Amulikwabilile Kumyuuya Mibi

JAMES wakakomenena kumunzi uuli munsumbu ya Malaita, mucisi ca Solomon Islands. Kuzwa kubwana, wakayiisyigwa kuti kalemeka mizimo. Wakaamba kuti, “Nokuba kuti tandikonzyi kwaambila mizimu kuti ibakatazye bamwi, ndilakonzya kutola lubazu mucilengwa ca rarafono kutegwa kandikkomana akukwabililwa.”

Bantu banji munyika mbubwenya mbuli bantu bakkala ku Solomon Islands basyoma kuti mizimo ilakonzya kumugwasya naa kumukatazya muntu. Masimpe ngakuti, bantu banji bakkala kunsumbu zya Melanesia basyoma mizimo alimwi tabaiyoowi.

Kuli nzila zinji bantu mobatondezya kuti basyoma mizimo. Mucikozyanyo, James naakali mwana, bamakaintu bamumunzi bakali kusisa bana mumaanda aabo ikuti bamvwa ciyuni ciitwa kuti korokoro. Nkaambo nzi? Bakali kusyoma kuti ciyuni eeci cileta malweza.

Basimunzi bamwi balabikka kabwe katuba atala amulyango. Oobu mbwaakali kucita James, wakali kuyeeya kuti inga walikwabilila kumyuuya mibi. Kunze lyaboobo, kuncito James wakali kubwezelela bufwefwelenga boonse bwakali kucaala masyikati akububikka mucibbeeke kutegwa akabusowele kumbi. Ncaakali kucitila boobu ncakuti wakali kuyoowa kuloogwa.

Nokuba kuti zyintu zyaambwa atala aawa tazicitwi nkomukkala, ambweni mbuli James muyeeya kuti mweelede kutola lubazu muzilengwa zimwi kutegwa mulikwabilile kumyuuya mibi. Mulakonzya kuyeeya kuti mweelede kucita zilengwa eezyi kutegwa kamukkala kabotu.

Ikuti naa mulalisyoma Bbaibbele, nkokuti mulayanda kuzyiba ncolyaamba kujatikizya mibuzyo iitobela: (1) Ino mbuti myuuya mibi mboikonzya kumukatazya? (2) Sena kucita zilengwa zimwi kulakonzya kupa kuti mukatazyigwe amadaimona? (3) Mbuti mbomukonzya kukkomana akukwabililwa kumyuuya mibi?

Mboikonzya Kumukatazya Myuuya Mibi

Ibbaibbele lyaamba kuti myuuya mibi tabali bantu bakafwa. Ijwi lya Leza lyaamba kuti, “Baumi balizi kuti balafwa, pele bafwide tabezi cintu niciba comwe.” (Mukambausi 9:5) Masimpe ngakuti, myuuya mibi  mbangelo bakazanga akutobela Saatani mumulimo wakwe wakucenga bantu.—Ciyubunuzyo 12:9.

Imagwalo alacisalazya kwaamba kuti tweelede kulikwabilila kumyuuya mibi. Imwaapostolo Paulo wakabalembela Banakristo baku Efeso kuti: “Inkondo njitulwa tiiensi yakulwana abantu balya maila, pe, njakulwana . . . amyuuya yabubi iili mumyeenya yakujulu.” Imwaapostolo Petro wakaamba kuti mwami wamyuuya mibi, Saatani Diabolosi, uli mbuli ‘syuumbwa wabutambo uuya buyandaula ngwati lume.’—Ba-Efeso 6:12; 1 Petro 5:8.

Saatani ulabaletela mapenzi bantu kwiinda mukubacenga naa kubasunka kucita zyintu zitamukkomanisyi Leza. Ibbaibbele lyaamba kuti “Saatani mwini alakwe ulalisandula mbuli angelo wamumuni.” (2 Ba-Korinto 11:14) Ulalicengeezya mbuli kuti mungelo mubotu uukonzya kutukwabilila, kaali ulaamakanze mabi. Saatani wapa kuti bantu batamuzyibi maano aakwe akuzyiba Leza. (2 Ba-Korinto 4:4) Ino ncinzi ncacitila boobu?

