Mibuzyo Iili Kkumi Iijatikizya Koonana

1 Yaingulwa 1 Sena koonana ncecibi ncobakacita ba Adamu a Eva mumuunda wa Edeni?

▪ Bwiinguzi: Bantu banji bayeeya kuti mucelo wakakasyidwe mumuunda wa Edeni wakali kwiiminina koonana. Pele oobo tabuli mboliyiisya Bbaibbele pe.

Amubone: Noliba leelyo Eva katanalengwa, Leza wakalailila Adamu kuti atalyi mucelo “[wa]musamu wakuziba bubotu abubi.” (Matalikilo 2:15-18) Akaambo kakuti Adamu wakali alikke, kukasyigwa ooku takukonzyi kwaamba koonana. Kuyungizya waawo, Leza wakapa ba Adamu a Eva mulawo uulimvwisya wakuti ‘bazyalisye, bavule, bazuzye nyika akwiibombya.’ (Matalikilo 1:28) Sena Leza siluyando naakalailila banabukwetene bakusaanguna ‘kuzuzya nyika’—calo cakali kujatikizya koonana—mpoonya akubapa cisubulo calufwu akaambo kakutobela malailile aakwe?—1 Johane 4:8.

Kunze lyaboobo, Eva taakali abalumi bakwe ciindi ‘naakacela mucelo [wakakasyidwe] akulya. Kumane nobakaba antoomwe amulumi wakwe wakamupa eelyo awalo wakalya.’—Matalikilo 3:6, NW.

Kumane boobo, ba Adamu a Eva tiibakasinswa nibakoonana akuzyala bana. (Matalikilo 4:1, 2) Cilasalala kuti mucelo ngobakalya ba Adamu a Eva tiiwakali kwiiminina koonana pe, pele wakali mucelo wini wakazwa kucisamu.

2 Sena Bbaibbele lilakasya kulikondelezya kujanika kwiinda mukoonana?

▪ Bwiinguzi: Ibbuku lyakusaanguna mu Bbaibbele liyubununa kuti Leza ngookalenga bantu kabali “baalumi abanakazi.” Leza wakaamba zyintu nzyaakalenga kuti “zyabota loko.” (Matalikilo 1:27, 31) Mukuya kwaciindi, Leza wakasololela mulembi umwi wa Bbaibbele kulailila baalumi kuti: “Sekelela amwanakazi wabulombe bwako . . . Inkolo zyakwe zikukutye ciindi coonse.” (Tusimpi 5:18, 19) Sena majwi aaya amvwika mbuli kuti Bbaibbele lilakasya kulikondelezya kujanika kwiinda mukoonana?

 Bumboni butondezya kuti kunze lyakupa kuti kabazyalana, Leza wakalenga zizyo zibelesyegwa mukoonana munzila iipa kuti banabukwetene kabatondezyanya luyando munzila iikkomanisya. Koonana kuli boobo kulakonzya kupa kuti balimvwe kukkutila banabukwetene ibayandana.

3 Sena Bbaibbele lilazumizya musankwa amusimbi kukkala antoomwe ikuti kabatakwetene mumulawo?

▪ Bwiinguzi: Ibbaibbele lilasalazya nolyaamba kuti “Leza uyoobabeteka basibwaamu.” (Bahebulayo 13:4) Ibbala lya Chigiliki ilyaamba bwaamu, nkokuti por·neiʹa, lyaamba kutazibelesya kabotu zizyo zibelesyegwa mukoonana akati kabantu batakwetene. * Aboobo, cililubide mumeso aa Leza kuti musankwa amusimbi kabakkala antoomwe batakwetene mumulawo—nokuba kuti bakanza kuyookwatana.

Nokuba kuti musimbi amusankwa balakonzya kabayandana kapati, Leza uyanda kuti saansi bakwatane kabatanatalika koonana. Ngu Leza wakatulenga kuti katucikonzya kuyandana. Bube bwa Leza butaanzi nduyando. Aboobo, ulijisi twaambo tumvwika ncaambila kuti koonana kweelede kucitwa buyo abanabukwetene mbuli mbocitiipandulule cibalo citobela.

4 Sena maali alazumizyigwa?

▪ Bwiinguzi: Kwaciindi cili mbocibede, Leza wakali kuzumizya mwaalumi kukwata maali. (Matalikilo 4:19; 16:1-4; 29:18–30:24) Pele Leza talinguwe wakatalisya maali. Wakamupa buyo mukaintu omwe Adamu.

Leza wakapa Jesu nguzu zyakuti aainduluke kwaamba makanze aakwe aakusaanguna aakuti nkukwata buyo mukaintu omwe. (Johane 8:28) Naakabuzyigwa kujatikizya cikwati, Jesu wakaamba kuti: “Ooyo wakabalenga kuzwa kumatalikilo, wakalenga mwaalumi amukaintu alimwi wakati: ‘Akaambo kaceeci mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe.’”—Matayo 19:4, 5.

Mukuya kwaciindi, umwi sikwiiya wa Jesu wakasololelwa a Leza kulemba kuti: “Mwaalumi aumwi abe amukaintu wakwe uumugeme alimwi mukaintu aumwi abe amulumaakwe uumugeme.”  (1 Bakolinto 7:2) Ibbaibbele alimwi lyaamba kuti kufwumbwa musankwa mumbungano ya Bunakristo uukwete alimwi uupedwe mikuli iilibedelede weelede kuti kali “mulumi uukwete mukaintu omwe.”—1 Timoteyo 3:2, 12.

