“Ciindi Cakuyanda Aciindi Cakusula”

“LEZA nduyando.” Mumasi amwi bantu balaalemba majwi aaya akwaabikka kubwaanda muŋanda yabo. Masimpe, majwi mabotu aapandulula mbwabede Leza—ncikozyanyo cibotu caluyando.

Nokuba boobo, bantu banji tabazyi kuti majwi aaya azwa mu Bbaibbele. Mwaapostolo Johane ngookalemba kuti: “Muntu uutatondezyi luyando tanamuzyiba Leza pe, nkaambo Leza nduyando.” (1 Johane 4:8) Johane alimwi wakalemba kujatikizya luyando lwa Leza lwakunununa bantu boonse munyika naakati: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atakanyonyoonwi pele akabe abuumi butamani.”—Johane 3:16.

Akaambo kaceeci, bamwi bayeeya kuti Leza lyoonse tabikkili maano kucintu cili coonse ncotucita. Bunji bwabantu mbobapona cilatondezya kuti bayeeya kuti kufwumbwa zyintu nzyobacita, Leza takababeteki akaambo kabukkale bwabo. Pele sena aaya masimpe? Sena Leza ulabayanda bantu boonse, basizibi alimwi abacita zibotu? Sena kuli ciindi Leza nasulaika?

Luyando lwa Leza Mbolwiindene Alusulo Lwakwe

Mwami musongo Solomoni wakaamba majwi aaya: “Zintu zyoonse zilijisi ciindi cazyo, amakani oonse aansi alijisi mazuba aao . . . ciindi cakuyanda aciindi cakusula.” (Mukambausi 3:1, 8) Kweelana anjiisyo eeyi, nokuba kuti Leza ngusiluyando alimwi mubombe moyo, kuli ziindi zimwi nasulaika.

Kusaanguna, ino caamba nzi “kusula” mbuli mbokulembedwe mu Bbaibbele? Ibbuku limwi liingula kuti: “Mu Bbaibbele ibbala lyakuti “kusula” lijisi bupanduluzi bunji. Lilakonzya kwaamba businkondo, kuzumanana kucimwa, ziindi zinji kusangene amizeezo yakuyanda kunyonyoona zyina lyamuntu. Kusula kuliboobu kulakonzya kupa muntu kuti anyonyoone zyina lyamuntu ngwasulide naa kumujaya.” Oobu mbobupanduluzi mbotuzyi kabotu, alimwi tulabona azyintu zicitika munyika yoonse akaambo kalusulo luliboobu. Pele bbuku ndilyonya eeli lilayungizya akwaamba kuti: “‘Kusula’ alimwi kulakonzya kwaamba kutaciyanda cintu pele kakunyina muzeezo wakuyanda kucinyonyoona.”

Bupanduluzi bwabili oobu mbotulanga-langa aawa. Caamba kucimwa, kusesemwa—kutali kuyanda kucisa muntu. Sena Leza inga waba alusulo luliboobu? Amubone caambidwe mulugwalo lwa Tusimpi 6:16-19: “Nkuzili zintu zili musanu acimwi Jehova nzyasulide, azintu zili musanu azibili zimusesemya: meso aakulisumpula, lulimi lwakubeja, amaanza aatila bulowa bwabaabo batakwe mulandu, moyo uuyeeya makanze aabubi, maulu aazuzaanina kububi, kamboni sikubeja uuyooya  zyabubeji, amuntu uubusya inkondo akati kababunyina.”

Mbuli mbotwabona, kuli micito imwi Leza njasulaika. Pele, takuli kuti tamuyandi muntu uucita zyintu zili boobo. Ulabikkila maano kubukkale ibupa kuti muntu acite oobo, mbuli kutalondoka, bukkale mwabede, mbwaakakomezyegwa, alimwi akubula luzyibo. (Matalikilo 8:21; Baloma 5:12) Mulembi wa lugwalo lwa Tusimpi ulacipandulula eeci kwiinda mukubelesya cikozyanyo cibotu naakati: “Muntu ngwayanda Jehova, ulamweempya, alimwi ulanunsaula mwana umwi aumwi ngwatambula.” (Tusimpi 3:12) Muzyali ulakonzya kwiisulaika micito yamwana iitali kabotu, pele kacimuyanda mwana alimwi ulacita ncakonzya kucita kutegwa amugwasye kuleka micito mibi kwiinda mukumulaya. Muluyando lwakwe, Jehova ulacita mbubwenya oobu kuti kakuli bulangizi bwakuti muntu sizibi inga wanununwa.

