Mupailo

2 Nkuuli ni Nkotweelede Kupaila?

SENA mipailo yoonse ulaimvwa Leza nokuba kuti igamikidwe kuli ba leza bambi? Bantu banji munyika baamba kuti aayo masimpe. Aaya makani balaakkomanina aabo bayandisya kuvwelanya bukombi alimwi bayanda kuti zikombelo zyoonse kazyitambulika nokuba kuti ziliindene. Pele sena aaya masimpe?

Bbaibbele liyiisya kuti mipailo yabantu banji tayuunki kuli Leza mwini-mwini. Kaindi Bbaibbele nolyakalembwa, bantu banji bakali kupaila kumituni. Nokuba boobo, Leza cakwiinduluka-induluka wakali kubacenjezya kujatikizya cilengwa eeci. Mucikozyanyo, lugwalo lwa Intembauzyo 115:4-6 lwaamba boobu kujatikizya mituni: “Zilijisi matwi, pele taziswiilili.” Kaambo kalasalala. Sena inga cagwasya kupaila kuli leza uutakonzyi kumuswiilila?

Cibalo cimwi camu Bbaibbele cilaabandika makani aaya cakusalazya. Musinsimi uusyomeka Eliya wakaambila basinsimi ba Bbaala kuti bapaile kuli leza wabo kwamana awalo wakali kuyoopaila kuli Leza wakwe. Eliya wakaamba kuti Leza wakasimpe uyoovwiila pele wakubeja takavwiila. Basinsimi ba Bbaala bakazumina kuti kube boobo, aboobo bakapaila kwaciindi cilamfwu alimwi camoyo woonse mane bakoongolola buya—pele taakwe cakacitika. Cibalo caamba kuti: “Katakwe ijwi niliba lyomwe naba sikuvuwa naba sikuswiilila.” (1 Bami 18:29) Ino ncinzi cakacitika Eliya naakapaila?

Naakamana kupaila Eliya, Leza wakavwiila mpoona-mpoona, kwiinda mukutuma mulilo kuzwa kujulu akuumpa cituuzyo ncaakabikkide acipaililo. Ino nkwiimpana nzi kwakaliko? Kuli kaambo komwe kayandika kapati kali mumupailo wa Eliya, kalembedwe kulugwalo lwa 1 Bami 18:36, 37. Mupailo wakwe mufwaafwi kapati —ujisi buyo mabala aatandila ku 30 mumwaambo wakutalika wa Chihebrayo. Nokuba boobo, mumabala buyo masyoonto aaya, Eliya kwaziindi zyotatwe wakalibelesya zyina lya Leza limugeme lyakuti Jehova.

Zyina lyakuti Bbaala ilyaamba kuti “mukamwini” naa “simalelo,” lyakali zyina lya leza wabana Kanana alimwi bantu bakooko bakali kulibelesya zyina eeli akuli ba leza bamwi. Nokuba boobo, izyina lyakuti Jehova lililibedelede nkaambo libelesyegwa buyo kuli nguwe alikke. Leza ooyu wakabaambila boobu bantu bakwe: “Ndime Jehova. Ndezina lyangu. Bulemu bwangu nsikooyoobupa umbi.”—Isaya 42:8.

Sena mupailo wa Eliya amipailo ya basinsimi ba Bbaala yakaingulwa a Leza nokuba kuti yakagamikidwe kuba leza baindene-indene? Bukombi bwa Bbaala bwakali kuusisya bantu nkaambo kazilengwa zyabwaamu alimwi akutuula bantu. Mukwiimpana aceeci, Jehova wakalailila bantu bakwe bana Israyeli kuti kabamukomba  munzila yabulemu. Aboobo, amukayeeye kaambo aaka: Ikuti mwalemba lugwalo kumweenzyinyoko uulemekwa kapati, sena inga mwayanda kuti lutolwe kumuntu uutali mweenzyinyoko alimwi ngomuzyi kuti uulaampuwo mbi iitendelani anzyayanda mweenzyinyoko? Peepe!

Kuti kamupaila kuli Jehova, nkokuti mupaila kumulengi, Usyi wabantu boonse. * Musinsimi Isaya wakapaila boobu: “Nduwe tateesu, O Jehova.” (Isaya 63:16) Aboobo ooyu Ngonguwe Jesu Kristo ngwaakali kwaamba naakaambila basikwiiya bakwe kuti: “Ndilatanta kuli Taata alimwi a Bauso, kuli Leza wangu a Leza wanu.” (Johane. 20:17) Jehova mbausyi Jesu. Jehova ngo Leza Jesu nkwaakali kupaila alimwi wakaambila basikumutobela kuti abalo kabapaila kuli Jehova.—Matayo 6:9.

Sena Bbaibbele litwaambila kupaila kuli Jesu, kuli Mariya, kubasaante akubangelo? Peepe—nkuuli Jehova kulikke. Amulange twaambo tobilo ncocili boobo. Cakusaanguna, mupailo ncibeela cakukomba alimwi Bbaibbele lyaamba kuti tweelede kukomba buyo Jehova alikke. (Kulonga 20:5) Cabili, Bbaibbele litwaambila kuti alikke “[Nguu]swiilila zikombyo.” (Intembauzyo 65:2) Nokuba kuti Jehova ulabapa mikuli bamwi, ooyu mukuli taakwe ngwapede naba omwe pe. Ngu Leza uutusyomezya kuti uyakwiiswiilila mipailo njotupaila.

Kuti kamuyanda kuti Leza aiswiilile mipailo yanu, amuyeeye kukulwaizya kwamumagwalo ooku: “Woonse wiita zyina lya Jehova uyoofwutulwa.” (Milimo 2:21) Pele sena caamba kuti Jehova ulaiswiilila mipailo yoonse? Sena kuli cintu acimwi ncotweelede kuzyiba kuti katuyanda kuti Jehova aiswiilile mipailo yesu?

[Bupanduluzi buyungizidwe]

[Cifwanikiso icili apeeji 5]

Cakacitika kuli Eliya alimwi abasinsimi ba Bbaala citondezya kuti mipailo yoonse tayuunki kuli Leza