Lusyomo Mbolwakandigwasya Kuliyumya Mumapenzi

Akuluulwa aba Soledad Castillo

Ziindi zinji ndakatyompwa kapati mubuumi bwangu—nokuba boobo tiindakalendelelwa. Nindakali amyaka 34 balumi bangu bakafwa. Nikwakainda myaka iili cisambomwi abalo bataata bakafwa. Kwiinde buyo myezi iili lusele kuzwa ciindi bataata nibakafwa, ndakaambilwa kuti mwanaangu wakali abulwazi butaponi.

IZYINA lyangu ndime Soledad ilyaamba “Kulendelelwa.” Nokuba kuti izyina lyangu mbolyaamba oobu, taaku nindakalimvwide kuti ndalendelelwa. Naakandicitikila mapenzi aaya, ndakabona kuti Jehova Leza wakali andime ‘wakali ndijisi kujanza akundigwasya kutegwa nditayoowi.’ (Isaya 41:13) Kamuleka lino ndimwaambile mbwaakandileka mapenzi ngindakajisi ambwaakandipa kuba mulongwe wa Jehova.

Ndakali Kupona Kabotu Alimwi Ndakajisi Buyo Mapenzi Masyoonto

Ndakazyalilwa ku Barcelona mu Spain, mu May 3, 1961. Ndakazyalwa ndelikke kuli ba José aba Soledad. Nindakali amyaka iili fwuka bamaama bakaiya kasimpe kuzwa mu Jwi lya Leza. Bakali kuyandaula bwiinguzi kumibunzyo iijatikizya bukombi, pele cikombelo cabo kunyina nicakabagwasya pe. Bumwi buzuba, Bakamboni ba Jehova bobilo bakabaswaya kuŋanda akuyiingula mibuzyo yoonse njibakajisi kwiinda mukubelesya Magwalo. Bakazumina kuba aciiyo ca Bbaibbele.

Muciindi buyo cisyoonto, bamaama bakabbapatizyigwa akuba Bakamboni ba Jehova kumane nikwakainda myaka misyoonto abalo bataata bakabbapatizyigwa. Ba Eliana ibakali kuyiisya bamaama bakabona kuti andime ndakalijisi luyandisisyo mu Jwi lya Leza. Nokuba kuti ndakacili mwana, ba Eliana bakalomba kuti andime ndibe aciiyo cangu ndelikke. Ndilabalumba ba Eliana abamaama kuti bakandigwasya akundikulwaizya kusikila nindakabbapatizyigwa kandili aamyaka iili 13.

Nindakali mukubusi, ziindi zinji ndakali kupaila kuli Jehova—ikapati kuti naa kuli ncendiyanda kusala. Imasimpe ngakuti, nindakali kukomena tiindakajisi mapenzi manji. Mumbungano ndakalijisi beenzuma banji alimwi twakali kumvwana kapati abazyali bangu. Mu 1982 ndakakwatwa kuli ba Felipe, Bakamboni ibakajisi mbaakani mbuli yangu yakubelela Jehova.

Twakamuyiisya Mwaneesu Kuti Kamuyanda Jehova

Nikwakainda myaka yosanwe, ndakatumbuka mwana musankwa mubotu ngotwakapa zyina  lyakuti Saúl. Ime aba Felipe twakakkomana kuba amwana. Twakali kuyeeya kuti Saúl ulakomena kabotu akumuyanda Leza. Ime aba Felipe lyoonse twakali kuba a Saúl katumwaambila makani aajatikizya Jehova, kulida antoomwe, kumutola kumasena aakulyookezyezya akusobana anguyo. Saúl wakali kuyanda kuunka aba Felipe mubukambausi nibakali kuunka abamwi, alimwi kacili muniini bakatalika kumuyiisya kukonkomona amulyango akubapa matulakiti bantu.

Saúl wakali kucita kabotu akaambo kakuti twakali kumuyanda akumuyiisya kabotu. Naakali amyaka iili cisambomwi twakali kuunka limwi mukukambauka lyoonse. Wakali kukkomana kuswiilila kumakani aamu Bbaibbele alimwi wakali kucilangila ciiyo ca Bbaibbele camukwasyi. Mbwaakatalikila buyo cikolo, wakatalika kulisalila twaambo tumwi kweelana aluzyibo lwamu Bbaibbele ndwaakajisi.

