Twaambo Tosanwe Tutupa Kuyoowa Leza Ikutali Kuyoowa Muntu

MUKUBUSI umwi wakagambwa akaambo kakuti tanaakali kuciyeeyela cakacitika. Mubandi ngwaakajisi a Bakamboni ba Jehova bobilo wakamuyiisya cintu cimwi cipya. Mubuzyo wakuti nkaambo nzi Leza ncalekelede kupenga wakali kumukatazya kwamyaka minji pele wakajana bwiinguzi bwamu Bbaibbele. Tanaakalizyi kuti mu Bbaibbele muli twaambo tunji tugwasya alimwi tukonzya kukkomanisya muntu.

Nokwakainda buyo ciindi cisyoonto kabali baunka kale beenzu, bakaintu beni ŋanda cabukali bakanjila muŋanda akubuzya kuti, “Ino bantu baya mbaani?”

Musankwa ooyu wakaumuna buyo, kunyina ancaakaamba.

Bakaintu aaba bakaamba cabukali kuti, “ndilibazyi, ikuti alimwi ukabatambule muno muŋanda uyakuzwa ukalangaule kumbi kwakukkala!”

Bakacijala cijazyo canguzu, mpoonya ba­kazwa.

Batobeli ba Kristo Bakasimpe Balakonzya Kukazyigwa

Cakamucitikila musankwa ooyu cilabacitikila bantu banji. Ijwi lya Leza, Bbaibbele, lyaamba kuti: “Boonse aabo bayanda kupona cakululama muli-Kristo Jesu mbobayoopenzegwa.” (2 Timoteo 3:12) Kuzwa kaindi, Banakristo bakasimpe mbantu batayandwi. Nkaambo nzi? Imwaapostolo Johane wakaambila Banakristonyina kuti: “Tulizi kuti tuli ba-Leza anyika yoonse iikede muzibi [naa, mumaanza aamubi].” Alimwi Saatani Diabolosi waambwa kuti ngu  ‘syuumbwa wabutambo uuya buyandaula ngwati lume.’ (1 Johane 5:19; 1 Petro 5:8) Ikuyoowa muntu ncimwi cazilwanyo Saatani nzyabelesya kapati.

Naba Jesu Kristo, iwakacita zyintu zinji zibotu alimwi watakacita cibi, wakapenzyegwa akusampaulwa. Wakaamba kuti: “Bakandisula neentakwe kaambo.” (Johane 15:25) Masiku aamamanino katanafwa, wakaambila batobeli bakwe zyintu zyakali kulangilwa kubacitikila, wakati: “Na inyika yamusula, mulizi kuti yali kundisulide kale. Amuyeeye ijwi ndendakamwaambila kuti, Muzike tali mupati kwiinda simalelaakwe. Kuti bakandipenzya mebo, bayoomupenzya anywebo.”—Johane 15:18, 20.

Akaambo kaceeci, bantu banji bakali kuwayawaya kutambula bukombi bwakasimpe. Ikujatikizya bantu bamwi ibakali kumuyandaula Jesu aciindi cimwi, Ibbaibbele lyaamba kuti: “Nokuboobo takukwe muntu wakamwaamba antangalala, nkaambo bakali kuyoowa ba-Juda.” (Johane 7:13; 12:42) Basololi babukombi aciindi eeco bakali kubakonga bantu kuti kufwumbwa muntu uusyoma Jesu ulatandwa mucikombelo. Aboobo kuyoowa muntu kwakapa kuti banji batabi Banakristo.—Incito 5:13.

Nokwakainda ciindi cili mbocibede, Bunakristo kabuli bwatalika kale, imbungano yamu Jerusalemu yakatalika “kupenzegwa kapati.” (Incito 8:1) Alimwi buya, Ibanakristo bakapenzyegwa munyika yoonse yakali kulelwa abana Roma. Bantu bakali ampuwo kapati mu Roma bakaambila mwaapostolo Paulo kuti: “Nkaambo tulizi kuti anooli aankamu eeyi, alakazigwa kumasena oonse.” (Incito 28:22) Masimpe, Banakristo bakasimpe bakali kukazyigwa koonse-koonse.

