Amubayiisye Bana Banu Sena Ulaamunyono? Ibanyina Josefa Mbubakabede Oobo

LINO atubandike ncicaamba kuba amunyono. Sena cilakukatazya kuyanda muntu akaambo kakuti bamwi bamwaamba kuti mubotu naa usama kabotu? *—Eeci ncecikonzya kucitika ikuti naa ulaamunyono kuli bamwi.

Munyono ulakonzya kuba mumukwasyi ikuti naa bazyali kabatondezya kuti balamuyanda mwana umwi kwiinda bamwi. Ibbaibbele litwaambila makani aajatikizya mukwasyi umwi iwakanjila mumapenzi mapati akaambo kamunyono. Atulange-lange mapenzi aakaba alimwi aciiyo ncotukonzya kwiiya kuli ceeco cakacitika.

Josefa wakali wakkumi aumwi kukuzyalwa kuli Jakobo alimwi ibanyina kuli bausyi bakali kumunyonokela. Sena ulizyi ncibakali kucitila boobo?—Nkaambo kakuti bausyi bakali kumuyanda kapati Josefa. Mucikozyanyo, Jakobo wakamusumina cijasi cibotu camyeengwe-ngwe Josefa. Jakobo wakali kumuyanda kapati Josefa ‘nkaambo wakali mwana wamubucembele bwakwe’ alimwi wakali ngomwana mutaanzi kumukaintu wakwe Rakele ngwaakali kuyanda kapati.

Ibbaibbele lyaamba kuti ‘ibanyina nibakabona kuti bausyi bakali kumuyandisya Josefa kwiinda mbabo, bakamusula.’ Bumwi buzuba, Josefa wakaambila bamumukwasyi kuti walota kuti boonse kubikkilizya abausyi bakali kumufwugamina. Ibbaibbele lyaamba kuti: “Bakulana bakwe bakali kumufwida ibbivwe,” abalo bausyi bakamubwentela akaambo kakubaambila ciloto cili boobo.—Matalikilo 37:1-11.

Josefa naakali amyaka iili 17, kakwiindide ciindi cilamfwu kuzwa ciindi naakalota,  ibanyina bakaunka kulamfwu kuya kweembela mbelele ampongo. Jakobo wakamutuma Josefa kuti akabalange ibanyina. Sena ulicizyi ncibakali kuyeeya kucita ibanyina bamwi nibakamubona kuti wasika?—Bakali kuyeeya kumujaya! Pele Rubeni a Juda tiibakaujisi muzeezo ooyu pe.

Lino basikusambala nibakainda kabaya ku Egepita, Juda wakati: “[A]tumusambale.” Oobo mbobakacita. Bamane bakajaya mpongo akunyika cijansi ca Josefa mubulowa oobo. Bamane nibakabatondezya cijansi bausyi bakalila kabati: “Cinyama cibi camulya” Josefa!—Matalikilo 37:12-36.

Nikwakainda ciindi, Farao mwami waku Egepita wakamuyanda Josefa. Eeci cakacitika oobu akaambo kakuti Leza wakamugwasya kuzipandulula ziloto zyobilo nzyaakalota Farao. Cakutaanguna cakali caŋombe zineneede zili ciloba azikokede zili ciloba. Icabili cakali camakunka aamaila aali ciloba akali kuboneka kabotu amakunka aali ciloba aaputide. Josefa wakaamba kuti ziloto eezyi zyobilo zyakali kwaamba kuti kuya kuba myaka iili ciloba yabutebuzi bubotu amyaka iili ciloba yanzala. Farao naakamvwa boobo wakamupa mukuli Josefa wakuti ayobole zyakulya zinji mumyaka yabutebuzi bubotu kulibambila ciindi canzala.

Niyakatalika nzala, ibamukwasyi wa Jakobo ibakali kukkala kulamfwu yakabanjilila nzala. Amane Jakobo wakatuma bana bakwe bali kkumi, ibanyina Josefa, kuti bakaule cakulya ku Egepita. Nobakasika bakaambaula a Josefa pesi tiibakamuzyiba. Kakunyina kulipandulula Josefa wakabasunka ibanyina kutegwa abone naa bakacinca mizeezo yabo kweelana ambubakali kumubona, wakabona kuti tiibakakkomene akaambo kakumupenzya nkubakacita. Amane Josefa wakalipandulula. Bakakkomana kapati kubonana alimwi.—Matalikilo, caandaano 40 kusika ku 45.

Ino ncinzi ncooyiya kujatikizya munyono mumakani aaya aamu Bbaibbele?—Munyono ulakonzya kutunjizya mumapenzi manji cakuti muntu ulakonzya kusula munyina. Atubale lugwalo lwa Incito 5:17, 18 a Incito 7:54-59 tubone bantu ncobakacita kuli basikwiiya ba Jesu akaambo kamunyono.—Kweelana ambotwabala, sena wakabona kaambo ncotuteelede kuba amunyono?—

Josefa wakafwa kali amyaka iili 110. Wakali abana, bazyukulu abazyukululwa. Tusyoma kuti boonse aaba Josefa wakali kubayiisya kuti kabamvwana kutegwa batabi amunyono.—Matalikilo 50:22, 23, 26.

Bupanduluzi buyungizidwe

Mibuzyo:

○ Ino caamba nzi kuba amunyono?

○ Ino ncinzi ncobakacita ibanyina Josefa akaambo kamunyono?

○ Ino ncinzi cakapa kuti Josefa abalekelele ibanyina?

○ Ino ncinzi ncotwiiya mumakani aaya?