Nokuba boobo, Saúl naakaba amyaka iili ciloba buumi mumukwasyi wesu bwakacinca. Ba Felipe bakatalika kuciswa bulwazi bwamapunga. Kwamyezi iili 11 bakapenga kapati cakuti tiibakali kucikonzya kubeleka alimwi bunji bwaziindi tiibakali kubukilwa bulo. Balumi bangu nibakali amyaka iili 36 bakafwa.

Ndilaakulila ndauyeeya mwaka ooyu ngubakafwa balumi bangu. Balumi bangu bakapenga kapati akaambo kabulwazi oobu alimwi kunyina ncindakali kukonzya kucita. Nibakali kuciswa ba Felipe ndakali kubakulwaizya kuti balapona, pele ndakalityompedwe kapati akaambo kakuti makanze ngindakajisi akamana. Ndakali kubabalila zibalo zyakajisi twaambo twamu Magwalo alimwi eeci cakali kutuyumya-yumya notwakali kwaalilwa kuunka kumiswaangano ya Bunakristo. Nibakafwa ndakausa kapati.

Pele Jehova wakandigwasya. Lyoonse ndakali kulomba muuya wakwe. Ndakamulumba Leza akaambo kamyaka njitwakakkala aba Felipe katukkomene alimwi abulangizi bwakuya kubonana ambabo baakubusyigwa. Ndakamulomba Leza kutegwa kandikkomana lyoonse nendiyeeya zyintu zibotu zitwakali kucita abalumi bangu akundipa maano aakuti ndimukomezye kabotu mwanaangu kutegwa abe Munakristo mwini-mwini. Nokuba kuti ndakaliuside ndakalimvwa kwaanguluka.

Bazyali bangu abakwesu mumbungano bakandigwasya kapati. Nokuba boobo, ndakazumanana kwiiya Bbaibbele a Saúl akumugwasya kubona mbwakonzya kumubelekela Jehova. Muntu umwi wakali kunjizya mulimo wakandipa mulimo mubotu wamuofesi pele ndakamulomba kuti andipe mulimo wakupyaanga-pyaanga kutegwa kandijana ciindi cinji cakuba a Saúl akotoka kucikolo.

Lugwalo lwa Tusimpi lwakandigwasya kapati kubona kaambo keni ncindeelede kumuyiisya Saúl munzila njayanda Leza. Lwaamba kuti: “Iyisya mwana aende munzila iielede, lino akomena takooyooleya mulinjiyo.” (Tusimpi 22:6) Oolu lugwalo lwakandikulwaizya kapati alimwi ndakaba alusyomo lwakuti, ikuti ndamuyiisya Saúl nzila zya Leza, Jehova uyakundilongezya. Masimpe, tiindakali kuvwola mali manji pele ndakeelede kuba aciindi cinji cakuba amwanaangu nkaambo eeci ncicakali mumizeezo kwiinda kuba azyintu zinji.

 Saúl naakali amyaka 14, bataata bakafwa. Saúl wakanyongana akaambo kakuti lufwu lwabakaapanyina lwakamupa kuti ayeeye lufwu lwabausyi. Bataata abalo bakali acikozyanyo cibotu akaambo kakuti bakali kumuyanda Jehova. Naakamana malila Saúl wakayeeya kuti nguwakali “musankwa” alikke wakaceede mumukwasyi, aboobo nguwakali amukuli wakulanganya banyina abakaapanyina.

Kusoleka Kusilika Bulwazi bwa Leukemia

Nikwakainda myezi iili lusele kuzwa ciindi bataata nibakafwa, dokotela wamukwasyi wesu wakandaambila kuti ndikamutole kucibbadela Saúl nkaambo wakali kukatala kapati. Bamadokotela nibakamupima ziindi zili mbozibede bakandaambila kuti Saúl wakali kuciswa bulwazi bwa leukemia. *

