‘Kuponya Kwamaleele’ Kucitwa Mazuba Aano Sena Kuzwa Kuli Leza?

MUMASI amwi, bantu bamwi balaunka kumalende kwaakuponesyegwa malwazi ngobaamba kuti “taasilikiki.” Mumasi amwi, baŋanga baamba kuti babelesya nguzu zigambya. Alimwi mumasena amwi, basizikombelo balaakuba amiswaangano ooko bantu baciswa nkobasotoka kuzwa amacinga aabo aabalema naa kusowa madoombe aabo bamana kupaililwa akwaamba kuti baponesyegwa.

Bunji bwaziindi aabo basilika bazwa muzikombelo ziindene-indene alimwi kanji-kanji baambana kuti mbaasiluleyo, mbabeji naa tabakombi Leza. Aboobo inga mwabuzya kuti, Sena Leza inga wabelesya zikombelo ziindene-indene alimwi zikazyanya ikucita maleele? Alimwi, Ibbaibbele lyaamba kuti: “Leza tali walupilingano pe, ngwaluumuno.” (1 Ba-Korinto 14:33) Aboobo, sena masimpe kuti ‘kuponya kwamaleele’ kucitwa abantu aaba kuzwa kuli Leza? Bamwi baamba kuti babelesya nguzu zya Jesu kuponya bantu. Atubone Jesu mbwaakali kubaponya bantu.

Jesu Mbwaakali kubaponya bantu

Jesu mbwaakali kubaponya baciswa kuliindena kapati ambobaponya basikuponya bamazuba aano. Mucikozyanyo, Jesu wakabaponya boonse bakasika kulinguwe kuti bagwasyigwe. Tanaakali kusala buya bantu bakuponya kuzwa munkamu. Alimwi Jesu wakali kuponya bantu alimwi kanji-kanji wakali kucita oobo mpoonya aawo. Ibbaibbele lyaamba kuti: “Makamu makamu aabantu boonse bakali kuyanda kumwaampa, nkaambo kwanuunga zyazwa nguzu mulinguwe, zyabaponya boonse.”—Luka 6:19.

Mukwiimpana abasikuponya bamazuba aano ibaamba kuti ibaciswa tabaponi akaambo kakuti banyina lusyomo, Jesu wakali kuponya nobaba baabo batakali kumusyoma. Mucikozyanyo, cimwi ciindi Jesu wakaponya muntu moofwu iwatakamulomba kuti amuponye. Kumane, Jesu wakamubuzya kuti: “Sena wamusyoma mwana a-Leza?” Walo wakavuwa kuti: “Ino nguni, Omwami, kuti musyome? Jesu wakamwaambila kuti, “Ulimubwene, alimwi ngonguwe ngoambaula awalo.”—Johane 9:1-7, 35-38.

Inga mwalibuzya kuti, ‘ikuti naa lusyomo tiilwakali kuyandika kutegwa Jesu abaponye bantu, nkaambo nzi kanji-kanji ncaakali kwaambila aabo mbaakaponya kuti: “Lusyomo lwako lwakufutula”?’ (Luka 8:48; 17:19; 18:42) Jesu naakali kwaamba boobo wakali kupandulula kuti aabo bakalaalusyomo bakaunka kuli nguwe alimwi wakabaponya, pele aabo batakacita oobo taakabaponya. Aabo bakapona taluli lusyomo lwabo lwakapa kuti bapone, pele ninguzu zya Leza zyakabaponya. Ibbaibbele lyaamba boobu kujatikizya Jesu: “Mbwaakamunanika a Muuya Uusalala akumupa nguzu. Nkaambo kakuti Leza wakali aanguwe, wakeendeenda koonse-konse kaya bucita milimo mibotu akuya buponya aabo bakali kupenzegwa a Saatani.”—Milimo 10:38, BT.

Mazuba aano, bunji bwaziindi aabo balyaamba kuti balasilika bayanda kubbadelwa kutegwa basilike bantu. Basikusilika aaba balizyibidwe kuti mbantu baayandisya mali. Umwi wabasilisi aaba waambwa kuti wakajana mali aaku America aasika ku $89,000,000 mumwaka omwe kwiinda mukutondezya mbwaakali kusilika mucipekupeku. Zikombelo ziinde-indene azyalo zilajana mali kuzwa kubantu baunka kumalende kutegwa bakasilikwe. Mukwiimpana, Jesu kunyina naakali kubabbadelesya bantu mbaakali kuponya. Zimwi ziindi mane wakabapa zyakulya. (Matayo 15:30-38) Jesu naakatuma basikwiiya  bakwe kuya kukambauka, wakabaambila kuti: “Amuponye balwazi, amubusye bafu, amusalazye basicinsenda, amutande badaimona. Mwakapegwa buyo, anywe amupe buyo.” (Matayo 10:8) Ino nkaambo nzi ncokuli kwiindana akati kabasilisi bamazuba aano ambwaakali kusilika Jesu?

