Sena Cilayandika Kuzyiba Bwiinguzi?

“Mulazyiba kasimpe, eelyo kasimpe kalamwaangununa.”—JOHANE 8:32.

Ibbaibbele lilijisi kasimpe kakonzya kutwaangununa kunjiisyo zinyonganya kujatikizya Jesu. Aboobo, sena kuli makani anzyotusyoma kujatikizya nguwe? Inzya. Zilamujatikizya Jehova a Jesu, alimwi zyeelede kutujatikizya andiswe.

● Nkaambo nzi ncozimujatikizya Jehova? Mubufwaafwi, nkaambo “Leza nduyando.” (1 Johane 4:8) Jehova uyanda kuti katukkomene lyoonse. Jesu wakaamba kuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma . . . akabe abuumi butamani.” (Johane 3:16) Leza wakatuma Mwanaakwe kutegwa atununune alimwi wakatujaluda nzila yakuti tukapone kukabe kutamani muparadaiso anyika, kweelana amakanze aakwe aakusaanguna. (Matalikilo 1:28) Leza uliyandide kupa cipego cabuumi butamani kuli baabo bayiya kasimpe kujatikizya Mwanaakwe alimwi akupona kweelana akasimpe aako.—Baloma 6:23.

● Nkaambo nzi ncozimujatikizya Jesu? Jesu awalo ulabayanda bantu. Wakatondezya luyando lwakulyaaba kwiinda mukulisungula kutufwida. (Johane 15:13) Wakalizyi kuti ngookali kujula nzila ilikke buyo iitola kulufwutuko. (Johane 14:6) Sena ceelede kutugambya kubona kuti Jesu uyanda kuti banji bagwasyigwe acinunuzyo cakwe? Nkakaambo kaako wakatuma basikumutobela beni-beni kuyiisya bantu nyika yoonse kujatikizya kuyanda kwa Leza amakanze aakwe.—Matayo 24:14; 28:19, 20.

● Nkaambo nzi ncozyeelede kutujatikizya andiswe? Amuyeeye kwaciindi cisyoonto kujatikizya zyintu ziyandika kapati kulindinywe mbuli buumi amukwasyi wanu. Sena kuli nomulangila kuti muyoopona buumi bubotu nywebo abayandwa banu? Jehova kwiinda muli Jesu umupa bulangizi nywebo abayandwa banu bwakuyoopona buumi bulondokede alimwi butamani munyika mpya, munoonyina macise akupenga. (Intembauzyo 37:11, 29; Ciyubunuzyo 21:3, 4) Sena bulangizi oobu bulamukkomanisya? Ikuti kacili boobu, kuli cintu ncomweelede kucita.

Amululange alimwi lugwalo luli antoomwe amutwe wamakani: “Mulazyiba kasimpe, eelyo kasimpe kalamwaangununa.” Ikasimpe kajatikizya Jesu alimwi amulimo wakwe mukuzuzikizya makanze aa Leza kalakonzya kutwaangununa kubuzike bwiinda kubija bwacibi alufwu. Pele kutegwa mwaangununwe, mweelede ‘kuzyiba kasimpe.’ Sena inga tiimwayanda kwiiya zinji kujatikizya kasimpe aaka ambomukonzya kugwasyigwa nywebo abayandwa banu? Bakamboni ba Jehova bayookkomana kumugwasya.