“Ulabona Moyo”
Amube Acilongwe A Leza
“Ulabona Moyo”
KULANGA bantu mbobaboneka kulakonzya kutucenga. Zimwi ziindi muntu mbwalibonya tacaambi kuti mbwabede amumoyo. Bantu babona buyo muntu mbwalibonya. Pele Jehova Leza talangi buyo mbotulibonya. Eeci cilalibonya mumajwi aalembedwe mulugwalo lwa 1 Samuele 16:1-12.
Amweezyeezye cakali kucitika kweelana azilembedwe mumakani aatobela. Jehova wakali kuyanda kunanika mwami mupya kuti ayeendelezye bana Israyeli. Leza wakaambila musinsimi Samuele kuti: “Ndakutuma kuli-Jese waku-Betelehemu, nkaambo ndalisalila mwami akati kabana bakwe.” (Kapango 1) Jehova tanaakamwaamba izyina pele wakaamba buyo kuti ooyo uusalidwe unakuli umwi wabana ba Jese. Samuele naakali kuya ku Betelehemu, ambweni wakali kulibuzya kuti, ‘Ino ndiya kumuzyiba buti mwana wa Jese ooyo Jehova ngwaasala?’
Naakasika ku Betelehemu, Samuele wakacita bubambe bwakuti Jese abana bakwe balide antoomwe cakulya cacituuzyo. Naakanjila Eliabu mwana mutaanzi wa Jese, Samuele wakabotelwa akaambo kambwaakali kulibonya. Samuele wakali kuyeeya kuti Eliabu mbwaakali kulibonya wakali kweelela kuba mwami alimwi wakaamba kuti: “Ncobeni nguuno munanike wa-Jehova waboneka lino kubusyu bwakwe.”—Kapango 6.
Nokuba boobo, Jehova tanaakali kuzilanga boobo zyintu. Wakaambila Samuele kuti: “Utalangi ciwa cakwe nibuba bulamfu bwacimo cakwe, nkaambo ndamukaka.” (Kapango 7) Jehova tanaakamukkomanina Eliabu nokuba kuti wakali mulamfwu alimwi wakali mubotu. Jehova talangi buyo muntu mbwalibonya pele ulalanga ankobujanika bubotu bwini bwamuntu.
Jehova wakamwaambila boobu Samuele: “Nkaambo Jehova talangi mbuli mbwalanga muntu pe. Muntu ulabona busyu buyo, pele Jehova ulabona moyo.” (Kapango 7) Masimpe, Jehova ulanga moyo wamuntu mboubede—nkaambo mumoyo wamuntu momuzwa mizeezo, micito alimwi ambwalimvwa. ‘Sikusunka myoyo’ wakamukaka Eliabu—alimwi abana ba Jese bamwi bali cisambomwe ibakaletwa kuli Samuele.—Tusimpi 17:3.
Kwakasyeede mwana omwe wa Jese, Davida, walo ngowakali musyoonto ali boonse, iwakali ‘kweembela mbelele.’ (Kapango 11) Aboobo Davida bakaakumwiita nkwaakali kweembelela mbelele musyokwe aboobo wakaboola kuli Samuele. Kumane Jehova wakaambila Samuele kuti: “Buka, umunanike, nkaambo ngonguwe oyu.” (Kapango 12) Ncobeni, Davida wakali “kubalangala akweebeka akubota kwakubotezya meso.” Pele moyo wakwe nguwakapa kuti abote mumeso aa Leza.—1 Samuele 13:14.
Munyika ino bantu mobabikkila kapati maano kukubota kwaatala, tulakonzya kuumbulizyigwa ikuzyiba kuti Jehova Leza takwelelezyegwi ambotuboneka atala. Tabikkili maano naa muli balamfwu buti naa bamwi bamubona kuti muli babotu. Walo Jehova ubikkila maano mbomubede mukati, mumoyo. Sena kuzyiba zyintu eezyi kwapa kuti anywebo mube aluyandisisyo lwakuba abube bukonzya kumukkomanisya Leza?