Ciindi Lusulo Nolweelede

Aboobo, ino kuti muntu wacizyiba ncayanda Leza pele tayandi kucicita? Muntu uuli boobu tamukkomanini Leza. Kuti kacita micito njatayandi Leza acaali, ulipa buyo kuti asulaikwe anguwe. Mucikozyanyo, Bbaibbele lyaamba kuti: “Jehova ulalingula baluleme abasizibi. Moyo wakwe ulisulide basikufumpa.” (Intembauzyo 11:5) Muntu uuli boobu uuteempwi kucita zibi tacilekelelwi, mbuli Paulo mbwaakakasalazya kaambo mulugwalo lwakwe kubana Hebrayo naakati: “Ikuti katucita cibi acaali notwamana kutambula luzyibo lwini-lwini lwakasimpe, kunyina cipaizyo cimbi cazibi cili coonse cicisyeede pe, pele kuli buyo bulangizi bwalubeta buyoosya alimwi abukali buyaka mulilo ibuyoonyonyoona baabo ibakazya.” (Bahebulayo 10:26, 27) Ino nkaambo nzi Leza siluyando ncanga wacitila boobu?

Ikuti muntu wacita cibi cipati acaali, bubi bunjilila limwi cakuti muntu inga wakakilwa kubugwisya. Ulakonzya kuba muntu mubi kapati, uutakonzyi kucinca. Bbaibbele lyaamba kuti muntu uuli boobu ulikozyenye asiluwe uutakonzyi kucinca mubala wakwe. (Jeremiya 13:23) Kuteempwa kupa muntu kucita cibi Bbaibbele ncoliita kuti ‘cibi citamani,’ calo citakonzyi kulekelelwa.—Maako 3:29.

Eeci ncobakacita ba Adamu a Eva alimwi a Judasi Iskariote. Mbwaanga ba Adamu a Eva bakalengwa kabalondokede alimwi mbwaanga mulawo wa Leza wakalisalede kuli mbabo alimwi bakaumvwisya boonse bobilo, cilalibonya kuti kubisya kwabo cakali caali alimwi tiibakali kukonzya kulekelelwa. Majwi ngaakabaambila Leza nobakamana kubisya atondezya kuti tiibakali kukonzya kulekelelwa. (Matalikilo 3:16-24) Nokuba kuti Judasi taakalondokede, wakayanzana a Mwana aa Leza pele wakamuzangila.  Jesu wakamwaamba kuti wakali “mwana walunyonyooko.” (Johane 17:12) Ibbaibbele alimwi litondezya kuti Diabolosi wakatalika kaindi kucita cibi acaali alimwi ncakonzya kulindila buyo ndunyonyooko. (1 Johane 3:8; Ciyubunuzyo 12:12) Bantu aaba balisulaikidwe a Leza.

Nokuba boobo, cilakkomanisya kuzyiba kuti tabali boonse babisya batakonzyi kulekelelwa. Jehova ulakkazika moyo alimwi tacikkomanini kusubula baabo ibabisya akaambo kakubula luzyibo. (Ezekiele 33:11) Ubatamba kuti beempwe kutegwa balekelelwe. Tubala kuti: “Sizibi aleke inzila yakwe, asimilandu aleke miyeeyo yakwe. Aboole kuli-Jehova, kuti amufwide luzyalo, akuli-Leza wesu, nkaambo nguuinda kulekelela.”—Isaya 55:7.