Saatani uyanda kuti kakombwa, aboobo uyanda kuti bantu kabamukomba kufwumbwa naa balizyi naa pe. Mwana wa Leza, Jesu, naakali anyika, Saatani wakali kuyanda kuti ‘amufwugamine akumukomba.’ Jesu wakaamba kuti: “Koya, uwe Saatani, nkaambo kulilembedwe kuti, nguwe Jehova Leza wako ngoelede kukomba.” (Matayo 4:9, 10) Jesu wakakaka kucita cintu cili coonse cikonzya kutondezya kuti ukomba Saatani.

Jehova ulaanguzu kapati kwiinda myuuya iili yoonse alimwi takonzyi kubalekelezya bamumvwida. (Intembauzyo 83:18; Ba-Roma 16:20) Pele, ikuti katuyanda kumukkomanisya Jehova Leza mbuli mbwaakacita Jesu, tatweelede kucita cintu cili coonse cikonzya kutondezya kuti tukomba Saatani naa madaimona aakwe. Aboobo, tweelede kuzyizyiba zilengwa zipa kuti bantu kabalemeka myuuya mibi. Ino mbuti mbomukonzya kucita oobo?

Amuzyizyibe Zilengwa Zitamukkomanisyi Leza

Jehova Leza wakabacenjezya bana Israyeli kuti tiibakeelede kwiiya zilengwa nzyobakali kucita bantu bamasi aambi aakali munsi-munsi. Wakabaambila kuti: “Kutajanwi akati kanu muntu . . . uusonda, naba muŋanga, naba mulozi, naba mucape, naba simabibo.” Kujatikizya baabo bakali kucita zilengwa eezyi, Ibbaibbele lyaamba kuti: “Kufumbwa muntu uucita ezi ncisesemyo kuli-Jehova.”—Deuteronomo 18:10-12.

Aboobo, nomulanga-langa zilengwa zicitwa nkomukkala, amulibuzye kuti: Sena cilengwa eeci cikulwaizya bantu kusyoma masalamuzi? Sena cipa kuti bantu kabasyoma kuti zyintu zitaponi zilakonzya kubakwabililwa munzila yamaleele? Sena cijatikizya kulowa naa kulisinkilila kubalozi? Sena cijatikizya kumvwida muntu uumbi ikutali Jehova naa mwiiminizi wakwe, Jesu?—Ba-Roma 14:11; Ba-Filipi 2:9, 10.

Tamweelede kutola lubazu muzilengwa zili zyoonse zikulwaizya micito eeyi. Nkaambo nzi? Mwaapostolo Paulo wakasololelwa amuuya kulemba kuti: “Tamukonzyi kwaabilwa kuntafule ya-Mwami akuntafule yabadaimona abalo.” Wakacenjezya kuti aabo bayanda kukkomanisya Leza alimwi amyuuya imwi ‘bapa kuti Jehova abe abbivwe.’ (1 Ba-Korinto 10:20-22) Jehova Leza uleelede alimwi uyanda kuti kakombwa alikke.—Kulonga 20:4, 5.

Alimwi amulange-lange mubuzyo ooyu: Sena cilengwa eeci cipa kuti muntu kayeeya kuti tayelede kupegwa mulandu ikuti wacita zyintu zibi? Mucikozyanyo, bumambi akoonana kamutana kwatana tabazikkomanini bantu banji alimwi zilakasyigwa mu Bbaibbele. (1 Ba-Korinto 6:9, 10) Pele mumasi aamwi aali mulwaanje lwa Pacific, micito iili  boobu ilakonzya kuzumizyigwa ikuti naa musimbi waamba kuti wakacita bwaamu akaambo kakuti bakamulisya musamu.

