Sena Mwalizyi?

Ino ‘masani aasalala pyu’ aambwa kanji-kanji mubbuku lya Kulonga ninzi?

▪ Kweelana acilembedwe mu Bbaibbele, milembo yamatente yakabelesyegwa kupanga bwaanda amanjililo aatente lyakubunganina, ibwakali busena bwakukombela mu Israyeli wansiku, yakabambidwe “amasani aanyanzabili amasani aakamwemvwe amasani aasalala pyu.” (Kulonga 26:1; 38:18) Azyalo “zyakusama zisalala” izyabapaizi zyakasumidwe “[a]amasani aasalala pyu.”—Kulonga 28:1-6.

Mubala uusalala ujisi zyina limbi lyakuti kermes, wakali mubala wakupentezya zisani kuti zisubile pyu. Mubala ooyu wakupentezya zisani wakali kuzwa kutuuka tukaintu twamukwasyi wa Coccidae. Ootu tuuka tunyina mababa tukkala mumasamu mapati (Quercus coccifera), ku Middle East alimwi akunkomwe yalwizi lwa Mediterranean. Mubala ooyu ujanika mumayi aali mumubili watuuka tukaintu. Ciindi tuuka ootu notujisi mayi mwida tulibonya mbuli malubbeni, alimwi bupati bwantuto buli mbuli nyemu alimwi tulanamatila kututabi akumatu aacisamu eeci cipati. Bamana kutubwezelela akututwa tuuka ootu, balatunyika mumaanzi kutegwa bapange mubala wakupentezya zisani. Sikwiiya makani aakaindi muna Roma uutegwa Pliny wakaamba kujatikizya mubala ooyu uusalala pyu naakati uuli akati kamibala yakali aampuwo kapati ciindi naakali kupona.

Akati kabalembi ba Magwalo aa Banakristo aa Chigiliki, mbaani bakajanika lya Pentekoste 33 C.E.?

▪ Kulangilwa kuti akati kabaalumi bali lusele bakalemba cibeela eeci ca Magwalo, ibali cisambomwe bakajanika.

Kweelana acibalo cilembedwe mulugwalo lwa Milimo, Jesu wakalailila basikwiiya bakwe kuti: “Mutazwi mu Jelusalemu pe, pele kamuzumanana kulindila ceeco Taata ncaakasyomezya.” (Milimo 1:4) Cibalo nciconya eeci citondezya kuti ibakazoolemba Bbaibbele ba Matayo, Johane, alimwi a Petro bakaatobela malailile aaya akubungana “mubusena bomwe,” antoomwe abasikwiiya bambi. Banabokwabo a Jesu abalo bakaliko. (Milimo 1:12-14; 2:1-4) Aaba bobilo, ba Jakobo a Juda (Judasi), mbobakazoolemba mabbuku obilo aamu Bbaibbele aajisi mazyina aabo.—Matayo 13:55; Jakobo 1:1; Juda 1.

Mumakani mabotu ngaakalemba, Marko waamba mwaalumi wakaccija masiku ngaakajatwa Jesu. Wakali kulyaamba lwakwe nkaambo boonse basikwiiya bakali kumuccijide kale Jesu. (Maako 14:50-52) Aboobo, kuboneka kuti Marko ngookali umwi wabasikwiiya bakusaanguna, alimwi kulalangilwa kuti wakajanika lya Pentekoste.

Balembi bobilo ba Magwalo aa Banakristo aa Chigiliki aakasololelwa amuuya batanaambwa mbaa Paulo a Luka. Ilya Pentekoste 33 C.E., Paulo tanaakaningaba mutobeli wa Kristo. (Bagalatiya 1:17, 18) Alimwi kulangilwa kuti awalo Luka tanaakaliko, akaambo kakuti taakalibikkilizya alibaabo “ibakalibonena ameso” bukambausi bwa Jesu.—Luka 1:1-3

[Cifwanikiso icili apeeji 20]

TUUKA TUBELESYEGWA KUPANGA MUBALA WAKUPENTEZYA ZISANI

[Kulumba]

Courtesy of SDC Colour Experience (www.sdc.org.uk)

[Cifwanikiso icili apeeji 20]

PETRO ULAKANANA LYA PENTEKOSTE 33 C.E.