Sena Bwiinguzi Bulaakaambo?

“Ndakajisi myaka iili kkumi yakuzyalwa ciindi nindakatalika kweenda abasankwa. Kumatalikilo, twakali kujatana buyo maanza akukkisana. Pele tiilyakalampa, twakatalika kujatana zizyo zyamubili akoonana munzila zisiyene-siyene. Nindakakkwanya myaka iili 15, ndakatalika kubeleka alimwi basankwa mbotwakali kubeleka limwi bakali kundisikila kabayanda kuti toonane. Ndakali kuyanda kucita zyintu zikkomanisya babelesima akubasangana muzyintu zyoonse nzyobakali kucita. Ndakali kuyanda kuti beenzuma kabandiyanda, calo cakandipa kuti ndizumanane koonana abasankwa.”—Ba SARAH, * AUSTRALIA.

SENA inga camugambya kuzyiba kuti ba Sarah bakakomenena mumukwasyi uusungweede mubukombi? Bazyali babo bakasoleka kubakomezya kweelana anjiisyo zyamu Bbaibbele. Pele ba Sarah bakasala kutobela nzila iimbi.

Banji balakonzya kuzumina kuti ba Sarah bakasala kabotu. Baamba kuti nzyolyaamba Bbaibbele mumakani aakoonana tazicibeleki mazuba aano. Bamwi babona kuti taakwe bubi buliko mukupona buumi bwakutalilemeka kumwi koli mukombi uulyaabide.

Sena kuli mbocigwasya kupona kweelana ancoliyiisya Bbaibbele kujatikizya koonana? Bbaibbele lyaamba kuti ‘lyakasololelwa a Leza alimwi lilagwasya mukuyiisya.’ (2 Timoteyo 3:16) Ikuti naa mulasyoma kuti Leza ngookalenga bantu alimwi akuti Bbaibbele ndi Jwi lyakwe lyakasololelwa amuuya, nkokuti ncolyaamba kujatikizya makani aaya cilayandika kuzyiba.

Cuusisya ncakuti, bantu banji balinyongene kujatikizya ncoliyiisya Bbaibbele mumakani aakoonana. Basololi bazikombelo ibalyaamba kuti balalilemeka Bbaibbele bayiisya mizeezo iikazyanya kujatikizya koonana akwaamba kuti mizeezo eeyi iyeeme a Bbaibbele. Alimwi kaambo aaka kazyandaanya zikombelo zinji.

Muciindi cakusyoma nzyobaamba bantu, sena inga tiimwajana ciindi cakuti muvwuntauzye nobeni kujatikizya makani aaya? Cibalo citobela cilabandika mibuzyo iili kkumi iivwula kubuzigwa kujatikizya ncolyaamba Bbaibbele mumakani aakoonana. Mucibalo eeci mulajana bwiinguzi butaindi mumbali ibuyeeme acini ncoliyiisya Bbaibbele. Cibalo camamanino cazibalo eezyi cilatondezya kaambo kusala kwesu ncokuli aakaambo.

[Bupanduluzi buyungizidwe]