Mbubi nzi Buliko Mukusyoma Mizimo?

Kuzwa kubwana, ba Barbara * bakali kubona zilengaano, bakali kumvwa majwi alimwi bakalisinizyide kuti bakali kwaambaula abasazinyina bafwide. Balo abalumi babo ba Joachim bakali kubala mabbuku aamba zyamizimo alimwi bakaba basyaazibwene mukubelesya makkaadi aaitwa kuti tarot kutegwa baambe zyakumbele. Makkaadi aaya akali kutondezya kuti bayoojana mali manji, calo cakacitika mumakwebo. Bumwi buzuba, makkaadi akabacenjezya kuti bantu babyaabi balaboola kuŋanda yabo alimwi akabaambila mbobeelede kulikwabilila kwiinda munguzu zyamizimo.

NOKUBA kuti kusyoma mizimo inga kwabonwa kuti ncilengwa cakaindi alimwi citabeleki, kusyoma mizimo kulidumide kapati. Nyika yoonse bantu banji balasama zitumwa, kubelesya nsengo naa kubuzya makani kubaŋanga kutegwa babaambile zyintu zibotu naa kulikwabilila kuzyintu zibi. Mucibalo cijisi mutwe wakuti “Laptop and Lucifer,” magazini yaku German yakaamba kuti: “Intaneti ili mukupa kuti zyintu zijatikizya bulozi bazibikkile maano kapati.”

Sena mulizyi kuti Bbaibbele lilaamba kujatikizya kusyoma mizimo? Ncolyaamba kujatikizya makani aaya cilakonzya kumugambya.

Ncolyaamba Bbaibbele Kujatikizya Kusyoma Mizimo

Mulawo Leza ngwaakapa bantu bakwe bansiku bana Israyeli wakali kwaamba kuti: “Kutajanwi akati kanu . . . muntu uusonda, naba muŋanga, naba mulozi, naba mucape, naba simabibo, naba sibusangu, naba sibamooba, naba muntu uubuzya makani kubafu. Nkaambo kufwumbwa muntu uucita ezi ncisesemyo kuli-Jehova.” (Deuteronomo 18:10-12) Nkaambo nzi mulawo wa Jehova ncowakali kukasizyalimwi micito yamizimo?

Kweelana acakuluula cili kumatalikilo mbocitondezya, banji basyoma kuti bantu bapona balakonzya kubandika abantu bafwide alimwi akuti makani aajanwa kwiinda mumicito yamizimo azwa kubafwu. Njiisyo zili boobo zizwa kuzyintu nzyobayiisya muzikombelo zinji—kuti bantu bafwa balazumanana kupona kubusena bwamyuuya. Pele kwiindana anjiisyo eeyi, Bbaibbele cakusalazya lyaamba kuti: “Bafwide tabezi cintu niciba comwe; tabacijisi impindu, tabaciyeeyegwi limbi.” (Mukambausi 9:5) Lipandulula bafwide mbuli kuti bali muŋonzi, kakunyina kuzyiba cilicoonse cicitika kulimbabo. * (Matayo  9:18, 24; Johane 11:11-14) Kuti kacili boobo, mulakonzya kubuzya kuti, Mbuti mbotukonzya kupandulula zyintu zyamizimo zicitikila bantu? Ino kubandika kuli boobo kuzwa kuli?

Kubandika Amyuuya

Zibalo zya Makani Mabotu zitondezya kuti ciindi Jesu naakali anyika, wakali kwaambaula amyuuya. Lugwalo lwa Maako 1:23, 24 lwaamba kuti “muuya uusofweede” wakaambila Jesu kuti: ‘Ndilikuzyi kabotu kuti nduwe ni.’ Cakutadooneka myuuya ilimuzyi kabotu andinywe. Pele sena nywebo muliizyi kabotu?

Leza katanalenga bantu, wakalenga zyuulu-zyuulu zyabana bamuuya, naa bangelo. (Jobu 38:4-7) Bangelo bajisi buumi busumpukide kwiinda buumi bwabantu. (Bahebulayo 2:6, 7) Balijisi nguzu alimwi mbasongo, alimwi bakalengwa kutegwa kabacita kuyanda kwa Leza. Sintembauzyo wakaimba kuti: “Amulumbe Jehova nobaangelo bakwe, inywe nobasintaze basinguzu nomucita mbwaamba, akuswiilila ijwi lyamajwi aakwe.”—Intembauzyo 103:20.

