Mwatambwa!

ANDIZA kuli nomwakaindide afwaafwi a Ŋanda ya Bwami ya Bakamboni ba Jehova iili mucilawo cenu akulibuzya kuti, ‘ino ncinzi cicitika muŋanda eeyi?’ Sena mulizyi kuti kufwumbwa uuyanda ulakonzya kujanika kumiswaangano iicitwa a Bakamboni amvwiki? Boonse baswaya balatambulwa amaanza obilo.

Nokuba boobo, ambweni mulijisi mibuzyo. Mulakonzya kubuzya kuti, Ino nkaambo nzi Bakamboni ba Jehova ncobaswaanganina? Ino ncinzi cicitika lyamiswaangano yabo? Ino ncinzi ncobaamba aabo batali Bakamboni ba Jehova ibajanika kumiswaangano eeyi?

“Amubunganye Bantu Boonse”

Kuzwa kaindi, bantu bali kubungana kutegwa bakombe akwiiya makani aajatikizya Leza. Myaka iitandila ku 3,500 yainda, bana Israyeli bakaambilwa kuti: “Amubunganye bantu boonse, baalumi abanakazi abana abeenzu bakede muminzi yanu, kuti baswiilile, baiye, balemeke Jehova Leza wanu akucenjela kubamba majwi oonse aa-Mulao oyu.” (Deuteronomo 31:12) Aboobo, mu Israyeli, bana abapati bakali kuyiisyigwa kukomba akumvwida Jehova Leza.

Nikwakainda myaka minji, imbungano ya Bunakristo noyakatalisyigwa, bakombi bakasimpe bakazumanana kuswaangana. Imwaapostolo Paulo wakalemba kuti: “Aboobo katunga katuyeeyana, katugwasyanya, katutondezya kuyandana alimwi akucita milimo mibotu. Tutaleki cilengwa cakuswaangana antoomwe, mbuli bamwi bali aciyanza cakulengaana. Pele katuyumizyanya.” (Ba-Hebrayo 10:24, 25, BT.) Mbubonya luyando mbolukonzya kukomena ikuti banamukwasyi kabaswayana, alwalo luyando lwa Banakristo lulayumizyigwa nobaswaangana akukomba Leza.

Kweelana azikozyanyo eezyi zyamu Magwalo, Bakamboni ba Jehova balaswaangana ziindi zyobilo amvwiki. Aabo bajanika kumiswangano eeyi balagwasyigwa kumvwisya akubelesya njiisyo zyamu Bbaibbele. Bunji bwamakani aabandikwa kumiswaangano nyika yoonse mboizulwa alikozyene alimwi muswaangano aumwi ulagwasya munzila yakumuuya. Miswaangano kaitana talika anoyamana, aabo bajanika ‘balayumizyanya’ kwiinda mumibandi. (Ba-Roma 1:12, BT.) Ino muswaangano aumwi ucitwa buti?

Makani aa Bbaibbele

Muswaangano bantu banji nkobajanika kwaciindi cakusaanguna ngwamakani aabuleya aazwa mu Bbaibbele alimwi bunji bwaziindi ucitwa kumamanino amvwiki. Jesu wakali kukanana kubuleya ziindi zinji—kubikkilizya a Mulumbe waa Cilundu uuzyibidwe kapati. (Matayo 5:1; 7:28,29) Mwaapostolo Paulo wakakanana kubantu baku Atene. (Incito 17:22-34) Kwiinda mukutobela cikozyanyo ca Jesu aca Paulo, akati kamiswaangano iicitwa a Bakamboni ba Jehova kuli makani aabambilidwe buleya, kubikkilizya abaabo bajanika kumuswaangano ooyu kwaciindi cakusaanguna.

