Amwiiye Ncolyaamba Jwi Lya Leza

Ino Inga Mwabuzyiba Buti Bukombi Bwakasimpe?

Cibalo eeci cili amibuzyo ambweni njomwakalibuzyide kale alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.

1. Sena kuli buyo cikombelo comwe cakasimpe?

Jesu wakayiisya basikumutobela kujatikizya cikombelo comwe buyo, cakasimpe. Cili mbuli nzila iisololela kubuumi. Kujatikizya nzila eeyi, Jesu wakaamba kuti: “Mbasyoonto baijana.” (Matayo 7:14) Leza utambula buyo bukombi buyeeme a Jwi lyakwe lyakasimpe. Bakombi boonse bakasimpe balikamantene mulusyomo lomwe.—Amubale Johane 4:23, 24; 14:6; Baefeso 4:4, 5.

2. Nkaambo nzi zikombelo zinji ncozilyaamba kuti zya Bunakristo?

Basinsimi bakubeja banyonganya Bunakristo alimwi babubelesya kutegwa balijanine mpindu. Mbuli mbwaakaamba Jesu, balitondezya mbuli kuti ‘nimbelele’ pele bacita mbuli baumpe balaanzala. (Matayo 7:13-15, 21, 23) Bunakristo bwakubeja bwakatalika ciindi nobakamana kufwa bamaapostolo ba Jesu.—Amubale Milimo 20:29, 30.

3. Ino bukombi bwakasimpe inga bwazyibwa buti?

Bakombi bakasimpe balalilemeka Bbaibbele kuti ndi Jwi lya Leza. Balasolekesya kupona kweelana anjiisyo zyandilyo. Aboobo cikombelo cakasimpe ciliindene acikombelo ciyeeme aamizeezo yabantu. (Matayo 15:7-9) Bakombi bakasimpe tabayiisyi cintu cimwi akucita ciimpene ancobayiisya.—Amubale Johane 17:17; 2 Timoteyo 3:16, 17.

Cikombelo cakasimpe cilalilemeka zyina lya Leza, Jehova. Jesu wakalizyibya zyina lya Leza. Wakabagwasya bantu kumuzyiba Leza alimwi wakabayiisya kupailila zyina lya Leza kuti lisalazyigwe. (Matayo 6:9) Kubusena ooko nkomukkala, ino ncikombelo nzi cikulwaizya kubelesya zyina lya Leza?—Amubale Johane 17:26; Baloma 10:13, 14.

 4. Ino inga mwabazyiba buti bakombi bakasimpe?

Banakristo bakasimpe balakambauka kujatikizya Bwami bwa Leza. Leza wakatuma Jesu kuti akambauke kujatikizya Bwami. Bwami bwa Leza mbobulangizi bulikke mbobajisi bantu. Jesu wakazumanana kubukambauka kusikila buzuba mbwaakali kufwa. (Luka 4:43; 8:1; 23:42, 43) Wakaambila basikumutobela kukambauka Bwami bwa Leza. Ikuti muntu wamusikila kaambaula a Bwami bwa Leza, ino inga wabalilwa kucikombelo nzi?—Amubale Matayo 10:7; 24:14.

Basikumutobela Jesu tabali banyika eeyi mbyaabi. Tabatoli lubazu mutwaambo twacisi naa mumazwanga aabuleya. (Johane 17:16) Alimwi tabaiyi micito amizeezo mibyaabi iili munyika.—Amubale Jakobo 1:27; 4:4.

5. Ino ncitondezyo nzi cakusaanguna ca Bunakristo bwakasimpe?

Banakristo bakasimpe balijisi luyando akati kabo. Kwiinda mu Jwi lya Leza, bayiya kulemeka bantu bamisyobo yoonse. Nokuba kuti bukombi bwakubeja bwagwasyilizya munkondo zicitika munyika, bakombi bakasimpe balakaka kucita oobo. (Mika 4:1-4) Muciindi caboobo, bantu bamucikombelo cakasimpe babelesya ciindi cabo azyintu zyabo kugwasya alimwi akukulwaizya bamwi cakulisungula.—Amubale Johane 13:34, 35; 1 Johane 4:20, 21.

Ino ninkamu nzi yabukombi iijisi buyo njiisyo ziyeeme a Jwi lya Leza, iilemeka zyina lya Leza, alimwi yaambilizya Bwami bwa Leza kuti mbobulangizi bulikke bwabantu? Ino ninkamu nzi iijisi luyando alimwi iitatoli lubazu munkondo? Bumboni butondezya kuti Mbaakamboni ba Jehova.—1 Johane 3:10-12.

Kutegwa muzyibe zinji, amubone cibalo 15 mubbuku eeli, lyakamwaigwa a Bakamboni ba Jehova.

[Cifwanikiso icili apeeji 17]

Ino Ncinzi Cini Bbaibbele Ncoliyiisya?

[Cifwanikiso icili apeeji 16]

“Caantangalala baamba kuti balimuzyi Leza, pele balamukaka kwiinda mumilimo yabo.”—Tito 1:16