Basikubala Balabuzya . . .

Ino Paradaiso Yaambwa mu Bbaibbele ili Kuli?

▪ Jesu wakasyomezya mwaalumi simucita zibi ngubakafwa limwi wakatondezya lusyomo cabusicamba kuti: “Uyooba andime mu Paladaiso.” (Luka 23:43) Ino ooyu mwaalumi wakali kuyookkala kuli? Sena Paradaiso iyakubeda kujulu, anyika, naa mumulenga-lenga kwalo bantu nkobalindila lubeta?

Bazyali besu bakusaanguna bakali kukkala mu Paradaiso. Ibbaibbele litwaambila kuti: “Lino Jehova Leza wakalima muunda kujwe ku-Edeni, nkabela mpempawo mpaakabika oyo muntu ngwaakabumba. . . . Lino Jehova Leza wakabweza oyo muntu, wamubika mumuunda wa-Edeni kuti aulime akuubamba.” (Matalikilo 2: 8, 15) Mabala aaya naakasandululwa mu Cigiliki, bbala lyakuti “muunda” lyakasandululwa kuti pa·raʹdei·sos, mwalo mu Chitonga lyaamba kuti “paradaiso.”

Mbubwenya mbuli banabukwetene mbobakomezya ŋanda yabo bana nobavwula, abalo bazyali besu bakusaanguna bakeelede kukomezya Paradaiso yamu Edeni kweelana amukwasyi mbuwakali kuyabukomena. Leza wakabaambila kuti: ‘Amuzuzye nyika akwiibombya.’—Matalikilo 1:28.

Mulengi wesu wakajisi makanze akuti bantu kabakkala akuzyala bana mu Paradaiso anyika. Bakeelede kupona kukabe kutamani kakunyina amasena azikkilwa bantu. Nyika njoyakeelede kuba munzi wabantu boonse. Nkakaambo kaako zilengwaleza zili munyika zilatukkomanisya kapati. Twakalengelwa kuti katukkala munyika mbotu.

Sena makanze a Leza akacinca? Peepe. Aboobo Jehova ulatusyomezya kuti: “Mbubonya obo mbuliyooba ijwi lyangu lizwa kumulomo wangu. Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.” (Isaya 55:11) Kuzwa muntu naakalengwa, kwamyaaka iinda kuzyuulu zyotatwe, Ibbaibbele lyakaamba kujatikizya “Iwakabumba nyika akwiipanga akwiimika,”kuti “Teewakailenga kuti ibe yalupilingano pe” pele “wakaibumba kuti ikalwe bantu.” (Isaya 45:18) Makanze a Leza tanaacinca pe. Inyika iyakuba paradaiso alimwi.

Cikkomanisya ncakuti, zibalo zinji mu Bbaibbele zyaamba buumi mu Paradaiso anyika. Mucikozyano, businsimi bwa Isaya bwaamba kuti: “Lino bayooyaka maanda akukala mulingao, bayoobyala myuunda yamisaansa akulya micelo yayo.” (Isaya 65:21) Ino nkuli nkobaya kuyaka maanda akubyala myuunda yamisaansa? Ino nkuli nkobaya kulida micelo? Mpoonya ano anyika. Lugwalo lwa Tusimpi 2:21 lulaamba cakusinizya kuti: “Baluleme bayookala munyika; Baololokede mbebayoosyaala mulinjiyo.”

Jesu awalo wakaamba kujatikizya paradaiso yaanyika. Masimpe, wakasyomezya paradaiso yakujulu pele njabantu buyo basyoonto. (Luka 12:32) Bafwa, bakatanga kaniini balabusigwa kuya ku Paradaiso yakujulu kwalo nkobaya kulela Paradaiso yaanyika a Kristo. (Ciyubunuzyo 5: 10; 14: 1-3) Aaba basikulelanyina Kristo bayoyeendelezya kabotu Paradaiso yaanyika kweelana akuyanda kwa Leza.

Jesu wakalizyi kuti aaya ngamakanze a Leza kujatikizya nyika. Kaambo nkakuti , wakakkala abausyi kujulu nobakali kulenga muunda wa Edeni. Buumi butamani muparadaiso yaanyika bunooliko kubantu boonse basyoma mazubaano. (Johane 3:16) Bantu bali boobu, Jesu ubasyomezya kuti: ‘Muyooba andime mu Paladaiso.’—Luka 23:43.

[Nkotwakajana cifwanikiso icili apeeji 32]

© FORGET Patrick/SAGAPHOTO.COM/Alamy