Bbaibbele litondezya kuti mukuyakwaciindi bangelo bamwi bakatalika kubandika abantu munzila njaatakali kuzumizya Leza. Ino bakajisi makanze nzi? Mungelo wakusaanguna iwakacita boobo wakabacenga aabo bakamuswiilila, ba Adamu a Eva, akubatantamuna kuli Leza Mulengi wabo. Akaambo kakucita boobo, wakaba Saatani Diabolosi, sikubejekezya alimwi sikukazya Leza.—Matalikilo 3:1-6.

Mukuyakwaciindi, bangelo bambi “bakasiya busena bwabo bwakukkala bubeelede” kujulu akulisamika mibili yabuntu akutalika kukkala abamakaintu baboneka kabotu aano anyika. (Juda 6; Matalikilo 6:1, 2) Bangelo aaba bazangi alimwi abana babo ibakajisi bube bwamadaimona, bakali kuyoosya bantu cakunga nyika yoonse “yakazula luuni.” Cakutadooneka, mulaazyi kabotu-kabotu makani aamu Bbaibbele aamba kujatikizya Jehova mbwaakanyonyoona izyalani lyabasizibi alimwi basilunya kwiinda mukuleta Zambangulwe lyamuciindi ca Nowa.—Matalikilo 6:3, 4, 11-13.

Meenda aazambangulwe akapa kuti myuuya eeyi isiye mibili yabuntu akusama mibili yamuuya akupiluka kubusena bwamyuuya. Nokuba boobo, Mulengi kunyina naakabazumizya kuti bapiluke mubusena bwabo “bwakukkala.” Muciindi caboobo, bakaangwa akubikkwa mubusena busampukide bweezyanisyigwa “[k]umalindi aamudima uusiya mbi.” (2 Petulo 2:4, 5) Bbaibbele lyaamba bangelo aaba bazangi kuti “madaimona.” (Jakobo 2:19) Mbabeendelezya micito yamizimo.

Ncaayanda Madaimona

Makanze aakusaanguna aamyuuya mibi eeyi iibandika abantu nkubalesya kukomba Jehova, Leza wakasimpe. Zipego naa nguzu eezyo nzyobaamba-amba aabo bacita zyamizimo ncivwumbyo buyo kutegwa aabo bayanda batajani luzyibo lwini-lwini lwa Leza alimwi akuti batabi acilongwe anguwe.

Makanze aabili aamadaimona alakonzya kubonwa kwiinda musunko lya Saatani kuli Jesu. Saatani wakaambila Jesu kuti wakali kukonzya kumupa “mami oonse aamunyika abulemu bwangawo.” Ino ncinzi Saatani ncaakali kuyanda? Wakamwaambila kuti: “Fwugama akundikomba.” Inzya, Saatani alimwi amadaimona bayanda kukombwa. Jesu wakaukaka muzeezo wakusulaika Leza abukombi bwakasimpe.—Matayo 4:8-10.

Mazuba aano, myuuya mibi taivwuli kusunka mbuli mboyakasunka Jesu. Muciindi caboobo, ilasola kucenga bantu batakwe luzyibo kwiinda mukubayunga kuzibelesya munzila iitaluzi  zyintu zili mbuli bulungu, masamba, zinkuli, nkakata, alimwi azimbonimboni. Tamweelede kweenwa amicito iili boobu. Micito eeyi taili nzila yacilengwa leza yakwaambaula amyuuya. Myuuya mibi ibelesya micito iijatikizya mizimo iibakkomanisya bantu alimwi akuboongelezya kaijisi makanze aakuti bacileke kukomba Jehova. Kuti yaalilwa kuzuzikizya makanze aaya kwiinda mukubelesya nzila eezyi, myuuya mibi kanji-kanji ilabapenzya aabo bajatikizyidwe mumicito yamizimo. Ikuti eeci cilamucitikila, ncinzi ncomukonzya kucita kutegwa mwaangununwe mukweendelezyegwa aamyuuya mibi?