Pele, Bbaibbele liyiisya kuti aumwi uya kutebula ncasyanga. (Ba-Roma 14:12; Ba-Galatiya 6:7) Mucikozyanyo, mukaintu wakusaanguna, Eva, wakaamba kuti Saatani nguwakamucenga kuti azangile Leza, naakati: “Inzoka njiyakandoongelezya, aboobo ndalya.” Nokuba boobo, Jehova wakamupa mulandu Eva. (Matalikilo 3:13, 16, 19) Andiswe ulatupa mulandu kweelana amicito yesu.—Ba-Hebrayo 4:13.

Ino Ncinzi Ncomweelede Kucita?

Ikuti kamuyanda kumukkomanisya Leza akutobela njiisyo zyamu Bbaibbele, mweelede kulikwabilila kuli Saatani amadaimona aakwe. Bantu babombe myoyo ibakali kukkala ku Efeso mumwaanda wamyaka wakusaanguna bakapa citondezyo cibotu mumakani aaya. Kutegwa baleke kweendelezyegwa amyuuya mibi, bakabweza mabbuku oonse ngobakajisi aajatikizya kusyoma mizimo ‘akwaatenta kumbele lyabantu boonse.’—Incito 19:19.

Kabatanacita oobu, bantu aaba bakali kuboola akulyaambilila “milimo yabo” antangalala.” (Incito 19:18) Nzyaakabayiisya Paulo kujatikizya Kristo zyakabanjila mumoyo cakuti bakaumpa mabbuku aabo akaswaangene amadaimona. Alimwi bakacinca ambobakali kulimvwa kujatikizya zilengwa zyabo.

Ncobeni, cilakonzya kumukatazya kuleka zilengwa zimwi. Oobo mbocakabede akuli James, iwaambwa kumatalikilo. Wakatalika kwiiya Bbaibbele a Bakamboni ba Jehova alimwi wakali kuzikkomanina nzyaakali kwiiya. Nokuba boobo, wakazumanana kutola lubazu mucilengwa ca rarafono. Naakakkala ansi kuyeeya mbwaakali kulimvwa kujatikizya zilengwa eezyi, wakabona kuti nokuba kuti wakali kuzisyoma zisyomezyo zya Jehova zyabuumi butamani wakazumanana kusyoma mizimo kutegwa kaimukwabilila.

Ino ncinzi cakamugwasya James kuti acince mizeezo? Wakaamba kuti: “Ndakamulomba Jehova kuti andikwabilile akundigwasya kuti kandimusyoma. Alimwi ndakaleka kutola lubazu muzilengwa nzyondakali kucita kaindi.” Sena kuli mapenzi ngaakajana akaambo kakucita boobo? James wakaamba kuti: “Mazuba aano ndilamusyoma kapati Jehova alimwi ndilamvwana kapati anguwe.” Lino, James ulaamyaka iili ciloba mumulimo waciindi coonse, ugwasya bamwi kuzyiba ncoliyiisya Bbaibbele.

Ino mulekela nzi kutobela cikozyanyo ca James? Amukkale ansi kuyeeya zilengwa zicitwa nkomukkala, akubona naa zileendelana ‘akuyanda kwa Leza.’ (Ba-Roma 12:1, 2) Mwamana, mweelede kuzileka ikuti naa mwabona kuti zijatikizya kusyoma mizimo. Ikuti naa mwacita oobo, mulakonzya kuba alusyomo lwakuti Jehova ‘uyakumutambula’ akumukwabilila. (2 Ba-Korinto 6:16-18) Mbubwenya mbuli James, muya kukkala kabotu kweelana ambolisyomezya Bbaibbele kuti: “Izina lya-Jehova ningazi injumu; mululami ulacijila kulinjiyo, aboobo ulafutuka.”—Tusimpi 18:10.

[Cifwanikiso icili apeeji 13]

Cifwoto cakafwotolwa aba Dr. Bakshi Jehangir

[Cifwanikiso icili apeeji 13]

“Korokoro”

[Cifwanikiso icili apeeji 13]

Musimbi ubwezelela bufwefwelenga kutegwa ataloogwi