Kululanga Munzila Yeelede Luyando a Lusulo

Masimpe, mbotuli basikwiiya Leza, Banakristo bakasimpe beelede kuzyiba “ciindi cakuyanda” alimwi “aciindi cakusula.” Kuciindizya ikutondezya lubomba inga kwapa kuti muntu atalangi luyando aluse munzila yeelede. Pele majwi asikwiiya Juda alakonzya kutugwasya kukulanga munzila yeelede kutondezya luse alimwi akusula cibi nati: “Amuzumanane kubafwida luse bamwi, kamucita boobo cakuyoowa, kumwi kamusulaika nociba cisani cabisyigwa amubili wanyama.” (Juda 22, 23) Aboobo, tweelede kuzisulaika zyintu zibi pele kutali muntu uucita zyintu zibi.

Banakristo alimwi balaililwa kutondezya luyando kulibasinkondonyina kwiinda mukubacitila zibotu. Jesu wakaamba kuti: “Amuzumanane kuyanda basinkondonyoko akubapailila aabo bamupenzya.” (Matayo 5:44) Nkakaambo kaako Bakamboni ba Jehova tabaleki kukambauka makani mabotu aa Bwami bwa Leza lyoonse kuli basimukobonyina nokuba kuti bamwi tabautambuli mulumbe ooyu. (Matayo 24:14) Kulanga twaambo kweelana a Bbaibbele ncolyaamba, Bakamboni babona muntu uuli woonse kuti uleelela kutambula luyando alimwi aluse lwa Jehova. Ciindi bantu nobatalumbi lugwasyo ndobapa Bakamboni naa ciindi Bakamboni nobakakwa akupenzyegwa, batobela lulayo lwa Paulo lwakuti: “Amuzumanane kubalongezya aabo bamupenzya; kamulongezya, mutanoosinganyi pe . . . Mutapilusizyi muntu uuli woonse bubi.” (Baloma 12:14, 17) Balizyi kuti Jehova nguuzyi bayandika luyando alusulo lwakwe. Ngomubetesi mupati mumakani aajatikizya buumi alufwu.—Bahebulayo 10:30.

Masimpe, “Leza nduyando.” Pele swebo, tweelede kumulumba akaambo kaluyando lwakwe alimwi akusolekesya kuzyiba kuyanda kwakwe alimwi akukucita. Kwiinda mukubelesya Bbaibbele lyanu, Bakamboni ba Jehova bakkala kubusena nkomuzwa bayookkomana kumugwasya kwiiya nzyayanda Leza alimwi ambomukonzya kuzibelesya mubuumi bwanu. Kwiinda mukucita boobo Leza takamusulaiki pele uyoomuyanda.

[Majwi aakwelelezya sikubala aali apeeji 13]

“Nkuzili zintu zili musanu acimwi Jehova nzyasulide, azintu zili musanu azibili zimusesemya: meso aakulisumpula, lulimi lwakubeja, amaanza aatila bulowa bwabaabo batakwe mulandu, moyo uuyeeya makanze aabubi, maulu aazuzaanina kububi, kamboni sikubeja uuyooya zyabubeji, amuntu uubusya inkondo akati kababunyina.”—TUSIMPI 6:16-19

[Majwi aakwelelezya sikubala aali apeeji 14]

“Ikuti katucita cibi acaali notwamana kutambula luzyibo lwini-lwini lwakasimpe, kunyina cipaizyo cimbi cazibi cili coonse cicisyeede pe, pele kuli buyo bulangizi bwalubeta buyoosya.”—BAHEBULAYO 10:26, 27

[Majwi aakwelelezya sikubala aali apeeji 15]

“Sizibi aleke inzila yakwe, asimilandu aleke miyeeyo yakwe. Aboole kuli-Jehova, kuti amufwide luzyalo . . . nkaambo nguuinda kulekelela.”—ISAIAH 55:7

[Cifwanikiso icili apeeji 14]

Muzyali uulaa luyando ulamulaya mwanaakwe kutegwa amugwasye

[Cifwanikiso icili apeeji 15]

Baange banji bagwasyigwa aluyando alimwi aluse lwa Leza