Ino Nguni Weelede Kuyiisya Bana Kujatikizya Leza?

“Sikwiiya taindi mwiiyi wakwe, pele kufwumbwa uyiisyigwa kabotu uyooba mbuli mwiiyi wakwe.”—LUKA 6:40.

BAZYALI bamwi balimvwa kuti tabeeleli kuyiisya bana babo kujatikizya Leza. Balakonzya kulimvwa kuti tabayiide kapati naa kuti takwe zinji nzyobazyi kujatikizya bukombi kutegwa babe bamayi babotu. Akaambo kaceeci, balakonzya kulekela umwi wacibbululu naa musololi wacikombelo kucita mulimo ooyu uuyandika kapati.

Pele mubwini, ino nguni weelede kuyiisya bana kasimpe alimwi anjiisyo zyakulilemeka? Amubone Bbaibbele ncolyaamba mumakani aaya, mpoonya mweezyanisye atwaambo ooto ntobajana basikuvwuntauzya.

Ino Mukuli Nzi Ngobajisi Bausyi Bana?

Ncoliyiisya Bbaibbele: “Nomausyi, mutanoobanyemyi bana banu pe, pele amuzumanane kubalela mululayo lwa Jehova akubayiisya kutobela mizeezo yakwe.”—Baefeso 6:4.

Nzyobajana basikuvwuntauzya: Mbuti bausyi bana mbobakonzya kugwasyigwa kuti kabali basungu mumakani aakukomba? Cibalo cimwi icakamwaigwa mu 2009 cakuti, Fathers’ Religious Involvement and Early Childhood Behavior, cakaamba kuti: Kutola  lubazu muzyintu zyabukombi izicitwa mucilawo inga cagwasya bamaalumi kuba bazyali babotu. Bukombi bulakonzya kupa kuti bantu kabamvwana alimwi akubapa njiisyo zitondezya mbobakonzya kupona buumi bubotu.

Bbaibbele lilakankaizya kapati kujatikizya mbouyandika mukuli wabausyi bana mukukomezya bana alimwi akubayiisya. (Tusimpi 4:1; Bakolose 3:21; Bahebulayo 12:9) Pele sena lulayo oolu lulayandika asunu? Mu 2009 cikolo cipati caku Florida cakalemba cibalo cimwi icakali kwaamba bana mbobajatikizyigwa anzyobacita bausyi. Basikuvwuntauzya bakajana kuti ibana ibakajisi bamausyi bakali kubabikkila maano nobakali kukomena, bakali kulangilwa kuba bantu basilweetelelo alimwi akulimvwa kuti mbantu abalo. Basankwa bakali kulangilwa kuba bantu balilemeka, alimwi basimbi bakali kulangilwa kuba amaano. Mubwini, lulayo lwamu Bbaibbele luciyandika kapati.

Ino Mukuli Wabanyina Bana Uyandika Kapati Buti?

Ncoliyiisya Bbaibbele: “Alimwi utataalazyi mulao wabanyoko.”—Tusimpi 1:8.

Nzyobajana basikuvwuntauzya: Mu 2006, ibbuku litegwa Handbook of Child Psychology lyakaamba kuti: “Mweelwe waakati-kati utondezya kuti bamanyina bana balaba aciindi cinji cakwiizya abana babo basyoonto icili akati ka 65% a 80% kwiinda ciindi bamawisyi ncobaizya abana babo, alimwi oobu mbocibede mumasi aasiyene-siyene.” Akaambo kaceeci, mwana nayaabukomena ulajatikizyigwa kapati aŋambawido yabanyina, amicito yabo alimwi ambobazilanga zyintu.

Ikuti banyina abausyi babelekela antoomwe kuyiisya bana babo kasimpe kujatikizya Leza, babapa zipego zibotu zyobilo. Cakusaanguna, bana balaba acoolwe cakuba acilongwe a Usyi wabo wakujulu, cilongwe cikonzya kubagwasya mubuumi bwabo boonse. Cabili, bana balayiya kucikozyanyo camulumi amukaintu mbobeelede kubelekelaamwi kutegwa bazuzikizye mbaakani ziyandika. (Bakolose 3:18-20) Nokuba kuti bamwi inga bagwasya bausyi abanyina, bazyali mbabajisi mukuli wakuyiisya bana kujatikizya Leza alimwi ambwayanda Leza kuti mukwasyi ubeleke.

Aboobo, ino bazyali inga babayiisya buti bana babo? Ino ninzila nzi zyakuyiisya izilangilwa kubeleka kabotu?