Ndakazyiba Kuti Buumi Bulayandika Kapati

MWAKALI MU APRIL 16, 2007 MAFWUMOFWUMO. Nondakali muofesi muŋanda yamujulu yatatu iitwa kuti Norris Hall kucikolo ca Virginia Polytechnic Institute and State University, naa Virginia Tech, ndakafwugama kukaswi kaofesi akuyeeya mbociyandika kuzyiba kuti buumi mbotupona abuzuba bulayandika kapati.

Ndakali muofesi yangu muŋanda yamujulu yatatu kandilibambila kuya kumaofesi akali ansi kwaakubweza magwalo aangu. Haabupampu umwi wakaboola akundilomba kuti nduunke kuofesi lyakwe kutegwa ndikamubambile kkompyuta. Notwakali kuyanda kunjila muofesi yakwe, twakamvwa ntobolo kazilila ansi muŋanda yamujulu yabili. Akaambo kakuti tiitwakalizyi cakali kucitika, twakabalikila muofesi yakwe akulikkiila katutazyi citicitike. Ndakayubila kukaswi akutalika kupaila kuli Jehova Leza kutegwa andipe busolozi bukonzya kundigwasya kuliyumya kuzyintu zyoonse zyakali kulangilwa kucitika.

Notwakali kulindila ndakayeeya cakacitika cimwi myaka iili 15 yainda. Aciindi eeco ndakali kubamba myootokala. Kagabba kamungwimba nkaakajisi mweenzuma kakatalika kuyaka. Akaambo kakuyoowa, wakakafwusila kumeso aangu! Busi bwakandikola alimwi ndakapya kapati acamba. Bakanditola andeke kucibbadela cabantu bapya mulilo alimwi ndakakkala okuya kwamyezi yotatwe acisela kandifwumba bulamfwu. Noyakamana myezi yosanwe ndakapona kumane ndakajokela kuŋanda alimwi ndakalikkomene kuti ndakacili muumi. Cakacitika eeci cakandipa kuzyiba kuti buumi mbotupona abuzuba bulayandika kapati. Alimwi cakandigwasya kuzumanana kubelekela Jehova Leza wakandipa buumi mbwaanga ndili umwi wa Bakamboni.—Intembauzyo 90:12; Isaya 43:10.

Akaambo kantenda yakandicitikila tiindakali kukonzya kubamba myootokala. Aboobo, ndakayiya mulimo wakubamba makkompyuta mpoonya ndakanjila mulimo ku Virginia Tech. Eeci ncecakapa kuti ndijanike ku Norris Hall ibuzuba oobo mafwumofwumo.

Mebo amweezuma tiitwakalizyi kuti ntobolo zyakali kulila ansi zyakali ntobolo zitanalilide mu U.S.A. Zyakacileka kulila ciindi muntu ooyu wakajaya bantu banyina mulandu bali 32 naakalidubula. Nikwakainda maminiti aali 20 kuzwa ciindi nozyakatalika kulila ntobolo, twakamvwa bamapulisa kabaambaula. Twakabalomba kuti batusindikile.

Cakacitika eeci candiisya kubona kuti buumi mbufwaafwi alimwi akuti kabuca uleta tunji. (Jakobo 4:14) Aboobo, cilayandika kapati ikumusyoma Sikutupa buumi, Jehova Leza, akubona kuti buzuba abumwi ncipego kuzwa kulinguwe!—Intembauzyo 23:4; 91:2.

Nkotwakajana cifwanikiso icili apeeji 26]

AP Photo/The Roanoke Times, Alan Kim