Muntu Taponeni Buyo Nsima—Mbondakafwutuka Muntolongo zya Nazi

Akuluulwa aba Joseph Hisiger

Ndakabuzya sintolongoma kuti, “Ino ubala nzi?” Wakandiingula kuti: “Ndibala Bbaibbele.” Kumane wakandaambila kuti: “Inga ndakupa Bbaibbele eeli ikuti wandipa cakulya ncoyelede kulya kwansondo yomwe.”

NDAKAZYALWA mu March 1, 1914, mucilikiti ca Moselle, icakali kweendelezyegwa acisi ca Germany aciindi eeco. Noyakamana Nkondo Yanyika Yakusaanguna mu 1918, cilikiti eeci cakaba mumaanza acisi ca France. Mu 1940, bakacibweza alimwi bana German. Kumane noyakamana Nkondo Yanyika Yabili mu1945, cilikiti eeci cakaba mumaanza aa France alimwi. Ndakaiya mwaambo wa Chifulenci awaci Germany ciindi nokwakali kucinca-cinca ooku.

Bazyali bangu bakali kupaila ku Katolika. Lyoonse masiku twakali kufwugama akupaila katutana koona. Twakali kuunka kucikombelo mu Nsondo alimwi amumazuba akulyookezya. Tiindakali kulovwa kucikombelo alimwi ndakali mukabunga kaitwa kuti Catholic study group.

Ndakali Musungu Mumulimo wa Bakamboni ba Jehova

Mu 1935, ibazyali bangu bakaswaigwa a Bakamboni ba Jehova bobilo. Bakali kubandika makani aajatikizya zikombelo mbozyakali kutola lubazu munkondo yanyika yakusaanguna. Kuzwa ciindi eeco, ndakaba aluyandisisyo lwakwiiya Bbaibbele cakuti mu 1936 ndakalomba Bbaibbele kumupaizi. Wakaamba kuti, ikutegwa ndilizyibe kabotu Bbaibbele, ndakeelede kwiiya makani aabukombi. Nokuba boobo, eeci cakandipa kuti ndizumanane kuyandaula Bbaibbele lindigeme kutegwa kandilibala.

Mu 1937, imweenzuma ngotwakali kubeleka limwi, Albin Relewicz, iwakali umwi wa Bakamboni ba Jehova wakatalika kubandika andime makani aajatikizya ncoliyiisya Bbaibbele. Ndakamubuzya kuti: “Sena ulijisi Bbaibbele?” Wakandaambila kuti ulijisi, kumane nokwakainda mazuba masyoonto wakanditondezya izyina lya Leza, Jehova, mu Bbaibbele lyamuci German liitwa kuti Elberfelder version ndyaakandipa. Ndakalibala cabunkutwe alimwi ndakatalika kuunka kumiswaangano ya Bakamboni mudolopo lya Thionville ilyakali afwaafwi.

Mu August 1937, ndakaunka a Albin kumuswaangano wamasi wa Bakamboni wakacitilwa mucisi ca Paris. Nitwakasika okuya, ndakatalika kukambauka kuŋanda-aŋanda. Nokwakainda mazuba masyoonto ndakabbapatizyigwa alimwi mu 1939 ndakatalika mulimo waciindi coonse. Bakandituma kwaakubelekela mudolopo liitwa kuti Metz. Mpoonya mu July ndakatambwa kwaakubelekela kuofesi yamutabi ya Bakamboni ba Jehova ku Paris.

Mapenzi Aakaliko Nokwakali Nkondo

Ndakakkala buyo mazuba masyoonto kumutabi, mpoonya mu August 1939, bamfwulumende yaku France bakandiita kuti ndikabeleke mulimo wabusikalumamba.  Ndakakaka kubeleka mulimo ooyu akaambo kakuti manjezyeezya aangu tanaakali kundizumizya, bamane bakandaanga. Mu May mwaka wakatobela kandili muntolongo, cisi ca Germany cakalwana acisi ca France. Mu June, cisi ca France cakazundwa alimwi eci cakapa kuti ndibe muna German. Aboobo, mu July 1940 ndakagusyigwa muntolongo mpoonya ndakaunka kwaakukkala abazyali bangu.

Mbwaanga twakali kweendelezyegwa aba Nazi, twakali kusisikizya buya kwiiya Bbaibbele. Imukaintu umwi wazyina lyakuti Maryse Anasiak, Munakristo sicamba ngondakali kujana mucintoolo mupangilwa zinkwa icakali camukwesu nguwakali kutweetela Ngazi Yamulindizi. Kuzyi kusika mu 1941, ndakaliyumya kumapenzi ngobakali kujana Bakamboni mucisi ca Germany.

