Ino Ncinzi Cini Cicitika Muntu Afwa?

“Bantu boonse, nobaba basizibi tabafwidilili pe . . . Mbokunga tabafwidilili, balapenzyegwa lyoonse mumulilo uutamani alimwi kunyina nobakonzya kuzwa mumapenzi aaya.”—Clement waku Alexandria, imulembi wamumwaanda wamyaka wabili awatatu C.E.

MBUBONYA Clement mbwaakaamba, aabo basyoma njiisyo yakuti kuli mulilo wahelo bayeeya kuti bantu tabafwidilili. Sena njiisyo eeyi ileendelana ancolyaamba Bbaibbele? Amubone Jwi lya Leza ncolyaamba kumibuzyo eeyi iitobela.

Sena muntu wakusaanguna, Adamu, wakalengwa munzila yakuti takonzyi kufwa? Adamu naakalengwa, Leza wakamupa mulawo wakuti: “Misamu yoonse yamumuunda ncobeni uyooilya, cita musamu wakuziba bubotu abubi. Toelede kulya kulinguwo pe, nkaambo mubuzuba obo mboyoolya kulinguwo ncobeni uyoofwa.” (Matalikilo 2:16, 17) Eeci citondezya kuti Adamu wakali kukonzya kufwa.

Ncinzi cakazyi kumucitikila Adamu naakabisya? Leza tanaakaamba kuti uyakumusubula mumulilo wahelo uutamani. Muciindi caboobo, Leza wakaamba kuti: “Uyoolya insima cakufwa mitukuta mane ukapiluke kunyika, nkaambo mulinjiyo mowakagwisigwa, nkaambo uli bulongo buyo, akooko kubulongo nkoelede kupiluka.” (Matalikilo 3:19) Majwi aaya ngaakaamba Leza atondezya kuti kunyina cintu cimwi cakazumanana kupona naakafwa Adamu.

Sena kuli muntu uutafwi? Bantu boonse balafwa alimwi kunyina cintu cizumanana kupona afwa muntu. Kulugwalo lwa Mukambausi 3:20, Bbaibbele lyaamba kuti: “Boonse balaya kubusena bomwe. Bakazwa kubulongo, alimwi balapiluka kubulongo.” Mwaapostolo Paulo wakalemba kuti: “Mbuboobo cibi mbucakanjila munyika kumaanza aamuntu omwe buyo [Adamu], alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya.” (Ba-Roma 5:12) Bantu boonse mbaasizibi, aboobo boonse balafwa.

Sena bafwide kuli cintu cili coonse ncobazyi naa ncobayeeya? Ijwi lya Leza lyaamba kuti: “Baumi balizi kuti balafwa, pele bafwide tabezi cintu niciba comwe.” (Mukambausi 9:5) Ikujatikizya cicitika muntu afwa, Bbaibbele lyaamba kuti: “Ulabweeda kubulongo; mubuzuba obo mbubonya makanze aakwe oonse alamana.” (Intembauzyo 146:4) Ikuti bafwide “tabezi cintu niciba comwe” alimwi ikuti naa ‘makanze aabo oonse alamana,’ sena inga bamvwa kucisa mumulilo wahelo?

Jesu Kristo kunyina naakaamba kuti bafwide kuli ncobazyi, pele wakaamba kuti bali mbuli muntu uuli muŋonzi. (Johane 11:11-14) Nokuba boobo, bamwi inga baamba kuti Jesu wakaamba kuti mulilo wahelo nkouli ncobeni alimwi akuti basizibi mobaya kusowelwa. Atubone naa kuli ncaakaamba Jesu kujatikizya mulilo wahelo.