Ncinzi Bana Ncobeelede Kwiiya?

“Magwalo oonse akasololelwa a Leza alimwi alagwasya mukuyiisya, mukusinsa, mukululamika, mukulaya cabululami.” —2 TIMOTEYO 3:16.

BANA beelede kuyiisyigwa kasimpe kajatikizya Leza. Ino inga bakayiila kuli kasimpe aako? Kuzwa mubbuku lyabukombi lilemekwa munyika yoonse, Ibbaibbele.

Bbaibbele lili mbuli lugwalo kuzwa kuli Leza. Mulugwalo oolu, Leza uyubununa bube bwakwe alimwi ulapa malailile aambobeelede kulilemeka bana bakwe boonse, ibapati alimwi abana. Amubone njiisyo zimwi buyo izili mu Bbaibbele alimwi aziiyo nzyobakonzya kwiiya bana abalo.

Ino ncinzi Leza ncayanda kuti tuzyibe kujatikizya nguwe?

▪ Ncoliyiisya Bbaibbele: “Nduwe olike oojisi izina lya-Jehova, Nduwe Mupatikampatila atala anyika yoonse.”—Intembauzyo 83:18.

Ncotwiiya: Leza Muntu wini-wini alimwi ulijisi zyina.

▪ Ncoliyiisya Bbaibbele: “Jehova ulalingula myoyo yoonse, ulazibisya makanze oonse amiyeeyo yoonse. Na ulamuyandaula, ulamujana.”—1 Makani 28:9.

Ncotwiiya: Jehova Leza ulatulanganya toonse, ikubikkilizya abana basyoonto. (Intembauzyo 10:14; 146:9) Uyanda kuti twiiye kujatikizya nguwe.

▪ Ncoliyiisya Bbaibbele: “Mutapenzyi . . . mucaala naba umwi. Na mwabapenzya, alimwi na bakwiilila ndime, ncobeni ndamvwa kukwiila kwabo.”—Kulonga 22:22-24.

Ncotwiiya: Jehova ulaiswiilila mipailo noiba yabana basyoonto. Tulakonzya kupaila kuli Leza lyoonse alimwi akumwaambila nzyotuyeeya alimwi ambotulimvwa kujatikizya nguwe.

▪ Ncoliyiisya Bbaibbele: “Bakali kusunka Leza, Akukalazya Uusalala wa-Israyeli.” —Intembauzyo 78:41.

Ncotwiiya: Ŋambawido alimwi amicito yesu zilamujatikizya mbwalimvwa Jehova, aboobo tweelede kuyeeya katutanaambaula alimwi akucita cintu.

 Ino mbuti mbotweelede kubabona aabo batali mbuli ndiswe?

▪ Ncoliyiisya Bbaibbele: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.” —Milimo 10:34, 35.

Ncotwiiya: Ikuti Leza ulabatambula bantu boonse ibazwa mubukkale bwiindene-indene, andiswe tatweelede kusalulula bamwi akaambo kacikanda naa akaambo kakwiindana kubusyu.

▪ Ncoliyiisya Bbaibbele: “Kamulibambilide lyoonse kuliiminina kumuntu uuli woonse uukonzya kumubuzya kaambo kajatikizya bulangizi mbomujisi, pele amucite boobo amoyo mubombe alimwi abulemu kapati.”—1 Petulo 3:15.

Ncotwiiya: Ciindi notubandika zyabukombi, tweelede kwaamba mizeezo yesu cakusinizya pele munzila yaluzyalo. Alimwi tweelede kutondezya bulemu kulibaabo mbotwiindene limwi njiisyo zyabukombi.

Ino mbuti mbotweelede kubabona banamukwasyi?

▪ Ncoliyiisya Bbaibbele: “Nywebo nobana, amubamvwide bazyali banu muzyintu zyoonse, nkaambo eeci cilakkomanisya mu Mwami.” —Bakolose 3:20.

Ncotwiiya: Bana bamvwida bazyali tabatondezyi buyo kuti balabayanda bazyali babo, pele balatondezya akuti bayanda kukkomanisya Leza.

▪ Ncoliyiisya Bbaibbele: “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo.”—Bakolose 3:13.

Ncotwiiya: Bamwi bantu, ikubikkilizya abamukwasyi wesu, balakonzya kututyompya zimwi ziindi. Pele kuti katuyanda kuti Leza atulekelele, tweelede kwiiya kulekelela bamwi. —Matayo 6:14, 15.

 Ino nkaambo nzi ncotweelede kusyomeka alimwi akuba basibuuya?

▪ Ncoliyiisya Bbaibbele: ‘Amucileke kubeja, umwi aumwi wanu aambe zyamasimpe kuli simukobonyina.’—Baefeso 4:25.

Ncotwiiya: Ciindi notwaamba zyamasimpe, twiiya Leza alimwi tulamukkomanisya. Ikuti naa twaba aciyanza cakubeja, tuba mbuli sinkondonyina a Leza, Diabolosi, walo uuli “ngousyi wabubeji.”—Johane 8:44; Tito 1:2.

▪ Ncoliyiisya Bbaibbele: “Zyintu zyoonse nzimuyanda kuti bantu bamucitile, anywebo nzimweelede kubacitila.”—Matayo 7:12.

Ncotwiiya: Tweelede kubikkila maano bantu mbobalimvwa, mbobayeeya, alimwi anzyobayandika bamumukwasyi wesu alimwi abantu bamucilawo cesu. Ikuti ‘katubeetelela’ bantu, bamwi balakonzya kucita mbubwenya oobo akulindiswe.—1 Petulo 3:8; Luka 6:38.

Mbuli zikozyanyo eezyi mbozitondezya, ziiyo izili mu Bbaibbele zilakonzya kubagwasya bana kuba bantu balumba, balaabulemu alimwi ibabikkila maano. Pele ino nguni weelede kuyiisya bana zyintu eezyi?