Muunzila nzi Mbomukonzya Kusala Kuyooba Abuumi Buli Kabotu Kumbele?

INO inga mwaba buti abuumi buli kabotu? Nzila imwi njakulanga-langa zyintu zikonzya kuboola kumbele akaambo kakusala nkomucita lino.

Masimpe ngakuti cilakonzya kumukatazya kusala zyintu zikonzya kumugwasya mubuumi bwanu boonse. Nkaambo nzi? Nkaambo kakuti bantu banji mazuba aano baziyanda mpoonya-mpoonya zyintu zibakkomanisya. Mucikozyanyo, ambweni mulakonzya kubona kuti kubelesya lulayo lwamu Bbaibbele cilakonzya kumugwasya kumvwana kapati mumukwasyi. (Baefeso 5:22–6:4) Kutegwa mucite oobo, tamweelede kubelesya ciindi canu coonse kumulimo, kukulyookezya, alimwi akuzyakulikondelezya, pele mweelede kuba aciindi lyoonse cakuba antoomwe amukwasyi wanu. Ziindi zinji mubuumi, mweelede kusala akati kakulikondelezya kwampoonya-mpoonya alimwi ambotukonzya kuzwidilila kumbele. Ino inga mwabujana buti busongo bwakusala kabotu? Amubweze ntaamu eezyi zitobela zyone.

1 Amweezyeezye Zyintu Zikonzya Kuboola Akaambo Kakusala Kwanu

Ciindi nomuyanda kusala, amweezyeezye zyintu zikonzya kumucitikila ncobeni. Ibbaibbele likulwaizya kuti: “Muntu uucenjede, abona mapenzi, ulayuba.” (Tusimpi 22:3) Ikuti mwazilingula ncobeni zyintu zibi zikonzya kumucitikila, ambweni tamukabwezi ntaamu iikonzya kumunjizya mumapenzi. Kulubazu lumwi, ikuti mweezyeezya bubotu bukonzya kuboola akaambo kakusala kabotu, muyooyumizyigwa kuyanda kubweza ntaamu iili kabotu.

Amulibuzye kuti: ‘Ino ncinzi ciyoocitika mumwaka naa myaka iili 10 noyiba iili 20 iiboola kumbele akaambo kakusala kwangu? Ino kusala kwangu kuyoobujatikizya buti buumi bwangu? Ino kusala kwangu kuyoobajatikizya buti bamukwasyi wangu abantu bamwi mbondiyanda?’ Ikapati, amulibuzye kuti: ‘Sena kusala kwangu kuyoomukkomanisya Leza? Ino kuyoocijatikizya buti cilongwe cangu anguwe?’ Mbwaanga Bbaibbele lyakasololelwa a Leza, lilakonzya kumugwasya kuzyiba zimukkomanisya alimwi akumucenjezya ntenda nzyomwatabwene.—Tusimpi 14:12; 2 Timoteyo 3:16.

2 Amulisalile Nobeni

Muciindi cakulisalila nzyobayanda, bantu banji basala kucita nzyobacita bantu babazingulukide. Pele bukkale bumwi tabukonzyi kusololela kubuumi buli kabotu akaambo buyo kakuti bulizyibidwe kapati. Amulisalile nobeni. Mucikozyanyo, amubone cakacitikila ba Natalie. * Bakaamba kuti: “Ndakali kuyanda cikwati cibotu. Pele ndakabona kuti tiindakali kukonzya kucijana akaambo kabukkale bwangu. Kukkolegi beenzuma boonse bakali bakubusi basongo kapati. Nokuba boobo, kusala nkobakali kucita mubuumi bwabo lyoonse tiikwakali kabotu. Bakali kucinca-cinca basankwa abasimbi ziindi zinji. Mbubwenya mbuli mbabo, andime ndakajisi basankwa banji. Bukkale oobu bwakandiletela mapenzi manji.”

Ba Natalie bakatalika kwiiya Bbaibbele a Bakamboni ba Jehova. Bakaamba kuti: “Akati ka Bakamboni ndakabona bakubusi bakkomene alimwi abanabukwetene bakkomene. Aasyoonto-syoonto ndakacinca bukkale bwangu nokuba kuti tiicakali cuuba.” Ino ncinzi cakatobela? Ba Natalie bakaamba kuti: “Lyoonse ndakali kuyanda kukwatwa kumuntu ngondakali kuyanda kapati. Mukuyakwaciindi, ndakakwatwa kumuntu ngotukomba limwi.  Ndilimvwa kuti Jehova wandipa mukwasyi uuli kabotu kwiinda ngondakali kuyeeyela.”

