Sena Ncobeni Leza Ulamulanganya?

SENA mulimvwa kuyandwa? Sena zimwi ziindi mulimvwa kuti taakwe uumuyanda? Munyika ino bantu mobajisi bubi, mobaliyanda, tacigambyi kulimvwa kuti kunyina umubikkila maano. Kweendelana a Bbaibbele mbolyaapandulula mazuba eesu, bantu banji babikkila buyo maano kuzyintu zyabo beni.—2 Timoteyo 3:1, 2.

Kunyina makani amyaka yakuzyalwa, zilengwa, mwaambo naa musyobo, bantu boonse balayanda kuti kabayandwa akutondezya luyando. Kweelena azilembedwe zimwi, insinga zyesu zyakabambwa munzila mozikonzya kumvwa kuyandwa. Jehova Leza wakatulenga nguuzyi kabotu kwiinda boonse mboluyandika luyando akulumbaizyigwa. Ino inga mwalimvwa buti kuti wamwaambila kuti ulamuyanda? Eeci ncoolwe cipati ncomukonzya kuba ancico. Sena inga twaba masimpe kuti Jehova ulabayanda bantu batalondekede? Sena ulabikkila maano kuli umwi aumwi wesu? Kuti kacili boobo, ncinzi cikonzya kupa kuti muntu ayandwe kuli Leza?

Jehova Ulalanganya

Myaka yainda iili 3,000, sintembauzyo uuyoowa Leza weelede kuti wakagambwa naakabona bubotu bwajulu lizwide nyenyeezi masiku. Sintembauzyo wakazyiba kuti Mulengi wakali sumpukide. Naakali kuyeeya Jehova mbwali anguzu akubona muntu mbwali musyoonto, sintembauzyo wakaamba cakukkomana kujatikizya mbwatuyanda Leza naakati: “Nembona majulu aako, milimo yaminwe yako, Mwezi anyenyeezi nzowakalenga! Ino muntu ncinzi nowamwiibaluka? Amwana amuntu ncinzi, nomuswaya?” (Intembauzyo 8:3, 4) Tulakonzya kuyeeya kuti Mupati Kampatila uli kule kapati naa tajisi ciindi cakulanganya bantunsi. Pele sintembauzyo wakalizyi kuti tobantu tulayandika kapati kuli Leza nokuba kuti tatweelene anguwe alimwi tupona buyo kwamyaka misyoonto.

Aumwi sintembauzyo wakaamba kuti: “Jehova ulabotelwa kulibaabo bamulemeka, kulibaabo basyoma luzyalo lwakwe.” (Intembauzyo 147:11) Twaambo tuli muntembauzyo eezi zyobilo tulakulwaizya. Nokuba kuti Jehova ulisumpukide kapati, tabalangili caalamfwu-lamfwu bantu. Pele ‘ulabalanganya’ alimwi ‘ulababotelwa.’

 Kaambo aaka kalakankaizyigwa mubusinsimi bwamu Bbaibbele bupandulula zyintu zicitika mazuba aano. Kwiinda mumusinsimi Hagai, Jehova wakatondezya mbuli kukambauka kwamakani mabotu mbokuyoocitwa nyika mboizulwa. Ino zinzi zyakali kunoocitika? Amubone businsimi oobu, bwaamba kuti: “zintu ziyandisi zyazisi zyoonse ziboole, elyo njoozuzya iŋanda eyi bulemu.”—Hagai 2:7.

Ino “zintu ziyandisi” zyakazwa muzisi zyoonse zinzi? Eezi tazikonzyi kuba buvwubi bwakumubili. (Hagai 2:8) Mubwini, cikkomanisya moyo wa Jehova taili siliva naa ngolida. Jehova ulabakkomanina bantu bamukomba caluyando, nokuba kuti tabalondokede. (Tusimpi 27:11) Eezi “zintu ziyandisi” mbantu bamupa bulemu, alimwi ulabotelwa akaambo kakuba basungu mumulimo. Sena muli akati kabo?

Muzeezo wakuti bantu batalondokede inga bayandwa Kumulengi wabubumbo boonse inga waboneka mbuli kuti taukonzyeki. Pele, mubwini kasimpe aaka keelede kutukulwaizya kuswenenena kulinguwe.—Isaya 55:6; Jakobo 4:8.

“Uli Muntu Uuyandwa Loko”

Kacembeede kale, musinsimi Daniele wakacitikilwa cintu cigambya bumwi buzuba kumangolezya. Ciindi Daniele naakacili kupaila, kwakasika mweenzu. Izyina lyakwe wakali Gabriyeli. Daniele wakamuzyiba kuti mungelo wa Leza nkaambo bakali bwenene kale. Gabriyeli wakapandulula kaambo ncaakasikila cakutayeeyelwa: “Daniele, ndeza lino kuzookutya busongo aluzibo . . . nkaambo uli muntu uuyandwa loko.”—Daniele 9:21-23.