5 Sena banabukwetene tabeelede kubelesya misamu naa nzila zimbi zikasya kumita?

▪ Bwiinguzi: Jesu tanaakalailila basikumutobela kuba abana. Alimwi kunyina sikwiiya wa Jesu wakalailila boobo. Kunyina mpolyaamba caantangalala Bbaibbele kuti ncibi kubelesya misamu naa nzila zimbi zikasya kumita.

Aboobo, banabukwetene balaangulukide kulisalila kuba abana naa pe. Alimwi balakonzya kulisalila naa bayanda kuzyala bana bongaye alimwi aciindi nobanga bazyala. Ikuti banabukwetene basala kubelesya nzila iikasya kumita kakunyina kugwisya da, eeco ncakulisalila cabo alimwi mukuli wabo. * Kunyina weelede kubabeteka.—Baloma 14:4, 10-13.

6 Sena cililubide kugwisya da?

▪ Bwiinguzi: Buumi bulisetekene kuli Leza, alimwi noiba nsalalila wiibona kuti muntu uupona. (Intembauzyo 139:16) Leza wakaamba kuti muntu wakeelede kupegwa mulandu akaambo kakujaya mwana uucili mwida. Aboobo, kuli Leza, kujaya mwana uucili mwida mbujayi.—Kulonga 20:13; 21:22, 23.

Pele, ino mbuti kuti aciindi cakutumbuka kwaba ntenda imwi yacibukilambuta iiyandika kuti banabukwetene basale kufwutula banyina akulekela mwana kuti afwe naa kufwutula mwana akulekela banyina kuti bafwe? Mubukkale buli boobu, banabukwetene beelede kusala ngobeelede kufwutula. *

7 Sena Bbaibbele lilazumizya kulekana?

▪ Bwiinguzi: Ibbaibbele talizumizyi kulekana. Nokuba boobo, Jesu wakaamba buyo kaambo komwe kakonzya kupa kuti cikwati cimane, naakati: “Kufwumbwa uuleka mukaintu wakwe iwatacita bwaamu, amane wakwata umbi, wacita bumambe.”—Matayo 19:9.

Leza ulakusulaika kulekana kwabumpelenge. Leza uyoobabeteka aabo balekana ambobakwetene limwi kakunyina atwaambo tuyakoomoonga, kwaambisya kuti bacita boobo kabajisi makanze aakukwata naa kukwatwa kumbi.—Malaki 2:13-16; Maako 10:9.

8 Sena Leza ulazumizya koonana kwabantu bajisi zizyo zikozyenye?

 ▪ Bwiinguzi: Cakusalazya, Ibbaibbele lilakasya bwaamu, bwalo bubikkilizya koonana kwabantu bajisi zizyo zikozyenye. (Baloma 1:26, 27; Bagalatiya 5:19-21) Nokuba kuti Bbaibbele lilaamba cacigaminina Leza mbwatabuyandi buumi bwamusyobo ooyu, pele alimwi tulizyi kuti “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atakanyonyoonwi pele akabe abuumi butamani.”—Johane 3:16.

Nokuba kuti balizyi kuti koonana kwabantu bajisi zizyo zikozyenye takuli kabotu, Banakristo bakasimpe balatondezya lubomba kubantu boonse. (Matayo 7:12) Leza uyanda kuti ‘katubalemeka bantu bamisyobo yoonse.’ Aboobo, Banakristo bakasimpe tababasulaiki bantu boonana bajisi zizyo zikozyenye.—1 Petulo 2:17.

9 Sena ncibi kubelesya fooni naa Intaneti kubandika, kutuma tugwalo naa zifwanikiso ziletela muzeezo wakoonana?

▪ Bwiinguzi: Ibbaibbele talyaambi cigaminina micito iili boobu iicitika mazuba aano. Pele lilaamba kuti: “Bwaamu abusofwaazi bwamusyobo uuli oonse naa busyaacivwulemwangu tazyeelede nokuba kwaambwa akati kanu pe, mbubonya mbokweelede kubantu basalali; alimwi kutabi bukkale buusya nsoni naa makani aabufwubafwuba naa kwaamba masesya aajatikizya zitondwa, izyintu ziteelede.” (Baefeso 5:3, 4) Izyintu mbuli kubelesya fooni naa Intaneti kubandika, kutuma tugwalo naa zifwanikiso ziletela muzeezo wakoonana cisumpula muzeezo utali kabotu kujatikizya koonana alimwi cikulwaizya bantu kuti kabalikondelezya kwiinda mukoonana nokuba kuti tabakwetene. Muciindi cakukulwaizya bantu kulilesya mumakani aakoonana, micito eeyi isumpula kulikkomanisya kwampoonya-mpoonya.

10 Ino Bbaibbele lyaamba nzi kujatikizya kulisobanya kubusankwa naa kubukaintu?

▪ Bwiinguzi: Ibbaibbele talyaambi cacigaminina kujatikizya kulisobanya kubusankwa naa kubukaintu—ikulisobanya kutegwa alimvwe mbuli kuti ucita cilengwa cakoonana kutegwa asike mpocikondelezya. Nokuba boobo, Ijwi lya Leza lilailila Banakristo kuti: “Aboobo, amujaye zizyo zyamubili wanu eezyo zili anyika kujatikizya zisusi mbuli bwaamu, busofwaazi, luunyaunya, kulombozya kubyaabi.”—Bakolose 3:5.

Kulisobanya kubusankwa naa kubukaintu kupa kuti muntu kaliyanda akutakulanga munzila yeelede koonana. Ibbaibbele litusyomezya kuti Leza ulakonzya kupa “nguzu zigambya iziinda zyabantu” kuli baabo basoleka canguzu kuleka cilengwa eeci.—2 Bakolinto 4:7; Bafilipi 4:13.

[Bupanduluzi buyungizidwe]