Ino Mbuti Ikuzyiba Bwini Kujatikizya Mulilo Wahelo Mbokukonzya Kumugwasya?

AABO bayiisya kuti helo mbusena bwakupenzyelwa basampula Jehova Leza alimwi tababuzyi bube bwakwe. Mubwini, Ibbaibbele lyaamba kuti Leza uyakubanyonyoona basizibi. (2 Ba-Tesalonika 1:6-9) Pele, bukali tabuli mbobube bupati bwa Leza.

Leza tali silunya. Mane ubuzya kuti: “Sa cilandibotela kuti sizibi afwe?” (Ezekieli 18:23) Ikuti naa Leza tabotelwi kuti basizibi bafwe, ino inga camubotela buti kubabona kabapenzyegwa kukabe kutamani?

Bube bwa Leza bupati nduyando. (1 Johane 4:8) Masimpe ngakuti, “Jehova mubotu kuliboonse; luzyalo lwakwe lulimwaikide kuzilenge zyakwe zyoonse.” (Intembauzyo 145:9) Mbubwenya buyo, Leza alakwe uyanda kuti andiswe tumuyande amoyo woonse.—Matayo 22:35-38.

Ncinzi Cimupa Kumubelekela Leza—Nkuyoowa Mulilo Wahelo naa Nkumuyanda?

Injiisyo yakuti bafwide balapenzyegwa mumulilo wahelo ipa kuti bantu kabamuyoowa Leza munzila iiteelede. Kunze lyaboobo, ikuti muntu waiya kasimpe kajatikizya Leza akumuyanda, ulatalika kumuyoowa munzila yeelede. Intembauzyo 111:10 yaamba kuti: “Kulemeka [naa “kuyoowa,” BT] Jehova matalikilo aabusongo; boonse bacita obo bali amaanu mabotu.” Kuyoowa Leza tacaambi kuba abukandu, pele caamba kumulemeka kapati akaambo kakuti ngo Mulengi. Eeci citupa kuyoowa kutamukkomanisya.

Amubone mbobakagwasyigwa ba Kathleen, bali amyaka yakuzyalwa iili 32 alimwi ibakacileka kubelesya misamu iikola nobakaiya kasimpe kujatikizya mulilo wahelo. Bakali kuyandisya mapobwe, nkondo, tiibakali kulilemeka alimwi bakali kubona kuti taaku ncibakali kuponena. Bakati: “Ndakali kucita kuti ndamulanga mwanaangu wamwaka omwe, ndakali kweetezyegwa. Ndakali kuyeeya kuti ndiya kupya mumulilo wahelo akaambo kazyintu nzyondakali kumucitila.” Ba Kathleen bakasola kuleka kubelesya misamu iikola pele bakaalilwa. Bakaamba kuti: “Ndakali kuyanda kuba muntu mubotu, pele buumi bwakandiyumina akaambo kakuti zyintu zyakali kweendela kulumwensyi. Tiindakali kucibona ncondakeelede kulilemekela.”

Mpoonya ba Kathleen bakatalika kwiiya Bbaibbele a Bakamboni ba Jehova. Ba Kathleen bakati: “Kwiinda mukubala Magwalo ndakaiya kuti kunyina mulilo wahelo. Ndakakkomana kapati kuzyiba kuti kunyina nondiya kupya mumulilo wahelo.” Alimwi bakaiya kuti Leza wakasyomezya kuti bantu baya kupona kukabe kutamani anyika ciindi bubi nobuya kumana. (Intembauzyo 37:10, 11, 29; Luka 23:43) Bakaamba cakukondwa kuti: “Lino ndilijisi bulangizi bwini-bwini bwakupona kukabe kutamani mu Paradaiso!”

 Sena ba Kathleen nobakacikonzya kuleka kubelesya misamu iikola ikuti nobatakali kuyoowa mulilo wahelo? Bakaamba kuti: “Ciindi nondakali kuyanda kubelesya misamu iikola, ndakali kupaila kuli Jehova kuti andigwasye. Ndakali kuyeeya mbwaibona micito iili boobu iisofwaazya alimwi tiindakali kuyanda kumunyemya. Wakayiingula mipailo yangu.” (2 Ba-Korinto 7:1) Ikuyoowa kumunyemya Leza kwakapa kuti ba Kathleen bazileke zilengwa zyabo zibi.

Masimpe, ikumuyanda Leza akuyoowa kumunyemya—ikutali kuyoowa kupenzyegwa mumulilo wahelo—kulakonzya kutukulwaizya kucita luyando lwakwe kutegwa katukkomana lyoonse. Sintembauzyo wakalemba kuti: “Ngusicoolwe uuyoowa Jehova, uuenda munzila zyakwe.”—Intembauzyo 128:1.

Kabbokesi/[Zifwanikiso izili apeeji 9]

MBAANI BAYAKUZWA MUHELO?

Basanduluzi bama Bbaibbele bamwi banyonganya bantu akaambo kakusandulula mabala obilo aa Cigiliki aindene—lya Geʹen·na alimwi alya Haiʹdes—kuti “helo.” Mu Bbaibbele, ibbala lya Geʹen·na (Gehena) lyaamba kunyonyookela limwi, kakunyina bulangizi bwabubuke. Mukwiimpana abaabo bali mu Gehena, aabo bali mu Haiʹdes, naa Hades (cikkalilo cabafwu) balijisi bulangizi bwabubuke.

Aboobo, Jesu naakafwa akubusyigwa, imwaapostolo Petro wakasyomezya baswiilizi bakwe kuti Jesu ‘kunyina naakasiigwa kucikkalilo cabafwu’ naa [“muhelo,” King James Version.] (Incito 2:27, 31; Intembauzyo 16:10) Ibbala lisandulwidwe kuti ‘cikkalilo cabafwu’ (naa helo) mulugwalo oolu lizwa kubbala lya Cigiliki lyakuti Haiʹdes. Jesu kunyina naakaunka kubusena bwamulilo. Hades naa “helo” ncuumbwe. Pele, tali Jesu alikke Leza ngwaakagusya ku Hades naa kucikkalilo cabafwu.

Kujatikizya bubuke, Ibbaibbele lyaamba kuti: “Lufu acikalilo cabafu zyoonse zyakabweedezya bafu bali mulinzizyo.” (Ciyubunuzyo 20:13, 14) Kugusya bafwide ‘mucikkalilo cabafwu’ caamba kuti Leza uyakubusya bantu boonse mbabona kuti baleelela kubusyigwa. (Johane 5:28, 29; Incito 24:15) Eelyo kaka cilakkomanisya ikuba abulangizi bwakubonana abayandwa besu baakubusyigwa! Jehova, Leza siluyando lutamani, uyakucita oobo.