Acimwi ciindi, umwi wabangelo ba Jehova wakaambila Daniele kuti: “Daniele, uli muntu uuyandwa loko.” Kayumya-yumya Daniele, mungelo wakaamba kuti: “Utayoowi, O muntu uuyandwa loko, koba aluumuno.” (Daniele 10:11, 19) Daniele waambwa kuti “uuyandwa loko” kwaziindi zyotatwe. Alimwi majwi aaya alakonzya kwaamba “uulemekwa kapati,” naa “muntu wiinda kuyandwa.”

Masimpe, Daniele wakalizyi kuti bakali kumvwana kale a Leza alimwi wakalizyi kuti Jehova wakali kukuzumina kukomba kwakwe. Pele majwi akazwa kuli Leza kwiinda mumungelo akamukulwaizya kapati. Cakutadooneka, Daniele wakaingula kuti: “Wandipa inguzu.”—Daniele 10:19.

Cibalo eeci cikkomanisya citondezya Jehova mbwali silweetelelo kumusinsimi wakwe uusyomeka cililembedwe mu Jwi lyakwe kutegwa tugwasyigwe. (Baloma 15:4) Kuyeeya cikozyanyo ca Daniele cilatugwasya kuzyiba muntu mbwanga wayandwa a Taateesu wakujulu siluyando.

 Amwiiye Jwi Lya Leza Lyoonse

Daniele wakali musungu mukwiiya Magwalo. Tulizyi oobu nkaambo walo wakalemba kuti: “Mebo . . . ndakamvwa makani aamumabuku. Ndakamvwa mweelwe wamyaka, . . . kuzuzikizigwa mane kusaalwa kwa-Jerusalemu.” (Daniele 9:2) Mabbuku akaliko ciindi naakali kupona akali kubikkilizya magwalo akasololelwa amuuya aakalembwa aba Musa, Davida, Solomoni, Isaya, Jeremiya, Ezekiele alimwi abasinsimi bamwi. Atuyeeye buyo mabbuku manji akazungulukide Daniele, ngaakali kubala alimwi akubona kwiindana kwabusinsimi bwakali kwaamba kubukulusyigwa kwabukombi bwakasimpe ku Jerusalemu. Kakwiina awakali kumunyonganya mukaanda kakwe kamujulu, wakali kuzinzibala kuyeeya ncozyakali kwaamba zyakali kubala. Eeci ciiyo cakayumya lusyomo lwakwe alimwi cakamugwasya kuba acilongwe a Jehova.

Kwiiya Jwi lya Leza kwakagwasya Daniele kuba abube bubotu mubuumi bwakwe boonse. Malailile amumagwalo ngaakaiya naakacili mwana akumugwasya kuzumanana naakali mukubusi kutalya zyintu zyatakazumizidwe Mumulawo wa Leza aciindi eeco. (Daniele 1:8) Nokwakainda ciindi, wakaambilizya mulumbe wa Leza kubami baku Babuloni cakutayoowa. (Tusimpi 29:25; Daniele 4:19-25; 5:22-28) Kuzumanana alimwi akusyomeka kwakwe kwalizyibidwe. (Daniele 6:4) Kunze lyaboobo, muciindi cakuleka kusyomeka kutegwa afutule buumi bwakwe, Daniele wakali kumusyoma Jehova cakumanina. (Tusimpi 3:5, 6; Daniele 6:23) Nkakaambo kaako ncaakali “muntu uyandwa loko” mumeso a Leza.

Munzila zimwi, kwiiya Bbaibbele mazuba aano ncuuba-uba kwiinda mbucakabede kuli Daniele. Mabbuku aakali manji akabikwa antoomwe akupanga bbuku lyoomwe. Tulijisi Bbaibbele likkwene, kubikkilizya azilembedwe kujatikizya businsimi bwa Daniele mbubwakazuzikizigwa. Alimwi tulijisi zibelesyo zinji zitugwasya kulimvwisya Bbaibbele nzyotukonzya kubelesya mukuvwuntauzya. * Sena mulazibelesya zibelesyo zili boobu? Sena mulijisi bubambe bwakujana ciindi cakubala Bbaibbele akuzinzibala kuyeeya? Ikuti kamucita oobu munoocita mbwakali kucita Daniele. Muyakuba alusyomo luyumu alimwi cilongwe canu a Jehova ciyakuyuma. Ijwi lya Leza linakumusolela mubuumi bwanu, akumusyomezya luyando lwakwe.