Noliba lino, Saatani upa kuti bantu kabayoowa bantunyina kutegwa batabi batobeli ba Kristo bakasimpe. Bantu babombe myoyo, ibaiya Bbaibbele a Bakamboni ba Jehova balakazyigwa akusampaulwa kucikolo, kumilimo, kuli basimukobonyina naa kubeenzyinyina. Balakonzya kulibilika kuti kunyina unakubalemeka, kubayanda naa kubagwasya. Muminzi imwi, balimi inga balibilika kuti basimukobonyina balakonzya kukaka kubagwasya ciindi cakutebula naa kukwabilila zivwubwa zyabo. Nokuba boobo, ibanji bazumanana kutobela cikozyanyo ca Jesu Kristo kwiinda mukusyomeka kuli Leza akupona kweelana ambolyaamba Jwi lyakwe. Alimwi Jehova wabalongezya.

Ncokuyandika Kuyoowa Leza, Ikutali Muntu

Ibbaibbele litukulwaizya kuyoowa Leza ikutali muntu. Lyaamba kuti: “[Kuyoowa] Jehova matalikilo aabusongo.” (Intembauzyo 111:10) Eeci tacaambi kuba bakandu, pele caamba kuyoowa kumunyemya Sikutupa Buumi. Kuyoowa Leza kuleendelana akumuyanda. Ino nkaambo nzi ncotweelede kuyoowa Leza ikutali muntu? Atulange-lange twaambo tosanwe.

1 Jehova ngo Mupati Kampatila. Jehova ulijisi nguzu kwiinda muntu uuli woonse. Ikuti katuyoowa kumubisizya Leza, tutondezya kuti tuli kulubazu lwa Singuzuzyoonse uubona ‘bamasi kuti bali mbuli idosi lyamaanzi mukati kantesyo.’ (Isaya 40:15) Akaambo kakuti Leza ngu Singuzuzyoonse, ulakonzya kuzunda “cilwisyo [cilicoonse] cibumbwa kukulwisya” baabo basyomeka kulinguwe. (Isaya 54:17) Kunze lyaboobo, mbwaanga walo nguusala beelede kupegwa buumi butamani, tweelede kuzumanana kwiiya makani aamba nguwe akucita luyando lwakwe.—Ciyubunuzyo 14:6, 7.

2 Leza uyakutugwasya akutukwabilila. Kulugwalo lwa Tusimpi 29:25, Ibbaibbele lyaamba kuti: “Kuyoowa muntu kulateya kakole, pele uusyoma Jehova ulakala kabotu.” Ikuyoowa muntu nkakole nkaambo kulakonzya kutupa kuyoowa kwaamba kuti tulamusyoma Leza. Leza utusyomezya kuti ulijisi nguzu zyakutufwutula. Waamba kuti: “Utayoowi, nkaambo ndili ayebo. Utakankami, nkaambo ndime Leza wako. Njookuyumya, njookugwasya, ncobeni njookutabilila ajanza lyalulyo lyabululami bwangu.”—Isaya 41:10.

3 Leza ulabayanda aabo bamuyanda. Imwaapostolo Paulo wakalemba majwi aaya aakulwaizya aakuti: “Ndisinizye kuti taakwe cintu, niluba lufu nibuba buumi, nibaba baangelo nibaba basibwami nibaba basinguzu, naaba makani aasunu naaba makani  aaciza, niziba zintu zyakujulu niziba zyakunsi, niziba zilenge zimwi zyoonse, taakwe cintu niciba cimwi cikonzya kutwaandaanya kuluyando lwa-Leza lwamuli-Kristo Jesu Mwami wesu.” (Ba-Roma 8:37-39) Ikuti katumusyoma Leza akumumvwida, tulakonzya kuba muluyando lutamani lwa Mwami Wakoonse-koonse. Elo kaka ncoolwe cipati ikuyandwa a Leza!

4 Tulamulumba kapati Leza akaambo kazyintu zyoonse nzyaatucitila. Jehova ngo Mulengi wesu, ngonguwe uupa kuti katupona. Kunze lyaboobo, wakatupa zyintu ziyandika kapati mubuumi alimwi izipa kuti katukkomana. Masimpe, Leza nguutupa zipego zibotu zyoonse. (Jakobo 1:17) Davida, imwaalumi uusyomeka alimwi iwakalumba Leza akaambo kaluzyalo lwakwe, wakalemba kuti: “Nzinji loko nzowakacita, O Jehova Leza wangu, nkukuti malele aako amakanze aako kulindiswe . . . Na njanda kuzikanana nanka kuzyaamba, nzinji loko, tazibaliki.”—Intembauzyo 40:5.

