti ‘ndalumba’