Ino Leza Ububona Buti Bukoko?

MULENGI wesu, uuyanda kuti katukkomana, tatukasyi kunywa bukoko buniini. * Kunze lyaboobo, wakatupa “waini uubotezya moyo wamuntu, amafuta aakusyukizya busyu bwakwe, acilyo cipa moyo wamuntu inguzu.” (Intembauzyo 104:15) Ciindi cimwi, Jesu Kristo wakapa kuti bantu bakkomane lyamucado naakasandula maanzi kuba “waini mubotu.”—Johane 2:3-10.

Tweelede kuzyiba kuti Mulengi ulizyi bukoko mbobubeleka mumubili amubongo bwamuntu. Kwiinda mu Bbaibbele, Taateesu wakujulu ‘utuyiisya kuti tugwasyigwe,’ alimwi ulatucenjezya bubi bwakunywa bukoko cakwiindizya. (Isaya 48:17) Amubone kucenjezya ooku kuli mu Bbaibbele:

“Mutakolwi bukoko buleta budakwi.” (Ba-Efeso 5:18) “Bakolwi . . . tabakooyoovuba Bwami bwa-Leza.” (1 Ba-Korinto 6:9-11) Ijwi lya Leza lilakasya ‘kukolwa azyintu zimwi zibi.’—Ba-Galatiya 5:19-21.

Lino atulange-lange bubi bwakuciindizya kunywa.

Bubi Bwakuciindizya Kunywa Bukoko

Nokuba kuti bukoko mbubotu, bulijisi zyintu zimwi zikonzya kunyonganya mizeezo amubili. Kuciindizya kunywa bukoko kulakonzya kuleta mapenzi mbuli yaaya aatobela:

Kuciindizya kunywa kulakonzya kupa kuti muntu ‘katayeeyi kabotu.’ (Tusimpi 23:33, Today’s English Version) Ba Allen ibaambwa mucibalo cainda bakaamba kuti: “Bukolwi tabuli buyo bulwazi bwamubili; mbulwazi bujatikizya mizeezo yamuntu ambwazilanga zyintu. Nomunywa bukoko, tamubikkili maano mbobakonzya kulimvwa bamwi.”

Kuciindizya kunywa bukoko kulakonzya kupa kuti muntu katafwi nsoni. Magwalo acenjezya kuti: “Bukoko akukolwa nzezibuzya maanu.” (Hosea 4:11) Munzila nzi? Ikuti  twakolwa, tulakonzya kucita zyintu nzyotutakonzyi kucita ikuti katutanywide. Cilakonzya kutupa kwaalilwa kucita zyintu zili kabotu. Bukoko bulakonzya kupa kuti katutalilemeki, calo cikonzya kupa kuti tuleke kumvwana a Leza.

Mucikozyanyo, ba John nibakakalazyanya abakaintu babo, bakazwa cabukali akuunka kwaakunywa bukoko. Nobakanywa mabbodela aali mbwaabede, kwakaboola mukaintu umwi mpobakakkede. Bakazumanana kunywa bamane bakatolana kwaakucita bumambe. Nibakamana, ba John bakausa kapati akaambo kakucita cintu ncibatakali kukonzya kucita ikuti nibatakanywa bukoko.

Kuciindizya kunywa bukoko kulakonzya kupa kuti muntu kaambaula akucita zyintu ziteelede. Ibbaibbele lilabuzya kuti: “Ngwani uuli abuusu? Ngwani uuli ankondo? . . . Mbembabo bakala ciindi cilamfu kukunywa.” (Tusimpi 23:29, 30) Kuciindizya kunywa kulakonzya kumupa kulimvwa mbuli “muntu uulala mukati kalwizi, na mbuli muntu uulala akasamu kandembela.” (Tusimpi 23:34) Akololokwa muntu iwakakoledwe ulakonzya kulijana kuti “ulaazilonda pesi katakonzyi kuyeeya cakamucisa.”—Tusimpi 23:35, Contemporary English Version.

Kuciindizya kunywa bukoko kuleta malwazi. ‘Kumamanino [bukoko] bulaluma mbuli nzoka, bulazapula mbuli cipile.’ (Tusimpi 23:32) Basilisi baabona mbwaali aamasimpe majwi aaya. Kuciindizya kunywa bukoko kulakonzya kupa kuciswa malwazi aakkansa aaindene-indene, ikuzimba muni, ikuzimba kalulizya, kuvwula kwaccuka mumubili, kulemana kubana batanazyalwa, kulebuka mubili naa kupa kuti moyo kautabeleki kabotu alimwi amalwazi aamwi. Nokuba kunywa buyo ciindi comwe cakwiindizya, kulakonzya kupa kuti muntu anetuke naa kufwa. Kunze lyakuciswa, kuli acimwi cipati cikonzya kucitika kumuntu uuciindizya kunywa bukoko calo ncobataambi basilisi mumabbuku aabo.

Cintu cipati cikonzya kucitika. Nokuba kuti umwi takolwi, kunywa kapati kulakonzya kuleta ntenda zyakumuuya. Ibbaibbele lilaamba cakusalazya kuti: “Maawe kulibaabo bafuma cifumo kuti batobele bukoko, alimwi balamuka kuleka mangolezya mane  bukoko bwabakola.” Nkaambo nzi? Isaya ulaamba ntenda zyakumuuya zikonzya kucitika akaambo kakunywa kapati. Waamba kuti: “Tababiki myoyo yabo kumilimo ya-Jehova, ancito zyamaanza aakwe tabaziboni.”—Isaya 5:11, 12.

Ijwi lya Leza lilatwaambila kuti tatweelede kukkala ‘akati kabacakolwa.’ (Tusimpi 23:20) Bamakaintu bapati baambilwa kuti tabeelede ‘kwiindilizya kunywa imbote [naa bukoko].’ (Tito 2:3) Ino nkaambo nzi? Asyoonto asyoonto—kakunyina akuzyiba—bamwi balatalika kuyungizya bukoko mbobanywa. Mukuya kwaciindi, bacakolwa balatalika kulibuzya kuti, “Nsinsimuke lili? Nkayandaule cakunywa alimwi.” (Tusimpi 23:35) Bacakolwa balaakumvwa kabotu ikunywa bukoko mafwumina kutegwa bamane munzuwe.

Ibbaibbele licenjezya kuti aabo beenda ‘mukukolwa, munjalalando, mukusenga bukoko kuti bayoolivwiilila kulinguwe uuti kabeteke bantu boonse buyo, baumi abafwide.’ (1 Petro 4:3, 5) Alimwi kujatikizya mazuba aano mabyaabi ngotupona, Jesu wakacenjezya kuti: ‘Pele amukalilangisye, kuti ambweni myoyo yanu ilalengaala nkaambo kabulyatu, abukolwi, amakataazyo aabuumi buno, abuzuba obuya [bwa Jehova] nobuyoomutilimuna mbuli kooze.’—Luka 21:34, 35.

Aboobo, ino ncinzi ncobakonzya kucita baciindizya kunywa kutegwa ‘batalengaani abukolwi’?

Bupanduluzi buyungizidwe

[Zifwanikiso izili apeeji 4, 5]

Kuciindizya kunywa bukoko kulakonzya kuleta mapenzi manji