5 Ibamwi batukazya balakonzya kucinca. Mulakonzya kubagwasya aabo bamukazya ikuti mwazumanana kumuyoowa akumuyanda Leza. Amuyeeye ncibakacita bamukwasyi wa Jesu. Kumatalikilo tiibakali kumusyoma, pele bakali kwaamba kuti: “Wasondoka.” (Marko 3:21; Johane 7:5) Kumbele, Jesu naakafwa akubuka, bunji bwabo bakatalika kusyoma. Banyina Jesu ba Jakobo a Juda bakatola lubazu mukulemba magwalo amwi aamu Bbaibbele. Alimwi kwakali muntu umwi uutegwa Saulo iwakali kupenzya Banakristo pele wakacinca akuba mwaapostolo Paulo. Ikuti twazumanana kusyomeka, ibamwi batupenzya balakonzya kubona kuti tulikazyi kasimpe kamu Bbaibbele.—1 Timoteo 1:13.

Mucikozyanyo, imukaintu umwi wamu Afulika wazyina lya Aberash wakali kupaila kutegwa akazyibe kasimpe kajatikizya Leza. Naakatalika kwiiya Bbaibbele a Bakamboni ba Jehova, bamumukwasyi wakwe abasololi bacikombelo bakali kumukazya kapati. Bamukwasyi wakwe bamwi ibakali kwiiya Bbaibbele, bakacileka kwiiya akaambo kakuyoowa bantu. Nokuba boobo, Aberash wakapaila kuli Leza kuti amupe nguzu abusicamba, aboobo wakabbapatizyigwa akuba umwi wa Bakamboni ba Jehova. Ino ncinzi cakatobela? Bamukwasyi wakwe bali lusele bakakulwaizyigwa abusicamba bwakwe, bakatalika alimwi kwiiya Bbaibbele alimwi bacita kabotu kumuuya.

Mulakonzya Kucileka Kuyoowa Muntu

Kutegwa mutacegwi mukakole kakuyoowa muntu, amuzumanane kumuyanda Leza. Mulakonzya kucita oobo kwiinda mukubala Bbaibbele akuyeeya magwalo mbuli Ba-Hebrayo 13:6, lwaamba kuti: “Jehova ngomuvuni wangu, takukwe encenjoowa. Nobaba bantu ino bandicite buti?” Mutatulubi twaambo twaambwa itutondezya ncotweelede kuyoowa Leza ikutali kuyoowa muntu ancocigwasya ikucita boobo.

Kuyungizya waawo, amuzumanane kuyeeya zilongezyo nzyomukonzya kujana akaambo kakubelesya nzyomwiiya mu Bbaibbele. Mulakonzya kujana bwiinguzi bukkazika moyo kumibuzyo iiyandika kapati mubuumi. Mulakonzya kuba abusongo bukonzya kumugwasya kuzunda mapenzi aamusikila mubuumi. Mulakonzya kuba abulangizi nokuba kuti tukkala munyika yamapenzi. Alimwi mulakonzya kupaila kuli Leza Singuzuzyoonse aciindi cilicoonse.

Imwaapostolo Johane wakalemba kuti: “Nyika ilamana, azisusi zyayo, pele ooyo uucita makanze aa-Taata ulakalilila kukabe kutamani.” (1 Johane 2:17) Ecino nceciindi cakuzumanana kuyoowa Leza akumusyoma. Muciindi cakujoka munsi akaambo kakuyoowa muntu, mweelede kutobela lulayo lwa Leza lwakuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.” (Tusimpi 27:11) Eelyo kaka ncoolwe cipati eeci!

Amubone, kunyina muntu uuli woonse uukonzya kumupa ceeco Leza ncaya kupa baabo bamuyoowa: “Kulibombya akuyoowa Jehova kulaleta buvubi abulemu abuumi.”—Tusimpi 22:4.

[Cifwanikiso icili apeeji 14]

Akaambo kabusicamba bwa Aberash, bamukwasyi wakwe bali lusele balacikkomanina ciiyo ca Bbaibbele