Lugwalo Kuzwa ku Ghana

 Iwakali Mucisobano ca Karate Mbwaakacinca Bukkale Bwakwe

TIINDALI kumuyeeyela kuti mbwabede oobo. Musankwa ngondajana usamide cisani cilamfwu cituba buu, munkanya waangide ntambo mpati iisiya iisika kumasentimita aali 5, uliimvwi alimwi wateya maanza aakwe kalibambide kulwana, tasamide mabbusu alimwi wazyandamana. Wacinca kumeso alimwi ulayoosya kumulanga. Ooyu muntu mukali, meso aakwe asalala pyu.

Mukulaba kwaliso, wasotoka akuti: “Hiyaaa!” Wauma cipulanga akucaandula ajanza. Alimwi wasotoka kumwi kazinguluka mujulu kumane wauma ngobalwana limwi. Sena ncobeni ooyu ngonguyo musankwa wakaamba kuti uyanda kwiiya Bbaibbele?

Nindaunka kwaakumwaanzya, ndamubuzya kuti: “Sena ndendiwe Kojo? Ndakamvwa kuti uyanda kwiiya Bbaibbele.” Wamwetamweta akundijata mujanza. Waanguluka kubusyu alimwi uboneka kuti ulaaluyandisisyo. Waingula kuti: “Inzya ndendime, ndilayanda kwiiya. Ino inga twatalika lili?”

Twakkala mukkoce katujisi ma Bbaibbele amabbuku aakwiiya. Abusena aawa kutontola kabotu alimwi taaku bayobeka. Tuli totatwe: Kojo, mebo akaceta kakwe. Kaceta aaka nkaniini kasika kumasentimita aali 35 kulampa, kumutwe kajisi boya busalala kumane kalezu kalatuba alimwi kalanoneezya kulanga. Kaceta aaka kaile kweendeenda, kalyatauka mabbuku eesu, katunyanga mabboopeni, akunjizya twaanza munkomwi zyesu kuyandaula zyakusobanya. Mbubonya mbuli muzyali wakazyibila kuyobeka kwabana, Kojo ubikkide buyo maano kuzyintu zyotwiiya. Mibuzyo yakwe itondezya kuti ulayeeya alimwi uliyandide kwiiya. Ambweni cisobano ca karate ncocamupa kuti kabikkila maano kuzyintu nzyacita, aboobo tasyomi naa kuzumina zyintu nzyaambilwa ccita kuti watondezyegwa mu Magwalo.

Ciiyo cesu ceenda buyo kabotu. Nokuba boobo, ndabona kuti kuli cimukatazya mumizeezo. Wandaambila kuti: “Ncondiyanda kapati munyika iino ncisobano ca karate.” Cakutadooneka, musankwa ooyu ulaciyanda cisobano eeci nkaambo ncaali kucita kwamyaka minji alimwi nguhaazibwene. Nokuba kuti ujisi buyo myaka iili 26 uliizyi karate alimwi wakapegwa kale ntambo  iisiya, ibanji njobaalilwa kujana alimwi njobatalangili kupegwa.

Tandizyi naa Kojo ulasala nzi aawa. Pele ndabona kuti wazyiba kuti ikubelesya maanza amaulu ikuuma bamwi takweendelani abube mbobatondezya Banakristo bakasimpe mbuli luzyalo, lubomba aluyando. Nokuba boobo, ndilizyi kuti kasimpe kamu Bbaibbele kakabacinca bantu bamwi bakajisi myoyo mibi kwiinda wa Kojo. Ikuti kali amoyo mubotu, Leza ulakonzya kumugwasya Kojo kuba alubomba. Ndeelede kukkazyika moyo.

Bumwi buzuba masikati notwakali kuyanda kumanizya kwiiya, twakabala lugwalo lwakamunjila mumoyo Kojo. Wakabala kuti: “Jehova ulalingula baluleme abasizibi. Moyo wakwe ulisulide [boonse bayandisya nkondo, NW].” (Intembauzyo 11:5) Wainduluka kwaamba kuti: “Boonse bayandisya nkondo.” Naamana kwaamba boobo, wandilanga, amane wamwetamweta akwaamba kuti: “Ndabona lino ncondeelede kucita.”

Mazuba aano, mebo a Kojo tucita mulimo ngotuyanda kapati wakuyiisya bantu Bbaibbele kakunyina kubabbadelesya. Sunu mafwumo-fwumo, tuya kwaakuswaya Luke.

Nitwali kuya kuŋanda yakwe, twainda kumusika kuzwide bantu. Mumbali aanzila kuli matebulu aabasikusambala banji aajisi zyintu: milwi yampilibili iisalala ayanyanzabili, zinzuma zizwide madeede aasalala pyu, milwi yadelele lyamakoto, zilimba, tululi, nsipa, mawiigi, mipika, mabbusu azisani zyasalaula. Kunze lyaboobo, kuli basimbi batwikkide mipika iijisi zyakulya zijikidwe kabotu zyobaya busambala. Baya bulyaatikizya mubantu kutegwa aabo bafwide nzala baule nswi ziyokedwe, nkala ankumba. Alimwi kuli babwa, impongo ankuku zyeendeenda. Akwalo kulila kwamyootokala, zilimba akuyobeka kwabantu takwaambwi.

Nitwazwa amusika, twabelesya kazila katusisya aŋanda yakaindi. Twamujana Luke, musankwa ucili mwana uboneka kuti ulaamyaka iili 20, kaimvwi amulyango, watutambula akutunjizya muŋanda. Muŋanda eeyi muli zibbeeke azibbokesi zinji zizwide misamu yamiyanda, yamatu aangidwe ayamakwa—zyoonse eezyi nzyabanyina Luke bapati ibasilika bantu. Misamu eeyi balaisanganya kweelana aluzyibo lwakazwa kuli bamakaapanyina alimwi basyoma kuti yatugwa akujikwa ilakonzya kusilika malwazi oonse. Luke wali kutulangila. Notwanjila, twajana wasalazya kale alimwi wabikka kale tuuno totatwe. Mpoonya twakkala akutalika kwiiya Bbaibbele.

Kojo nguuyiisya Luke. Ndilaswiilila nobabandika ncoliisya Bbaibbele kujatikizya ncokuli bubi bunji munyika. Ciindi Kojo namugwasya Luke kujana lugwalo mu Bbaibbele, ndayeeya mbwaakali kubelesya maanza aakwe kuuma bantu. Ijwi lya Leza lili anguzu zyakucinca bantu bakali bali munyika eeyi mbyaabi akubapa kuti babe alweetelelo aluyando. Eeci ncecintu iciinda kubota kuli zyoonse!

Nitwali kujokela kuŋanda, twabandika amusankwa uukkede munsi aacisamu camango. Kojo namubalila lugwalo walo ulaswiilila. Naazyiba kuti tuli Bakamboni ba Jehova, wanyamuka cabukali akwaamba kuti: “Tandimuyandi nobantu nywebo!” Mukaindi buyo kasyoonto, ndabona kuti Kojo wanyema. Nokuba boobo, wautontomeka moyo kumane twalaya.

Notwali kweenda, Kojo waamba kuti: “Sena ulizyi? Candicima ncaamba muntu uulya. Sena ulicizyi ncondali kukonzya kumucita?” Kumwi kandimwetamweta ndamwaambila kuti: “Inzya ndilizyi.” Awalo wamwetamweta, kumane twazumanana kweenda.