Ino Nguzu “Zyakuponya” Zizwa Kuli?

Kwamyaka iili mbwiibede, bamadokotela abasyaabusongo bamwi mumakani aabusilisi bali kuvwuntauzya mbobaponya basizikombelo. Ino ncinzi ncobajana? Kweelana amuteende waku London wakuti Daily Telegraph, dokotela wakucisi ca England iwakali kuvwuntauzya kaambo aaka kwamyaka iili 20 wakaamba kuti: “Impuwo yabaabo baamba kuti balaponya camaleele inyina bumboni buzwa kumadokotela.” Nokuba boobo, bantu banji basyoma kuti balapona kwiinda mukubelesya zyintu zibakali kubelesya bapati bazikombelo naa kuunka kumalende. Sena bakeenwa?

Mu Mulumbe Waacilundu, Jesu wakaamba kuti basizikombelo zyakubeja bayoomwaambila kuti: “Mwami, mwami, sa . . . teensi kuzina lyako nkutwakacita milimo mipati minji?” Pele walo uyoobaambila kuti: “Nsimuzi pe, amuzwe kulindime inywe nubamucita zibi.” (Matayo 7:22, 23) Kaamba nkozizwa nguzu zyabantu aaba balyaamba kuti balasilika, imwaapostolo Paulo wakacenjezya kuti: “Oyu sikusotoka milao uyooza akubeleka kwa-Saatani, anguzu zyamisyobo misyobo azitondezyo aziyoosyo zyakubeja. Uyooza alweeno loonse lwabubi.”—2 Ba-Tesalonika 2:9, 10.

Kuyungizya waawo, “ikuponya” kucitwa kwiinda mukubelesya zyintu zibakali kubelesya bapati bazikombelo, mituni azikozyanyo takukonzyi kuzwa kuli Leza. Nkaambo nzi? Nkaambo kakuti Ijwi lya Leza cakutainda mumbali lyaamba kuti: “Amucije kukomba mituni” alimwi “Amucenjele kuti mutavwelani amituni.” (1 Ba-Korinto 10:14; 1 Johane 5:21) “Ikuponya” ooku nenzila imwi Saatani njabelesya kuyunga bantu kuti bazwe mubukombi bwakasimpe. Ibbaibbele lyaamba kuti: “Saatani mwini alakwe ulalisandula mbuli angelo wamumuni.”—2 Ba-Korinto 11:14.

Icakali Kupa Kuti Jesu a Baapostolo Kabaponya Bantu

Ikuponya kwamaleele ikulembedwe mu Magwalo aa Banakristo aa Cigiliki kwakali kutondezya caantangalala kuti Jesu abaapostolo bakatumwa a Leza. (Johane 3:2; Ba-Hebrayo 2:3, 4) Ikuponya kwamaleele Jesu nkwaakacita alimwi kwakali kusinizya mulumbe ngwaakali kukambauka: “Wakali kuya bweendeenda moonse mu-Galilaya, kaya bwiisya muzikombelo zyabo akukambauka makani mabotu aa-Bwami akuponya malwazi oonse.” (Matayo 4:23) Eeyi milimo iigambya njaakacita Jesu, kubikilizya akusanina makamu aabantu, kuumuzya guwo alimwi akubusya bafwide, yakali kutondezya nzyayakucita kubantu baluleme mu Bwami bwakwe. Eelo kaka aaya makani mabotu!

Imilimo eeyi iigambya yakamana naakafwa Jesu abaapostolo aboonse bakapedwe nguzu zyakucita milimo eeyi. Imwaapostolo Paulo wakalemba kuti: “Masinsimi alaloba, ayalo myaambo ilamana, alwalo luzibo lulaloba.” (1 Ba-Korinto 13:8) Nkaambo nzi? Milimo iigambya kubikkilizya akuponya munzila yamaleele ‘zyakaloba’ alimwi taziciyandiki akaambo kakuti zyakazuzikikizya mulimo wakutondezya kuti Jesu ngo Mesiya wakasyomezyedwe akuti Leza waatalika kubelesya mbungano ya Bunakristo.

Nokuba boobo, makani aajatikizya kuponya kwamaleele nkwaakacita Jesu alayandika kapati mazuba aano. Ikuti twazibikkila maano akuzisyoma nzyaakali kuyiisya Jesu kujatikizya Bwami bwa Leza, tulakonzya kulangila ciindi businsimi bwamu Bbaibbele nobuya kuzuzikizyigwa kumuuya akumubili: “Takukooyooba naba omwe akati kabantu banyika uuamba kuti, Ndaciswa.”—Isaya 33:24; 35:5, 6; Ciyubunuzyo 21:4.