Jesu Mbwaakalipandulula

“Jesu wakalizyi nkwaakazwida, ncaakaboolela anyika azyintu izyakali kuya kumucitikila kumbele.”—SIKULEMBA HERBERT LOCKYER.

KATUTANA kuzisyoma zyintu nzyaakali kuyiisya Jesu, tweelede kumuzyiba. Ino Jesu wakali ni? Ino wakazwa kuli? Ino wakajisi makanze nzi mubuumi? Notubala Makani Mabotu—Matayo, Marko, Luka a Johane—tulakonzya kulimvwida Jesu kaingula mibuzyo eeyi.

Wakaliko katanazyalwa anyika Ciindi cimwi Jesu wakaamba kuti: “Abrahamu katanazyalwa mebo mpendi.” (Johane 8:58) Abrahamu wakali kupona myaka iibalilwa ku 2,000 katanazyalwa Jesu. Nokuba boobo, Jesu wakaliko syaanene ooyu wakali kusyomeka katanazyalwa. Pele ino Jesu wakali kukkala kuli? Wakaamba kuti: “Ndaseluka kuzwa kujulu.”—Johane 6:38.

Mwana wa Leza Jehova ulijisi bana bangelo banji. Nokuba boobo, Jesu ulilibedelede. Wakalyaamba kuti “Mwana a-Leza simuzyalwa alike.” (Johane 3:18) Majwi aaya aamba kuti Jesu wakalengwa cakaanzambwene a Leza. Leza wakabelesya Mwana simuzyalwa alikke kulenga zyintu zimbi zyoonse.—Ba-Kolose 1:16.

“Mwana a-muntu” Aaya majwi Jesu wakaabelesya kapati kwiinda majwi oonse ngaakali kulyaamba mwini. (Matayo 8:20) Aboobo, wakatondezya kuti wakali muntu wini-wini ikutali mungelo wakasamide mubili wamuntu naa kuti wakalicinca buya. Kwiinda mukubelesya muuya wakwe uusalala, Leza wakalonzya buumi bwa Mwanaakwe kuzwa kujulu akumuleta ansi, akupa kuti nakalindu Mariya amite. Aboobo, Jesu naakazyalwa wakali londokede alimwi tanaakajisi cibi.—Matayo 1:18; Luka 1:35; Johane 8:46.

Mesiya iwakasyomezyegwa Mukaintu muna Samariya wakaambila Jesu kuti: “Ndilizi kuti Mesiya uleza.” Jesu wakaingula kuti: “Ede kai, ndime Mesiya.” (Johane 4:25, 26) Ibbala lyakuti “Mesiya,” mbubwenya mbuli lyakuti “Kristo,” lyaamba kuti “Munanike.” Jesu wakananikwa naa kusalwa a Leza kutegwa azuzikizye zisyomezyo zya Leza.

Mulimo wakwe mupati Jesu wakaamba kuti: “Ndileelede kwiikambaukila minzi imwi Makani Mabotu aa-Bwami bwa-Leza, nkaambo nkonkuko nkwendakatuminwa.” (Luka 4:43) Nokuba kuti bantu wakabacitila milimo mibotu minji, mulimo mupati mubuumi bwakwe wakali wakukambauka makani aajatikizya Bwami bwa Leza. Makani ngaakayiisya kujatikizya Bwami oobo aya kubandikwa mucibalo cili kumbele.

Cilisalede kuti Jesu wakali muntu uulibedelede. * Mbuli mbotulaabone, ibuumi mbwaakapona naakali kujulu bwakapa kuti bantu bazimvwisye zyintu nzyaakali kuyiisya. Aboobo tacigambyi kuti mulumbe ngwaakayiisya ulabagwasya bantu banji nyika yoonse.

Bupanduluzi buyungizidwe