Imuswaangano ulatalika anyimbo iizwa mubbuku lyanyimbo lyakuti Amwiimbile Jehova Intembauzyo. * Boonse ibayanda kwiimikila akwiimba nyimbo balakonzya kucita oobo. Wamana mupailo, mwaambi ulakanana makani aamaminiti aali 30. (Amubone kabbokesi kakuti  “Makani Aagwasya Buleya.”) Makani ngapa azwa mu Bbaibbele. Bunji bwaziindi, mwaambi waambila baswiilizi kuti bajalule ma Bbaibbele aabo akumutobelezya nabala Magwalo aasalazya kaambo. Aboobo, mulakonzya kuletelezya Bbaibbele lyenu naa kulomba kuli umwi wa Bakamboni ba Jehova miswaangano kaitana talika.

Ciiyo ca Ngazi Yamulindizi

Mumbungano zinji zya Bakamboni ba Jehova, makani aabuleya amana, kulaba Ciiyo ca Ngazi Yamulindizi. Eeci nciiyo cawoola lyomwe iciyeeme amakani aamu Bbaibbele cicitwa kwiinda mukubuzya mibuzyo akwiingula. Muswaangano ooyu ulabagwasya bantu boonse  bajanika kuti babe mbuli bantu baku Bereya bakuciindi ca Paulo ‘ibakatambula makani amyoyo ilibambide kabotu, akulingaula Magwalo.’—Incito 17:11.

Ciiyo ca Ngazi Yamulindizi cilatalika alwiimbo. Cibalo cibandikwa alimwi amibuzyo njabuzya sikusololela ciiyo eeci ilajanika mumagazini yakwiiya. Mulakonzya kujana magazini yakwiiya kuli umwi wa Bakamboni ba Jehova. Akati katwaambo twakabandikwa caino-ino kuli twakuti: “Nobazyali​—Amuyiisye Bana Banu Caluyando,” “Mutabweedezyi Cibi Kumuntu” alimwi acakuti “Ikaambo Kupenga Koonse Ncokuya Kumana Ino-ino.” Nokuba kuti ciiyo eeci cilacitwa kwiinda mukubuzya mibuzyo akwiingula, baswiilizi bayanda kwiingula balatambika maanza alimwi bunji bwaziindi baingula mbaabo ibakacibalila limwi cibalo eeco amagwalo aali mumo. Imuswaangano ooyu ulamana kwiinda mukwiimba lwiimbo amupailo.—Matayo 26:30; Ba-Efeso 5:19.

Ciiyo ca Bbaibbele Cambungano

Bakamboni ba Jehova alimwi balijisi buzuba nobaswaangana ku Ŋanda ya Bwami kumuswaangano uujisi zibeela zyotatwe uutola woola lyomwe amaminiti aali 45. Cibeela cakusaanguna ciitwa kuti Ciiyo ca Bbaibbele Cambungano icitola maminiti aali 25. Iciiyo eeci cipa kuti aabo bajanika bakonzye kulizyiba kabotu Bbaibbele, kucinca bukkale bwabo ambobayeeya alimwi akuba basikwiiya ba Kristo babotu. (2 Timoteo 3:16, 17) Mbubonya mbuli ciiyo ca Ngazi Yamulindizi, mumuswaangano ooyu kubandikwa twaambo twamu Bbaibbele kwiinda mukubuzya mibuzyo akwiingula. Aabo bayanda kwiingula balatambika maanza. Nobacita muswaangano ooyu bunji bwaziindi babelesya bbuku naa broshuwa iipandulula twaambo twamu Bbaibbele yakamwaigwa a Bakamboni ba Jehova.

 Ino nkaambo nzi ncobabelesya mabbuku aapandulula Bbaibbele kumiswaangano eeyi? Ciindi nolyakali kulembwa Bbaibbele, bantu tiibakali kubala buyo Jwi lya Leza. Bakali “kupandulula majwi mbwaamba, aboobo bantu bakamvwisya majwi aakabalwa.” (Nehemiya 8:8) Muciindi cesu, imabbuku aapandulula ibbuku lya Isaya, Daniele alimwi alya Ciyubunuzyo abagwasya aabo bajanika kumuswaangano ooyu ikumvwisya mabbuku aaya amu Bbaibbele.

