Amube Acilongwe A Leza

“Mebo nde-Jehova Njookujata Kujanza Lyalulyo”

“CIINDI nibakali kuyanda kukosola mugwagwa usyi wakaambila mwanaakwe musankwa kuti “Jata janza lyangu.” Akaambo kakuti bausyi bakamujatilila kukwaanza, mwana wakalimvwa kukwabililwa kakunyina kuyoowa. Sena kuli nimwakalombozyede kuti kubota umwi wamujatilila kukwaanza akumukwabilila mumakatazyo aabuumi? Ikuti kacili boobo, mulakonzya kuumbulizyigwa amajwi aakalembwa a Isaya.—Amubale Isaya 41:10, 13.

Isaya wakali kwaambila bana Israyeli majwi aaya. Nokuba kuti Leza wakali kubona bantu aaba kuti ‘balayandika mumeso aakwe,’ bakazingulukidwe aabasinkondo. (Kulonga 19:5) Sena bana Israyeli bakayoowa? Jehova wakabelesya Isaya kubaambila mulumbe uukulwaizya. Twanoolanga-langa majwi aayo, katuyeeya kuti alabeleka akubakombi ba Leza bamazuba aano.—Baloma 15:4.

Jehova ukulwaizya kuti, “Utayoowi.” (Kapango 10) Aaya taali majwi buyo. Jehova wakapandulula kaambo bantu bakwe ncobatakeelede kuyoowa naakati: “Nkaambo ndili ayebo.” Tali mugwasyi uuli kule, alimwi ulasyomezya kuti ulakonzya kugwasya kufwumbwa ciindi nokuyandika lugwasyo. Uyanda kuti bantu bakwe bazyibe kuti ulaambabo alimwi ulilibambilide kubagwasya lyoonse. Sena aaka takali kaambo kaumbulizya?

Alimwi Jehova usyomezya bakombi bakwe kuti: “Utakankami.” (Kapango 10) Ibbala lyamu Chihebrayo libelesyedwe aawa lilakonzya kwaamba baabo “balanga-langa mumbazu zyoonse kutegwa babone naa kuli cintu cikonzya kubanyonganya.” Jehova ulapandulula kaambo bantu bakwe ncobateelede kuyoowa nati: “Nkaambo ndime Leza wako.” Kunyina cakali kukonzya kubakulwaizya kwiinda ceeci. Jehova “Mupatikampatila,” alimwi ngu “Singuzuzyoonse.” (Intembauzyo 91:1) Tiibakeelede kuyoowa nkaambo bakali aa Jehova Leza wabo singuzuzyoonse.

Aboobo, ncinzi bakombi ba Jehova ncobakonzya kulangila kulinguwe? Usyomezya kuti: “Ncobeni njookutabilila ajanza lyalulyo lyabululami bwangu.” (Kapango 10) Alimwi waamba kuti: “Mebo nde-Jehova njookujata kujanza lyalulyo.” (Kapango 13) Ino ncinzi ncomuyeeya ciindi nomumvwa majwi aaya? Ibbuku limwi lyakapandulula kuti: “Kutulangila antoomwe tupango ootu tobilo tupa cikozyanyo cibotu camuzyali amwana. [Usyi] taimvwi buyo kuti akwabilile, pele alimwi uyaabweendela antoomwe amwana; takonzyi kuzumina kuti baandaane amwana.” Amuyeeye buyo—Jehova talangilwi kuzumina kuti aandaane abantu bakwe neliba leelyo nibali mubukkale bukkatazya kapati.—Bahebulayo 13:5, 6.

Mazuba aano, bakombi ba Jehova balakonzya kuumbulizyigwa kapati mumajwi ngaakalemba Isaya. Mumazuba aano ‘aakatazya,’ zimwi ziindi tulakonzya kutyompwa kapati akaambo kamapenzi aamubuumi. (2 Timoteyo 3:1) Pele tatweelede kulwana buyumuyumu buli boobu tolikke. Jehova ulilibambilide kutugwasya. Mbubwenya mbuli bana mbobasyoma, tulakonzya kujata kujanza lyakwe lyanguzu katusyomede kuti ulatusololela munzila iili kabotu alimwi akutugwasya ciindi notuyandika lugwasyo.—Intembauzyo 63:7, 8.