Mumyaka yobilo acisela, Saúl wakali kweendela buyo kucibbadela kapenga abulwazi oobu bwakkansa akunywa misamu njibakali kumupa bamadokotela kusoleka kumana bulwazi oobu. Nokwakainda myezi iili cisambomwe kuzwa naakatalika kunywa musamu, Saúl wakalimvwa mbubo-mbubo kwamwaka acisela. Mukubula coolwe, bulwazi bwakakomena, Saúl wakapegwa musamu ciindi catatu, wakalimvwa kabotu ciindi cisyoonto buyo pele musamu tiiwakabeleka kabotu mbuli ciindi cakutaanguna. Saúl wakali lyaabide kuli Leza alimwi walaambide kale kuti uyanda kubbapatizyigwa kutegwa abe umwi wa Bakamboni ba Jehova, pele mukubula coolwe wakafwa naakaba amyaka iili 17 katanabbapatizyigwa.

Bamadokotela bunji bwaziindi baamba kuti, ikuti konywa musamu wakkansa uyandika kubikkwa bulowa bumbi kutegwa busukulule bulowa buli abulwazi. Masimpe ngakuti, kubikkwa bulowa takukonzyi kumana bulwazi. Bamadokotela nibakabujana buyo bulwazi bwa leukemia, ime a Saúl twakamvwana kuti tatukazumini busilisi oobu akaambo kakuti twakali kuyanda kutobela mulawo wa Jehova ‘wakulikasya . . . kubulowa.’ (Incito 15:19, 20) Ziindi zili mbozibede kanditako, Saúl wakali kubaambila bamadokotela mbwaakali kuyanda kuti asilikwe. (Amubone kabbokesi kali apeeji 21.)

Kumamanino bamadokotela bakabona kuti Saúl mupati akuti wakali kukonzya kulisalila mbwayanda kusilikwa alimwi wakalizyi bulwazi oobu mbobupenzya. Bakazumina kumusilika kakunyina kubelesya bulowa, nokuba kuti bakacili kutusinikizya kuti tucince muzeezo wesu. Ndakakkomana nindakalimvwida Saúl kabapanduluda bamadokotela mbwabubona bulowa. Masimpe ngakuti, wakali kumuyanda Jehova.

Nitwakazyiba-zyiba buyo kuti Saúl wakali abulwazi oobu, nceciindi ibbuku lyakuti Amubaa Cilongwe a Jehova nilyakazwa amuswaangano wacooko mu Barcelona. Eeli bbuku libotu lyakatuyumya ciindi camapenzi nekuba kuti tiitwakalizyi cakali kuya kucitika kumbele. Ciindi nitwakali mucibbadela, twakali kulibala aatomwe bbuku eeli. Nitwakali kuliyumya mumampenzi eesu twakali kuyeeya ncolyaamba. Aciindi eeci twakalumvwisya lugwalo lwa Isaya 41:13 lulembedwe kumatalikilo aabbuku eeli. Ilugwalo oolu lwaamba kuti: “Mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako.”

Ilusyomo lwa Saúl Lwakabagwasya Bamwi

Bamadokotela abamanesi baku Cibbadela caku Vall d’ Hebrón bakakulwaizyigwa abusicamba bwa Saúl alimwi anzyaakali kubaambila. Boonse basicibbadela bakali kumugwasya bakali kumuyanda. Imupati wamulimo uulanganya malwazi aakkansa, kuzwa ciindi eeco ulabasilika bana ba Bakamboni baciswa bulwazi bwa leukemia alimwi ulabalemeka. Ulaluyeeya lusyomo ndwaakajisi Saúl, mbwaakaliyumya kusikila naakafwa alimwi ambwaakali kububona buumi. Bamanesi bakamwaambila Saúl kuti wakali mulwazi mubotu kwiinda boonse mbobatambula  muwaadi iilya. Bakaamba boobo akaambo kakuti tanaakali kutongooka alimwi kusikila buzuba mbwaakafwa wakali kubasamausya bantu.

Imukaintu wakaiya mbobubeleka bongo bwabantu wakandaambila kuti, ibana banji baciswa bulwazi butasilikiki ibali muciimo eeci, balaakubazangila bamadokotela abazyali babo. Balaakucita oobo akaambo kakucimwa akutalimvwa kabotu. Icakamugambya ncakuti Saúl kunyina naakacita oobo, pele wakaluumunyi alimwi wakali kuzilanga kabotu zyintu. Eeci cakatupa kuti mebo a Saúl tumukambaukile akumwaambila nzyotusyoma.