Mbotukonzya Kutantamuka Mizimo

Myuuya mibi iibandika abantu mbaasinkondonyina a Leza alimwi ilindila kunyonyoonwa. (Juda 6) Mbaasilweeno alimwi mbabeji balicengeezya kuti mbantu bakafwa. Ino inga mwalimvwa buti kuti mwazyiba kuti muntu ngomuyanda kupanga limwi cilongwe ngusilweeno, walo uuyanda buyo kumukasya kucita zyintu nzyomuyanda? Ncinzi ncomukonzya kucita kuti cakutazyiba mwatalika cilongwe aa Intaneti amuntu uutundulula bamakaintu? Kujatikizyigwa mumicito yamadaimona nkubi kapati kwiinda waawo. Mweelede kucita kufwumbwa ncomukonzya kutegwa mwiitantamuke. Ncinzi ncomukonzya kucita?

Nibakamana kwiiya Magwalo ncaamba kujatikizya mizimo, bamwi ibakali kukkala mu Efeso yansiku bakabona kuti bakeelede kunyonyoona mabbuku aabo aamasalamuzi nokuba kuti akali kudula kapati. ‘Bakaaumpa bantu boonse kabalangilila.’ (Milimo 19:19, 20) Mazuba aano zyintu zijatikizya mizimo tazili buyo mabbuku, zitumwa, nsengo naa zyintu zimwi zikozyenye azyeezyi, pele alimwi zilabikkilizya ama DVD, zisobano zyaakkompyuta naa zyintu zimwi zijanika a Intaneti. Amuzitantamuke zyintu zyoonse zijatikizyidwe amizimo.

Amuyeeye banabukwetene baambidwe kumatalikilo aacibalo eeci. Makkaadi aabo aaitwa kuti tarot akabacenjezya kuti kwakali kuyooboola bamakaintu babi kuŋanda yabo alimwi akuti tiibakeelede kubaswiilila naa kutambula cintu cili coonse kuzwa kulimbabo. Ciindi Bakamboni ba Jehova, ba Connie aba Gudrun nibakasika aŋanda yaba Joachim aba Barbara akubaambila kuti babaletela makani mabotu kujatikizya Leza, bakasala kuti baswiilile. Mubandi ngobakajisi wakasika kumakani aajatikizya mizimo, alimwi ba Connie aba Gudrun bakabaambila makani aaluzi kujatikizya mizimo aazwa mu Magwalo. Mubandi wamu Bbaibbele uusitikide wakatalisyigwa.

Tiilyakalampa, ba Joachim aba Barbara bakasala kuleka kucita zyintu zili zyoonse zijatikizya mizimo. Bakamboni bakapandulula kuti myuuya mibi taikacikkomanini eeco pe. Masimpe ngakuti, ba Joachim aba Barbara bakapenga kapati alimwi madaimona akali kubalwana. Kwaciindi cilimbocibede, bakali kuyoowa lyoonse masiku kusikila nibakalongela muŋanda iimbi. Nibakali mumapenzi, banabukwetene aaba bakazumanana kwaasyoma majwi aajanika mulugwalo lwa Bafilipi 4:13 aakuti: “Muzyintu zyoonse ndilijisi nguzu kwiinda muli yooyo uundipa nguzu.” Jehova wakabalongezya alimwi mukuyakwaciindi myuuya mibi yakaleka kubapenzya. Mazuba aano ba Joachim aba Barbara balikkomene kuba bakombi ba Jehova, Leza wakasimpe.

Magwalo akulwaizya boonse bayanda kulongezyegwa a Jehova kuti: “Amulibombye kuli Leza; pele amumukazye Diabolosi eelyo uyoomutija. Amuswene kuli Leza, eelyo awalo uyooswena kulindinywe.” (Jakobo 4:7, 8) Jehova Leza ulakonzya alimwi uyoomugwasya kutegwa mwaanguluke kukuyungwa amadaimona kuti kamuyanda. Bayeeya mbobakaanguluka kumizimo, ba Joachim aba Barbara camoyo woonse balaazumina majwi aajanika mulugwalo lwa Intembauzyo 121:2 aakuti: “Lugwasyo lwangu lulazwa kuli-Jehova.”

[Bupanduluzi buyungizidwe]

[Majwi aakwelelezya sikubala aali apeeji 11]

Micito iijatikizya mizimo ipa kuti bantu kabatabi acilongwe cibotu a Leza

[Majwi aakwelelezya sikubala aali apeeji 12]

“Amuswene kuli Leza, eelyo awalo uyooswena kulindinywe.”—JAKOBO 4:8