3 Amulange-lange Nzyomusala Lino Mboziyoomujatikizya Kumbele

Kutegwa mutayeeyi buyo zyintu zikonzya kumucitikila mpoonya-mpoonya, mweelede kuzyiba buumi bwanu mbomuyanda kuti bukabe alimwi ambomukonzya kuyoobujana. (Tusimpi 21:5) Mutayeeyi buyo zikonzya kucitika mumyaka iili 70 naa iili 80 njakonzya kupona muntu. Muciindi caboobo, amweezyeezye kuti mulikkomene mubuumi butamani mbolipandulula Bbaibbele.

Bbaibbele lyaamba kuti kwiinda mucipaizyo cacinunuzyo ca Kristo Jesu, Leza wabikka bubambe bwakuti bantu bakabe abuumi butamani. (Matayo 20:28; Baloma 6:23) Leza usyomezya kuti lino-lino makanze aakwe aakusaanguna kujatikizya bantu alimwi anyika aayoozuzikizyigwa. Aabo bamuyanda Leza bayooba acoolwe cakupona kukabe kutamani munyika mbotu iyoobambululwa. (Intembauzyo 37:11; Ciyubunuzyo 21:3-5) Buumi oobu bwakumbele bulakonzya kuba bwanu ikuti kamuyeeya zili kumbele.

4 Amubeleke Kutegwa Muzuzikizye Mbaakani Zyanu

Ino ncinzi ncomweelede kucita kutegwa mukabe munyika eeyo yakasyomezyegwa? Mweelede kusaanguna kuba aluzyibo lwa Leza. (Johane 17:3) Kuba aluzyibo lwini-lwini lwamu Bbaibbele kuyooyumya lusyomo lwanu muzisyomezyo zya Leza zyakumbele. Lusyomo luli boobo luyoopa kuti mucince mpomuyandika kutegwa mukkomaninwe a Leza.

Amubone cikozyanyo caba Michael. Bakaamba kuti: “Ndakatalika kunywa bukoko cakuciindizya alimwi akubelesya misamu iikola nindakajisi myaka iili 12 yakuzyalwa. Ndakali kuyanzana akabunga kabantu batamvwi alimwi ndakali kulangila kuti ndilafwa kanditanakkwanya myaka iili 30 yakuzyalwa. Kunyema alimwi akutyompwa zyakali kundipa kuyanda kulijaya. Ndakali kulangila zyintu zinji mubuumi, pele kunyina nindakazijana.” Ba Michael nibakacili kucikolo, mweenzinyina ngobakali kusunda limwi wakatalika kwiiya Bbaibbele a Bakamboni ba Jehova. Ba Michael abalo bakazumina kucita oobo.

Nzyobakaiya ba Michael mu Bbaibbele zyakabapa kuti bacince mbobakali kububona buumi bwakumbele. “Ndakaiya kuti kumbele nyika iyoocinca kuba paradaiso akuti bantu bayoopona muluumuno, kakunyina kulibilika. Oobu mbundakatalika kububona buumi bwangu bwakumbele. Kuyumya cilongwe cangu a Jehova yakaba nembaakani yangu. Pele talili lyoonse nindakali kukonzya kumukkomanisya Jehova. Noliba leelyo nindakatalika kwiiya Bbaibbele, ndakali kukolwa zimwi ziindi. Alimwi ndakoona amusimbi ciindi comwe.”

Ino ba Michael bakacikonzya buti kucinca bukkale bwabo? Bakaamba kuti: “Ibakali kundiyiisya Bbaibbele bakandikulwaizya kubala Bbaibbele buzuba abuzuba alimwi akuyanzana abantu bakali kuyanda kukkomanisya Leza. Ndakabona kuti beenzuma mbondakali kusobana limwi bakacili kundiyunga. Nokuba kuti bakali mbuli mukwasyi wangu, ndakacileka kuyanzana ambabo.”

Ba Michael bakalibikkila mbaakani zyaciindi cifwaafwi izyakabagwasya kuzuzikizya mbaakani yabo mpati yakweendelanya buumi bwabo azyeelelo zya Leza. Andinywe mulakonzya kucita mbubwenya oobo. Amulembe mbaakani yanu yaciindi cilamfwu alimwi antaamu nzyomweelede kubweza zikonzya kumugwasya kwiizuzikizya. Amubaambile mbaakani zyanu aabo bakonzya kumugwasya, alimwi amubalombe kuti bamugwasye kubona mbomuyaambele.

Mutasumpyi kwiiya kujatikizya Leza akutobela busolozi bwakwe mubuumi bwanu. Amubweze ntaamu lino zyakuyumya cilongwe canu a Leza alimwi akuyanda Jwi lyakwe, Ibbaibbele. Ikwaamba muntu uubelesya njiisyo zyamu Bbaibbele, Ijwi lya Leza lyaamba kuti: “Zyoonse nzyacita ziyooba acoolwe.”—Intembauzyo 1:1-3.

[Bupanduluzi buyungizidwe]