Ciindi Ncotuteelede Kuuzyila
Amubayiisye Bana Banu
Ciindi Ncotuteelede Kuuzyila
ULAKONZYA kuzumina kuti ciindi noli kucikolo cilayandika kapati kutauzyila. Banji balauzyila ciindi nobali mukkilasi, pele kutegwa wiiye toyelede kuuzyila. Ambweni ulaunka akumiswaangano kwalo nkomwiiya Bbaibbele.
Ino uyeeya kuti ncinzi ncoyelede kucita kutegwa kotauzyili?— * Nzila yomwe njakufwambaana koona masiku. Ambweni akwalo koona asyoonto buyo masikati kulakonzya kugwasya. Atubone ncotukonzya kwiiya kucintu cakacitika kumukubusi umwi wakoona masiku ciindi mwaapostolo Paulo naakali kupa makani. Kobala mu Bbaibbele lugwalo lwa Milimo caandaano 20, kapango 7 kusikila ku 12, ubone cakacitika.
Paulo wakaswaide mbungano iili mumunzi wa Trowa imwakali kwiimina mato. Ibbaibbele lyaamba kuti Paulo “wakali kuyanda kuunka buzuba butobela” abwato. Aboobo “wakakanana kwaciindi cilamfwu kusikila akati kamasiku.” Tubala kuti: “Kakkede ampulungwido, mulombwana umwi uutegwa Yutiko wakoona Paulo naakacili kubandika.” Mpoonya ncinzi cakacitika?—
Yutiko wakawa ampulungwido “kuzwa muŋanda yatatu yamujulu.” Paulo alimwi abamwi bakazuzila ansi cakakufwambaana. Yutiko wakawa ansi—wafwa! Sena inga weezeezya mbobakalimvwa boonse?— Ibbaibbele lyaamba kuti Paulo wakamubweza Yutiko akumufwukatila. Mpoonya aawo, cakukondwa Paulo wakati: ‘Mutapengi, ulikabotu!’ Leza wakamubusya Yutiko kuzwa kulufwu!
Ncinzi ncotukonzya kwiiya kuli Leza kujatikizya cakacitika kuli Yutiko?— Kaambo komwe nkakuti Jehova, Taateesu wakujulu, ulakonzya kubabusya bantu bafwide kubikkilizya abana basyoonto. Masimpe, Jehova ulikuzyi alimwi ulakuyanda kwiinda ambobakuyanda bazyali bako. Ciindi Jesu naakali anyika, wakatondezya mbwabede Jehova kwiinda mukubweza bana basyoonto akubafwukatila alimwi akutalika kubalongezya. Alimwi wakabusya bana basyoonto, kubikkilizya amusimbi uujisi myaka yakuzyalwa iili 12.
Ino ulimvwa buti akaambo kakuzyiba kuti Uso wakujulu ulakuyanda?— Masimpe, citupa kuti andiswe tumuyande Jehova alimwi akutobela nzyatwaambila. Sena ulizyi mbotukonzya kutondezya kuti tulamuyanda Jehova?— Inzila yomwe njakumwaambila kuti tulamuyanda. Jesu wakaamba kuti: “Ndilamuyanda Taata.” Jesu tanaakaamba buyo kuti ulamuyanda Leza. Wakalutondezya luyando oolu kwiinda muzyintu nzyaakali kucita.
Jesu wakamumvwida Leza. Jesu wakaamba kuti: “Lyoonse ndicita zimukkomanisya.” Ikuti andiswe twacita oobo, tuyoosolekesya canguzu kutauzyila ciindi notuteelede kuuzyila kutegwa tumukkomanisye Jehova a Mwanaakwe, Jesu.
Kobala mu Bbaibbele Lyako
[Bupanduluzi buyungizidwe]
^ munc. 4 Ikuti naa mubala cibalo eeci amwana, keengo kamuyeezya kuti mweelede kwiima aniini akukulwaizya mwana kwaamba nzyazyi.