Cikolo Camulimo Weendelezyegwa a Leza

Wamana muswaangano wa Ciiyo ca Bbaibbele Cambungano, kulaba Cikolo Camulimo Weendelezyegwa a Leza. Ooyu muswaangano uutola maminiti aali 30 ugwasya Banakristo kucizyiba ‘kuyiisya’ kabotu. (2 Timoteo 4:2) Mucikozyanyo, sena mwanaanu naa mweenzinyoko kuli naakamubuzyide mubuzyo kujatikizya Leza naa Bbaibbele iwakamwaalila kwiingula? Muswaangano wa Cikolo Camulimo Weendelezyegwa a Leza ulakonzya kumugwasya kuzyiba kwiingula mibuzyo iikatazya kwiinda mukubelesya Bbaibbele. Aboobo, tulakonzya kwaazumina majwi ngaakaamba Isaya aakuti: “Mwami Jehova wandipa lulimi lwabaiyide, kuti nzibe kwaamba majwi aakugwasya bakateede.”—Isaya 50:4.

Muswaangano wa Cikolo Camulimo Weendelezyegwa a Leza ulatalika amakani aayeeme azibalo zyamu Bbaibbele nzyobakakulwaizyigwa kubalila limwi aabo bajanika. Amana kubandika, mwaambi ulalomba baswiilizi kuti baambe mubufwaafwi twaambo twakabakkomanisya muzibalo eezyo. Wamana mubandi ooyu, basicikolo bakalilembya mucikolo eeci balakanana makani aayindene-indene.

Basicikolo aaba balapegwa cibeela cakubala lugwalo lwamu Bbaibbele kucibumbili naa kutondezya mbobakonzya kuyiisya muntu umwi makani aamu Bbaibbele. Makani aamwi amana, sikupa lulayo uusimide kumuuya ulamulumbaizya sicikolo muzibeela mwacita kabotu kweelana amakani aalembedwe mubbuku lyakuti Amugwasyigwe Alwiiyo Lujanwa mu Cikolo Camulimo Weendelezyegwa a Leza. Yamana miswaangano, sikupa lulayo ulabonana asicikolo  aumwi akumwaambila nzila zikonzya kumugwasya kuyaambele.

Imuswaangano ooyu uutola ciindi cisyoonto buyo wakabambilwa kugwasya basicikolo abantu boonse bajanika ibayanda kucizyiba kubala kabotu, kupasaula kukanana alimwi akuyiisya kabotu. Camana Cikolo Camulimo Weendelezyegwa a Leza, lwiimbo luyeeme alugwalo lwamu Bbaibbele lulaimbwa kutegwa Muswaangano wa Mulimo utalike.

Muswaangano wa Mulimo

Cibeela camamanino camuswaangano ooyu ciitwa kuti Muswaangano wa Mulimo. Kwiinda mumakani, zitondezyo, kubuzya-buzya alimwi akwiingula kwabaswiilizi, aabo bajanika balaiya mbobakonzya kuyiisya kabotu kasimpe kamu Bbaibbele. Katana kubatuma basikwiiya bakwe kuya kukukambauka, Jesu wakabapa malailile aayandika kapati. (Luka 10:1-16) Akaambo kakuti bakalibambila kabotu mulimo wakukambauka, bakazwidilila. Nibakapiluka, bakalungulula kuli Jesu mbobakabeleka. (Luka 10:17) Bunji bwaziindi, basikwiiya bakali kwaambilana zyintu zyakali kubacitikila mumulimo ooyu.—Incito 4:23; 15:4.