Amujatisye Kupaila

Kupaila cakali cintu cipati mubuumi bwa Daniele. Wakalomba zyintu zyakeelede kuli Leza. Naakacili mukubusi, wakali kulangilwa kujaigwa kuti naakaalilwa kupandulula ciloto ca Mwami Nebukadinezara wa Babuloni. Kakwiina kusowa ciindi, Daniele wakalomba Jehova kuti amugwasilizye alimwi akumukwabilila. (Daniele 2:17, 18) Nokwakainda ciindi, musinsimi ooyu usyomeka wakalyaambilila zibi zyakwe antoomwe azyabantu bakwe akulomba Jehova kuti abalekelele akaambo kakuti wakalizyi kuti tiibakalondokede. (Daniele 9:3-6, 20) Ciindi naatakali kuzimvwisya zyintu zyakali kusololelwa amuuya, Daniele wakalomba Leza kuti amugwasye. Cimwi ciindi, mungelo iwakali kumuswaya akumupa busongo Daniele, wakamwaambila kuti: “Majwi aako akali kumvwigwa.”—Daniele 10:12.

Daniele taakali kulomba buyo lugwasyo kuli Leza. Ibbuku lya Daniele 6:10 lyaamba kuti: “Nkabela kotatwe mubuzuba . . . wakomba akulumba Leza, mbubonya mbwaakali kucita lyoonse.” Daniele wakalijisi twaambo tunji twakumulumba akumutembaula Jehova. Alimwi wakali kucita oobu lyoonse. Masimpe, kupaila cakali cintu cipati mubukombi bwakwe cakuti takali kukonzya kucileka nokuba kuti buumi bwakwe bwakali muntenda.  Cakutadooneka, Jehova wakamuyanda akaambo kakutazungaana kwakwe.

Eelyo kaka mupailo ncoolwe cipati! Kutaindi buzuba kakwiina kwaambaula a Bauso bakujulu. Kamuyeeya kumulumba akumutembaula akaambo kabubotu mbwamucitila. Amwaanguluke kumwaambila mapenzi aanu anzyomulibilika. Amuyeeye mbwaingula mipailo yanu alimwi amumulumbe. Amupaile kwaciindi cilamfwu. Ciindi notupaila kuli Jehova camoyo oonse, tulalimvwa mbuli mbwatuyanda swebo kutugama. Eelyo kaka cilakulwaizya ‘kujatisya kupaila’!—Baloma 12:12.

Amusumpule Zyina Lya Jehova

Kwiina cilongwe cikonzya kuzumanana kuti umwi kaliyanda. Ncimwi buyo acilongwe cesu a Jehova. Daniele wakalikazyi kaambo aaka. Amubone mbwaakali kubikkila maano kusumpula zyina lya Jehova.

Ciindi Leza naakaingula mupailo wa Daniele kwiinda mukumuyubunwida ciloto ca Nebukadinezara alimwi abupanduluzi bwancico, Daniele wakaamba kuti: “Lilumbwe izina lya-Leza lyoonse mane kukabe kutamani. Ngonguwe uujisi busongo anguzu.” Ciindi naakali kwaambila Nebukadinezara ciloto abupanduluzi bwancico, Daniele cakwiinduluka-induluka wakapa kulumba kuli Jehova, akukankaizya kuti ngonguwe alikke “Uuyubununa makani aasisidwe.” Mbubweenya buyo, ciindi Daniele naakali kulomba kulekelelwa alimwi akuvwunwa, wakaamba kuti: “O Leza wangu, . . . izina lyako lililembedwe amunzi wako abantu bako.”—Daniele 2:20, 28; 9:19.

Tulijisi nzila zinji motukonzya kumwiiya Daniele. Ciindi notupaila, tulakonzya kubikkila maano kuti zyina lya Leza ‘lisalazyigwe.’ (Matayo 6:9, 10) Tatweelede kusampuzya zyina lya Jehova lisalala kwiinda mumicito yesu. Muciindi caboobo, atuzumanane kusumpula zyina lya Jehova kwiinda mukukambaukila bamwi mulumbe mubotu wa Bwami.

Munyika motukkede, luyando alimwi akulanganya bamwi tazyibikkilwi maano. Nokuba boobo, tulakonzya kuumbulizyigwa kuzyiba kuti Jehova ulabalanganya ncobeni babelesi bakwe umwi aumwi kumugama. Mbuli sintembauzyo mbwaakaamba kuti: “Jehova ulabotelwa kucisi cakwe; Babombumyoyo ulabasamika lufutuko.”—Intembauzyo 149:4.

[Bupanduluzi buyungizidwe]

[Majwi aakwelelezya sikubala aali apeeji 11]

Leza wakatondezya kuti ulamuyanda Daniele kwiinda mukutuma mungelo Gabriyeli kuti amuyumye-yumye

[Majwi aakwelelezya sikubala aali apeeji 13]

Kuzumanana kwa Daniele mukwiiya alimwi akupaila kwakamugwasya kuba abube bubotu alimwi Leza wakali kumuyanda