Mpoonya buzuba bumwi, bamapulisa ba Nazi baitwa kuti Gestapo bakandiswaya. Umwi mupulisa wakandibuzya naa ndakacili kuyanda kuba Kamboni, nkaambo wakaamba kuti mulimo wa Bakamboni wakasyigwa. Nindakaamba kuti “Inzya” mpoonya wakandaambila kuti ndimutobele nkwaakali kuunka. Akaambo kakuyoowa, bamaama bakanetuka. Naakabona kuti bamaama banetuka, mupulisa ooyu wakandaambila kuti ndicaale kutegwa ndibabone mbobatiibe.

Mufakitoli mundakali kubeleka, tindakamwaanzya mupati wamulimo kweelana ambobakali kwaanzya. Alimwi ndakakaka kuba wankamu ya Nazi. Akaambo kakuti ndakakaka, buzuba bwakatobela bamapulisa ba Nazi bakandaanga. Nobakandibuzya ndakakaka kubaambila mazyina aa Bakambonima. Mupulisa wakali kundibuzya wakanduumya tako lyantobolo mumutwe kusikila ndanetuka. Mu September 11, 1942, inkuta ya Nazi iitegwa Sondergericht iyakali kulanganya twaambo twabantu bakali kuzangila mfulumende mudolopo lya Metz yakakosola kuti ndaangwe kwamyaka yotatwe. Bakandipa mulandu wakuti ndakali “kwiiminina Mbunga ya Bakamboni ba Jehova kwiinda mukumwaya makani aakubeja.”

Nokwakainda nsondo zyobilo, bakanditola kuntolongo yaku Zweibrücken nkubakali kundipenzya kapati. Okuya ndakali kubeleka ankamu yabasikubambulula njanji. Mulimo wesu wakali kujatikizya kwaanga njanji akubikka mabwe aakkala kunsi aanjanji. Mafwumo-fwumo twakali kupegwa buyo nkapu yomwe ya tii acinkwa mpoonya masikati akumangolezya toonse twakali kupegwa buyo musinza. Bamane, bakandilonzya akunditola kuntolongo iimbi iyakali munsi aadolopo nkondakabede kusaanguna. Okuya ndakali kusuma  mabbusu. Nokwakainda myezi iili mbwiibede, bakandipilusya ku Zweibrücken pele cino ciindi bakandipa mulimo wamumuunda.

Ndakali Kupona Ikutali Akaambo Kakulya Buyo Nsima

Muntolongo, ndakali kukkala amulombwana wakucisi ca Netherlands. Nondakacizyiba asyoonto kwaambaula musyobo wakwe, ndakamwaambila zyintu nzyondakali kusyoma. Wakaya ambele kumuuya alimwi wakatalika kutobela milawo ya Leza amane wakandilomba kuti ndimubbapatizye mumulonga. Naakazwa mumeenda, wakandikumbata akwaamba kuti, “Joseph, lino ndaba munyoko!” Twakazyi kwaandaana nibakandijola kwaakubeleka mulimo wakubambulula njanji.

Lino ndakatalika kukkala amuna German. Bumwi buzuba mangolezya, wakatalika kubala Bbaibbele. Eeci nceciindi naakandaambila kuti inga wandipa Bbaibbele lyakwe ikuti naa ndazumina kumupa cakulya ncondakeelede kulya nsondo yoonse. Ndakamwiingula kuti, “cili kabotu!” Nokuba kuti tiicakali cuubauba kutalya nsondo yoonse, ndakakkomana kuti ndakacita oobo. Ndakazyiba ncaamba majwi aa Jesu aakuti: “Teensi nsima ilike njaaponena muntu, ulaponena amajwi oonse aazwa kumulomo wa-Leza.”—Matayo 4:4.

Mbwaanga lino ndakalijisi Bbaibbele, ipenzi lyakaliko dyakuti tiindakalizyi mbondikonzya kulisisa. Bakamboni tiibakali kuzumizyigwa kuba a Bbaibbele mbuli bamwi. Aboobo ndakali kulibala cakusisikizya masiku kandilivwumbide ngubo. Bwaca ndakali kweenda andilyo muzisani. Taaku nolyakali kucaala akaambo kakuti bamalonda bakali kulanga-langa muzyintu zyangu ikuti kanditako.

Bumwi buzuba notwakabungana kuti tutalike kubeleka, ndakabona kuti ndaliluba Bbaibbele lyangu. Nitwakakotoka ndakafwambaana kuunka kucitolokesi pele ndakajana kuti Bbaibbele taliko. Nindakamana kupaila kuli Leza, ndakaunka kuli malonda akumwaambila kuti kuli walibba bbuku lyangu. Nindakamwaambila tanaakabikkila maano, pesi nindakajoka ndakalijana Bbaibbele lyangu. Ndakamulumba kapati Leza.