Zibeela zya Muswaangano wa Mulimo wamaminiti aali 35 zilalembwa amwezi mulugwalo lulembelwa Bakamboni boonse lwiitwa kuti Mulimo Wesu wa Bwami. Makani aakabandikwa caino-ino ngakuti: “Amumukombe Jehova Mumukwasyi Woonse,” “Citupa Kupilukila Cakwiinduluka-Induluka” alimwi aakuti “Amwiiye Kristo Mumulimo Wanu Wakukambauka.” Muswaangano ooyu ulamana alwiimbo, kumane umwi wamumbungano ulapaila mupailo wakujala.

Nzyobaamba Bantu Bakaswaide

Bantu bamumbungano balabatambula beenzu boonse amaanza obilo. Mucikozyanyo, Andrew wakaambilwa makani manji aakubeja kujatikizya Bakamboni ba Jehova. Pele naakajanika ciindi cakusaanguna kumuswaangano, wakagambwa kubona mbwaakatambulwa kabotu. Andrew waamba kuti: “Ndakakkomana kujanika kumuswaangano akutambulwa amaanza obilo.” Awalo Ashel, imukubusi uukkala kucisi ca Canada wakaamba kuti: “Muswaangano wakali kukkomanisya! Twaambo twakali kubandikwa tiitwakali kukatazya kumvwa.”

José uukkala kucisi ca Brazil wakazyibidwe kuti ncigwebenga mucilawo mwakkala. Nokuba boobo, wakatambwa kumuswaangano ku Ŋanda ya Bwami. Wakaamba kuti: “Boonse mbondakajana ku Ŋanda ya Bwami bakanditambula amaanza obilo nokuba kuti bakalizyi bukkale mbondakajisi musyule.” Atsushi uukkala kucisi ca Japan wakaamba kuti: “Masimpe ngakuti nindakajanika kumuswaangano wa Bakamboni ba Jehova kwaciindi cakusaanguna, ndakalilibilikide kapati. Nokuba boobo, ndakazyi kuzyiba kuti Bakamboni ba Jehova tabayoosyi pe. Bakanditambula kabotu.”

Mwatambwa

Kweelana amakani aambwa atala aawa, ikujanika kumiswaangano iicitilwa ku Ŋanda ya Bwami kulakonzya kumugwasya. Muyakwiiya makani aajatikizya Leza. Alimwi kwiinda mumalailile aamu Bbaibbele ngomuya kupegwa, Jehova Leza uyakumuyiisya kutegwa ‘mugwasyigwe.’—Isaya 48:17.

Bakamboni ba Jehova tabababbadelesyi aabo bajanika kumiswaangano yabo, alimwi kunyina weenzyeenzya mutiba kubwezelela mali. Sena mulayanda kuya kujanika kumuswaangano uucitilwa ku Ŋanda ya Bwami iili mucilawo cenu? Twamutamba!

Bupanduluzi buyungizidwe

 Kabbokesi kali apeeji 21]

 Makani Aagwasya Buleya

Makani aa Bbaibbele alasalwa kuzwa mumitwe yamu Magwalo iinda ku 170. Mitwe imwi njeeyi:

▪ Ibantu Nkobakazwa​—Sena Kuli Makani Kujatikizya Ncomusyoma?

▪ Leza Mbwaalanga Makani Aakoonana Alimwi Alukwatano

▪ Ikunyonyoona Nyika Kuletela Cisubulo ca Leza

▪ Ikulwana Mapenzi Aabuumi Aalibilisya

▪ Sena Buumi Buno Mbobuumi Buliko Bulikke?

[Cifwanikiso icili apeeji 30]

Makani aa Bbaibbele

[Zifwanikiso izili apeeji 30]

Ciiyo ca “Ngazi Yamulindizi”

[Cifwanikiso icili apeeji 31]

Ciiyo ca Bbaibbele Cambungano

[Cifwanikiso icili apeeji 31]

Cikolo Camulimo Weendelezyegwa a Leza

[Cifwanikiso icili apeeji 32]

Muswaangano wa Mulimo