Ndilayeeya alimwi Kamboni umwi mumbungano yesu mbwaakagwasyigwa acikozyanyo ca Saúl. Mukwesu ooyu wakali tyompedwe kwamyaka iili cisambomwi, bakasoleka misamu pele cakaala. Ziindi zinji nguwakali kumulindilila Saúl kucibbadela. Wakandaambila kuti, Saúl wakamukulwaizya akaambo kakuti tanaakali kulibilika kujatikizya bulwazi mbwaakajisi bwa leukemia. Wakabona kuti, nokuba kuti Saúl tanaakali kucikonzya kubuka, wakali kubakulwaizya ibakali kumuswaya. Kamboni ooyu wakati: “Icikozyanyo ca Saúl cakandikulwaizya kubona mbondikonzya kumana penzi lyangu lyakutyompwa.”

Kwainda myaka yotatwe kuzwa ciindi Saúl naakafwa. Aino ndicilila. Mazuba aano mbubo-mbubo pele Leza wandipa “nguzu zigambya.” (2 Ba-Korinto 4:7) Ndazyiba kuti nokuba kuti zyintu zikatazya alimwi zitakkomanisyi zilakonzya kutucitikila, tulakonzya kujana zimwi zikonzya kutukkazika moyo. Ikufwidwa mulumaangu, bataata amwanaangu musankwa candigwasya kubayanda akubabikkila maano bantu bapenga. Kunze lyaboobo, candipa kuba mulongwe wa Jehova. Tandiyoowi kuzumanana kupona akaambo kakuti Taateesu wakujulu ucindigwasya. Ucindijatilila kujanza.

Bupanduluzi buyungizidwe

Sena Kuli Nomwakalibuzyide Kuti?

Ndiza mwakamvwa kuti Bakamboni ba Jehova balakaka kubikkwa bulowa. Sena mulicizyi ncobakakila?

Bantu banji tabakaswiilisisyi kaambo kapa kuti Bakamboni ba Jehova kabakaka kubikkwa bulowa kweelana ancolyaamba Bbaibbele. Zimwi ziindi bantu bayeeya kuti Bakamboni ba Jehova balakaka busilisi buli boonse naa kuti tababubikili buya maano buumi. Aaya taali masimpe pe. Bakamboni ba Jehova bayanda misamu iikonzya kubeleka kabotu kumukwasyi woonse. Nokuba boobo, bayanda busilisi butabikkilizyi bulowa. Nkaambo nzi?

Nkaambo kakuti balausyoma mulawo Leza ngwaakabapa bantu. Mbulyakamanina buyo Zambangulwe muciindi ca Nowa, Leza wakazumizya Nowa amukwasyi wakwe kuti kabalya nyama. Pele Leza wakabapa mulawo ooyu: Tiibakeelede kulya bulowa. (Matalikilo 9:3, 4) Ooyu mulawo ucibeleka mazuba aano nkaambo misyobo yoonse yabantu bakazwa kuli Nowa. Ooyu mulawo tiiwakacinca pe. Nokwakainda myaanda yamyaka iinda kulusele, Leza wakawiinduluka mulawo ooyu kubana Israyeli, nakapandulula kuti bulowa bulisetekene akuti bwiiminina buumi. (Levitiko 17:14) Nikwakainda myaka iili 1,500, baapostolo Banakristo bakalailila Banakristo boonse ‘kulikasya kubulowa.’—Incito 15:29.

Bakamboni ba Jehova bacibona kuti cilatondwa kulya bulowa akubikkwa bulowa. Eeci ncecibapa kuti lyoonse kabalombozya kusilikwa kakunyina kubikkwa bulowa. Ikusyoma zili mu Magwalo kubapa kuti kabapegwa misamu mibotu. Eeci ncecipa kuti bantu banji ibatali Bakamboni ba Jehova abalo kabalomba busilisi butabikkilizyi kubikkwa bulowa.

[Cifwanikiso icili apeeji 19]

Kandili amulumaangu Felipe amwaneesu Saúl

[Cifwanikiso icili apeeji 19]

Bazyali bangu ba José aba Soledad

[Cifwanikiso icili apeeji 20]

Saúl kakuceede mwezi omwe kuti afwe