Bumwi buzuba, ndakaambilwa kuti ndikasambe. Nondakali kusamununa zyakusama, ndakali losyela caali Bbaibbele. Kumane naakalanga kumbi malonda, ndakalitontela mukati mucisambilo akuulu akulisisa kumbali nondakali kusamba. Nindakamana kusamba, ndakalitontela aakali mulwi wazisani zyakali kusalala.

Bubotu Abubi Bwamuntolongo

Bumwi buzuba mafwumo-fwumo mu 1943 bakaili kabakkede anze, ndakamubona Albin. Awalo wakalaangidwe. Twakalangana, kumane wakabika janza acamba kutondezya kuti tulibabunyina. Mpoonya wakanditondezya kuti ulandilembela kagwalo. Buzuba bwakatobela naakainda, wakandisiila kagwalo pele malonda wakakabona. Eeci cakapa kuti batwaandaanye, akutubikka aumwi mucitolokesi kwansondo zyobilo. Bakali kutupa buyo cinkwa cibolede ameenda aatombe alimwi twakali koona azipulanga kakunyina ngubo.

Kuzwa waawo, bakandilonzya akunditola kuntolongo iili mu Siegburg kwaakubeleka mulimo wakufwula zibulo. Mulimo ooyu wakali muyumu alimwi cakulya cakali cisyoonto. Masiku ndakalota kuti ndilya zyakulya zibotu—imakeke alimwi amicelo—mpoonya nindakabuka mwida mwakali kuguluma alimwi nkujana amoyo kwayuma ntaa. Ndakali kokede kapati. Nokuba boobo, abuzuba ndakali  kubala Bbaibbele lyangu akuzyiba ncindakali kuponena.

Lwaanguluko!

Bumwi buzuba mafwumo-fwumo, mu April 1945, bamalonda bakaccija akuzisiya bukwazi zijazyo zyatolongo. Ndakazwa muntolongo. Mbondakazwida buyo muntolongo ndakaunka kucibbadela kutegwa ndisilikwe. Kumamanino aamwezi wa May, ndakaunka kuŋanda yabazyali bangu. Bakali kuyeeya kuti ndakafwa kale. Bamaama nobakandibona, bakalila akaambo kakukkomana. Mukubula coolwe, ndakakkala buyo ambabo ciindi cisyoonto mpoonya bakafwa.

Ndakatalika kuswaangana alimwi ambungano ya Thionville. Eelo kaka ndakakkomana kubonana alimwi abakwesu abacizyi bakumuuya! Ndakakkomana kapati kumvwa kuti bakali kusyomeka nokuba kuti bakali kupenga. Imweenzuma Albin wakafwa ku Regensburg, mucisi ca Germany. Kumane ndakazyi kumvwa kuti mweenima, Jean Hisiger, wakaba Kamboni kumane wakajaigwa akaambo kakukaka kubeleka mulimo wabusikalumamba. Jean Queyroi, ngotwakali kukkala limwi kuofesi yamutabi yaku Paris, wakaliyumya muntolongo yaku Germany kwamyaka yosanwe. *

Kakunyina akusowa ciindi, ndakatalika alimwi kukambauka mudolopo lya Metz. Aciindi aawa ndakali kwiizya kapati amukwasyi waba Minzani. Imwana wabo musimbi wazyina lya Tina, wakabbapatizyigwa mu November 2, 1946. Wakali musungu mukukambauka alimwi wakali mubotu. Twakakwatana mu December 13, 1947. Mu September 1967, Tina wakatalika mulimo waciindi coonse alimwi wakazumanana kucita oobo kusikila naakafwa mu June 2003, kali amyaka iili 98. Lyoonse ndilamuyeeya Tina.

Mazuba aano, kandili amyaka iinda ku 90, ndabona kuti Ijwi lya Leza lilandiyumya lyoonse kutegwa ndiliyumye mumasunko. Nokuba kuti zimwi ziindi ndakali koona anzala pele lyoonse ndakali kubala Ijwi lya Leza alimwi Jehova wakali kundigwasya. ‘Ijwi lyakwe lyandibusya’.—Intembauzyo 119:50.

Bupanduluzi buyungizidwe

[Cifwanikiso icili apeeji 17]

Mweenzuma Albin Relewicz

[Cifwanikiso icili apeeji 17]

Maryse Anasiak

[Cifwanikiso icili apeeji 18]

Ibbaibbele lyakandiimya cakulya kwansondo yomwe

[Cifwanikiso icili apeeji 19]

Mu 1946, kandili a Tina, imusimbi ngondakali kuyanda kukwata

[Cifwanikiso icili apeeji 19]

Jean Queyroi amukaintu wakwe Titica