Nzila Zikonzya Kupa Mukwasyi Kukkomana

Ikuti Ngomukwetene Limwi Kaciswa naa Kuti Kalemene

Kuzwa nibakandijana abulwazi butasilikiki, balumi bangu mbababeleka balikke. Alimwi tiibakali kundaambila zikwelete nzyotwakalijisi. Ino nkaambo nzi tabandaambili makani aajatikizya mali? Ambweni bakalizyi kuti tulaazikwelete zinji aboobo bakali kuyoowa kuti inga ndanyema ikuti ndaazyiba makani aaya.—Ba Nancy. *

MULUKWATANO mulakonzya kuba mapenzi, ikapati ikuti umwi wabanabukwetene waciswa bulwazi butasilikiki. * Sena ngomukwetene limwi ulaciswa? Ikuti naa mboobo, sena mibuzyo eeyi iitobela ilaakumupa kulibilika: ‘Ino ncinzi ncendikonzya kucita ikuti mweenzuma waciswa kapati? Ino nkusikila lili kandimulaganya mweenzuma, kujika, kusalazya aŋanda akuunka kumulimo? Ino nkaambo nzi ncondatakaciswa ndime?’

Kunze lyaboobo, ikuti naa ndinywe muciswide mulakonzya kubuzya kuti: ‘Ino mbuti mbondikonzya kucita ikuti kanditacikonzyi kucita zyintu nzyendeelede kucita? Sena mweenzuma ulanyema akaambo kakuti ndilaciswa? Sena twacileka kumvwana?’

Cuusisya ncakuti, banabukwetene bamwi balalekana ikuti umwi wabo waciswa bulwazi butasilikiki. Pele eeci tacaambi kuti andinywe muya kulekana.

Banabukwetene bamwi balazumanana kukkala antoomwe nokuba kuti umwi wabo uciswa bulwazi butasilikiki. Amulange-lange cikozyanyo cabana bukwetene ba Yoshiaki aba Kazuko. Ba Yoshiaki balaalilwa kucita cintu cili coonse akaambo kakuti bakatyoka musana. Ba Kazuko baamba kuti: “Akaambo kakuti ndime ndibalanganya, nsingo yangu, mapekete amaanza aangu zilacisa akaambo kakuti andime ndijisi bulwazi bwamumafwuwa, pele ndisilikilwa kuŋanda. Ndibona kuti kulanganya mweenzyinyoko uuciswa kulaminya.” Ba Kazuko baamba kuti: “Nokuba kuti ndilalwazika, tulamvwana kapati.”

Aboobo, ino ncinzi cikonzya kupa kuti banabukwetene kabakkomene nokuba kuti bali mumapenzi aali boobu? Ibanabukwetene bamvwana mulukwatano lwabo malwazi baabona kuti ndipenzi lyabo boonse. Kayi ikuti umwi waciswa, boonse balaakulibilika munzila ziindene. Kumvwana ooku kuli akati kamulumi amukaintu kulapandululwa ku Matalikilo  2:24. Lwaamba kuti: “Mwaalumi uleelede kusia wisi abanyina akukakatila kumwanakazi wakwe, babe nyama yomwe buyo.” Aboobo, ikuti umwi wabanabukwetene uciswa bulwazi butasilikiki, beelede kubelekela antoomwe kutegwa babone mbobakonzya kulimana penzi eeli.

Kunze lyaboobo, ibuvwuntauzi bwakacitwa butondezya kuti banabukwetene bamvwana nokuba kuti umwi akati kabo ulaciswa balakonzya kujana nzila zikonzya kubagwasya kuliyumya. Nzila zimwi zyabagwasya kuliyumya zileelene alulayo lujanwa mu Bbaibbele. Amulange-lange nzila zyotatwe zikonzya kumugwasya.

Kamubikkilana Maano

Lugwalo lwa Mukambausi 4:9 lwaamba kuti: “Bantu bobile mbabotu kwiinda omwe.” Nkaambo nzi? Mbabotu akaambo kakuti kapango 10 kaamba kuti, “na umwi wawa, mweenzinyina ulamubusya.” Sena ‘mulamubusya’ mweenzyinyoko ikuti wawa akumwaambila majwi aatondezya kuti mulamubikkila maano?

Sena mulakonzya kujana nzila mbomukonzya kumugwasya mweenzyinyoko? Ba Yong bajisi mukaintu ulebukide baamba kuti: “Lyoonse ndilamubikkila maano mukaintu wangu. Ikuti ndafwa nyota ndilaakuyeeya kuti awalo ambweni uliimvwide. Ikuti kandiyanda kuunka anze kwaakubona zilengwaleza, ndilaakumwaambila kuti inga twaunka limwi ikuti kayanda. Toonse tulaakumvwa kucisa alimwi tulaliyumya antoomwe.”

Kunze lyaboobo, ikuti naa ndinywe muciswide, sena kuli zyintu nzyomukonzya kulicitila kakunyina kulicisa? Ikuti kamucikonzya kulicitila zyintu zimwi, tamuni kutyompwi kapati alimwi inga mwamukulwaizya ngomukwetene limwi kuti azumanane kumubikkila maano.

Muciindi cakutalika kuyeeyela kuti mulizyi mbomukonzya kumutondezya kuti mulamubikkila maano ngomukwetene limwi, kamumubuzya zyintu nzyayanda. Ba Nancy, baambwa kumatalikilo kwacibalo eeci, bakazyi kubaambila balumi babo mbobakali kulimvwa akaambo kakutazyiba zikwelete nzyobakajisi. Lino balumi babo balabaambila makani amali.

AMUSOLE NZILA EEYI: Aumwi alembe nzyayanda kuti mweenzyinyina kacita kutegwa alimvwe kuti ulamubikkila maano. Mwamanizya mucincane tupepa. Aumwi asale nzila yomwe naa zyobilo nzyomukonzya kubelesya.

Amulembe Mulongo Uukonzya Kumugwasya

Mwami Solomoni wakalemba kuti: “Zintu zyoonse zilijisi ciindi cazyo.” (Mukambausi 3:1) Aboobo, cilakonzya kumukatazya kuccilila mulongo ngomwalemba akaambo kakuciswa. Ncinzi cikonzya kumugwasya kuuccilila mulongo?

Tamweelede kulibilika lyoonse akaambo kamalwazi. Sena mulakonzya kuzumanana kucita zyintu zimwi nzyomwakali kucitila antoomwe kamutanaciswa? Ikuti naa tamukonzyi kucita boobo, sena kuli zimbi nzyomukonzya kucitila antoomwe? Mulakonzya kucita zyintu zitakatazyi mbuli kwiinzyanya kubala naa kwiiya mwaambo mupya. Kucita zyintu zimwi antoomwe nokuba kuti umwi ulaciswa kulakonzya kuyumya cilongwe canu akupa kuti kamukkomana.

Icimbi cikonzya kumugwasya nkuyanzana abamwi. Lugwalo lwa Tusimpi 18:1 lwaamba kuti: “Uulipambukanya ulayandaula zisusi zyakwe mwini, ulasowa kubeteka koonse kubotu.” Sena mwabona kuti kapango aaka katondezya kuti kutayanzana abamwi kulakonzya kumunyonganya? Mukwiimpana, kuyanzana abamwi lyoonse kulakonzya kumupa kuti kamukkomene. Mulakonzya kubaita bantu bamwi kuti bamuswaye kuŋanda yenu.

Ziindi zimwi, uulwazya uulakonzya kujana buyumuyumu. Bamwi balaciindizya kubeleka cakuti balatyompwa akubikka buumi  bwabo muntenda. Kwainda ciindi, balatondezya kuti baalilwa kumubikkila maano muyandwa wabo. Aboobo, ikuti kamulwazya ngomukwetene limwi uuciswa bulwazi butasilikiki, mweelede kuzibikkila maano zyintu nzyomuyandika. Amube aciindi ncomukonzya kuba molikke. * Ibamwi babona kuti cilagwasya kubandika amweenzyinyina ngobasyoma.

AMUSOLE NZILA EEYI: Amulembe apepa mapenzi ngomujana nomulanganya ngomukwetene limwi. Mpoonya amulembe zyintu nzyomukonzya kucita kutegwa muliyumye mumapenzi. Muciindi cakulibilika kapati, amulibuzye kuti, ‘Ino ninzila nzi nguba-uba njondikonzya kubelesya kutegwa ndiliyumye?’

Kamusola Kuzyibona Munzila Yeelede Zyintu

Ibbaibbele licenjezya kuti: “Utaambi kuti, Mazuba aakamana akali mabotu kwiinda aasunu.” (Mukambausi 7:10) Aboobo, mutani kuyeeyi buyo mbomwakali kupona kaindi. Kamuyeeya kuti munyika ino tacikonzyeki kuti kamukkomana lyoonse. Aboobo, mweelede kuzumina bukkale buli boonse akucita zyintu zyeelede.

Ino ncinzi cikonzya kumugwasya mumakani aaya? Kamubandika zyintu zibotu nzyomujana. Kamukkomana ikuti mwalimvwa kabotu asyoonto. Amulibikkile mbaakani nzyomukonzya kuzuzikizya.

Ibanabukwetene, ba Shoji aba Akiko bakalubelesya lulayo oolu alimwi lwakabagwasya. Aciindi cimwi, Akiko naakaciswa bulwazi bwiitwa kuti fibromyalgia, naa bulwazi buciswa bamakaintu bakaleka mulimo waciindi coonse wa Banakristo. Sena eeci cakabatyompya? Inzya bakabatyompwa. Nokuba boobo, Shoji ukulwaizya bamwi bajisi penzi lili boobu kuti: “Tamweelede kutyompwa akaambo kakuti tamucikonzyi kucita zyintu zimwi. Kamuzyibona munzila yeelede zyintu. Nokuba kuti mulizyi kuti buzuba bumwi muya kuba kabotu, amubikkile maano kuzyintu nzyomukonzya kucita lino. Eeci citondezya kuti, ndeelede kumubikkila maano mukaintu wangu.” Oolu lulayo lulakonzya kumugwasya ikuti ngomukwetene limwi uciswa bulwazi butasilikiki.

Bupanduluzi buyungizidwe

AMULIBUZYE KUTI . . .

Ino ncinzi ncondeelede kucita lino angondikwetene limwi?

▪ Kubandika makani aajatikizya bulwazi

▪ Kutabandika-bandika makani aajatikizya bulwazi

▪ Kutalibilika kapati

▪ Kubikkilana maano

▪ Kucitila antoomwe zyintu zimwi

▪ Kamuyanzana abamwi

▪ Amulibikkile mbaakani

[Cifwanikiso icili apeeji 20]

Kutegwa kamukkomana munzila yeelede zyintu, mweelede kucitila antoomwe zyintu.